ਸੌਦਾ ਸਾਧ ਨੂੰ ਸਲਾਖਾਂ ਪਿੱਛੇ ਭੇਜਣਾ ਜਰੂਰੀ : ਪੰਚ ਪ੍ਰਧਾਨੀ

ਤਰੀਕ: 25 ਜੁਲਾਈ, 2009- ਅਕਾਲੀ ਦਲ ਪੰਚ ਪ੍ਰਧਾਨੀ ਦੇ ਚੇਅਰਮੈਨ ਭਾਈ ਦਲਜੀਤ ਸਿੰਘ ਬਿੱਟੂ ਨੇ ਜਾਰੀ ਇਕ ਪ੍ਰੈਸ ਬਿਆਨ ਵਿਚ ਕਿਹਾ ਹੈ ਕਿ ਸੌਦਾ ਸਾਧ ਨੂੰ ਦਿੱਤੀ ਸੁਰੱਖਿਆ ਵਾਪਸ ਲੈ ਕੇ ਤੁਰੰਤ ਜੇਲ੍ਹ ਦੀਆਂ ਸਲਾਖਾਂ ਪਿੱਛੇ ਸੁੱਟ ਦੇਣਾ ਚਾਹੀਦਾ ਹੈ ਕਿਉਂਕਿ ਜਿੱਥੇ ਇਸ ਅਪਰਾਧੀ ਕਾਰਨ ਪੰਜਾਬ, ਹਰਿਆਣਾ ਤੇ ਰਾਜਸਥਾਨ ਦੀ ਸ਼ਾਂਤੀ ਵਿਵਸਥਾ ਨੂੰ ਖਤਰਾ ਪੈਦਾ ਹੋਇਆ ਹੈ ਉੱਥੇ ਇਸ ਖਿਲਾਫ ਬਲਾਤਕਾਰ ਤੇ ਕਤਲ ਦੇ ਕੇਸ ਚੱਲ ਰਹੇ ਹਨ ਅਤੇ ਹੁਣ ਪੰਜਾਬ ਤੇ ਹਰਿਆਣਾ ਹਾਈ ਕੋਰਟ ਨੇ ਹਰਿਆਣਾ ਪੁਲਿਸ ਦੀ ਜਾਂਚ ਤੋਂ ਅਸੰਤੁਸ਼ਟ ਹੋ ਕੇ ਡੇਰੇ ਦੇ ਸਾਬਕਾ ਮੈਨੇਜਰ ਫਕੀਰ ਚੰਦ ਦੇ ਕਤਲ ਦੀ ਜਾਂਚ ਵੀ ਸੀ.ਬੀ.ਆਈ ਨੂੰ ਸੌਂਪ ਦਿੱਤੀ ਗਈ ਹੈ। ਚਲਦੇ ਕੇਸਾਂ ਵਿਚ ਨਿਰਪੱਖ ਗਵਾਹੀਆਂ ਅਤੇ ਹੋਰ ਕੇਸਾਂ ਦੀ ਨਿਰਪੱਖ ਜਾਂਚ ਲਈ ਸੌਦਾ ਸਾਧ ਦੀਆਂ ਜਮਾਨਤਾਂ ਰੱਦ ਕਰਕੇ ਉਸਨੂੰ ਜੇਲ੍ਹ ਵਿਚ ਸੁੱਟਣਾ ਕਾਨੂੰਨ ਤੇ ਪੀੜਤਾਂ ਨੂੰ ਇੰਨਸਾਫ ਦੇਣ ਵੱਲ ਸੁਹਿਰਦਤਾ ਵਾਲਾ ਕਦਮ ਕਿਹਾ ਜਾ ਸਕਦਾ ਹੈ।

ਸਿਡਨੀ ਵਿਚ ਗਿਆਨੀ ਸੰਤੋਖ ਸਿੰਘ ਜੀ ਦਾ ਸਨਮਾਨ

ਸ. ਮੋਤਾ ਸਿੰਘ, ਸ. ਹਰਜਿੰਦਰ ਸਿੰਘ ਸੰਧੂ, ਬਲਰਾਜ ਸਿੰਘ ਸੰਘਾ, ਜਨਾਬ ਇਜਾਜ਼ ਖਾਨ ਗਿਆਨੀ ਜੀ ਨੂੰ ਸਨਮਾਨਤ ਕਰਦੇ ਹੋਏ।

ਪੰਜਾਬੀ ਕੌਂਸਲ ਆਫ਼ ਆਸਟ੍ਰੇਲੀਆ ਨੇ ਬੀਤੀ ਤਿੰਨ ਜੁਲਾਈ ਨੂੰ ਸਿਡਨੀ ਦੇ ਪ੍ਰਸਿੱਧ ਪੈਰਾਵਿਲਾ ਹਾਲ ਵਿੱਚ ਇੱਕ ਸਾਹਿਤਕ ਸ਼ਾਮ ਸ਼ਾਨਦਾਰ ਢੰਗ ਨਾਲ ਮਨਾਈ ਜਿਸ ਵਿੱਚ ਸਿਡਨੀ ਨਿਵਾਸੀ ਪ੍ਰਸਿੱਧ ਲੇਖਕ, ਗਿਆਨੀ ਸੰਤੋਖ ਸਿੰਘ ਜੀ ਨੂੰ ਪੰਜਾਬੀ ਸੱਥ (ਲਾਂਬੜਾ) ਵਲੋਂ ਸ਼ੁੱਧ ਸੋਨੇ ਦੇ ਮੈਡਲ ਨਾਲ ਸਨਮਾਨਿਆ ਗਿਆ।
ਪ੍ਰੋਗਰਾਮ ਦਾ ਆਰੰਭ, ਪੰਜਾਬੀ ਕੌਂਸਲ ਆਫ਼ ਆਸਟ੍ਰੇਲੀਆ ਦੇ ਕੋਆਰਡੀਨੇਟਰ, ਡਾ. ਮਨਿੰਦਰ ਸਿੰਘ ਵਲੋਂ ਸਾਰਿਆਂ ਨੂੰ ‘ਜੀ ਆਇਆਂ’ ਕਹਿਣ ਨਾਲ ਹੋਇਆ। ਸਟੇਜ ਸੈਕਟਰੀ ਦੀ ਭੂਮਿਕਾ ਕੌਂਸਲ ਦੇ ਪ੍ਰਧਾਨ, ਡਾ. ਪ੍ਰਭਜੋਤ ਸਿੰਘ ਸੰਧੂ ਨੇ ਨਿਭਾਉਂਦਿਆਂ, ਦੂਰੋਂ ਆਏ ਮਹਿਮਾਨਾਂ ਦੇ ਜੀਵਨ ਤੇ ਪੰਛੀ ਝਾਤ ਪੁਆਈ ਜਿਨ੍ਹਾਂ ਵਿੱਚ ਸਰਦਾਰ ਮੋਤਾ ਸਿੰਘ ਸਰਾਏ, ਉਹਨਾਂ ਨਾਲ ਇੰਗਲੈਂਡ ਤੋਂ ਆਏ ਹੋਏ ਪੰਜਾਬੀ ਕਵੀ, ਸ. ਹਰਜਿੰਦਰ ਸਿੰਘ ਸੰਧੂ ਅਤੇ ਅμਮ੍ਰਿਤਸਰ ਤੋਂ ਆਏ ਮਿਊਜ਼ਕ ਡਾਇਰੈਕਟਰ, ਸ. ਗੁਰਮੀਤ ਸਿੰਘ ਵੀ ਸ਼ਾਮਲ ਸਨ।
ਗਿਆਨੀ ਜੀ ਨੂੰ ਗੋਲਡ ਮੈਡਲ, ਸਿਰੋਪਾ, ਲੋਈ ਅਤੇ ਸਾਈਟੇਸ਼ਨ ਨਾਲ਼, ਸੱਥ ਵੱਲੋਂ ਸ. ਮੋਤਾ ਸਿੰਘ ਸਰਾਇ ਅਤੇ ਬਾਕੀ ਹਾਜਰ ਸੱਜਣਾਂ ਨੇ ਸਮੁਚੇ ਤੌਰ ਤੇ ਸਨਮਾਨਤ ਕੀਤਾ। ਇਸਦੇ ਨਾਲ਼ ਹੀ ਸੱਥ ਵੱਲੋਂ ਗਿਆਨੀ ਜੀ ਨੂੰ ਸੱਥ ਦੀ ਆਸਟ੍ਰੇਲੀਅਨ ਇਕਾਈ ਦੇ ਸਰਪ੍ਰਸਤ ਥਾਪ ਕੇ, ਅਗੋਂ ਸੱਥ ਦੀ ਸੰਸਥਾ ਕਾਇਮ ਕਰਨ ਲਈ ਇਹਨਾਂ ਨੂੰ ਜ਼ਿਮੇਵਾਰੀ ਦਿਤੀ। ਇਸ ਬਰਾਂਚ ਵਿਚ ਆਸਟ੍ਰੇਲੀਆ ਤੋਂ ਇਲਾਵਾ, ਨਿਊ ਜ਼ੀਲੈਂਡ, ਫ਼ਿਜੀ ਅਤੇ ਪ੍ਰਸ਼ਾਂਤ ਮਹਾਂਸਾਗਰ ਦੇ ਬਾਕੀ ਦੇ ਦੇਸ਼ ਵੀ ਸਾਮਲ ਹੋਣਗੇ।
ਇਸ ਮੌਕੇ ’ਤੇ ਬੋਲਦੇ ਹੋਏ ਪੰਜਾਬੀ ਸੱਥ (ਯੂਰਪੀਅਨ) ਦੇ ਸੰਚਾਲਕ, ਸਰਦਾਰ ਮੋਤਾ ਸਿੰਘ ਸਰਾਏ, ਨੇ ਦੱਸਿਆ, “ਗਿਆਨੀ ਸੰਤੋਖ ਸਿੰਘ ਹੋਰਾਂ ਵਲੋਂ ਪੰਜਾਬੀ ਸਾਹਿਤ ਦੀ ਕੀਤੀ ਜਾ ਰਹੀ ਸੇਵਾ ਕਾਰਨ, ਪੰਜਾਬੀ ਸੱਥ (ਲਾਂਬੜਾ) ਨੇ 2008 ਵਿੱਚ ਪ੍ਰੋ. ਪੂਰਨ ਸਿੰਘ ਐਵਾਰਡ ਗਿਆਨੀ ਜੀ ਹੋਰਾਂ ਨੂੰ ਦੇਣ ਦਾ ਫੈਸਲਾ ਕੀਤਾ ਸੀ ਪਰ ਸੱਥ ਚਾਹੁੰਦੀ ਸੀ ਕਿ ਇਹ ਸਨਮਾਨ ਗਿਆਨੀ ਜੀ ਹੋਰਾਂ ਦੀ ਆਪਣੀ ਕਰਮ ਭੂਮੀ, ਆਸਟ੍ਰੇਲੀਆ ਵਿੱਚ ਹੀ ਜਾ ਕੇ ਦਿਤਾ ਜਾਵੇ। ਇਸ ਕਰਕੇ ਪੰਜਾਬੀ ਸੱਥ ਵਾਲਿਆਂ ਨੇ ਇਹ ਜਿੰਮੇਵਾਰੀ ਮੈਨੂੰ ਅਤੇ ਮੇਰੇ ਸਾਥੀ ਸ. ਹਰਜਿੰਦਰ ਸਿੰਘ ਸੰਧੂ ਨੂੰ, ਸੌਂਪੀ ਸੀ ਤੇ ਅੱਜ ਮੈ ਉਹ ਜਿੰਮੇਵਾਰੀ ਨਿਭਾਉਣ ਲਈ ਏਥੇ ਆਇਆ ਹਾਂ।”
ਸ. ਮੋਤਾ ਸਿੰਘ ਨੇ ਹੋਰ ਅੱਗੇ ਗਿਆਨੀ ਜੀ ਦੀ ਲੇਖਣੀ ਬਾਰੇ ਚਾਨਣਾ ਪਾਉਂਦਿਆਂ ਹੋਇਆਂ ਦੱਸਿਆ ਕਿ ਉਹਨਾਂ ਦੀ ਕਲਮੀ ਸਾਂਝ, ਇਹਨਾਂ ਨਾਲ਼ ਕੁਝ ਸਾਲਾਂ ਤੋਂ ਸੰਸਾਰ ਭਰ ਵਿਚ ਛਪ ਰਹੇ ਪੰਜਾਬੀ ਪੱਤਰਾਂ ਵਿਚਲੇ, ਇਹਨਾਂ ਦੇ ਲੇਖਾਂ ਰਾਹੀਂ ਬਣੀ। ਇਹਨਾਂ ਦੇ ਲਿਖੇ ਲੇਖ ਪੜ੍ਹ ਕੇ ਸੱਥ ਵਾਲ਼ਿਆਂ ਨੂੰ ਪਤਾ ਲੱਗਾ ਕਿ ਚਾਰ ਦਹਾਕਿਆਂ ਦੇ ਕਰੀਬ, ਪੰਜਾਬੋਂ ਬਾਹਰ ਫਿਰਨ ਵਾਲਾ ਇਕ ਫ਼ਕੀਰ ਬਿਰਤੀ ਦਾ ਵਿਦਵਾਨ ਸੱਜਣ, ਪੰਜਾਬੀ ਮਾਂ ਬੋਲੀ ਦੀ ਕਲਮ ਤੇ ਭਾਸ਼ਨਾਂ ਰਾਹੀਂ ਸੇਵਾ ਕਰ ਰਿਹਾ ਹੈ। ਅਜਿਹੇ ਸਿਰੜੀ ਪੰਜਾਬੀ ਦੀ ਹੌਸਲਾ ਅਫ਼ਜ਼ਾਈ ਕਰਨੀ ਚਾਹੀਦੀ ਹੈ। ਭਾਵੇਂ ਕਿ ਇਹ ਅਜਿਹੇ ਕਿਸੇ ਮਾਣ ਸਨਮਾਨ ਦੀ ਆਸ ਤੇ ਨਹੀ ਇਹ ਕਾਰਜ ਕਰ ਰਹੇ ਪਰ ਸੱਥ ਦਾ ਇਹ ਫ਼ਰਜ਼ ਬਣਦਾ ਹੈ ਕਿ ਇਹਨਾਂ ਦੀ ਸੇਵਾ ਨੂੰ ਮਾਨਤਾ ਦਿਤੀ ਜਾਵੇ। ਗਿਆਨੀ ਜੀ ਦੀ ਲਿਖਤ ਉਪਰ, “ਜੇਹਾ ਡਿਠਾ ਮੈ ਤੇਹੋ ਕਹਿਆ॥” ਅਨੁਸਾਰ ਚਸ਼ਮਦੀਦ ਗਵਾਹੀ ਵਾਲ਼ੀ ਬਾਤ ਢੁਕਦੀ ਹੈ। ਇਹਨਾਂ ਦੀ ਸੋਚ ਅਤੇ ਲਿਖਤ ਉਪਰ ਗੁਰਬਾਣੀ, ਸਿੱਖ ਸਾਹਿਤ ਅਤੇ ਸਿੱਖ ਇਤਿਹਾਸ ਤੋਂ ਪ੍ਰਾਪਤ ਸੰਦੇਸ਼: ਸਰਬ ਸਾਂਝੀਵਾਲਤਾ, ਦਾ ਬਹੁਤ ਹੀ ਜ਼ਿਆਦਾ ਪ੍ਰਭਾਵ ਹੈ। ਗੁਰਮਤਿ ਮਨੁਖਤਾ ਨੂੰ ਸਰਬੱਤ ਦਾ ਭਲਾ ਲੋਚਣ ਤੇ ਸੋਚਣ ਲਈ ਪ੍ਰੇਰਨਾ ਕਰਦੀ ਹੈ। ਸੰਸਾਰ ਵਿਚ ਵੱਸ ਅਤੇ ਵਿਚਰ ਰਹੇ ਪੰਜਾਬੀ ਸਮਾਜ ਵਿਚ ਇਹਨਾਂ ਦੇ ਭਾਸ਼ਨਾਂ ਅਤੇ ਲੇਖਾਂ ਨੂੰ ਉਤਸੁਕਤਾ ਨਾਲ਼ ਉਡੀਕਿਆ ਜਾਂਦਾ ਹੈ। ਸ੍ਰੋਤਿਆਂ, ਪਾਠਕਾਂ ਅਤੇ ਪ੍ਰਸੰਸਕਾਂ ਵਲੋਂ ਜੋਰ ਦੇਣ ਤੇ, ਪਿਛਲੇ ਤਿੰਨ ਕੁ ਸਾਲਾਂ ਤੋਂ ਗਿਆਨੀ ਜੀ ਨੇ ਆਪਣੇ ਲੇਖਾਂ ਨੂੰ, ਕਿਤਾਬੀ ਰੂਪ ਵਿਚ ਵੀ ਪਾਠਕਾਂ ਦੀ ਭੇਟਾ ਕਰਨ ਦਾ ਉਦਮ ਕੀਤਾ ਹੈ। ਇਸ ਸਮੇ ਵਿਚ ਹੀ ਇਹਨਾਂ ਨੇ ਤਿੰਨ ਕਿਤਾਬਾਂ ਪਾਠਕਾਂ ਦੀ ਭੇਟਾ ਕੀਤੀਆਂ ਹਨ। ਧਾਰਮਿਕ ਲੇਖਾਂ ਦੀ ਇਹਨਾਂ ਦੀ ਪਹਿਲੀ ਕਿਤਾਬ ‘ਸਚੇ ਦਾ ਸਚਾ ਢੋਆ’ ਦੇ ਤਾਂ ਤਿੰਨ ਐਡੀਸ਼ਨ ਵੀ ਛਪ ਚੁੱਕੇ ਹਨ। ਦੂਜੀਆਂ ਦੋ ਕਿਤਾਬਾਂ, ਉਜਲ ਕੈਹਾਂ ਚਿਲਕਣਾ ਅਤੇ ਯਾਦਾਂ ਭਰੀ ਚੰਗੇਰ, ਇਹਨਾਂ ਦੇ ਆਪਣੇ ਨਿਜੀ ਤਜੱਰਬੇ ਹਨ, ਜੋ ਕਿ ਨਿਜੀ ਨਾ ਰਹਿ ਕੇ, ਸਾਰੇ ਸਿੱਖ ਸਮਾਜ ਦੇ ਬਣ ਚੁੱਕੇ ਹਨ। ਇਹਨਾਂ ਕਿਤਾਬਾਂ ਵਿਚ, ਸੰਸਾਰ, ਪੰਜਾਬ, ਸਿੱਖ ਅਤੇ ਅਕਾਲੀ ਦਲ ਦਾ, ਪਿਛਲੇ ਤਕਰੀਬਨ ਛੇ ਦਹਾਕਿਆਂ ਦਾ ਅੱਖੀਂ ਵੇਖਿਆ ਇਤਿਹਾਸ ਹੈ। ਇਹਨਾਂ ਦੀ ਲੇਖਣੀ “ਕੁੱਜੇ ਵਿਚ ਸਮੁੰਦਰ” ਸਮਾਨ ਹੈ। ਸਚਾਈ ਬਿਆਨ ਕਰਦਿਆਂ ਵੀ ਇਹ ਕਿਸੇ ਦੇ ਸਨਮਾਨ ਨੂੰ ਠੇਸ ਨਹੀ ਪੁਚਾਉਂਦੇ। ਕੁਝ ਵਿਦਵਾਨਾਂ ਦਾ ਤਾਂ ਇਹ ਵੀ ਵਿਚਾਰ ਹੈ ਕਿ ਗਿਆਨੀ ਜੀ ਦੀਆਂ ਇਹ ਤਿੰਨ ਕਿਤਾਬਾਂ ਪੜ੍ਹ ਕੇ, ਕੋਈ ਵਿਦਵਾਨ ਪੰਜਾਬ ਅਤੇ ਅਕਾਲੀ ਸਿਆਸਤ ਉਪਰ ਡਾਕਟ੍ਰੇਟ ਕਰ ਸਕਦਾ ਹੈ। ਉਹਨਾਂ ਨੇ ਅੰਤ ਵਿਚ ਇਹ ਕਿਹਾ ਕਿ ਅਸੀਂ ਗਿਅਨੀ ਜੀ ਨੂੰ ਸਨਮਾਨਤ ਨਹੀ ਕਰ ਰਹੇ ਸਗੋਂ ਇਹਨਾਂ ਨੇ ਇਹ ਸਨਮਾਨ ਸਵੀਕਾਰ ਕਰਕੇ ਸੱਥ ਦਾ ਸਨਮਾਨ ਕੀਤਾ ਹੈ। ਗਿਆਨੀ ਜੀ ਨੇ ਆਪਣੇ ਸੰਖੇਪ ਭਾਸ਼ਨ ਵਿਚ ਪੰਜਾਬੀ ਬੋਲੀ ਦਾ ਇਤਿਹਾਸ ਅਤੇ ਖੇਤਰ ਦਾ ਵਿਦਵਤਾ ਪੂਰਣ ਵਰਨਣ ਕਰਦਿਆਂ ਦੱਸਿਆ ਕਿ ਇਸ ਦਾ ਖੇਤਰ ਦਰਿਆ ਜਮਨਾ ਤੋਂ ਲੈ ਕੇ ਸਿੰਧ ਅਤੇ ਆਰੰਭ, ਸੰਸਾਰ ਦੀ ਸਭ ਤੋਂ ਪੁਰਾਣੀ ਪੁਸਤਕ ‘ਰਿਗ ਵੇਦ’ ਤੋਂ ਹੁੰਦਾ ਹੈ।
ਇਸ ਸਮੇ ਬੋਲਦਿਆਂ ਸਿਡਨੀ ਨਿਵਾਸੀ, ਸ. ਪਰਮਜੀਤ ਸਿੰਘ ਨੇ ਆਪਣੇ ਸੰਖੇਪ ਭਾਸ਼ਨ ਵਿੱਚ ਪੰਜਾਬੀ ਸੱਥ (ਲਾਂਬੜਾ) ਦਾ, ਗਿਆਨੀ ਸੰਤੋਖ ਸਿੰਘ ਦਾ ਸਨਮਾਨ ਕਰਨ ਲਈ ਧੰਨਵਾਦ ਕੀਤਾ ਅਤੇ ਗਿਆਨੀ ਜੀ ਦੀ ਸਾਹਿਤ ਤੇ ਧਾਰਮਿਕ ਵਿਦਿਅਕ ਯੋਗਤਾ ਬਾਰੇ ਚਾਨਣਾ ਪਾਇਆ। ਉਹਨਾਂ ਨੇ ਗਿਆਨੀ ਜੀ ਨਾਲ਼ ਆਪਣੀ ਤਿੰਨ ਦਹਾਕੇ ਪੁਰਾਣੀ ਸਾਂਝ ਦਾ ਜਜ਼ਬਾਤੀ ਜ਼ਿਕਰ ਵੀ ਕੀਤਾ। ਉਹਨਾਂ ਨੇ ਵਿਚਾਰ ਪਰਗਟ ਕੀਤੇ ਕਿ ਗਿਆਨੀ ਜੀ ਦੀ ਯੋਗਤਾ ਅਤੇ ਮਨੁਖਤਾ ਦੀ ਸੇਵਾ ਅਜਿਹੇ ਸਨਮਾਨਾਂ ਤੋਂ ਵੀ ਉਚੇਰੀ ਹੈ ਅਤੇ ਕਿਸੇ ਵੀ ਸੰਸਥਾ ਨੂੰ. ਇਹਨਾਂ ਦਾ ਸਨਮਾਨ ਕਰਦਿਆਂ, ਆਪਣਾ ਸਨਮਾਨ ਹੋਇਆ ਸਮਝਣਾ ਚਾਹੀਦਾ ਹੈ।
ਗਿਆਨੀ ਸੰਤੋਖ ਸਿੰਘ ਜੀ ‘ਸੱਥ’ ਅਤੇ ਹਾਜਰਾਂ ਦਾ ਧੰਨਵਾਦ ਕਰਦੇ ਹੋਏ। ਕੌਂਸਲ ਦੇ ਪ੍ਰਧਾਨ ਡਾ. ਪ੍ਰਭਜੋਤ ਸਿੰਘ ਸੰਧੂ ਹੋਰਾਂ ਨੇ ਦੱਸਿਆ ਕਿ ਆਸਟ੍ਰੇਲੀਆ ਦੇ ਸਿੱਖ ਗਿਆਨੀ ਜੀ ਦੀਆਂ, ਧਾਰਮਿਕ, ਸਮਾਜਕ ਅਤੇ ਸਾਹਿਤਕ ਸੇਵਾਵਾਂ ਤੋਂ ਭਲੀ ਭਾਂਤ ਜਾਣੂ ਹਨ। ਇਹਨਾਂ ਦੀਆਂ ਕੌਮੀ ਸੇਵਾਵਾਂ ਅਤੇ ਵਿਦਵਤਾ ਦਾ ਮਾਣ ਕਰਦਿਆਂ ਹੋਇਆਂ, ਕੁਝ ਸਾਲ ਪਹਿਲਾਂ, ਆਪਣੇ ਪਹਿਲੇ ਸਮਾਗਮ ਸਮੇ, ਪੰਜਾਬੀ ਕੌਂਸਲ ਨੇ ਵੀ ਇਹਨਾਂ ਨੂੰ, ‘ਪੰਜਾਬੀਅਤ ਦਾ ਮਾਣ’ ਭਗਤ ਪੂਰਨ ਸਿੰਘ’ ਐਵਾਰਡ ਦੇ ਕੇ ਸਨਮਾਨਤ ਕੀਤਾ ਸੀ।
ਪੰਜਾਬੀ ਕੌਂਸਲ ਦੇ ਬੋਰਡ ਮੈਬਰਾਨ ਡਾ. ਮਨਿੰਦਰ ਸਿੰਘ, ਡਾ. ਪ੍ਰਭਜੋਤ ਸਿੰਘ ਸੰਧੂ, ‘ਪੰਜਾਬ ਐਕਸਪ੍ਰੈਸ’ ਦੇ ਮੁਖ ਸੰਪਾਦਕ ਰਾਜਵੰਤ ਸਿੰਘ ਜ਼ੀਰਾ, ਮੁਹਾਲੀ ਵਾਲੇ ਸ. ਕਮਲਜੀਤ ਸਿੰਘ ਵਾਲੀਆ, ਮਨਧੀਰ ਸਿੰਘ ਸੰਧਾ, ਬਲਰਾਜ ਸਿੰਘ ਸੰਘਾ ਆਦਿ ਵਲੋਂ, ਇੰਗਲੈਂਡ ਤੋਂ ਆਏ, ਸ. ਮੋਤਾ ਸਿੰਘ ਸਰਾਏ ਅਤੇ ਸ. ਹਰਜਿੰਦਰ ਸਿੰਘ ਸੰਧੂ ਨੂੰ, ‘ਪੰਜਾਬੀਅਤ ਦਾ ਮਾਣ’ ਸਨਮਾਨ ਨਾਲ ਸਨਮਾਨਤ ਕੀਤਾ ਗਿਆ।
ਇਸ ਸਾਹਿਤਕ ਸ਼ਾਮ ਵਿਚ, ਵਲੈਤੋਂ ਉਚੇਚੇ ਆਏ ਕਵੀ, ਸ. ਹਰਜਿੰਦਰ ਸਿੰਘ ਸੰਧੂ ਜੀ, ਨੇ ਆਪਣੀ ਕਵਿਤਾ “ਤੈਂ ਕੀ ਦਰਦ ਨਾ ਆਇਆ!“ ਸੁਣਾ ਕੇ, ਸ੍ਰੋਤਿਆਂ ਪਾਸੋਂ ਵਾਹ ਵਾਹ ਖੱਟੀ। ਸੰਧੂ ਜੀ ਦੀ ਕਵਿਤਾ ਦਾ ਰੁਖ ਪੰਜਾਬ ਦੀ ਸਿੱਖ ਲੀਡਰਸ਼ਿਪ ਦੀ ‘ਬੇਰੁਖੀ’ ਵੱਲ ਸੇਧਤ ਸੀ। ਇਹ ਕਵਿਤਾ ਉਹਨਾਂ ਦੀ ਕਿਤਾਬ ‘ਅੱਗ ਦੇ ਅੱਥਰੂ’ ਵਿਚ ਪ੍ਰਕਾਸ਼ਤ ਹੈ। ਇਸ ਪ੍ਰੋਗਰਾਮ ਦੌਰਾਨ ਉਚ ਪਾਏ ਦੀ ਗਾਇਕੀ ਅਤੇ ਕਵਿਤਾਵਾਂ ਦਾ ਦੌਰ ਵੀ ਚੱਲਿਆ। ਅੰਮ੍ਰਿਤਸਰ ਤੋਂ ਆਏ ਗੁਰਮੀਤ ਸਿੰਘ ਹੋਰਾਂ:
ਤੂੰ ਬਾਪੂ ਓਦੋਂ ਨਾ ਆਇਆ ਜਦੋਂ ਲੋਕ ਘੂਰਦੇ ਸੀ।
ਸੁਣਾਇਆ। ਪੰਜਾਬੀ ਗਾਇਕ ਕੂਲਜੀਤ ਸੰਧੂ ਨੇ ਉਚ ਪਧਰ ਦੇ ਸਾਹਿਤਕ ਗੀਤ ਪੇਸ਼ ਕਰਕੇ, ਮਾਹੌਲ ਨੂੰ ਵੱਖਰਾ ਰੰਗ ਚਾੜ੍ਹ ਦਿੱਤਾ। (ਸੁਮਿਤ ਟੰਡਨ)

ਮਹਿੰਗਾਈ ਨੇ ਲੋਕਾਂ ਦਾ ਲੱਕ ਤੋੜਿਆ : ਪੰਚ ਪ੍ਰਧਾਨੀ

ਤਰੀਕ: 25 ਜੁਲਾਈ, 2009 - ਮੁਦਰਾ ਸਫੀਤੀ ਦੀ ਦਰ ਵਧਣ ਜਾਂ ਪ੍ਰਤੀ ਵਿਅਕਤੀ ਆਮਦਨ ਵੱਧਣ ਦੇ ਸਰਕਾਰੀ ਅੰਕੜਿਆਂ ਨਾਲ ਆਮ ਵਿਅਕਤੀ ਦਾ ਕੁਝ ਲੈਣਾ-ਦੇਣਾ ਨਹੀ ਹੁੰਦਾ ਕਿਉਂਕਿ ਮਾਰਕਿਟ ਉੱਪਰ ਉੱਠਣ ਦਾ ਫਾਇਦਾ ਉਹਨਾਂ ਨੂੰ ਹੀ ਹੁੰਦਾ ਹੈ ਜਿਹਨਾਂ ਨੇ ਮਾਰਕਿਟ ਵਿਚ ਆਪਣਾ ਧਨ ਲਾਇਆ ਹੁੰਦਾ ਹੈ ਨਾ ਕਿ ਉਹਨਾਂ ਨੂੰ ਜਿਹਨਾਂ ਨੇ ਦਿਨੇ ਮੇਹਨਤ ਕਰਕੇ ਸ਼ਾਮ ਨੂੰ ਰੋਟੀ ਖਾਣੀ ਹੁੰਦੀ ਹੈ। ਮਾਰਕਿਟ ਉੱਪਰ ਜਾਣ ਨਾਲ ਬੇਸ਼ੱਕ ਕਿਸੇ ਦੇ ਲਗਾਏ ਰੁਪਏ ਦੁੱਗਣੇ ਹੋ ਜਾਣ ਪਰ ਇਸ ਨਾਲ ਦਿਹਾੜੀਦਾਰ ਦੀ ਮਜਦੂਰੀ ਨੂੰ ਕੋਈ ਫਰਕ ਨਹੀਂ ਪੈਂਦਾ ਉਹ ਤਾਂ ਏਨਾ ਹੀ ਜਾਣਦਾ ਹੈ ਕਿ ਛੇ ਮਹੀਨੇ ਪਹਿਲਾਂ ਜਿਹੜੀ ਖੰਡ 18 ਰੁਪਏ ਕਿਲੋ ਸੀ ਉਹ ਅੱਜ 28 ਰੁਪਏ ਹੋ ਚੁੱਕੀ ਹੈ ਪਰ ਉਸਦੀ ਦਿਹਾੜੀ 150 ਰੁਪਏ ਉੱਤੇ ਹੀ ਖੜੀ ਹੈ ਤੇ ਦਿਹਾੜੀ ਨਾ ਲੱਗਣ ਦੇ ਦਿਨਾਂ ਵਿਚ ਵੀ ਵਾਧਾ ਹੋ ਚੁੱਕਾ ਹੈ। ਅਕਾਲੀ ਦਲ ਪੰਚ ਪ੍ਰਧਾਨੀ ਦੇ ਕੌਮੀ ਜਥੇਬੰਦਕ ਸਕੱਤਰ ਭਾਈ ਸੁਰਿੰਦਰ ਸਿੰਘ ਕਿਸ਼ਨਪੁਰਾ ਨੇ ਕਿਹਾ ਕਿ ਮਹਿੰਗਾਈ ਨੇ ਆਮ ਲੋਕਾਂ ਦਾ ਲੱਕ ਤੋੜ ਕੇ ਰੱਖ ਦਿੱਤਾ ਹੈ ਪਰ ਸਰਕਾਰਾਂ ਪਤਾ ਨਹੀਂ ਕਿਹੜੇ ਵਿਕਾਸ ਦੀਆਂ ਗੱਲਾਂ ਕਰ ਰਹੀਆਂ ਹਨ।ਅੱਜ ਲੋਕ ਬਿਜਲੀ, ਸਾਫ ਪਾਣੀ ਤੇ ਹਵਾ ਲਈ ਤਰਸ ਰਹੇ ਹਨ ਪਰ ਸਰਕਾਰਾਂ ਵਪਾਰੀਆਂ ਦੀਆਂ ਜੇਬਾਂ ਭਰਨ ਦੀ ਖਾਤਰ ਹੀ ਨੀਤੀਆਂ ਬਣਾ ਰਹੀਆਂ ਹਨ।

ਅਮਰੀਕਾ ਦੀ ਵਿਦੇਸ਼ ਨੀਤੀ ਵਿੱਚ ਹੈਰਾਨੀਜਨਕ ਰੱਦੋ-ਬਦਲ
ਹਿੰਦੋਸਤਾਨ ਪ੍ਰਮਾਣੂ ਤਕਨੀਕ ਤੇ ਮਸਿ਼ਨਰੀ ਦੀ ਚੋਰੀ ਛਿਪੇ ਦੁਰਵਰਤੋਂ ਕਰੇ ਬਿਨਾ ਨਹੀਂ ਰਹਿ ਸਕਦਾ

ਲੇਖਕ : ਸ: ਸਿਮਰਨਜੀਤ ਸਿੰਘ ਮਾਨ, ਪ੍ਰਧਾਨ, ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ)।

ਅਮਰੀਕਾ ਦੀ ਸੈਕਟਰੀ ਆਫ ਸਟੇਟ ਬੀਬੀ ਹਿਲੇਰੀ ਕਲਿੰਟਨ ਵੱਲੋਂ ਆਪਣੇ ਹਿੰਦ ਦੇ ਦੌਰੇ ਦੌਰਾਨ ਹਿੰਦੋਸਤਾਨ ਨਾਲ ਕੀਤੇ ਗਏ ਪ੍ਰਮਾਣੂ ਤਕਨੀਕ ਸਮਝੌਤਾ ਹਿੰਦੋਸਤਾਨ ਵਿੱਚ ਰਹਿਣ ਵਾਲੀਆਂ ਘੱਟ ਗਿਣਤੀਆਂ ਕੌਮਾਂ ਦੇ ਮਨੁੱਖੀ, ਇਖਲਾਕੀ ਹੱਕਾਂ ਨੂੰ ਨਜ਼ਰ ਅੰਦਾਜ਼ ਕਰਕੇ ਇੱਕ ਤਰਫਾ ਮਨੁੱਖਤਾ ਮਾਰੂ ਫੈਸਲਾ ਕੀਤਾ ਗਿਆ ਹੈ। ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਨੂੰ ਇਹ ਸ਼ੰਕਾ ਨਹੀਂ ਬਲਕਿ ਪੱਕਾ ਯਕੀਨ ਹੈ ਕਿ ਅਮਰੀਕਾ ਕੋਲੋ ਲਈ ਜਾ ਰਹੀ ਪ੍ਰਮਾਣੂ ਤਕਨੀਕ, ਮਸਿ਼ਨਰੀ ਨੂੰ ਹਿੰਦ ਨਾ ਤਾਂ ਉੱਥੇ ਲਾਵੇਗਾ ਜਿੱਥੇ ਇਹ ਸਥਾਪਿਤ ਕਰਨੀ ਚਾਹੀਦੀ ਹੈ, ਦੂਸਰਾ ਇਸਦੀ ਚੋਰੀ ਛਿਪੇ ਦੁਰਵਰਤੋਂ ਕਰੇ ਬਿਨਾ ਵੀ ਨਹੀਂ ਰਹਿ ਸਕੇਗਾ।
ਜਿਹੜੇ ਮਕਸਦ ਲਈ ਅਮਰੀਕਾ ਇਸ ਹਿੰਦੂਤਵ ਸਟੇਟ ਨੂੰ ਆਪਣੀ ਤਕਨੀਕ, ਪੁਰਜ਼ੇ ਅਤੇ ਮਸਿ਼ਨਰੀ ਜਾਰੀ ਕਰ ਰਿਹਾ ਹੈ, ਉਸ ਮਕਸਦ ਅਤੇ ਸਮਝੌਤੇ ਤੋਂ ਹੱਟ ਕੇ ਹਿੰਦ ਇਸ ਦੀ ਦੁਰਵਰਤੋਂ ਹਿੰਦੋਸਤਾਨ ਵਿੱਚ ਰਹਿਣ ਵਾਲੀਆਂ ਘੱਟ ਗਿਣਤੀ ਕੌਮਾਂ ਸਿੱਖ, ਮੁਸਲਿਮ ਅਤੇ ਇਸਾਈ ਕੌਮਾਂ ਦੇ ਹੱਕ-ਹਕੂਕਾਂ ਨੂੰ ਕੁਚਲਣ, ਉਹਨਾਂ ਵਿੱਚ ਦਹਿਸ਼ਤ ਪਾਉਣ ਅਤੇ ਉਹਨਾਂ ਨੂੰ ਆਪਣਾ ਗੁਲਾਮ ਬਣਾਉਣ ਦੀ ਮੰਦਭਾਵਨਾ ਅਧੀਨ ਕਰੇਗਾ। ਸਾਨੂੰ ਇਹ ਵੀ ਯਾਦ ਰੱਖਣਾ ਪਵੇਗਾ ਕਿ ਹਿੰਦੋਸਤਾਨ ਦਾ ਬੀਤੇ ਸਮੇਂ ਦਾ ਰਿਕਾਰਡ ਕਿਹੋ ਜਿਹਾ ਹੈ ਜਿਵੇਂ ਕਿ ਹਿੰਦੋਸਤਾਨ ਦੀ ਖੁਫੀਆਂ ਏਜੰਸੀ ਰਾਅ ਦੇ ਕਾਰਕੁੰਨਾਂ ਨੂੰ ਅਮਰੀਕਾ ਨੇ ਮਿਜ਼ਾਇਲ ਤਕਨੀਕ ਦੇ ਭੇਤ ਚੋਰੀ ਕਰਦੇ ਹੋਏ ਗ੍ਰਿਫਤਾਰ ਕੀਤਾ ਗਿਆ ਸੀ ਅਤੇ ਅਮਰੀਕਾ ਵਿੱਚ ਉਹਨਾਂ ਕਾਰਕੁੰਨਾਂ ਨੂੰ ਸਜ਼ਾਵਾਂ ਦਾ ਸਾਹਮਣਾ ਕਰਨਾ ਪਿਆ ਸੀ। ਫਿਰ ਇਸ ਗੱਲ ਤੋਂ ਕਿਸ ਤਰ੍ਹਾ ਇਨਕਾਰ ਕੀਤਾ ਜਾ ਸਕਦਾ ਹੈ ਕਿ ਜਦੋਂ ਇਸ ਹਿੰਦੂਤਵ ਸਟੇਟ ਦੇ ਹੱਥਾਂ ਵਿੱਚ ਅਮਰੀਕਾ ਦੀ ਪ੍ਰਮਾਣੂ ਤਕਨੀਕ ਆ ਗਈ ਤਾਂ ਉਹ ਇਸ ਨੂੰ ਨਹੀਂ ਚੁਰਾਏਗਾ।
ਇਸ ਤੋਂ ਵੀ ਅਗੇਰੇ ਅਮਰੀਕਾ ਦਾ ਜਿਹਨਾਂ ਉਹ ਮੁਲਕਾਂ ਨਾਲ ਇਹ ਪ੍ਰਮਾਣੂ ਸਮਝੌਤਾ ਹੋਇਆ ਹੈ, ਉਹ ਦੋਵੇਂ ਮੁਲਕ ਮੁੱਢ ਤੋਂ ਹੀ ਇਸਲਾਮ ਦੇ ਵਿਰੁੱਧ ਹਨ। ਇਜ਼ਰਾਈਲ ਅਤੇ ਹਿੰਦੋਸਤਾਨ। ਅਮਰੀਕਾ ਬੇਸ਼ੱਕ ਇੱਕ ਨਿਰਪੱਖ ਅਤੇ ਜਮਹੂਰੀਅਤ ਵਾਲਾ ਮੁਲਕ ਹੈ ਪਰ ਉਪਰੋਕਤ ਦੋਵੇਂ ਮੁਲਕਾਂ ਨਾਲ ਡੂੰਘੇ ਫੌਜੀ ਸੰਬੰਧ ਹਨ। ਜਿਸਦਾ ਸਿੱਖ ਕੌਮ ਅਤੇ ਮੁਸਲਿਮ ਕੌਮ ਵੱਲੋਂ ਤਿੱਖਾ ਵਿਰੋਧ ਹੋਣਾ ਕੁਦਰਤੀ ਹੈ। ਜਿਵੇਂ ਕਿ ਇਜ਼ਰਾਈਲ ਹਿੰਦੋਸਤਾਨ ਨੂੰ ਫੌਜੀ ਸਾਜ਼ੋ ਸਮਾਨ ਦੇਣ ਵਾਲਾ ਵੱਡਾ ਸਪਲਾਇਰ ਹੈ। ਇਹ ਇੱਕ ਬਹੁਤ ਹੀ ਖਤਰਨਾਕ ਭਵਿੱਖ ਵਾਲੇ ਦ੍ਰਿਸ਼ ਨੂੰ ਪੇਸ਼ ਕਰਦਾ ਹੈ ਕਿਉਂਕਿ ਇਜ਼ਰਾਈਲ ਹਿੰਦੋਸਤਾਨ ਦੀ ਧਰਤੀ ਨੂੰ ਵਰਤ ਕੇ ਭਵਿੱਖ ਵਿੱਚ ਕਿਸੇ ਸਮੇਂ ਵੀ ਈਰਾਨ ਉੱਤੇ ਹਮਲਾ ਕਰ ਸਕਦਾ ਹੈ, ਜੋ ਕਿ ਇਸ ਖਿੱਤੇ ਦੀ ਅਮਨ ਚੈਨ ਅਤੇ ਸ਼ਾਂਤੀ ਨੂੰ ਭੰਗ ਕਰਕੇ ਪ੍ਰਮਾਣੂ ਜੰਗ ਨੂੰ ਸੱਦਾ ਦੇਣ ਵਾਲੀ ਕਾਰਵਾਈ ਹੋਵੇਗੀ ਅਤੇ ਇਸ ਪ੍ਰਮਾਣੂ ਜੰਗ ਦਾ ਮੁੱਖ ਨਿਸ਼ਾਨਾ ਸਿੱਖ ਹੋਮਲੈਂਡ ਵਿਸ਼ੇਸ ਤੌਰ ‘ਤੇ ਬਣ ਜਾਵੇਗੀ, ਜਿਸਨੂੰ ਸਿੱਖ ਕੌਮ ਕਤਈ ਵੀ ਪ੍ਰਵਾਨ ਨਹੀਂ ਕਰ ਸਕਦੀ।
ਬੀਬੀ ਕਲਿੰਟਨ ਦੁਆਰਾ ਹਿੰਦੋਸਤਾਨ ਨਾਲ ਹੋਇਆ ਤਾਜ਼ਾ ਪ੍ਰਮਾਣੂ ਤਕਨੀਕ ਸਮਝੌਤਾ ਇਸ ਗੱਲ ਨੂੰ ਸਾਫ ਨਹੀਂ ਕਰਦਾ ਕਿ ਅਮਰੀਕਾ ਦੀ ਪ੍ਰਮਾਣੂ ਮਸਿ਼ਨਰੀ ਦੇ ਹੋਏ ਸਮਝੌਤੇ ਨੂੰ ਹਿੰਦੋਸਤਾਨ ਕਿਸੇ ਹਮਲੇ ਆਦਿ ਲਈ ਨਹੀਂ ਵਰਤੇਗਾ। ਸਾਨੂੰ ਇਸ ਗੱਲ ਦੀ ਵੀ ਬਹੁਤ ਵੱਡੀ ਹੈਰਾਨੀ ਹੈ ਕਿ ਇਹ ਸਮਝੌਤਾ ਕਰਦੇ ਹੋਏ ਹਿੰਦੋਸਤਾਨ ਤੋਂ ਕੋਈ ਲਿਖਤੀ ਵਿਸ਼ਵਾਸ ਨਹੀਂ ਲਿਆ ਗਿਆ ਕਿ ਉਹ ਨਿਮਨਲਿਖਤ ਕੌਮਾਂਤਰੀ ਯੂ ਐਨ ਸਮਝੌਤੇ, ਪ੍ਰੋਟੋਕੋਲਜ਼, ਕਨਵੈਸ਼ਨਜ਼ ਨੂੰ ਲਾਗੂ ਕਰੇਗਾ ਜਾਂ ਨਹੀਂ। ਜਿਵੇਂ :
Ø 1948 ਦਾ ਨਸਲਕੁਸ਼ੀ ਦਾ ਜ਼ੁਰਮ ਇਸ ਤੋਂ ਬਚਾਉਣ ਅਤੇ ਸਜ਼ਾ ਬਾਰੇ ਕਨਵੈਨਸ਼ਨ,
Ø 1951 ਦੀ ਰਫਿਊਜ਼ੀ ਸਟੇਟਸ ਬਾਰੇ ਕਨਵੈਨਸ਼ਨ,
Ø 1954 ਦੀ ਸਟੇਟਲੈੱਸ ਵਿਅਕਤੀਆਂ ਦੇ ਸਟੇਟਸ ਬਾਰੇ ਕਨਵੈਨਸ਼ਨ,
Ø 1960 ਦੀ ਛੋਟੇ ਮੁਲਕਾਂ ਨੂੰ ਅਤੇ ਲੋਕਾਂ ਨੂੰ ਆਜ਼ਾਦੀ ਪ੍ਰਦਾਨ ਕਰਨ ਬਾਰੇ ਸਪੱਸ਼ਟੀਕਰਨ,
Ø 1965 ਦੇ ਕੌਮਾਂਤਰੀ ਕਨਵੈਨਸ਼ਨ ਨਸਲੀ ਵਿਤਕਰੇ ਅਤੇ ਉਹਨਾਂ ਨੂੰ ਖਤਮ ਕਰਨ,
Ø 1967 ਦਾ ਰਫਿਊਜ਼ੀ ਸਟੇਟਸ ਬਾਰੇ ਸਮਝੌਤਾ,
Ø 1972 ਦੀ ਐਂਟੀ ਬਲਾਸਟਿਕ ਮਿਜ਼ਾਈਲ ਦੇ ਸਿਸਟਮ ਅਤੇ ਉਸਦੀ ਲਿਮੀਟੇਸ਼ਨ ਬਾਰੇ ਸੰਧੀ,
Ø 1972 ਦੀ ਦੁਨੀਆ ਦੇ ਕਲਚਰ ਅਤੇ ਕੁਦਰਤੀ ਵਿਰਾਸਤਾਂ ਦੀ ਸਾਂਭ ਸੰਭਾਲ ਬਾਰੇ ਕਨਵੈਨਸ਼ਨ,
Ø 1984 ਦੀ ਟਾਰਚਰ ਅਤੇ ਹੋਰ ਜ਼ਾਲਮਾਨਾ ਅਣਮਨੁੱਖੀ ਵਿਵਹਾਰ ਅਤੇ ਸਜ਼ਾ ਖਿਲਾਫ ਕਨਵੈਨਸ਼ਨ,
Ø 1984 ਦਾ ਮੌਤ ਦੀ ਸਜ਼ਾ ਦਾ ਸਾਹਮਣਾ ਕਰ ਰਹੇ ਵਿਅਕਤੀਆਂ ਦੇ ਬਚਾਅ ਅਤੇ ਸਾਂਭ ਸੰਭਾਲ ਬਾਰੇ ਸਮਝੌਤਾ,
Ø 1995 ਦੀ ਨਿਉਕਲੀਅਰ ਹਥਿਆਰਾਂ ਦਾ ਵਿਸਥਾਰ ਨਾ ਕਰਨ ਬਾਰੇ ਸੰਧੀ,
Ø 1997 ਦੀ ਜ਼ਮੀਨ ਵਿੱਚ ਲਾਈਆਂ ਗਈਆਂ ਮਾਈਨਾਂ ਨੂੰ ਬਾਹਰ ਕੱਢਣ ਅਤੇ ਐਂਟੀ ਪਰਸਨਲ ਮਾਈਨਾਂ ਨੂੰ ਤਬਾਹ ਕਰਨ ਬਾਰੇ ਓਟਾਵਾ ਵਿੱਚ ਕੀਤੀ ਗਈ ਕਨਵੈਨਸ਼ਨ ਅਤੇ
Ø 2001 ਵਿੱਚ ਮਿਸਰ ਵਿੱਚ ਹੱਗ ਵਿਖੇ ਸਥਾਪਿਤ ਕੀਤੀ ਗਈ ਅੰਤਰ ਰਾਸ਼ਟਰੀ ਕਰੀਮੀਨਲ ਕੋਰਟ ਦੀ ਸਹਿਮਤੀ ਬਾਰੇ।
ਅਮਰੀਕਾ ਦੁਆਰਾ ਅਜਿਹੀ ਗਰੰਟੀ ਪ੍ਰਵਾਨ ਕਰਨ ਦੀ ਕੋਈ ਗੱਲ ਨਜ਼ਰ ਨਹੀਂ ਆਉਂਦੀ। ਇਸ ਸਮਝੌਤੇ ਦੀਆਂ ਮੱਦਾਂ ਸੰਬੰਧੀ ਕੋਈ ਜ਼ਾਬਤਾ ਕੋਡ ਕਿ ਅਮਰੀਕਾ ਦੁਆਰਾ ਸਪਲਾਈ ਕੀਤੀ ਜਾਣ ਵਾਲੀ ਮਸਿ਼ਨਰੀ ਦਾ ਹਰ ਭਾਗ ਨੂੰ ਭੂਗੋਲਿਕ ਤੌਰ ‘ਤੇ ਕਿੱਥੇ ਅਤੇ ਕਦੋਂ ਲਾਇਆ ਜਾਵੇਗਾ, ਦਾ ਕੋਈ ਵੇਰਵਾ ਨਹੀਂ। ਇਸ ਲਈ ਸਾਡੀ ਪਾਰਟੀ ਅਮਰੀਕਾ ਨੂੰ ਅਤਿ ਸੰਜੀਦਗੀ ਭਰੀ ਅਪੀਲ ਕਰਦੀ ਹੈ ਕਿ ਉਸ ਵੱਲੋਂ ਹਿੰਦੋਸਤਾਨ ਨੂੰ ਦਿੱਤੀ ਜਾਣ ਵਾਲੀ ਅਜਿਹੀ ਪ੍ਰਮਾਣੂ ਮਸਿ਼ਨਰੀ ਅਤੇ ਤਕਨੀਕ ਨੂੰ ਸਿੱਖ ਹੋਮਲੈਂਡ ਜਾਂ ਸਿੱਖਾਂ ਵਿਰੁੱਧ ਬਿਲਕੁਲ ਵਰਤਣ ਦੀ ਇਜ਼ਾਜਤ ਨਾ ਦਿੱਤੀ ਜਾਵੇ।
ਸੈਕਟਰੀ ਆਫ਼ ਸਟੇਟ ਬੀਬੀ ਕਲਿੰਟਨ ਦੀ ਹਿੰਦ ਦੀ ਯਾਤਰਾ ਤੋਂ ਅਸੀਂ ਬਿਲਕੁਲ ਵੀ ਖੁਸ਼ ਨਹੀਂ ਹਾਂ ਕਿਉਂਕਿ ਇਟਲੀ ਦੇ ਐਲਅਕਊਲਾ ਵਿਖੇ ਜੀ-8 ਮੁਲਕਾਂ ਦੀ ਹੁਣੇ ਹੋਈ ਇਕੱਤਰਤਾ ਜਿਸ ਵਿੱਚ ਇਹ ਫੈਸਲਾ ਕੀਤਾ ਗਿਆ ਕਿ ਐਨ ਪੀ ਟੀ ਅਤੇ ਸੀ ਟੀ ਬੀ ਟੀ ਉੱਤੇ ਦਸਤਖਤ ਨਾ ਕਰਨ ਵਾਲੇ ਮੁਲਕਾਂ ਨੂੰ ਇਹ ਨਿਯੁਕਲੀਅਰ ਮਸਿ਼ਨਰੀ, ਔਜ਼ਾਰ ਨਹੀਂ ਦਿਤੇ ਜਾਣਗੇ ਦੇ ਉਸ ਮਹੱਤਵਪੂਰਨ ਫੈਸਲੇ ਦਾ ਵੀ ਇਸ ਹੋਏ ਸਮਝੌਤੇ ਨੇ ਉਲੰਘਣ ਕੀਤਾ ਹੈ। ਇਸ ਲਈ ਸਾਡੀ ਇਹ ਸੋਚ ਹੈ ਕਿ 123 ਪ੍ਰਮਾਣੂ ਸਮਝੌਤਾ ਵੀ ਰੱਦ ਹੋਣਾ ਚਾਹੀਦਾ ਹੈ ਕਿਉਂਕਿ ਫੌਜੀ ਪ੍ਰਮਾਣੂ ਰਿਐਕਟਰਜ਼ ਨੂੰ ਕੌਮਾਂਤਰੀ ਪ੍ਰਮਾਣੂ ਸ਼ਕਤੀ ਐਸੈਸੀਏਸ਼ਨ (ੀੳਓੳ) ਦੇ ਨਿਰੀਖਣ ਅਤੇ ਛਾਣਬੀਣ ਤੋਂ ਦੂਰ ਰੱਖਿਆ ਗਿਆ ਹੈ। ਜੋ ਕਿ ਸੈਕਟਰੀ ਆਫ ਸਟੇਟ ਬੀਬੀ ਕਲਿੰਟਨ ਨੇ ਪ੍ਰਮਾਣੂ ਸ਼ਕਤੀ ਨੂੰ ਖਤਮ ਕਰਨ ਦੇ ਜੀ-8 ਮੁਲਕਾਂ ਦੀ ਮੀਟਿੰਗ ਦੇ ਮਹੱਤਵ ਦਾ ਵੀ ਉਲੰਘਣ ਕੀਤਾ ਹੈ ਜੋ ਕਿ ਭਵਿੱਖ ਵਿੱਚ ਹੋਰ ਵੀ ਵੱਡੀਆਂ ਖਤਰਨਾਕ ਕੌਮਾਂਤਰੀ ਮੁਸ਼ਕਿਲਾਂ ਨੂੰ ਜਨਮ ਦੇਣ ਵਾਲੀ ਗੱਲ ਹੈ। ਇਸ ਲਈ ਕੋਈ ਜੀ-8 ਮੁਲਕਾਂ ਦੇ ਵੱਲੋਂ ਕੀਤੇ ਗਏ ਸਮਝੌਤੇ ਉੱਤੇ ਵਿਸ਼ਵਾਸ ਨਹੀਂ ਕਰੇਗਾ।
ਜਿੱਥੋਂ ਤੱਕ ਕੌਮਾਂਤਰੀ ਪੱਧਰ ‘ਤੇ ਮਨੁੱਖੀ ਹੱਕਾਂ ਦੀ ਰਖਵਾਲੀ ਕਰਨ ਦਾ ਸਵਾਲ ਆਉਂਦਾ ਹੈ। ਬੀਬੀ ਕਲਿੰਟਨ ਸਿੱਖ ਕੌਮ ਦੇ ਹੱਕ ਹਕੂਕਾਂ ਤੇ ਮਨੁੱਖੀ ਅਧਿਕਾਰਾਂ ਦੀ ਰਾਖੀ ਕਰਨ ਦੇ ਮੁੱਦੇ ‘ਤੇ ਫੇਲ੍ਹ ਹੋਈ ਹੈ। ਜਿਸਨੂੰ ਅਸੀਂ ਇਹ ਸਮਝਦੇ ਹਾਂ ਕਿ ਅਮਰੀਕਾ ਦੀ ਵਿਦੇਸ਼ ਨੀਤੀ ਜੋ ਮਨੁੱਖੀ ਅਧਿਕਾਰਾਂ ਦੀ ਵਿਸ਼ੇਸ ਤੌਰ ਤੇ ਗੱਲ ਕਰਦੀ ਹੈ, ਇਸ ਨਾਲ ਉਸਦੀ ਵਿਦੇਸ਼ ਨੀਤੀ ਨੂੰ ਹੀ ਡੂੰਘੀ ਠੇਸ ਪਹੁੰਚੀ ਹੈ। ਅਮਰੀਕਾ ਦੇ ਪ੍ਰੈਜ਼ੀਡੈਂਟ ਸ਼੍ਰੀ ਓਬਾਮਾ ਜਿਹਨਾਂ ਦੀ ਵਿਦੇਸ਼ ਨੀਤੀ ਵਿਸ਼ੇਸ ਤੌਰ ਤੇ ਮਨੁੱਖੀ ਅਧਿਕਾਰਾਂ ਦੀ ਰੱਖਿਆ ਦੀ ਗੱਲ ਕਰਦੀ ਹੈ। ਬੀਬੀ ਕਲਿੰਟਨ ਵੱਲੋਂ ਕੀਤੇ ਗਏ ਇਸ ਸਮਝੌਤੇ ਨਾਲ ਸਿੱਖਾਂ, ਕਸ਼ਮੀਰੀਆਂ, ਬਰਮੀਆਂ ਅਤੇ ਜੋ ਮੁਲਕ ਅਤੇ ਕੌਮਾਂ ਹਿੰਦੂਤਵ ਹਿੰਦੋਸਤਾਨ ਸਟੇਟ ਦੀ ਹਕੂਮਤ ਦੀਆਂ ਵਧੀਕੀਆਂ ਤੋਂ ਆਪਣੀ ਆਜ਼ਾਦੀ ਅਤੇ ਹੱਕਾਂ ਲਈ ਖਤਰਾ ਸਮਝਦੇ ਹਨ, ਉਹਨਾਂ ਦੇ ਮਨ ਅਤੇ ਆਤਮਾ ਵਿੱਚ ਵੀ ਅਮਰੀਕਾ ਦੀ ਵਿਦੇਸ਼ ਨੀਤੀ ਇੱਕ ਹਊਆ ਬਣ ਕੇ ਆ ਖਲੋਤੀ ਹੈ। ਇਸ ਬਦਲਦੀ ਹੋਈ ਹੈਰਾਨੀਜਨਕ ਅਤੇ ਦੁੱਖਦਾਈ ਅਮਰੀਕਾ ਦੀ ਨੀਤੀ ਕੀ ਸਮੁੱਚੇ ਸੰਸਾਰ ਵਿੱਚ ਉੱਥਲ-ਪੁੱਥਲ ਨਹੀਂ ਕਰ ਦੇਵੇਗੀ? ਸਾਨੂੰ ਸਿੱਖ ਕੌਮ ਨੂੰ ਇਸ ਗੱਲ ਦਾ ਵੀ ਗਹਿਰਾ ਦੁੱਖ ਹੈ ਕਿ ਬੀਬੀ ਕਲਿੰਟਨ ਸੈਕਟਰੀ ਆਫ ਸਟੇਟ ਨੇ 2000 ਵਿੱਚ ਜਦੋਂ ਉਸ ਸਮੇਂ ਦੇ ਅਮਰੀਕਾ ਦੇ ਪ੍ਰਧਾਨ ਸ਼੍ਰੀ ਬਿਲ ਕਲਿੰਟਨ ਸਾਊਥ ਏਸ਼ੀਆ ਦੇ ਦੌਰੇ ‘ਤੇ ਸਨ, ਉਦੋਂ ਚਿੱਠੀਸਿੰਘਪੁਰਾ (ਜ਼ੰਮੂ ਕਸ਼ਮੀਰ) ਵਿੱਚ 43 ਸਿੱਖਾਂ ਦੇ ਬੇਰਹਿਮੀ ਨਾਲ ਹੋਏ ਕਤਲੇਆਮ ਜਿਸਨੂੰ ਉਹਨਾਂ ਨੇ ਆਪਣੀ ਕਿਤਾਬ ਵਿੱਚ ਵੇਰਵਾ ਦਿੰਦੇ ਹੋਏ ਲਿਖਿਆ ਹੈ ਕਿ ਇਹ ਕਤਲੇਆਮ ਹਿੰਦੂ ਦਹਿਸ਼ਤਗਰਦਾਂ ਦੀ ਸ਼ਾਜਿਸ ਦਾ ਨਤੀਜਾ ਹੈ, ਉਸ ਸੰਬੰਧੀ ਬੀਬੀ ਕਲਿੰਟਨ ਵੱਲੋਂ ਹਿੰਦੋਸਤਾਨ ਦੇ ਦੌਰੇ ਸਮੇਂ ਇੱਕ ਵੀ ਲਫਜ਼ ਨਾ ਕਹਿਣਾ ਸਿੱਖ ਕੌਮ ਲਈ ਵੱਡੇ ਦੁੱਖ ਵਾਲੀ ਗੱਲ ਹੈ ਅਤੇ ਸਿੱਖ ਕੌਮ ਇਸ ‘ਤੇ ਡੂੰਘੀ ਬੇਚੈਨ ਹੋਈ ਹੈ। ਸਾਡੀ ਇਹ ਸੋਚਣੀ ਹੈ ਕਿ ਬੀਬੀ ਕਲਿੰਟਨ ਦੀ ਹਿੰਦੋਸਤਾਨ ਦੀ ਯਾਤਰਾ ਅਮਰੀਕਾ-ਇਜ਼ਰਾਈਲ ਅਤੇ ਹਿੰਦੂਤਵ ਹਿੰਦੂ ਸਟੇਟ ਦੇ ਸੰਬੰਧਾਂ ਨੂੰ ਹੀ ਮਜ਼ਬੂਤ ਕਰਦੀ ਹੈ ਜਦੋਂ ਕਿ ਕੌਮਾਂਤਰੀ ਪੱਧਰ ‘ਤੇ ਮਨੁੱਖੀ ਅਧਿਕਾਰਾਂ ਦੀ ਰਾਖੀ ਦੇ ਮੁੱਦੇ ‘ਤੇ ਏਸ਼ੀਆ ਨਾਲ ਸੰਬੰਧਿਤ ਦੂਜੇ ਮੁਲਕਾਂ ਨੂੰ ਖੁਦ ਹੀ ਇਸ ਬੇਨਤੀਜਾ ਕੌਮਾਂਤਰੀ ਪੱਧਰ ‘ਤੇ ਹਲਚਲ ਪੈਦਾ ਕਰਨ ਵਾਲੇ ਸਮਝੌਤੇ ਤੋਂ ਜਾਗਣਾ ਪਵੇਗਾ ਕਿਉਂਕਿ ਅਮਰੀਕਾ ਦੇ ਹੁਣ ਤੱਕ ਦੇ ਇਤਿਹਾਸ ਵਿੱਚ ਕਦੀ ਵੀ ਅਜਿਹਾ ਭੱਦਾ ਅਤੇ ਸ਼ੈਤਾਨੀਅਤ ਦੀ ਸੋਚ ਵਾਲਾ ਸਮਝੌਤਾ ਹੋਂਦ ਵਿੱਚ ਨਹੀਂ ਆਇਆ।

ਪੰਜਾਬ ਪੁਲਿਸ ਦੇ ਸਾਬਕਾ ਡਾਇਰੈਕਟਰ ਜਨਰਲ ਵਿਰਕ ਖਿਲਾਫ਼ ਸਪਲੀਮੈਂਟਰੀ ਚਲਾਨ ਪੇਸ਼

ਮੋਹਾਲੀ : 25 ਜੁਲਾਈ- ਪੰਜਾਬ ਵਿਜੀਲੈਂਸ ਬਿਊਰੋ ਵੱਲੋਂ ਪੰਜਾਬ ਪੁਲਿਸ ਦੇ ਸਾਬਕਾ ਡਾਇਰੈਕਟਰ ਜਨਰਲ ਅਤੇ ਮਹਾਰਾਸ਼ਟਰ ਦੇ ਮੌਜੂਦਾ ਡੀਜੀਪੀ ਸਰਬਦੀਪ ਸਿੰਘ ਵਿਰਕ ਖਿਲਾਫ ਲਗਭਗ ਦੋ ਸਾਲ ਪਹਿਲਾਂ ਦਰਜ ਕੀਤੇ ਗਏ ਭ੍ਰਿਸ਼ਟਾਚਾਰ ਦੇ ਮਾਮਲੇ ਵਿੱਚ ਅੱਜ ਵਿਜੀਲੈਂਸ ਨੇ ਸਪਲੀਮੈਂਟਰੀ ਚਲਾਨ ਪੇਸ਼ ਕੀਤਾ। ਇਹ ਚਲਾਨ ਪੇਸ਼ ਕਰਨ ਲਈ ਡੀ ਆਈ ਜੀ ਐੱਸ ਕੇ ਅਸਥਾਨਾ ਖੁਦ ਮੋਹਾਲੀ ਦੀ ਅਦਾਲਤ ਵਿਚ ਪਹੁੰਚੇ ਅਤੇ ਚਲਾਨ ਪੇਸ਼ ਕੀਤਾ। ਜ਼ਿਕਰਯੋਗ ਹੈ ਕਿ ਸ੍ਰੀ ਵਿਰਕ ਦੇ ਖਿਲਾਫ਼ ਆਪਣੇ ਅਹੁਦੇ ਦੀ ਦੁਰਵਰਤੋਂ ਕਰਕੇ ਕਰੋੜਾਂ ਰੁਪਏ ਦੀ ਜਾਇਦਾਦ ਬਣਾਉਣ ਅਤੇ ਕਾਲਾ ਧਨ ਇਕੱਤਰ ਕਰਨ ਦੇ ਦੋਸ਼ਾਂ ਅਧੀਨ 8 ਸਤੰਬਰ 2007 ਨੂੰ ਆਈਪੀਸੀ ਦੀਆਂ ਵੱਖ-ਵੱਖ ਧਾਰਾਵਾਂ ਦੇ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਸੀ।
ਜ਼ਿਕਰਯੋਗ ਹੈ ਕਿ ਇਹ ਮਾਮਲਾ ਵਿਜੀਲੈਂਸ ਬਿਊਰੋ ਵੱਲੋਂ ਦਰਜ ਕੀਤਾ ਗਿਆ ਸੀ, ਪਰ ਮਾਣਯੋਗ ਪੰਜਾਬ ਤੇ ਹਰਿਆਣਾ ਹਾਈਕੋਰਟ ਦੇ ਆਦੇਸ਼ਾਂ ‘ਤੇ ਸ੍ਰੀ ਅਸਥਾਨਾ ਨੂੰ ਇਸ ਮਾਮਲੇ ਦੀ ਜਾਂਚ ਸੌਂਪ ਦਿੱਤੀ ਗਈ ਸੀ। ਸ੍ਰੀ ਅਸਥਾਨਾ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ ਅਵਿਨਾਸ਼ ਗਰੇਵਾਲ ਨਾਂ ਦੇ ਵਿਅਕਤੀ ਕੋਲੋਂ ਜ਼ੀਰਕਪੁਰ ਵਿਚ 19.50 ਲੱਖ ਰੁਪਏ ਪ੍ਰਤੀ ਏਕੜ ਦੇ ਹਿਸਾਬ ਨਾਲ 15 ਏਕੜ ਜ਼ਮੀਨ ਖਰੀਦੀ ਗਈ, ਜਿੱਥੇ ਕਿ ਗ਼ੈਰ ਕਾਨੂੰਨੀ ਢੰਗ ਨਾਲ ਕਾਲੋਨੀ ਬਣਾਈ ਜਾਣੀ ਸੀ। ਚਲਾਨ ਅਨੁਸਾਰ ਸ੍ਰੀ ਵਿਰਕ ਵਿਰੁੱਧ 29 ਕਰੋੜ ਰੁਪਏ ਦੇ ਘੋਟਾਲੇ ਦਾ ਮਾਮਲਾ ਦਰਜ ਹੈ, ਜਿਸ ਵਿੱਚੋਂ ਲਗਭਗ 17 ਕਰੋੜ ਰੁਪਏ ਉਨ੍ਹਾਂ ਦੀ ਆਮਦਨ ਤੋਂ ਵੱਧ ਦਿਖਾਈ ਗਈ ਰਾਸ਼ੀ ਹੈ। ਸ੍ਰੀ ਵਿਰਕ ਨੇ ਆਰਕੀਟੈਕਟ ਦੀ ਮਦਦ ਨਾਲ ਸਾਈਟ ਪਲਾਨ ਤਿਆਰ ਕੀਤਾ ਅਤੇ ਠੇਕੇਦਾਰ ਬਲਬੀਰ ਸਿੰਘ ਰਾਹੀਂ ਕਾਲੋਨੀ ਬਣਾਉਣ ਦਾ ਕੰਮ ਆਰੰਭਿਆ। ਉਨ੍ਹਾਂ ਦੱਸਿਆ ਕਿ ਪੰਜਾਬ ਦੇ ਸਾਬਕਾ ਡੀ ਜੀ ਪੀ ਨੇ ਲੋਕਾਂ ਕੋਲੋਂ ਉਕਤ ਕੰਮ ਲਈ ਚੈੱਕ, ਡਰਾਫਟਾਂ ਅਤੇ ਕਾਲਾ ਧਨ ਦੇ ਰਾਹੀਂ ਵੱਡੀ ਮਾਤਰਾ ਵਿਚ ਧਨ ਇਕੱਠਾ ਕੀਤਾ ਗਿਆ। ਇਹ ਵੀ ਦੋਸ਼ ਹੈ ਕਿ ਇਸ ਤਰ੍ਹਾਂ ਜੋ ਕਾਲਾ ਧਨ ਇਕੱਠਾ ਹੋਇਆ, ਉਸ ਰਾਹੀਂ ਸ੍ਰੀ ਵਿਰਕ ਨੇ ਪਿੰਡ ਦਿਆਲਪੁਰਾ ਵਿਖੇ ਚਿਮਨੀ ਹਾਈਟ ਰਿਜ਼ੌਰਟ ਬਣਾਇਆ, ਇਸ ਕੰਮ ਵਿਚ ਵੀ ਆਪਣੇ ਅਹੁਦੇ ਦੀ ਕਥਿਤ ਦੁਰਵਰਤੋਂ ਕੀਤੀ ਅਜਿਹਾ ਕਰਦਿਆਂ ਪੰਜਾਬ ਸਰਕਾਰ ਤੇ ਪੁੱਡਾ ਨੂੰ ਲੱਖਾਂ ਦਾ ਚੂਨਾ ਵੀ ਲਗਾਇਆ ਗਿਆ।
ਉਨ੍ਹਾਂ ਦੱਸਿਆ ਕਿ ਸ੍ਰੀ ਵਿਰਕ ਦੇ ਨਾਭਾ ਅਤੇ ਛੱਤ ਪਿੰਡ ਵਿਚ ਮੈਗਾ ਪ੍ਰਾਜੈਕਟ ਬਣਾਉਣ ‘ਤੇ ਸਰਕਾਰ ਨੂੰ ਘੱਟੋ-ਘੱਟ 10 ਕਰੋੜ ਦਾ ਘਾਟਾ ਪਾਇਆ ਗਿਆ। ਇਹ ਜ਼ਮੀਨ ਮਿਉਂਸਪਲ ਕਮੇਟੀ ਜ਼ੀਰਕਪੁਰ ਦੇ ਨਾਲ ਲਗਦੀ ਹੈ। ਉਨ੍ਹਾਂ ਦੱਸਿਆ ਕਿ ਸ੍ਰੀ ਵਿਰਕ ਨੇ ਚੰਡੀਗੜ੍ਹ ਦੇ ਸੈਕਟਰ-27ਬੀ ਵਿਚ ਇਕ ਮਕਾਨ, ਸੈਕਟਰ-39 ਵਿਚ ਇਕ ਫਲੈਟ, ਜ਼ੀਰਕਪੁਰ ਵਿਖੇ 14 ਏਕੜ ਜ਼ਮੀਨ ਵਿਚ ਚਿਮਨੀ ਹਾਈਟ ਰਿਜੌਰਟ, ਮੈਗਾ ਪ੍ਰਾਜੈਕਟ ਲਈ 10 ਏਕੜ ਜ਼ਮੀਨ, ਇੰਟਰਨੈਸ਼ਨਲ ਕਨਵੈਨਸ਼ਨ ਸੈਂਟਰ ਦੇ ਲਈ ਪਿੰਡ ਬਾਕਰਪੁਰ ਵਿਚ 25 ਏਕੜ ਜ਼ਮੀਨ ਅਤੇ ਲਾਂਡਰਾਂ ਰੋਡ ‘ਤੇ ਪਿੰਡ ਸੇਖਨ ਮਾਜਰਾ ਵਿਖੇ 7 ਏਕੜ ਜ਼ਮੀਨ ਖਰੀਦੀ। ਉਨ੍ਹਾਂ ਦੱਸਿਆ ਕਿ 30 ਕਨਾਲ ਜ਼ਮੀਨ ਇਕ ਜੰਗੀ ਵਿਧਵਾ ਮਹਿੰਦਰ ਕੌਰ ਕੋਲੋਂ ਵਿਜੇਪਾਲ ਉਰਫ ਡਿੰਪੀ ਦੇ ਰਾਹੀਂ ਹਥਿਆ ਲਈ। ਉਨ੍ਹਾਂ ਦੱਸਿਆ ਕਿ ਸ੍ਰੀ ਵਿਰਕ ਤੇ ਡਿੰਪੀ ਨੂੰ 9 ਸਤੰਬਰ 2007 ਨੂੰ ਗ੍ਰਿਫ਼ਤਰ ਕਰ ਲਿਆ ਗਿਆ ਤੇ ਮੁੱਢਲੀ ਜਾਂਚ ਦੌਰਾਨ ਇਹ ਗੱਲ ਸਾਹਮਣੇ ਆਈ ਕਿ ਚਿਮਨੀ ਹਾਈਟ ਰਿਜ਼ੌਰਟ ‘ਤੇ 32 ਕਰੋੜ 97 ਲੱਖ 1 ਹਜ਼ਾਰ 936 ਰੁਪਏ ਖਰਚ ਕੀਤੇ ਗਏ, ਜਦੋਂਕਿ ਸਾਰੇ ਸਰੋਤਾਂ ਤੋਂ ਅਤੇ ਕਰਜ ਆਦਿ ਲੈ ਕੇ ਸ਼੍ਰੀ ਵਿਰਕ ਦੀ ਆਮਦਨ 16 ਕਰੋੜ 10 ਲੱਖ 62 ਹਜ਼ਾਰ 826 ਰੁਪਏ ਸੀ, ਇਸ ਤਰ੍ਹਾਂ 16 ਕਰੋੜ 86 ਲੱਖ 39 ਹਜ਼ਾਰ 110 ਰੁਪਏ ਉਨ੍ਹਾਂ ਦੀ ਆਮਦਨ ਤੋਂ ਵਾਧੂ ਪਾਏ ਗਏ। ਹੋਰ ਜਾਂਚ ਦੌਰਾਨ ਸ਼੍ਰੀ ਵਿਰਕ ਤੇ ਉਨ੍ਹਾਂ ਦੇ ਰਿਸ਼ਤੇਦਾਰਾਂ ਦੇ ਬੈਂਕ ਖਾਤਿਆਂ ਵਿਚ 3 ਕਰੋੜ 12 ਲੱਖ 19 ਹਜ਼ਾਰ 919 ਰੁਪਏ ਜਮ੍ਹਾਂ ਪਾਏ ਗਏ। ਉਨ੍ਹਾਂ ਦੱਸਿਆ ਕਿ ਸ਼੍ਰੀ ਵਿਰਕ ਕੋਲੋਂ ਇਕ ਡਾਇਰੀ ਵੀ ਮਿਲੀ ਹੈ, ਜਿਸ ਤੋਂ ਪਤਾ ਚਲਦਾ ਹੈ ਕਿ ਸਾਰਾ ਲੈਣ-ਦੇਣ ਕੋਡ ਵਰਡ ਰਾਹੀਂ ਹੁੰਦਾ ਸੀ। ਉਨ੍ਹਾਂ ਦੱਸਿਆ ਕਿ ਡਾਇਰੀ ਵਿਚ ਕਈ ਅਜਿਹੇ ਛੋਟੇ ਸ਼ਬਦ ਮਿਲਦੇ ਹਨ, ਜੋ ਸੰਕੇਤਾਂ ਵਜੋਂ ਲਿਖੇ ਹੋਏ ਹਨ। ਉਨ੍ਹਾਂ ਅਦਾਲਤ ਵਿਚ ਮੰਗ ਕੀਤੀ ਕਿ ਜ਼ਾਹਰਾ ਤੌਰ ‘ਤੇ ਜੋ ਸੰਪਤੀ ਜਾਂਚ ਏਜੰਸੀ ਨੂੰ ਪ੍ਰਾਪਤ ਹੋਈ ਹੈ, ਉਸ ਤੋਂ ਇਲਾਵਾ ਡਾਇਰੀ ਵਿਚ ਲਿਖੇ ਅਨੁਸਾਰ ਹੋਰ ਜੋ ਕਰੋੜਾਂ ਦੀ ਸੰਪਤੀ ਹੈ, ਉਸ ਬਾਰੇ ਸ਼੍ਰੀ ਵਿਰਕ ਹੀ ਦੱਸ ਸਕਦੇ ਹਨ, ਇਸ ਲਈ ਉਨ੍ਹਾਂ ਨੂੰ ਅਦਾਲਤ ਵਿਚ ਬੁਲਾਇਆ ਜਾਵੇ। ਇਸ ਤੋਂ ਇਲਾਵਾ ਜੋ ਸੰਖੇਪ ਸ਼ਬਦ ਡਾਇਰੀ ਵਿਚ ਲਿਖੇ ਗਏ ਹਨ, ਉਨ੍ਹਾਂ ਬਾਰੇ ਵੀ ਉਨ੍ਹਾਂ ਤੋਂ ਪੁੱਛਗਿਛ ਕਰਨੀ ਹੈ। ਜ਼ਿਕਰਯੋਗ ਹੈ ਕਿ ਚਲਾਨ ਵਿਚ ਇਹ ਜ਼ਿਕਰ ਵੀ ਕੀਤਾ ਗਿਆ ਹੈ ਕਿ ਸ਼੍ਰੀ ਵਿਰਕ ਨੇ ਬੈਂਕਾਂ ਤੋਂ ਜੋ ਕਰੋੜਾਂ ਰੁਪਏ ਦਾ ਕਰਜ਼ਾ ਲਿਆ, ਉਸ ਵਿਚੋਂ ਕੁੱਝ ਕਰੋੜ ਰੁਪਏ ਦੀ ਅਦਾਇਗੀ ਵੀ ਕੀਤੀ ਹੋਈ ਹੈ।

ਡੇਰਾ ਮੁਖੀ ਦੀ ਅਗਲੀ ਸੁਣਵਾਈ ਪਹਿਲੀ ਨੂੰ

ਸਿਰਸਾ : 25 ਜੁਲਾਈ - ਡੇਰਾ ਸੌਦਾ ਦੇ ਮੁਖੀ ਗੁਰਮੀਤ ਰਾਮ ਰਹੀਮ ਅੱਜ ਸੀਬੀਆਈ ਦੀ ਸਿਰਸਾ ਸਥਿਤ ਵਿਸ਼ੇਸ਼ ਅਦਾਲਤ ਵਿਚ ਬਣੇ ਵਿਸ਼ੇਸ਼ ਵੀਡਿਓ ਕਾਨਫਰੰਸਿੰਗ ਰੂਮ ਵਿਚ ਪੇਸ਼ ਹੋਏ। ਡੇਰਾ ਮੁਖੀ ਆਪਣੇ ਕਾਫਲੇ ਨਾਲ ਸਵੇਰੇ ਸਾਢੇ ਸੱਤ ਵਜੇ ਦੇ ਕਰੀਬ ਡੇਰੇ ਤੋਂ ਅਦਾਲਤ ਵੱਲ ਰਵਾਨਾ ਹੋਏ। ਉਨ੍ਹਾਂ ਦੇ ਇਸ ਕਾਫਲੇ ਵਿਚ ਜੈੱਡ ਸੁਰੱਖਿਆ ਦੇ ਜਵਾਨ, ਹਰਿਆਣਾ ਪੁਲਿਸ ਅਤੇ ਉਨ੍ਹਾਂ ਦੇ ਨਿੱਜੀ ਗਾਰਡਾਂ ਤੋਂ ਇਲਾਵਾ ਵੱਡੀ ਗਿਣਤੀ ਵਿਚ ਡੇਰਾ ਪ੍ਰੇਮੀਆਂ ਦੀਆਂ ਗੱਡੀਆਂ ਵੀ ਸ਼ਾਮਲ ਸਨ। ਡੇਰਾ ਮੁਖੀ ਲਗਭਗ 7 ਵੱਜ ਕੇ 52 ਮਿੰਟ ‘ਤੇ ਸਿਰਸਾ ਦੀ ਅਦਾਲਤ ਵਿਚ ਬਣੇ ਵਿਸ਼ੇਸ਼ ਕਾਨਫਰੰਸਿੰਗ ਰੂਮ ਵਿਚ ਹਾਜ਼ਰ ਹੋਏ ਅਤੇ ਅੰਬਾਲਾ ਦੀ ਸੀਬੀਆਈ ਅਦਾਲਤ ਦੀ ਕਾਰਵਾਈ ਖਤਮ ਹੋਣ ਤੋਂ ਬਾਅਦ 10 ਵਜ ਕੇ 56 ਮਿੰਟ ‘ਤੇ ਇਸ ਰੂਮ ਵਿੱਚੋਂ ਬਾਹਰ ਨਿਕਲੇ।
ਅੰਬਾਲਾ ਸਥਿਤ ਸੀਬੀਆਈ ਅਦਾਲਤ ਵਿਚ ਅੱਜ ਰਣਜੀਤ ਕਤਲ ਕਾਂਡ ਵਿਚ ਗਵਾਹਾਂ ਦੀ ਬਹਿਸ ਹੋਈ ਅਤੇ ਡੇਰਾ ਮੁਖੀ ਨਾਲ ਸਵਾਲ-ਜਵਾਬ ਕੀਤੇ ਗਏ। ਇਸ ਮਾਮਲੇ ਵਿਚ ਅਦਾਲਤ ਨੇ 1 ਅਗਸਤ ਦੀ ਤਾਰੀਖ ਬਹਿਸ ਲਈ ਨਿਰਧਾਰਤ ਕੀਤੀ ਹੈ। ਇਕ ਅਗਸਤ ਨੂੰ ਹੀ ਡੇਰਾ ਮੁਖੀ ਦੀ ਜ਼ਮਾਨਤ ਖਾਰਜ਼ ਕਰਨ ਸਬੰਧੀ ਅਰਜ਼ੀ ਉਪਰ ਵੀ ਸੁਣਵਾਈ ਹੋਣੀ ਹੈ। ਇਸ ਪੇਸ਼ੀ ਦੇ ਦੌਰਾਨ ਪੂਰਾ ਅਦਾਲਤੀ ਕੰਪਲੈਕਸ ਪੁਲਿਸ ਛਾਉਣੀ ਵਿਚ ਤਬਦੀਲ ਕੀਤਾ ਹੋਇਆ ਸੀ। ਜ਼ਿਲ੍ਹਾ ਪੁਲਿਸ ਦੇ ਸੈਂਕੜੇ ਕਰਮਚਾਰੀ ਸਾਰੇ ਅਦਾਲਤੀ ਕੰਪਲੈਕਸ ਦੀ ਰਖਵਾਲੀ ਕਰ ਰਹੇ ਸਨ, ਜਿਸ ਦੀ ਦੇਖ-ਰੇਖ ਸਿਰਸਾ ਦੇ ਐਸ ਪੀ ਖੁਦ ਕਰ ਰਹੇ ਸਨ।

ਗੁਰੂ ਨਾਨਕ ਨਾਮ ਲੇਵਾ ਜਥੇਬੰਦੀਆਂ ਦੀ ਇਕੱਤਰਤਾ 26 ਜੁਲਾਈ ਨੂੰ

ਚੰਡੀਗੜ, 24 ਜੁਲਾਈ( )- ਅਕਾਲੀ ਦਲ ਪੰਚ ਪ੍ਰਧਾਨੀ ਦੇ ਜਥੇਬੰਦਕ ਸਕੱਤਰ ਭਾਈ ਸੁਰਿੰਦਰ ਸਿੰਘ ਕਿਸ਼ਨਪੁਰਾ ਨੇ ਪ੍ਰੈਸ ਨੂੰ ਜਾਣਕਾਰੀ ਦਿੰਦਿਆ ਦੱਸਿਆ ਹੈ ਕਿ ਫਿਰਕੂਵਾਦੀ ਤਾਕਤਾਂ ਦੀਆਂ ਹਮੇਸ਼ਾ ਨੀਤੀਆ ਰਹੀਆਂ ਹਨ ਕਿ ਗੁਰੂ ਨਾਨਕ ਨਾਮ ਲੇਵਾ ਵਿਚ ਫੁੱਟ ਪਾਈ ਜਾਵੇ ਅਤੇ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਸਿਧਾਤਾਂ ਤੇ ਆਧਾਰਤ ਸਮਾਜ ਤੇ ਰਾਜ ਦੀ ਸਥਾਪਨਾ ਨਾ ਹੋ ਸਕੇ ਜਿਸ ਤਹਿਤ ਹੀ ਦੁਖਦਾਈ ਵਿਆਨਾ ਘਟਨਾ ਤੋਂ ਬਾਦ ਭਗਤ ਰਵਿਦਾਸ ਗੁਰੂ ਘਰਾਂ ਵਿਚੋਂ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਪ੍ਰਕਾਸ਼ ਹਟਾ ਕੇ ਬ੍ਰਾਹਮਣਵਾਦੀ ਰੀਤਾਂ ਦਾ ਪ੍ਰਚਲਨ ਕਰਨ ਦੀਆਂ ਕੋਸ਼ਿਸ਼ਾਂ ਕੀਤੀਆ ਜਾ ਰਹੀਆਂ ਹਨ ਪਰ ਮਨੂੰਵਾਦੀਆਂ ਦੀਆਂ ਇਹਨਾਂ ਚਾਲਾਂ ਨੂੰ ਕਾਮਯਾਬ ਨਹੀਂ ਹੋਣ ਦਿੱਤਾ ਜਾਵੇਗਾ। ਇਸ ਸਬੰਧ ਵਿਚ ਹੀ 26 ਜੁਲਾਈ ਨੂੰ ਗੁਰੂ ਨਾਨਕ ਨਾਮ ਲੇਵਾ ਜਥੇਬੰਦੀਆਂ ਦੀ ਇਕ ਇਕੱਤਰਤਾ ਕੇਂਦਰੀ ਸ੍ਰੀ ਗੁਰੂ ਸਿੰਘ ਸਭਾ ਵਲੋਂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਵਿੱਦਿਆ ਕੇਂਦਰ ਸੈਕਟਰ 28, ਚੰਡੀਗੜ ਵਿਖੂ ਹੋਵੇਗੀ।
ਉਹਨਾਂ ਦੱਸਿਆ ਕਿ ਇਸ ਮੀਟਿੰਗ ਵਿਚ ਸਾਬਕਾ ਐੱਮ.ਪੀ ਹਰਭਜਨ ਲਾਖਾ ਜੀ, ਗਿਆਨੀ ਦਿੱਤ ਸਿੰਘ ਇੰਟਰਨੈਸ਼ਨਲ ਸੁਸਾਇਟੀ ਦੇ ਪ੍ਰਧਾਨ ਨਸੀਬ ਸਿੰਘ ਸੇਵਕ ਜੀ, ਅਕਾਲੀ ਦਲ ਪੰਚ ਪ੍ਰਧਾਨੀ ਦੇ ਕੌਮੀ ਪੰਚ ਹਰਿੰਦਰ ਸਿੰਘ ਖ਼ਾਲਸਾ ਨਾਰਵੇਂ, ਗਿਆਨੀ ਹਰਿੰਦਰ ਸਿੰਘ ਤੇ ਪ੍ਰਭਜੀਤ ਸਿੰਘ ਭਾਣਜਾ ਸਾਹਿਬ ਕਾਂਸ਼ੀ ਰਾਮ ਜੀ ਤੋਂ ਇਲਾਵਾ ਵੱਖ-ਵੱਖ ਜਥੇਬੰਦੀਆਂ ਨੇ ਨੁੰਮਾਇੰਦੇ ਤੇ ਸੰਤ-ਮਹਾਂਪੁਰਸ਼ ਹਿੱਸਾ ਲੈਣਗੇ।

ਲੀਡਰਾਂ ਦੀ ਸੁਰੱਖਿਆ ਨਾਲੋਂ ਲੋਕਾਂ ਦੀ ਸੁਰੱਖਿਆ ਯਕੀਨੀ ਬਣਾਈ ਜਾਵੇ : ਪੰਚ ਪ੍ਰਧਾਨੀ

ਤਰੀਕ: 25 ਜੁਲਾਈ, 2009 - ਭਾਰਤੀ ਸੰਸਦ ਜਾਂ ਰਾਜਾਂ ਦੀਆਂ ਵਿਧਾਨ ਸਭਾਵਾਂ ਵਿਚ ਆਮ ਤੌਰ ਉੱਤੇ ਰੌਲਾ ਹੀ ਸੁਣਨ ਨੂੰ ਮਿਲਦਾ ਹੈ ਅਤੇ ਦੇਸ਼ ਦੀ ਜਨਤਾ ਦਾ ਕਰੋੜਾਂ ਅਰਬਾਂ ਰੁਪਈਆ ਇਹਨਾਂ ਰੌਲਿਆਂ ਉੱਤੇ ਹੀ ਲੱਗ ਜਾਂਦਾ ਹੈ ਪਰ ਵਿਰੋਧੀ ਪਾਰਟੀਆਂ ਵਿਚ ਵੀ ਕੇਵਲ ਦੋ ਮੁੱਦਿਆਂ ਉੱਤੇ ਸਰਬਸੰਮਤੀ ਜਰੂਰ ਹੋ ਜਾਂਦੀ ਹੈ ਇਕ ਜਦੋਂ ਇਹਨਾਂ ਨੇ ਆਪਣੀਆਂ ਤਨਖਾਹਾਂ, ਭੱਤੇ ਜਾਂ ਹੋਰ ਸਹੂਲਤਾਂ ਵਿਚ ਵਾਧੇ ਕਰਨੇ ਹੋਣ ਅਤੇ ਦੂਜਾ ਜਦੋਂ ਇਹਨਾਂ ਪਾਰਟੀਆਂ ਦੇ ਲੀਡਰਾਂ ਦੀ ਸੁਰੱਖਿਆ ਦੀ ਗੱਲ ਹੋਵੇ। ਯੂਥ ਅਕਾਲੀ ਦਲ ਪੰਚ ਪ੍ਰਧਾਨੀ ਦੇ ਕੌਮੀ ਬੁਲਾਰੇ ਜਸਪਾਲ ਸਿੰਘ ਮੰਝਪੁਰ ਨੇ ਕਿਹਾ ਕਿ ਜੇ ਇਹ ਸੱਚਮੁੱਚ ਹੀ ਲੋਕਾਂ ਦੇ ਚੁਣੇ ਨੁੰਮਾਇੰਦੇ ਹੋਣ ਤਾਂ ਇਹਨਾਂ ਨੂੰ ਕਿਸ ਤੋਂ ਖਤਰਾ ਹੈ ਅਤੇ ਭਾਰਤੀ ਸੱਭਿਆਚਾਰ ਮੁਤਾਬਕ ਮੌਤ ਅਟੱਲ ਹੈ ਤਾਂ ਫਿਰ ਇਹਨਾਂ ਨੂੰ ਮਰਨ ਤੋਂ ਕਿਹੜੀ ਸੁਰੱਖਿਆ ਬਚਾ ਸਕਦੀ ਹੈ?
ਉਹਨਾਂ ਕਿਹਾ ਕਿ ਸੁਰੱਖਿਆ ਦੀ ਲੋੜ ਤਾਂ ਆਮ ਜਨਤਾ ਨੂੰ ਹੈ ਜਿਸਨੂੰ ਸਰਕਾਰੀ ਅਫਸਰ, ਪੁਲਸ, ਅਦਾਲਤਾਂ ਹੀ ਲੁੱਟ ਤੇ ਮਾਰ ਰਹੀਆਂ ਹਨ। ਸੁਰੱਖਿਆ ਦੀ ਲੋੜ ਤਾਂ ਉਹਨਾਂ ਔਰਤਾਂ ਤੇ ਬੱਚੀਆਂ ਨੂੰ ਹੈ ਜਿਹਨਾਂ ਨੂੰ ਸਰਕਾਰੀ ਤੇ ਗੈਰ-ਸਰਕਾਰੀ ਦਰਿੰਦਿਆਂ ਵਲੋਂ ਆਪਣੀ ਹਵਸ ਦਾ ਸ਼ਿਕਾਰ ਬਣਾਇਆ ਜਾ ਰਿਹਾ ਹੈ। ਅਨੇਕ ਪੱਖੀ ਸੁਰੱਖਿਆ ਦੀ ਲੋੜ ਤਾਂ ਕੁੱਲੀ, ਗੁੱਲੀ ਤੇ ਜੁੱਲੀ ਲਈ ਸੰਘਰਸ਼ ਕਰ ਰਹੇ ਆਮ ਇਨਸਾਨ ਨੂੰ ਹੈ ਜੋ ਵੋਟਾਂ ਦੀ ਖਾਤਰ ਇਹਨਾਂ ਸੁਰੱਖਿਆ ਦੇ ਭੁੱਖੇ ਲੋਕਾਂ ਦੇ ਲਾਰਿਆਂ ਤੇ ਗੁੰਡਾਗਰਦੀ ਦਾ ਸ਼ਿਕਾਰ ਹੋ ਕੇ ਆਪਣੀਆਂ ਭਵਿੱਖੀ ਸੁਰੱਖਿਆਵਾਂ ਗੁਆ ਬਹਿੰਦਾ ਹੈ।