ਹਕੂਮਤੀ ਡੇਰਾਵਾਦ ਨਾਲ ਲੋਹਾ ਲੈਂਦਿਆਂ ਸ਼ਹੀਦੀਆਂ ਪਾਉਣ ਵਾਲੇ ਸਿੰਘਾਂ ਨੂੰ ਸ਼ਰਧਾਂਜਲੀ

ਸੈਨ ਫ਼ਰਾਂਸਿਸਕੋ-ਸੈਨ ਹੋਜ਼ੇ (ਬੀ.ਐਸ.ਖ਼ਾਲਸਾ) ਸੈਨ ਹੋਜ਼ੇ ਦੇ ਗੁਰਦੁਆਰਾ ਸਾਹਿਬ ਵਿਚ ਬੀਤੇ ਦਿਨ ਬੁੱਧਵਾਰ ਨੂੰ ਸਿੱਖ ਕੌਮ ਦੇ ਮਹਾਨ ਸ਼ਹੀਦ ਸਿੰਘਾਂ (ਭਾਈ ਕੰਵਲਜੀਤ ਸਿੰਘ, ਭਾਈ ਬਲਾਕਾਰ ਸਿੰਘ ਤੇ ਭਾਈ ਹਰਮੰਦਰ ਸਿੰਘ) ਦੀ ਯਾਦ ਵਿਚ, ਸ੍ਰੀ ਆਖੰਡ ਪਾਠ ਸਾਹਿਬ ਦੇ ਭੋਗ ਪਾਏ ਗਏ ਅਤੇ ਸ਼ਾਮਾਂ ਦਾ ਮੁੱਖ ਦੀਵਾਨ ਉਨ੍ਹਾਂ ਦੀਆਂ ਸ਼ਹਾਦਤਾਂ ਨੂੰ ਸਮਰਪਿਤ ਕੀਤਾ ਗਿਆ। ਦੀਵਾਨ ਦੀ ਸ਼ੁਰੂਆਤ ਕੀਰਤਨ ਤੋਂ ਸ਼ੁਰੂ ਹੋਈ ਜਿਸ ਵਿਚ ਭਾਈ ਕੁਲਤਾਰ ਸਿੰਘ ਦੇ ਜਥੇ ਤੇ ਭਾਈ ਨਰਿੰਦਰ ਸਿੰਘ ਦਿੱਲੀ ਵਾਲਿਆਂ ਦੇ ਜਥੇ ਨੇ ਵੈਰਾਗਮਈ, ਜੋਸ਼ੀਲੀ, ਸਹਿਜ ਭਰਪੂਰ, ਭਾਣਾ ਮੰਨਣ ਤੇ ਸੂਰਮੇ ਦੀ ਇਲਾਹੀ ਵਿਆਖਿਆ ਕਰਦੀ ਬਾਣੀ ਦਾ ਰਸ ਭਰਪੂਰ ਕੀਰਤਨ ਕੀਤਾ।ਕਥਾਕਾਰ ਭਾਈ ਕੁਲਤਾਰ ਸਿੰਘ ਹੁਰਾਂ ਨੇ ਗੁਰਬਾਣੀ ਦੀ ਕਥਾ ਕਰਦਿਆਂ ਯੋਧਿਆਂ ਦੀਆਂ ਗੱਲਾਂ, ਸ਼ਹੀਦੀ ਦੇ ਪ੍ਰਸੰਗ ਵਿਚ ਸੰਗਤਾਂ ਨਾਲ ਸਾਂਝੀਆਂ ਕੀਤੀਆਂ।
ਸ਼ਹੀਦੀ ਪਰਵਾਰ ਨਾਲ ਸੰਬਧਿਤ ਬੱਚੀਆਂ ਅੰਮ੍ਰਿਤ ਕੌਰ ਖ਼ਾਲਸਾ ਤੇ ਬੀਬੀ ਪੁਨੀਤ ਕੌਰ ਖ਼ਾਲਸਾ ਦੇ ਕੀਰਤਨੀ ਜਥੇ ਨੇ ਇਕ ਸ਼ਬਦ ਦਾ ਕੀਰਤਨ ਕਰਕੇ ਸ਼ਹੀਦਾਂ ਨੂੰ ਸ਼ਰਧਾਂਜਲੀ ਭੇਂਟ ਕੀਤੀ। ਸ਼ਹੀਦ ਸਿੰਘਾਂ ਦੀਆਂ ਤਸਵੀਰਾਂ ਦਾ ਇਕ ਸਲਾਈਡ ਸ਼ੋ ਪੇਸ਼ ਕੀਤਾ ਗਿਆ। ਸੈਨ ਹੋਜ਼ੇ ਦੇ ਗੁਰਦੁਆਰਾ ਸਾਹਿਬ ਦੇ ਜਨਰਲ ਸੱਕਤਰ, ਅਮਰੀਕਨ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਉਪ ਪ੍ਰਧਾਨ ਤੇ ਇਲਾਕੇ ਦੇ ਜ਼ਿਮੇਵਾਰ ਆਗੂ ਭਾਈ ਜਸਵੰਤ ਸਿੰਘ ਹੋਠੀ ਨੇ ਤਿੰਨਾਂ ਸ਼ਹੀਦਾਂ ਨੂੰ ਪ੍ਰਣਾਮ ਕਰਦਿਆਂ ਆਪਣੇ ਵੀਚਾਰ ਸੰਗਤਾਂ ਨਾਲ ਸਾਂਝੇ ਕਰਦਿਆਂ ਕਿਹਾ ਕਿ ਭਾਰਤ ਵਿਚ ਸਿੱਖਾਂ ਦੀ ਹਾਲਤ ਗ਼ੁਲਾਮੀ ਤੋਂ ਵੀ ਗਈ ਗੁਜ਼ਰੀ ਹੋ ਗਈ ਹੈ। ਕਦਮ ਕਦਮ ਤੇ ਸਾਨੂੰ ਦੂਜੇ ਦਰਜੇ ਦੇ ਸ਼ਹਿਰੀ ਹੋਣ ਦਾ ਅਹਿਸਾਸ ਬੜੇ ਦਰਿੰਦਗੀ ਭਰੇ ਢੰਗ ਨਾਲ ਕਰਵਾਇਆ ਜਾ ਰਿਹਾ ਹੈ। ਕਦੇ ਸਿੱਖਾਂ ਨੂੰ ਸ਼ਹੀਦ ਕੀਤਾ ਜਾਂਦਾ ਹੈ ਤੇ ਕਦੇ ਸਾਡੇ ਮਹਾਨ ਇਤਿਹਾਸਕ ਸਥਾਨਾਂ ਦੇ ਸਿਧਾਂਤਕ ਪ੍ਰਬੰਧ ਨੂੰ ਰੋਲਕੇ ਜ਼ਲੀਲ ਕੀਤਾ ਜਾਂਦਾ ਹੈ। ਸਿੱਖ ਅਵਾਮ ਤਾਂ ਹਰ ਜ਼ੁਲਮ ਪ੍ਰਤੀ ਰੋਸ ਪ੍ਰਗਟ ਕਰਨ ਲਈ ਗਲੀਆਂ ਤੇ ਸੜਕਾਂ ਤੇ ਆਕੇ ਆਪਣੇ ਬਾਗ਼ੀਆਨਾ ਅੰਦਾਜ਼ ਦਾ ਮੁਜ਼ਾਹਰਾ ਕਰਕੇ ਸ਼ਹਾਦਤਾਂ ਦੇ ਜਾਮ ਪੀ ਰਿਹਾ ਹੈ ਪਰ ਲੋਕਾਂ ਦੁਆਰਾ ਚੁਣੇ ਹੋਏ ਲੀਡਰ ਦੀਵਾਲੀਆ ਸੋਚ ਦਾ ਮੁਜ਼ਾਹਰਾ ਕਰਕੇ ਆਪਣਾ ਜਲੂਸ ਤਾਂ ਕੱਢ ਹੀ ਰਹੇ ਹਨ ਪਰ ਖ਼ਾਲਸਾ ਪੰਥ ਦਾ ਕੀਮਤੀ ਵਕਤ ਬਰਬਾਦ ਕਰ ਰਹੇ ਹਨ।ਭਾਈ ਹੋਠੀ ਨੇ ਸੰਗਤਾਂ ਨੂੰ ਵੀਚਾਰ ਗੋਸ਼ਟੀਆਂ ਨਾਲ ਗਿਆਨਵਾਨ ਹੋ ਕੇ ਨਿੰਕਮੇ ਲੀਡਰਾਂ ਤੋਂ ਖਹਿੜਾ ਛੁਡਾਉਣ ਲਈ ਬੇਨਤੀ ਕੀਤੀ।
ਇਸਤੋਂ ਬਾਅਦ ਸ਼ਹੀਦੀ ਪ੍ਰਵਾਰਾਂ ਵੱਲੋਂ ਬੋਲਦਿਆਂ ਭਾਈ ਬਲਵਿੰਦਰਪਾਲ ਸਿੰਘ ਨੇ ਤਿੰਨਾਂ ਸ਼ਹੀਦਾਂ ਨੂੰ ਸ਼ਰਧਾ ਦੇ ਫ਼ੁੱਲ ਭੇਂਟ ਕਰਦਿਆਂ ਕਿਹਾ ਕਿ ਡੇਰਾਵਾਦ ਦੇ ਖੂੰਨੀ ਹੱਥਾਂ ਪਿੱਛੇ ਹਿੰਦੋਸਤਾਨ ਦੀ ਹਕੂਮਤ ਦੇ ਲਹੂ ਲਿਬੜੇ ਹੱਥ ਹਨ ਜੋ ਸਿੱਖੀ ਦਾ ਖੁਰਾ ਖੋਜ ਮਿਟਾਉਣ ਤੇ ਤੁੱਲੀ ਹੋਈ ਹੈ। ਰਾਜ ਸ਼ਕਤੀ ਦੇ ਜ਼ੋਰ ਤੇ ਸਰਮਾਏ ਤੇ ਪਾਲੀਆਂ ਜਾਣ ਵਾਲੀਆਂ ਸੂਹੀਆ ਏਜੰਸੀਆਂ, ਸਿੱਖ ਕੌਮ ਨੂੰ ਭਜਾ ਭਜਾ ਕੇ ਥਕਾ ਦੇਣਾ ਚਾਹੁੰਦੀਆਂ ਹਨ ਤਾਂ ਕਿ ਸਿੱਖ, ਅਣਖ ਦਾ ਮਾਦਾ ਮੁਕਾ ਕੇ ਹਿੰਦੂਵਾਦ ਦੇ ਗ਼ਲਬੇ ਨੂੰ ਕਬੂਲ ਲੈਣ। ਉਨ੍ਹਾਂ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਜਥੇਦਾਰ ਨੂੰ ਕਾਲੀ ਦਲ ਬਾਦਲ ਵੱਲੋਂ ਕੋਝੇ ਤੇ ਅਮਾਨਵੀ ਤਰੀਕੇ ਨਾਲ ਘਰ ਤੋਰਨ ਦੇ ਢੰਗ ਤਰੀਕੇ ਦੀ ਆਲੋਚਨਾ ਕਰਦਿਆਂ ਕਿਹਾ ਕਿ ਤਿੰਨਾਂ ਸ਼ਹੀਦ ਸਿੰਘਾਂ ਦੀ ਸ਼ਹੀਦੀ ਤੇ ਜਥੇਦਾਰ ਦੀ ਪਦਵੀ ਨੂੰ ਰੋਲਣ ਲਈ ਕੇਂਦਰ ਸਰਕਾਰ, ਬਾਦਲ-ਭਾਜਪਾ ਸਰਕਾਰ ਤੇ ਇਸਦੀ ਝਾੜੂ ਬਰਦਾਰ ਸ਼੍ਰੋਮਣੀ ਕਮੇਟੀ ਜ਼ਿਮੇਵਾਰ ਹਨ ਪਰ ਅਸਲ ਤਾਕਤ, ਇਨ੍ਹਾਂ ਦੇ ਪਿੱਛੇ ਬੈਠੀ ਇਕੋ ਹੀ ਬ੍ਰਾਹਮਣਵਾਦੀ ਸ਼ਕਤੀ ਜ਼ਿਮੇਵਾਰ ਹੈ। ਤਿੰਨਾਂ ਸਿੰਘਾਂ ਦੀਆਂ ਸ਼ਹੀਦੀਆਂ ਸਾਨੂੰ ਇਕੋ ਹੀ ਪੈਗ਼ਾਮ ਦੇਂਦੀਆਂ ਹਨ ਕਿ ਅਸਾਂ ਸਦੀਵੀ ਮੁਕਤੀ ਭਾਵ ਅਜ਼ਾਦੀ ਹਾਸਲ ਕਰਨੀ ਹੈ ਤੇ ਅਜ਼ਾਦ ਹੋਣ ਲਈ ਸਾਨੂੰ ਆਤਮਿਕ ਤੌਰ ਤੇ ਮਜ਼ਬੂਤ ਹੋਣਾ ਪਏਗਾ। ਕੋਈ ਸਿੱਖ ਭਾਵੇਂ ਪੰਜਾਬ ਵਿਚ ਹੈ ਜਾਂ ਪਰਦੇਸ ਵਿਚ, ਉਸਨੂੰ ਹਕੂਮਤੀ ਜਬਰ ਦਾ ਸ਼ਰੇਆਮ ਵਿਰੋਧ ਕਰਨਾ ਚਾਹੀਦਾ ਹੈ ਤੇ ਇਹ ਜਬਰ ਭਾਵੇ ਕਾਲੀ ਦਲ ਬਾਦਲ ਕਰੇ, ਕਾਂਗਰਸ, ਭਾਜਪਾ ਜਾਂ ਕਾਮਰੇਡ ਕਰਨ। ਅਖ਼ੀਰ ਵਿਚ ਉਨ੍ਹਾਂ ਕਿਹਾ ਕਿ ਸਾਨੂੰ ਡੇਰੇ ਦੇ ਸਾਧਾਂ, ਬਾਬਿਆਂ ਤੋਂ ਖਹਿੜਾ ਛੁਡਾ ਕੇ ਸ਼ਬਦ ਗੁਰੂ ਸ੍ਰੀ ਗੁਰੂ ਗਰੰਥ ਸਾਹਿਬ ਨਾਲ ਹੀ ਵਾਸਤਾ ਰਖਣਾ ਚਾਹੀਦਾ ਹੈ।
ਇਸ ਵਾਰ ਫ਼ਿਰ ਸੈਨ ਹੋਜ਼ੇ ਗੁਰਦੁਆਰਾ ਸਾਹਿਬ ਦੀ ਪ੍ਰਬੰਧਕ ਕਮੇਟੀ ਨੇ ਜ਼ਖ਼ਮੀ ਸਿੱਖ ਕੌਮ ਦੇ ਮੋਢੇ ਨਾਲ ਮੋਢਾ ਜੋੜਦਿਆਂ, ਚੰਗਾ ਹੰਭਲਾ ਮਾਰ ਕੇ ਸ਼ਹੀਦੀ ਸਮਾਗਮ ਉਲੀਕਿਆ ਤੇ ਸਿੱਖ ਕੌਮ ਦੇ ਸ਼ਹੀਦਾਂ ਦਾ ਅਸਲ ਮਨੋਰਥ ਸੰਗਤਾਂ ਨਾਲ ਸਾਂਝਾ ਕੀਤਾ।

ਗਿਆਨੀ ਗੁਰਬਚਨ ਸਿੰਘ ਨੇ ਅਕਾਲ ਤਖਤ ਸਾਹਿਬ ਦੇ ਕਾਰਜਕਾਰੀ ਜਥੇਦਾਰ ਵਜੋਂ ਸੇਵਾ ਸੰਭਾਲੀ
ਸੌਦਾ ਸਾਧ ਵਿਰੁੱਧ ਸਖ਼ਤ ਕਾਰਵਾਈ ਕੀਤੀ ਜਾਵੇ : ਜਥੇ. ਗੁਰਬਚਨ ਸਿੰਘ

ਅੰਮ੍ਰਿਤਸਰ, 7 ਅਗਸਤ - ਸਿੱਖ ਪੰਥ ਨੂੰ ਸਮੇਂ ਦਾ ਹਾਣੀ ਬਨਾਉਣ ਤੇ ਸਮਕਾਲੀ ਚੁਣੌਤੀਆਂ ਦਾ ਟਾਕਰਾ ਕਰਨ ਲਈ ਇਕ ਵੱਡੇ ਹੰਭਲੇ ਦੀ ਲੋੜ ਹੈ। ਮੇਰੀ ਦਿਲੀ ਰੀਝ ਹੈ ਕਿ ਸਿੱਖ ਕੌਮ ਦੀ ਨਿਆਰੀ ਹਸਤੀ ਦੁਨੀਆਂ ਦੀਆਂ ਬਾਕੀ ਕੌਮਾਂ ਲਈ ਹਮੇਸ਼ਾ ਪ੍ਰੇਰਨਾ ਸਰੋਤ ਬਣੀ ਰਹੇ। ਗੁਰਬਾਣੀ ਦੇ ਪਾਵਨ ਫ਼ੁਰਮਾਨ 'ਇਕਾ ਬਾਣੀ ਇਕੁ ਗੁਰੁ ਇਕੋ ਸਬਦੁ ਵੀਚਾਰਿ' ਅਨੁਸਾਰ ਇਕ ਗੁਰੂ, ਇਕ ਵਿਚਾਰਧਾਰਾ, ਇਕ ਮਰਿਯਾਦਾ ਦਾ ਸਿਧਾਂਤ ਸਿੱਖ ਕੌਮ ਦੀ ਸ਼ਕਤੀ ਹੈ। ਇਨ੍ਹਾਂ ਵਿਚਾਰਾਂ ਦਾ ਪ੍ਰਗਟਾਵਾ ਸਿੰਘ ਸਾਹਿਬ ਗਿਆਨੀ ਗੁਰਬਚਨ ਸਿੰਘ ਜੀ ਨੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਕਾਰਜਕਾਰੀ ਜਥੇਦਾਰ ਵਜੋਂ ਸੇਵਾ ਸੰਭਾਲ ਸਮਾਗਮ ਸਮੇਂ ਪੰਥ ਦੇ ਵੱਡੇ ਪ੍ਰਤੀਨਿਧੀ ਇਕੱਠ ਨੂੰ ਸੰਬੋਧਨ ਕਰਦਿਆਂ ਕੀਤਾ। ਉਨ੍ਹਾਂ ਕਿਹਾ ਕਿ ਛੇਵੇਂ ਪਾਤਸ਼ਾਹ ਸ੍ਰੀ ਗੁਰੂ ਹਰਿਗੋਬਿੰਦ ਸਾਹਿਬ ਜੀ ਨੇ ਸ੍ਰੀ ਹਰਿਮੰਦਰ ਸਾਹਿਬ ਦੇ ਐਨ ਸਾਹਮਣੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੀ ਸਥਾਪਨਾ ਕੀਤੀ ਤਾਂ ਜੋ ਸਮਕਾਲੀ ਰਾਜਸੀ ਧਿਰਾਂ ਨੂੰ ਸਿੱਖ ਧਰਮ ਦੀ ਹੋਂਦ ਦਾ ਅਹਿਸਾਸ ਹੁੰਦਾ ਰਹੇ। ਸ੍ਰੀ ਅਕਾਲ ਤਖ਼ਤ ਸਾਹਿਬ ਤੋਂ ਸਮੇਂ-ਸਮੇਂ ਗੁਰੂ ਘਰ ਦੇ ਵਿਰੋਧੀਆਂ ਸਮਾਜਿਕ-ਰਾਜਸੀ ਬੇਇਨਸਾਫੀਆਂ, ਗੁਰਦੁਆਰਿਆਂ ਦੇ ਪ੍ਰਬੰਧ ਸੁਧਾਰ ਅਤੇ ਸਿੱਖੀ ਦੇ ਪ੍ਰਚਾਰ ਤੇ ਪ੍ਰਸਾਰ ਹਿਤ ਲਹਿਰਾਂ ਉਠਦੀਆਂ ਰਹੀਆਂ ਅਤੇ ਉਦੋਂ ਤੋਂ ਲੈ ਕੇ ਵਰਤਮਾਨ ਸਮੇਂ ਤਕ ਸਿੱਖਾਂ ਦੀ ਪ੍ਰਭੂਸੱਤਾ ਸੰਪੰਨ ਰਾਜਸੀ ਸੋਚ ਦੇ ਪ੍ਰਤੀਕ ਸ੍ਰੀ ਅਕਾਲ ਤਖ਼ਤ ਸਾਹਿਬ ਪ੍ਰਤੀ ਸਮਕਾਲੀ ਹਕੂਮਤਾਂ ਦਾ ਨਜ਼ਰੀਆ ਹਮੇਸ਼ਾਂ ਵਿਰੋਧ ਵਾਲਾ ਰਿਹਾ ਪਰ ਇਤਿਹਾਸ ਗਵਾਹ ਹੈ ਕਿ ਸਿੱਖ ਪੰਥ ਨੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਤੋਂ ਹੋਏ ਹਰ ਹੁਕਮ ਅੱਗੇ ਸਿਰ ਨਿਵਾਂਦਿਆਂ ਕੌਮੀ ਮਾਣ ਨੂੰ ਸਿਰਜਣ ਹਿਤ ਆਪਣੀਆਂ ਜਾਨਾਂ ਦੀ ਵੀ ਪ੍ਰਵਾਹ ਨਹੀਂ ਕੀਤੀ। ਸ੍ਰੀ ਅਕਾਲ ਤਖ਼ਤ ਸਾਹਿਬ ਤੋਂ ਹੋਏ ਹੁਕਮਨਾਮੇ, ਆਦੇਸ਼ ਜਾਂ ਸੰਦੇਸ਼ ਨੂੰ ਗੁਰੂ ਖ਼ਾਲਸਾ ਪੰਥ ਦੇ ਮੰਨਣ ਵਾਲਿਆਂ ਨੇ ਹਮੇਸ਼ਾਂ ਹੀ ਸਿਰ ਨਿਵਾ ਕੇ ਪ੍ਰਵਾਨ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਸ੍ਰੀ ਅਕਾਲ ਤਖ਼ਤ ਸਾਹਿਬ ਨੇ ਹਰ ਸਮੇਂ ਸਿੱਖ ਭਾਵਨਾਵਾਂ ਦੀ ਤਰਜਮਾਨੀ ਕਰਦਿਆਂ ਸਮੇਂ-ਸਮੇਂ ਖ਼ਾਲਸਾ ਪੰਥ ਦੀ ਅਗਵਾਈ ਕੀਤੀ ਹੈ ਅਤੇ ਕਰਦਾ ਰਹੇਗਾ। ਵਰਤਮਾਨ ਸਮੇਂ ਖ਼ਾਲਸਾ ਪੰਥ ਦੇ ਸਾਹਮਣੇ ਬਹੁਤ ਸਾਰੀਆਂ ਚੁਣੌਤੀਆਂ ਅਤੇ ਸਮੱਸਿਆਵਾਂ ਹਨ। ਇਕ ਪਾਸੇ ਤਾਂ ਪਤਿਤਪੁਣੇ ਵਿਚ ਦਿਨੋਂ ਦਿਨ ਵਾਧਾ ਹੋ ਰਿਹਾ ਹੈ, ਸਿੱਖ ਜੁਆਨੀ ਨਸ਼ਿਆਂ ਵਿੱਚ ਗ੍ਰਸੀ ਹੋਈ ਹੈ, ਭਰੂਣ ਹੱਤਿਆ ਦਿਨੋਂ ਦਿਨ ਵੱਧ ਰਹੀ ਹੈ ਅਤੇ ਦੂਸਰੇ ਪਾਸੇ ਸਿੱਖ ਵਿਰੋਧੀ ਸ਼ਕਤੀਆਂ ਡੇਰਾਵਾਦ ਨੂੰ ਉਤਸ਼ਾਹਿਤ ਕਰ ਰਹੀਆਂ ਹਨ। ਧਾਰਮਿਕ ਚੇਤੰਨਤਾ ਦੀ ਘਾਟ ਕਰਕੇ ਕਈ ਭੁੱਲੜ ਵੀਰ ਇਨ੍ਹਾਂ ਡੇਰੇਦਾਰਾਂ ਦੇ ਚੁੰਗਲ ਵਿਚ ਫਸ ਰਹੇ ਹਨ। ਉਨ੍ਹਾਂ ਸਮਾਗਮ ਤੋਂ ਬਾਅਦ ਪੱਤਰਕਾਰਾਂ ਨਾਲ ਗੱਬਾਤ ਕਰਦਿਆਂ ਕਿਹਾ ਕਿ ਡੇਰਾ ਸਿਰਸਾ ਦੇ ਮੁਖੀ ਗੁਰਮੀਤ ਰਾਮ ਰਹੀਮ ਦੀਆਂ ਸਿੱਖ ਵਿਰੋਧੀ ਕਾਰਵਾਈਆਂ ਨੂੰ ਨੱਥ ਪਾਉਣ ਲਈ ਸਖਤ ਕਾਰਵਾਈ ਕੀਤੇ ਜਾਣ ਦੀ ਲੋੜ ਹੈ। ਉਨ੍ਹਾਂ ਕਿਹਾ ਕਿ ਮੈਂ ਕੇਂਦਰ ਸਰਕਾਰ ਦੇ ਨਾਲ ਨਾਲ ਪੰਜਾਬ ਅਤੇ ਹਰਿਆਣਾ ਦੀਆਂ ਸਰਕਾਰਾਂ ਨੂੰ ਡੇਰਾ ਸੌਦਾ ਸਾਧ ਦੀਆਂ ਗਤੀਵਿਧੀਆਂ ਨੂੰ ਨੱਥ ਪਾਉਣ ਲਈ ਲੋੜੀਂਦੀ ਕਾਰਵਾਈ ਕਰਨ ਦੀ ਅਪੀਲ ਕਰਦਾ ਹਾਂ। ਉਨ੍ਹਾਂ ਸਮੂੰਹ ਸਿੱਖ ਸੰਗਤਾਂ, ਸਭਾ ਸੁਸਾਇਟੀਆਂ, ਸਿੰਘ ਸਭਾਵਾਂ, ਸੰਪਰਦਾਵਾਂ ਨੂੰ ਅਪੀਲ ਕੀਤੀ ਕਿ ਉਹ ਇਸ ਨਾਜ਼ੁਕ ਮੌਕੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਨੂੰ ਸਮਰਪਿਤ ਹੁੰਦਿਆਂ ਦਾਸ ਨੂੰ ਸਹਿਯੋਗ ਦੇਣ ਤਾਂ ਜੋ ਉਹ ਆਪਣੇ ਜ਼ਿੰਮੇ ਲੱਗੀ ਸੇਵਾ ਗੁਰੂ ਦੀ ਭੈ-ਭਾਵਣੀ, ਸਿੱਖ ਸਿਧਾਂਤਾਂ ਤੇ ਮਰਿਯਾਦਾ ਦੀ ਰੌਸ਼ਨੀ 'ਚ ਨਿਭਾ ਸਕਣ। ਇਸ ਮੌਕੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਜਥੇਦਾਰ ਅਵਤਾਰ ਸਿੰਘ ਨੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਕਾਰਜਕਾਰੀ ਜਥੇਦਾਰ ਸਿੰਘ ਸਾਹਿਬ ਗਿਆਨੀ ਗੁਰਬਚਨ ਸਿੰਘ ਜੀ ਨੂੰ ਸੇਵਾ ਸੰਭਾਲਣ 'ਤੇ ਮੁਬਾਰਕਬਾਦ ਦਿੰਦਿਆਂ ਕਿਹਾ ਕਿ ਸ੍ਰੀ ਗੁਰੂ ਰਾਮਦਾਸ ਜੀ ਦੇ ਪਾਵਨ ਦਰ 'ਤੇ ਨੇਕਨੀਤੀ, ਸ਼ਰਧਾ ਤੇ ਸਤਿਕਾਰ ਨਾਲ ਕੀਤੀ ਸੇਵਾ ਸਦਕਾ ਹੀ ਅੱਜ ਇਨ੍ਹਾਂ ਨੂੰ ਸਿੱਖ ਜਗਤ ਦੇ ਮਹਾਨ ਅਸਥਾਨ ਸ੍ਰੀ ਅਕਾਲ ਤਖ਼ਤ ਸਾਹਿਬ ਜੀ ਦੇ ਕਾਰਜਕਾਰੀ ਜਥੇਦਾਰ ਵਜੋਂ ਸੇਵਾ ਬਖਸ਼ਿਸ਼ ਹੋਈ ਹੈ।ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਦੀ ਨਿਯੁਕਤੀ ਅਜਿਹੇ ਸਮੇਂ ਹੋਈ ਹੈ ਜਦੋਂ ਸਿੱਖ ਪੰਥ ਗੰਭੀਰ ਚੁਣੌਤੀਆਂ ਦਾ ਸਾਹਮਣਾ ਕਰ ਰਿਹਾ ਹੈ, ਨਸ਼ਾਖੋਰੀ, ਪਤਿਤਪੁਣਾ, ਸਮਾਜਕ ਕੁਰੀਤੀਆਂ ਤੋਂ ਇਲਾਵਾ ਸਿੱਖ ਵਿਰੋਧੀ ਸ਼ਕਤੀਆਂ ਸਿੱਖ ਪੰਥ ਨੂੰ ਖੋਰ ਲਾਉਣ, ਪਤਿਤਪੁਣਾ, ਸਮਾਜਕ ਕੁਰੀਤੀਆਂ ਅਤੇ ਪਾਖੰਡੀ ਡੇਰੇਦਾਰਾਂ ਵਲੋਂ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੀ ਸਰਵਉੱਚਤਾ ਨੂੰ ਚੁਣੌਤੀ ਦਿੱਤੇ ਜਾਣ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਸਤਿਗੁਰ ਕ੍ਰਿਪਾ ਕਰਨ ਕਿ ਸਿੰਘ ਸਾਹਿਬ ਨੂੰ ਇਨ੍ਹਾਂ ਚੁਣੌਤੀਆਂ ਦਾ ਸਾਹਮਣਾ ਕਰਨ ਦੇ ਸਮਰੱਥ ਬਨਾਉਣ। ਉਨ੍ਹਾਂ ਕਿਹਾ ਕਿ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਸਿੱਖ ਜਗਤ ਦੀ ਚੁਣੀ ਹੋਈ ਸਿਰਮੌਰ ਪ੍ਰਤੀਨਿਧ ਸੰਸਥਾ ਹੈ ਅਤੇ ਇਸ ਵਲੋਂ ਕੀਤਾ ਹੋਇਆ ਫੈਸਲਾ ਸਿੱਖ ਪੰਥ ਦਾ ਫੈਸਲਾ ਹੈ ਅਤੇ ਜੋ ਇਸ ਦੀ ਵਿਰੋਧਤਾ ਕਰ ਰਹੇ ਹਨ, ਇਹ ਸਮਝਿਆ ਜਾਵੇਗਾ ਕਿ ਉਹ ਪੰਥ ਵਿਰੋਧੀ ਤਾਕਤਾਂ ਦੀ ਪਿੱਠ ਪੂਰ ਰਹੇ ਹਨ। ਉਨ੍ਹਾਂ ਇਸ ਮਹਾਨ ਸੰਸਥਾ ਦੀ ਅਥਾਰਟੀ ਨੂੰ ਚੁਣੌਤੀ ਦੇਣ ਵਾਲਿਆਂ ਨੂੰ ਅਪੀਲ ਕੀਤੀ ਕਿ ਉਹ ਨਿੱਜੀ ਸਵਾਰਥਾਂ ਨੂੰ ਤਿਆਗਕੇ ਕੌਮ ਦੇ ਵਡੇਰੇ ਹਿਤਾਂ ਲਈ ਸਿੰਘ ਸਾਹਿਬ ਨੂੰ ਸਹਿਯੋਗ ਦੇਣ। ਉਨ੍ਹਾਂ ਕਿਹਾ ਕਿ ਪੰਥ ਵਿਚ ਜੋ ਕਿਸੇ ਵੀ ਪ੍ਰਕਾਰ ਦੇ ਵਖਰੇਵੇਂ ਹਨ, ਪੰਥ ਦੇ ਹਿਤਾਂ ਦੀ ਖਾਤਰ 'ਹੋਇ ਇਕਤ੍ਰ ਮਿਲਹੁ ਮੇਰੇ ਭਾਈ ਦੁਬਿਧਾ ਦੂਰਿ ਕਰਹੁ ਲਿਵ ਲਾਇ' ਦੀ ਰੌਸ਼ਨੀ ਵਿਚ ਮਿਲ ਬੈਠ ਕੇ ਹੱਲ ਕੀਤੇ ਜਾਣੇ ਚਾਹੀਦੇ ਹਨ। ਉਨ੍ਹਾਂ ਸੇਵਾ ਸੰਭਾਲ ਸਮਾਗਮ ਸਮੇਂ ਪੁੱਜੇ ਸਮੂੰਹ ਸਿੱਖ ਸੰਪਰਦਾਵਾਂ, ਨਿਰਮਲੇ, ਦਮਦਮੀ ਟਕਸਾਲ, ਨਿਹੰਗ ਸਿੰਘ ਜਥੇਬੰਦੀਆਂ, ਸ਼੍ਰੋਮਣੀ ਅਕਾਲੀ ਦਲ, ਸਿੱਖ ਸਟੂਡੈਂਟਸ ਫੈਡਰੇਸ਼ਨ, ਧਾਰਮਿਕ ਸਭਾ ਸੁਸਾਇਟੀਆਂ, ਸੰਤਾਂ-ਮਹਾਂਪੁਰਸ਼ਾਂ, ਦੇਸ-ਵਿਦੇਸਾਂ ਤੋਂ ਪੁੱਜੀਆਂ ਸਿੱਖ ਜਥੇਬੰਦੀਆਂ ਦੇ ਨੁਮਾਇੰਦਿਆਂ ਦਾ ਤਹਿ ਦਿਲੋਂ ਧੰਨਵਾਦ ਕੀਤਾ।
ਇਸ ਤੋਂ ਪਹਿਲਾਂ ਸ੍ਰੀ ਹਰਿਮੰਦਰ ਸਾਹਿਬ ਦੇ ਐਡੀ: ਹੈੱਡ ਗ੍ਰੰਥੀ ਸਿੰਘ ਸਾਹਿਬ ਗਿਆਨੀ ਮੋਹਨ ਸਿੰਘ ਅਤੇ ਗ੍ਰੰਥੀ ਸਿੰਘ ਸਿੰਘ ਸਾਹਿਬ ਗਿਆਨੀ ਜਸਵਿੰਦਰ ਸਿੰਘ ਨੇ ਸਿੰਘ ਸਾਹਿਬ ਗਿਆਨੀ ਗੁਰਬਚਨ ਸਿੰਘ ਜੀ ਨੂੰ ਸ੍ਰੀ ਅਕਾਲ ਤਖ਼ਤ ਸਾਹਿਬ ਜੀ ਦੇ ਕਾਰਜਕਾਰੀ ਜਥੇਦਾਰ ਵਜੋਂ ਨਿਯੁਕਤ ਕੀਤੇ ਜਾਣ ਦਾ ਐਲਾਨ ਕੀਤਾ ਅਤੇ ਸਿੰਘ ਸਾਹਿਬ ਗਿਆਨੀ ਜਗਤਾਰ ਸਿੰਘ, ਸਿੰਘ ਸਾਹਿਬ ਗਿਆਨੀ ਮੱਲ ਸਿੰਘ, ਤਖ਼ਤ ਸ੍ਰੀ ਕੇਸਗੜ੍ਹ ਸਾਹਿਬ ਦੇ ਜਥੇਦਾਰ ਸਿੰਘ ਸਾਹਿਬ ਗਿਆਨੀ ਤਰਲੋਚਨ ਸਿੰਘ, ਤਖ਼ਤ ਸ੍ਰੀ ਦਮਦਮਾ ਸਾਹਿਬ ਤਲਵੰਡੀ ਸਾਬੋ ਦੇ ਜਥੇਦਾਰ ਸਿੰਘ ਸਾਹਿਬ ਗਿਆਨੀ ਬਲਵੰਤ ਸਿੰਘ ਨੰਦਗੜ੍ਹ, ਤਖ਼ਤ ਸ੍ਰੀ ਪਟਨਾ ਸਾਹਿਬ ਦੇ ਜਥੇਦਾਰ ਸਿੰਘ ਸਾਹਿਬ ਗਿਆਨੀ ਇਕਬਾਲ ਸਿੰਘ, ਤਖ਼ਤ ਸ੍ਰੀ ਹਜ਼ੂਰ ਸਾਹਿਬ ਵਲੋਂ ਹੈੱਡ ਗ੍ਰੰਥੀ ਗਿਆਨੀ ਪ੍ਰਤਾਪ ਸਿੰਘ, ਹੈੱਡਗ੍ਰੰਥੀ ਸ੍ਰੀ ਅਕਾਲ ਤਖ਼ਤ ਸਾਹਿਬ ਗਿਆਨੀ ਰਵੇਲ ਸਿੰਘ, ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵਲੋਂ ਪ੍ਰਧਾਨ ਜਥੇਦਾਰ ਅਵਤਾਰ ਸਿੰਘ, ਸ਼੍ਰੋਮਣੀ ਅਕਾਲੀ ਦਲ ਵਲੋਂ ਪ੍ਰੋ: ਪ੍ਰੇਮ ਸਿੰਘ ਚੰਦੂਮਾਜਰਾ, ਸ਼੍ਰੋਮਣੀ ਅਕਾਲੀ ਦਲ ਦਿੱਲੀ ਵਲੋਂ ਜਥੇਦਾਰ ਅਵਤਾਰ ਸਿੰਘ ਹਿਤ, ਸਿੱਖ ਸਟੂਡੈਂਟਸ ਫੈਡਰੇਸ਼ਨ ਵਲੋਂ ਸ. ਗੁਰਚਰਨ ਸਿੰਘ ਗਰੇਵਾਲ ਤੇ ਸ. ਮਨਜੀਤ ਸਿੰਘ ਭੋਮਾ ਯੂਥ ਅਕਾਲੀ ਦਲ ਵਲੋਂ ਸ. ਕਿਰਨਬੀਰ ਸਿੰਘ ਕੰਗ, ਦਮਦਮੀ ਟਕਸਾਲ (ਮਹਿਤਾ) ਦੇ ਮੁਖੀ ਗਿਆਨੀ ਹਰਨਾਮ ਸਿੰਘ ਖ਼ਾਲਸਾ, ਦਮਦਮੀ ਟਕਸਾਲ (ਸੰਗਰਾਵਾਂ) ਦੇ ਮੁਖੀ ਭਾਈ ਰਾਮ ਸਿੰਘ, ਬਿਧੀ ਚੰਦ ਸੰਪਰਦਾ ਦੇ ਮੁਖੀ ਬਾਬਾ ਦਇਆ ਸਿੰਘ ਸੁਰਸਿੰਘ, ਧਰਮ ਪ੍ਰਚਾਰ ਲਹਿਰ ਤੇ ਸਿੱਖ ਵਿਰਸਾ ਸੰਭਾਲ ਮੁਹਿੰਮ ਦੇ ਮੁੱਖ ਸੇਵਾਦਾਰ ਗਿਆਨੀ ਬਲਦੇਵ ਸਿੰਘ, ਚੀਫ਼ ਖ਼ਾਲਸਾ ਦੀਵਾਨ ਵਲੋਂ ਸ. ਭਾਗ ਸਿੰਘ ਅਣਖੀ ਤੇ ਸ. ਗੁਰਚਰਨ ਸਿੰਘ (ਚੱਢਾ), ਸਾਬਕਾ ਜਥੇਦਾਰ ਸ੍ਰੀ ਅਕਾਲ ਤਖ਼ਤ ਸਾਹਿਬ ਗਿਆਨੀ ਪੂਰਨ ਸਿੰਘ ਤੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਸਾਬਕਾ ਹੈੱਡ ਗ੍ਰੰਥੀ ਗਿਆਨੀ ਭਗਵਾਨ ਸਿੰਘ, ਭਾਈ ਕਰਨੈਲ ਸਿੰਘ ਗਰੀਬ ਅੰਬਾਲਾ ਨੇ ਸਿੰਘ ਸਾਹਿਬ ਗਿਆਨੀ ਗੁਰਬਚਨ ਸਿੰਘ ਨੂੰ ਦਸਤਾਰਾਂ ਤੇ ਸਿਰੋਪਾਓ ਭੇਟ ਕੀਤੇ। ਇਸ ਤੋਂ ਪਹਿਲਾਂ ਹਜ਼ੂਰੀ ਰਾਗੀ ਭਾਈ ਇੰਦਰਜੀਤ ਸਿੰਘ ਬੰਬੇ ਵਾਲੇ ਦੇ ਰਾਗੀ ਜਥੇ ਨੇ ਇਲਾਹੀ ਬਾਣੀ ਦਾ ਕੀਰਤਨ ਕੀਤਾ ਅਤੇ ਅਰਦਾਸ ਗਿਆਨੀ ਧਰਮ ਸਿੰਘ ਅਰਦਾਸੀਏ ਨੇ ਕੀਤੀ।ਇਸ ਮੌਕੇ ਸ਼੍ਰੋਮਣੀ ਕਮੇਟੀ ਦੇ ਸੀਨੀਅਰ ਮੀਤ ਪ੍ਰਧਾਨ ਸ. ਰਘੂਜੀਤ ਸਿੰਘ ਕਰਨਾਲ, ਅੰਤ੍ਰਿੰਗ ਮੈਂਬਰ ਸੰਤ ਟੇਕ ਸਿੰਘ ਧਨੌਲਾ, ਸ. ਰਾਜਿੰਦਰ ਸਿੰਘ ਮਹਿਤਾ, ਸ. ਗੁਰਬਚਨ ਸਿੰਘ ਕਰਮੂੰਵਾਲਾ ਤੇ ਸ. ਦਿਆਲ ਸਿੰਘ ਕੋਲਿਆਂਵਾਲੀ, ਮੈਂਬਰ ਸ਼੍ਰੋਮਣੀ ਕਮੇਟੀ ਬੀਬੀ ਅਜਾਇਬ ਕੌਰ ਭੋਤਨਾ, ਮਾਸਟਰ ਜਗੀਰ ਸਿੰਘ, ਸ. ਜਸਵਿੰਦਰ ਸਿੰਘ ਐਡਵੋਕੇਟ, ਸ. ਬਲਬੀਰ ਸਿੰਘ ਕੁਰਾਲਾ, ਸ. ਅਮਰਿੰਦਰ ਸਿੰਘ ਚੰਡੀਗੜ੍ਹ, ਸ. ਬਲਦੇਵ ਸਿੰਘ ਐਮ.ਏ., ਸ. ਕਵਲਇੰਦਰ ਸਿੰਘ ਠੇਕੇਦਾਰ, ਸ. ਗੋਪਾਲ ਸਿੰਘ ਜਾਣੀਆਂ, ਸ. ਸਵਿੰਦਰ ਸਿੰਘ ਸੱਭਰਵਾਲ, ਸ. ਹਰਦਿਆਲ ਸਿੰਘ ਸੁਰਸਿੰਘ, ਸ. ਗੁਰਪਾਲ ਸਿੰਘ ਗੋਰਾ ਕਾਦੀਆਂ, ਸ. ਸੁਰਜੀਤ ਸਿੰਘ ਮਮੇਰਾਕਲਾਂ, ਸ. ਦਿਲਬਾਗ ਸਿੰਘ ਪਠਾਨਕੋਟ, ਸ. ਸੁਖਵਿੰਦਰ ਸਿੰਘ ਝਬਾਲ, ਸ. ਸਵਿੰਦਰ ਸਿੰਘ ਦੋਬਲੀਆ, ਸ. ਉਂਕਾਰ ਸਿੰਘ ਸ਼ਰੀਫਪੁਰਾ, ਸੰਤ ਜਸਬੀਰ ਸਿੰਘ ਕਾਲਾਬੂਲਾ, ਸ. ਜਗੀਰ ਸਿੰਘ ਵਰਪਾਲ, ਸ. ਜਗਰੂਪ ਸਿੰਘ ਢਿਲੋਂ, ਸ. ਭੁਪਿੰਦਰ ਸਿੰਘ ਭਲਵਾਨ, ਸ. ਅਮਰ ਸਿੰਘ ਭਦੌੜ, ਸ. ਗੁਰਮੇਲ ਸਿੰਘ ਸੰਗੋਵਾਲ, ਸ. ਹੀਰਾ ਸਿੰਘ ਚਿੜੇਵਾਣ, ਬੀਬੀ ਦਵਿੰਦਰ ਕੌਰ ਬਠਿੰਡਾ, ਧਰਮ ਪ੍ਰਚਾਰ ਕਮੇਟੀ ਦੇ ਮੈਂਬਰ ਸ. ਭਰਪੂਰ ਸਿੰਘ ਖ਼ਾਲਸਾ, ਸ. ਹਰਦਲਬੀਰ ਸਿੰਘ ਸ਼ਾਹ, ਭਾਈ ਮਨਜੀਤ ਸਿੰਘ, ਸ. ਪ੍ਰਦੀਪ ਸਿੰਘ ਵਾਲੀਆ ਤੇ ਬਾਵਾ ਸਿੰਘ ਗੁਮਾਨਪੁਰ, ਸ. ਜਗਮੋਹਨ ਸਿੰਘ (ਬਰਾੜ) ਸੀਨੀਅਰ ਮੀਤ ਪ੍ਰਧਾਨ ਜ਼ਿਲ੍ਹਾ ਅਕਾਲੀ ਦਲ ਬਾਦਲ ਮੁਕਤਸਰ, ਸ. ਜਸਵੀਰ ਸਿੰਘ ਘੁੰਮਣ, ਸ. ਗੁਰਦਰਸ਼ਨ ਸਿੰਘ ਜੀ ਬਾਹੀਆ, ਸੰਤ ਬਾਬਾ ਬਲਬੀਰ ਸਿੰਘ ਜਥੇਦਾਰ ਬਾਬਾ ਬੁੱਢਾ ਦਲ 96ਕਰੋੜੀ, ਸੰਤ ਬਾਬਾ ਬਲਵੰਤ ਸਿੰਘ ਹਰਖੋਵਾਲ, ਸੰਤ ਬਾਬਾ ਰਣਜੀਤ ਸਿੰਘ ਗੁਰਦੁਆਰਾ ਸ਼ਹੀਦ ਸਿੰਘਾਂ ਹੁਸ਼ਿਆਰਪੁਰ, ਸੰਤ ਬਾਬਾ ਬਲਬੀਰ ਸਿੰਘ ਟਿੱਬਾ, ਸੰਤ ਬਾਬਾ ਬਲਬੀਰ ਸਿੰਘ ਬਿਰਧ ਆਸ਼ਰਮ ਹੁਸ਼ਿਆਰਪੁਰ, ਸੰਤ ਬਾਬਾ ਰਣਜੀਤ ਸਿੰਘ ਡਗਾਵਾ ਰੋਡ, ਸੰਤ ਬਾਬਾ ਪਰਮਜੀਤ ਸਿੰਘ ਮਾਹਲਪੁਰ ਵਾਲੇ, ਸੰਤ ਅਮੀਰ ਸਿੰਘ ਜਵੱਦੀ ਕਲਾਂ ਟਕਸਾਲ, ਸੰਤ ਬਾਬਾ ਗੁਰਵਿੰਦਰ ਸਿੰਘ ਜੀ ਮਾਂਡੀ ਉਦਾਸੀ ਸੰਤ, ਬਾਬਾ ਲਾਭ ਸਿੰਘ ਜੀ ਕਾਰਸੇਵਾ ਵਾਲੇ, ਸੰਤ ਬਾਬਾ ਗੁਰਦੇਵ ਸਿੰਘ ਜੀ ਹਰੀਆਂ ਵੇਲਾਂ ਵਾਲੇ, ਸੰਤ ਬਾਬਾ ਹਰਬੰਸ ਸਿੰਘ ਕਾਰਸੇਵਾ ਵਾਲੇ, ਬਾਬਾ ਕਸ਼ਮੀਰ ਸਿੰਘ ਜੀ ਭੂਰੀਵਾਲੇ, ਬਾਬਾ ਵੱਸਣ ਸਿੰਘ ਜੀ ਮੜ੍ਹੀਆਂਵਾਲੇ, ਸੰਤ ਸੇਵਾ ਸਿੰਘ ਜੀ ਰਾਮਪੁਰ ਖੇੜਾ, ਬਿਧੀਚੰਦ ਸੁਰਸਿੰਘ ਵਾਲੇ ਬਾਬਾ ਦਇਆ ਸਿੰਘ ਜੀ, ਸੰਤ ਬਾਬਾ ਲਖਬੀਰ ਸਿੰਘ ਜੀ ਰਤਵਾੜੇ ਵਾਲੇ, ਬਾਬਾ ਭਗਵੰਤ ਭਜਨ ਸਿੰਘ ਜੀ ਰਮਦਾਸ ਵਾਲੇ, ਬਾਬਾ ਹਰੀਦੇਵ ਸਿੰਘ ਜੀ ਈਸੇਪੁਰ ਵਾਲੇ, ਸ. ਕੰਵਲਦੀਪ ਸਿੰਘ ਪ੍ਰਧਾਨ ਗੁਰਦੁਆਰਾ ਮਾਈ ਥਾਨ ਸ੍ਰੀ ਗੁਰੂ ਸਿੰਘ ਸਭਾ, ਸੰਤ ਸੰਤੋਖ ਸਿੰਘ ਦਿਆਲਪੁਰਾ, ਮਹੰਤ ਤਰਲੋਚਨ ਸਿੰਘ ਜੀ ਪ੍ਰਧਾਨ ਨਿਰਮਲ ਮਹਾਂਮੰਡਲ, ਸੰਤ ਹਰਬੀਰ ਸਿੰਘ (ਚੀਮਾਂ), ਸੰਤ ਹਾਕਮ ਸਿੰਘ ਗੰਢਾ ਸਿੰਘ ਵਾਲਾ, ਮਹੰਤ ਸੰਤਾ ਸਿੰਘ ਪਟਿਆਲਾ, ਭਾਈ ਗਗਨਦੀਪ ਸਿੰਘ ਫੈਡਰੇਸ਼ਨ ਮਹਿਤਾ ਜਨਰਲ ਸਕੱਤਰ, ਜਥੇਦਾਰ ਬਾਬਾ ਜੋਗਿੰਦਰ ਸਿੰਘ ਜੀ ਬੁਢਾ ਦਲ, ਵਿਧਾਇਕ ਡਾ: ਦਲਬੀਰ ਸਿੰਘ, ਸ. ਕੁਲਵੰਤ ਸਿੰਘ ਢੋਟ, ਸ. ਅਮਰਬੀਰ ਸਿੰਘ ਢੋਟ, ਬਾਬਾ ਸੁਖਦੇਵ ਸਿੰਘ ਬੇਦੀ ਗੁਰੂ ਨਾਨਕ ਨੈਸ਼ਨਲ ਸੇਵਾ ਮਿਸ਼ਨ ਅਤੇ ਪ੍ਰਚਾਰ ਸਭਾ ਘੁਮਾਣ, ਜਥੇਦਾਰ ਭਾਰੀ ਨਿਰਵੈਰ ਸਿੰਘ ਗੁਰਦੁਆਰਾ ਸ੍ਰੀ ਅਕਾਲ ਪ੍ਰਕਾਸ਼ ਸਦਰਵਾਲਾ, ਮਖੂ(ਫਿਰੋਜ਼ਪੁਰ), ਸ. ਕਸ਼ਮੀਰ ਸਿੰਘ, ਸ. ਮਖਤੂਲ ਸਿੰਘ, ਸ.ਨਰਿੰਦਰ ਸਿੰਘ, ਸਰਪੰਚ ਜਗੀਰ ਸਿੰਘ, ਸ. ਬਲਵਿੰਦਰ ਸਿੰਘ, ਸ. ਲਖਬੀਰ ਸਿੰਘ, ਸ. ਸਰਵਣ ਸਿੰਘ ਸਰਪੰਚ, ਸ. ਗੁਰਨਾਮ ਸਿੰਘ ਤੇ ਸ. ਮੰਗਲ ਸਿੰਘ ਸੋਹਲ(ਸ਼੍ਰੋਮਣੀ ਕਮੇਟੀ), ਜਨਮ ਅਸਥਾਨ ਬਾਬਾ ਸੈਣ ਭਗਤ ਜੀ ਪਿੰਡ ਸੋਹਲ ਵਲੋਂ,ਬਾਬਾ ਹੀਰਾ ਸਿੰਘ ਝੂਲਣੇ ਮਹਿਲ ਵਾਲੇ, ਬਾਬਾ ਦਰਸ਼ਨ ਸਿੰਘ ਬੀੜ ਸਾਹਿਬ ਵਲੋਂ ਬਾਬਾ ਸੰਤੋਖ ਸਿੰਘ, ਡਾ: ਬੂਟਾ ਸਿੰਘ ਗੁਰਦੁਆਰਾ ਗੁਰੂ ਨਾਨਕ ਪ੍ਰਕਾਸ਼ ਅਮਰੀਕਾ, ਭਾਈ ਰਣਜੀਤ ਸਿੰਘ ਖ਼ਾਲਸਾ ਨਿਊ ਜਰਸੀ (ਯੂ.ਐਸ.ਏ), ਗੁਰਦੁਆਰਾ ਹੇਰਾਂ ਵਲੋਂ, ਸ੍ਰੀ ਗੁਰੂ ਰਾਮਦਾਸ ਲੋਕ ਭਲਾਈ ਟਰੱਸਟ ਅੰਮ੍ਰਿਤਸਰ ਵਲੋਂ, ਬਾਬਾ ਨੰਦ ਸਿੰਘ ਮੁੰਡਾ ਪਿੰਡ, ਬਾਬਾ ਬਲਕਾਰ ਸਿੰਘ ਤਰਨਾ ਦਲ, ਭਾਈ ਘਨੱਈਆ ਜੀ ਮਿਸ਼ਨ ਸੁਸਾਇਟੀ ਵਲੋਂ ਸ. ਸਤਨਾਮ ਸਿੰਘ ਸਿੰਘ ਬ੍ਰਦਰਜ਼, ਅਖੰਡ ਕੀਰਤਨੀ ਜਥੇ ਦੇ ਭਾਈ ਪੂਰਨ ਜੀ, ਬਾਬਾ ਬਲਵਿੰਦਰ ਸਿੰਘ ਚਾਹਲ ਭਾਈ ਘਨ੍ਹਈਆ ਜੀ ਬਿਰਧ ਘਰ ਅੰਮ੍ਰਿਤਸਰ, ਬਾਬਾ ਗੁਰਬਚਨ ਸਿੰਘ ਖਾਲਸਾ ਮੁੱਖ ਸੇਵਾਦਾਰ ਦਸਮੇਸ਼ ਪਰਵਾਰ ਇੰਟਰਨੈਸ਼ਨਲ ਅੰਮ੍ਰਿਤਸਰ, ਸ. ਸੁਖਵਿੰਦਰ ਸਿੰਘ ਸ੍ਰੀ ਸੁਖਮਨੀ ਸੇਵਾ ਸੁਸਾਇਟੀ ਰਣਜੀਤ ਐਵੀਨਿਊ, ਸੰਤ ਬਾਬਾ ਅਜਮੇਰ ਸਿੰਘ ਰੱਬ ਜੀ ਟਰੱਸਟ ਨਿਊ ਮੋਗਾ, ਸ. ਹਰਪਾਲ ਸਿੰਘ (ਭੁੱਲਰ) ਵਿਸ਼ਵ ਭਾਈ ਮਰਦਾਨਾ ਯਾਦਗਾਰੀ ਕੀਰਤਨ ਦਰਬਾਰ ਸੁਸਾਇਟੀ ਫਿਰੋਜ਼ਪੁਰ, ਸ੍ਰੀ ਗੁਰੂ ਰਾਮਦਾਸ ਜੀ ਛਬੀਲ ਅੰਮ੍ਰਿਤਸਰ ਦੇ ਮੁੱਖ ਸੇਵਾਦਾਰ ਮਹੰਤ ਕੁਲਦੀਪ ਸਿੰਘ, ਬਾਬਾ ਦੀਪ ਸਿੰਘ ਜੀ ਸੇਵਾਦਲ ਵਲੋਂ ਜਥੇਦਾਰ ਸੁਰਿੰਦਰ ਸਿੰਘ, ਨਿਰਮਲ ਅਖਾੜਾ ਮਹੰਤ ਮੂਲ ਸਿੰਘ, ਮਹੰਤ ਭਾਗ ਸਿੰਘ ਬੰਗਾ, ਮਹੰਤ ਸੁਰਿੰਦਰਪਾਲ ਸਿੰਘ ਹਰੀਕੇ ਕਲਾਂ, ਮਹੰਤ ਕਸ਼ਮੀਰ ਸਿੰਘ ਗੋਲੇਵਾਲ, ਮਹੰਤ ਦਰਸ਼ਨ ਸਿੰਘ ਮੁਖੀ ਪੰਜ ਗਰਾਈਂ, ਮਹੰਤ ਤੇਜਾ ਸਿੰਘ ਖੁੱਡਾ, ਮਹੰਤ ਭੁਪਿੰਦਰ ਸਿੰਘ ਡੇਰਾ ਮਿਸ਼ਰਾ ਸਿੰਘ, ਮਹੰਤ ਅਮਰੀਕ ਸਿੰਘ ਮੌਨੀ ਚੌਂਕ, ਮਹੰਤ ਗਜ਼ਬ ਸਿੰਘ ਸੇਵਾ ਪੰਥੀ ਅੰਮ੍ਰਿਤਸਰ, ਮਹੰਤ ਸੰਤ ਸਿੰਘ ਡੇਰਾ ਭਿੰਡਰਾਂਵਾਲੇ, ਮਹੰਤ ਜਰਨੈਲ ਸਿੰਘ ਠਾਕਰਾਂ, ਮਹੰਤ ਰਾਮ ਸਿੰਘ ਬਿਬੇਕਸਰ ਆਦਿ ਨੇ ਵੀ ਆਪਣੀ ਸੰਸਥਾਵਾਂ ਵਲੋਂ ਸਿੰਘ ਸਾਹਿਬ ਨੂੰ ਦਸਤਾਰਾਂ ਤੇ ਸਿਰੋਪਾਓ ਭੇਟ ਕੀਤੇ।ਇਸ ਮੌਕੇ ਸਕੱਤਰ ਸ. ਹਰਬੇਅੰਤ ਸਿੰਘ, ਦਲਮੇਘ ਸਿੰਘ ਅਤੇ ਸ. ਰਣਵੀਰ ਸਿੰਘ, ਐਡੀ: ਸ. ਰੂਪ ਸਿੰਘ, ਸ. ਜੋਗਿੰਦਰ ਸਿੰਘ, ਸ. ਗੁਰਦਰਸ਼ਨ ਸਿੰਘ ਅਤੇ ਸ. ਹਰਜੀਤ ਸਿੰਘ, ਮੀਤ ਸਕੱਤਰ ਸ. ਅੰਗਰੇਜ ਸਿੰਘ, ਸ. ਬਲਕਾਰ ਸਿੰਘ, ਸ. ਸਤਬੀਰ ਸਿੰਘ, ਸ. ਬਲਵਿੰਦਰ ਸਿੰਘ ਜੌੜਾਸਿੰਘਾ, ਪੱਤਰ ਵਿਹਾਰ ਦੇ ਡਾਇਰੈਕਟਰ ਸ. ਜਸਬੀਰ ਸਿੰਘ ਸਾਬਰ, ਸੁਪ੍ਰਿੰਟੈਂਡੈਂਟ ਸ. ਦਿਲਬਾਗ ਸਿੰਘ, ਪਬਲੀਸਿਟੀ ਵਿਭਾਗ ਦੇ ਇੰਚਾਰਜ ਸ. ਰਾਮ ਸਿੰਘ, ਸਹਾਇਕ ਸੰਪਾਦਕ ਸ. ਨਿਰਵੈਰ ਸਿੰਘ ਅਰਸ਼ੀ, ਮੈਨੇਜਰ ਸ੍ਰੀ ਦਰਬਾਰ ਸਾਹਿਬ ਸ. ਹਰਭਜਨ ਸਿੰਘ ਤੇ ਸ. ਕੁਲਦੀਪ ਸਿੰਘ ਬਾਵਾ, ਐਡੀ: ਮੈਨਜਰ ਸ. ਸੁਖਦੇਵ ਸਿੰਘ, ਸ. ਬਲਵਿੰਦਰ ਸਿੰਘ (ਭਿੰਡਰ) ਅਤੇ ਸ. ਟਹਿਲ ਸਿੰਘ, ਮੀਤ ਮੈਨੇਜਰ ਸ. ਭੁਪਿੰਦਰ ਸਿੰਘ ਮੈਨੇਜਰ ਤਰਨ ਤਾਰਨ ਸ. ਸੁਰਜੀਤ ਸਿੰਘ, ਮੈਨੇਜਰ ਕੇਸਗੜ੍ਹ ਸਾਹਿਬ ਸ. ਜਵਾਹਰ ਸਿੰਘ, ਸੁਪ੍ਰਿੰਟੈਂਡੈਂਟ ਧਰਮ ਪ੍ਰਚਾਰ ਸ. ਹਰਭਜਨ ਸਿੰਘ, ਮੈਨੇਜਰ ਗੁਰਦੁਆਰਾ ਸ਼ਹੀਦਾਂ ਲੱਧੇਵਾਲ ਮਾਹਿਲਪੁਰ(ਹੁਸ਼ਿਆਰਪੁਰ),ਗੁਰਦੁਆਰਾ ਮੰਜੀ ਸਾਹਿਬ ਅੰਬਾਲਾ ਹਰਿਆਣਾ ਦੇ ਮੈਨੇਜਰ, ਬੀੜ ਬਾਬਾ ਬੁੱਢਾ ਜੀ ਮੈਨੇਜਰ ਆਦਿ ਹਾਜ਼ਰ ਸਨ।
ਇਸ ਮੌਕੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੀ ਸਾਬਕਾ ਜਥੇਦਾਰ ਗਿਆਨੀ ਜੋਗਿੰਦਰ ਸਿੰਘ ਵੇਦਾਂਤੀ, ਦਲ ਖ਼ਾਲਸਾ, ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ (ਪੰਚ ਪ੍ਰਧਾਨੀ) ਸਿੱਖ ਯੂਥ ਫ਼ੈਡਰੇਸ਼ਨ ਭਿੰਡਰਾਂਵਾਲਾ, ਖ਼ਾਲਸਾ ਐਕਸ਼ਨ ਕਮੇਟੀ, ਸ਼੍ਰੋਮਣੀ ਖ਼ਾਲਸਾ ਪੰਚਾਇਤ, ਦਮਦਮੀ ਟਕਸਾਲ ਅਜਨਾਲਾ ਧੜਾ, ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਸਤਿਕਾਰ ਕਮੇਟੀ ਦਾ ਕੋਈ ਨੁਮਾਇੰਦਾ ਸ਼ਾਮਲ ਨਹੀਂ ਹੋਇਆ ਅਤੇ ਨਾ ਹੀ ਸ਼੍ਰੋਮਣੀ ਕਮੇਟੀ ਮੈਂਬਰ ਕਰਨੈਲ ਸਿੰਘ ਪੰਜੋਲੀ, ਗੁਰਵਿੰਦਰ ਸਿੰਘ ਸ਼ਾਮਪੁਰ, ਮਨਜੀਤ ਸਿੰਘ ਕਲਕੱਤਾ ਵੀ ਗ਼ੈਰ ਹਾਜ਼ਰ ਰਹੇ।

ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਜਥੇਦਾਰ ਦੀ ਸ਼ਾਨ ਨੂੰ ਰੋਲਣ ਦੇ
ਦੇ ਸੰਦਰਭ ਵਿਚ
ਭਾਰਤੀ ਨਕਸ਼ੇ ਵਿਚ ਕੈਦ ਸਿੱਖ ਕੌਮ ਦੀ ਤਰਸਯੋਗ ਹਾਲਤ

(ਬਲਵਿੰਦਰਪਾਲ ਸਿੰਘ ਖ਼ਾਲਸਾ-ਸੈਨ ਫ਼ਰਾਂਸਿਸਕੋ) ਭਾਰਤੀ ਨਕਸ਼ੇ ਵਿਚ ਕੈਦ ਸਿੱਖ ਕੌਮ ਦੀ ਹਾਲਤ ਬਾਰੇ ਜੇ ਕੋਈ ਟਿੱਪਣੀ ਕਰਨੀ ਹੋਵੇ ਤਾਂ ਮੀਰੀ ਪੀਰੀ ਦੇ ਮਹਾਨ ਕੇਂਦਰ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਜਥੇਦਾਰ ਨੂੰ ਹਟਾਉਣ ਲਈ ਅਪਣਾਏ ਗਏ ਭੱਦੇ, ਨਿਰਾਦਰ ਭਰੇ, ਅਪਮਾਨ ਜਨਕ ਢੰਗ ਤੋਂ ਲਾਈ ਜਾ ਸਕਦੀ ਹੈ। ਸੰਸਾਰ-ਸੰਚਾਰ-ਪ੍ਰਬੰਧ ਵਿਚ ਇਸ ਬਾਰੇ ਖ਼ਬਰਾਂ ਚੱਲ ਰਹੀਆਂ ਹਨ ਕਿ ਸੰਘ ਪਰਵਾਰ ਦਾ ਦਬਾਅ ਵੀ ਜਥੇਦਾਰ ਨੂੰ ਜ਼ਲੀਲ ਕਰਕੇ ਕੱਢਣ ਦਾ ਇਕ ਮੁੱਖ ਕਾਰਨ ਬਣਿਆ ਹੈ।
ਬੁਨਿਆਦੀ ਤੌਰ ਤੇ ਸੰਘ ਪਰਵਾਰ ਹਿੰਦੋਸਤਾਨ ਵਿਚ ਦਹਿਸ਼ਤਵਾਦ ਦੇ ਕਾਰਨਾਂ ਲਈ ਜ਼ਮੀਨ ਤਿਆਰ ਕਰਨ, ਆਤੰਕਵਾਦ ਦੇ ਬੀਜ ਪਾਉਣ ਤੇ ਦਹਿਸ਼ਤ ਦੀ ਫ਼ਸਲ ਉਗਾਉਣ ਤੇ ਇਸ ਖੇਤੀ ਨੂੰ ਪੂਰੇ ਹਿੰਦੋਸਤਾਨ ਵਿਚ ਫ਼ੈਲਾਉਣ ਤੇ ਮੁੜ ਆਪ ਫ਼ਸਲ ਵੱਢਣ ਦੇ ਬਹਾਨੇ ਘੱਟ ਗਿਣਤੀਆਂ ਦੇ ਨਸਲਘਾਤ ਲਈ ਜ਼ਿਮੇਵਾਰ ਹੈ। ਸੰਘ ਪਰਵਾਰ ਕੋਈ ਇਕ ਨਾਮ ਨਹੀਂ ਬਲਕਿ ਇਸ ਵਿਚ ਕਈ ਨਾਮ ਸ਼ਾਮਲ ਹਨ।
ਇਸਦਾ ਮੁੱਖ ਨਾਮ ਭਾਰਤੀ ਜਨਤਾ ਪਾਰਟੀ ਵੀ ਹੈ, ਸ਼ਿਵ ਸੈਨਾ ਵੀ, ਬਜਰੰਗ ਦਲ, ਆਰ ਐਸ ਐਸ, ਕਾਂਗਰਸ, ਕਮਿਊਨਿਸਟ ਤੇ ਹੁਣ ਦਾ ਅਕਾਲੀ ਦਲ ਤੇ ਆਰੀਆ ਸਮਾਜ ਵੀ। ਹੁਣ ਦੇ ਅਕਾਲੀ ਦਲ ਨੇ ਪੰਥਕ ਨਾਮ ਨੂੰ ਆਪਣੇ ਅਕਾਲੀ ਸਵਿੰਧਾਨ ਤੋਂ ਖਾਰਜ ਕਰ ਕੇ ਇਸਨੂੰ ਪੰਜਾਬੀ ਦਲ ਬਣਾ ਲਿਆ ਹੈ। ਸੰਘ ਚਾਲਕਾਂ ਦੇ ਦਿਮਾਗ਼ ਦੀ ਬਣਤਰ, ਸੱਠ ਲੱਖ ਯਹੂਦੀਆ ਦਾ ਨਸਲਘਾਤ ਕਰਨ ਵਾਲੇ ਜਰਮਨ ਦੇ ਚਾਂਸਲਰ ਹਿਟਲਰ ਦੀ ਸੋਚ ਨਾਲ ਮਿਲਦੀ ਜੁਲਦੀ ਹੈ। ਹਿਟਲਰ ਨੇ ਹਿੰਦੂਆਂ ਦੇ ਸਵਾਸਤਿਕਾ ਨੂੰ ਯਹੂਦੀਆਂ ਦੇ ਕੁਲਨਾਸ਼ ਲਈ ਅਪਣਾਇਆ ਪਰ ਹਿਟਲਰ ਆਪਣੀ ਔਕਾਤ ਨੂੰ ਪਛਾਨਣ ਵਿਚ ਭਾਰੀ ਗਲਤੀ ਕਰ ਗਿਆ। ਉਹ ਦੂਜਿਆਂ ਦੇ ਲਹੂ ਦੀਆਂ ਨਦੀਆਂ ਵਹਾਉਂਦਾ ਇਹ ਵਿਸਾਰ ਹੀ ਬੈਠਾ ਕਿ ਉਸਦਾ ਆਪਣਾ ਅੰਤ ਵੀ ਹੋਣਾ ਹੈ ਤੇ ਕਿਸੇ ਕੌਮ ਦਾ ਬੀਜ ਨਾਸ ਕਰਨ ਦੀ ਤਾਕਤ ਕਿਸੇ ਮਨੁੱਖ ਜਾਂ ਮਨੁੱਖਾਂ ਦੇ ਸਮੂਹ ਦੇ ਹੱਥ ਵੱਸ ਕਦੇ ਵੀ ਨਹੀਂ ਹੁੰਦੀ। ਦੂਜਿਆਂ ਨੂੰ ਮਾਰਦਾ ਮਾਰਦਾ ਅੰਤ ਉਹ ਆਪਣੇ ਆਪਤੋਂ ਹੀ ਤੰਗ ਹੋ ਗਿਆ ਤੇ ਉਸਨੂੰ ਆਤਮ ਹੱਤਿਆ ਕਰਕੇ ਜ਼ਲਾਲਤ ਭਰੀ ਮੌਤ ਮਰਨਾ ਪਿਆ। ਇਹੋ ਹੀ ਹਾਲ ਇਨ੍ਹਾਂ ਹਿੰਦੂ ਸੰਘ ਸਗੰਠਨ ਵਾਲਿਆਂ ਤੇ ਬਾਦਲੀ ਲਾਣੇ ਦਾ ਹੈ। ਇਹ ਵੀ ਸਿੱਖਾਂ, ਇਸਾਈਆਂ, ਮੁਸਲਮਾਨਾਂ, ਅਖੌਤੀ ਹਰੀਜਨਾਂ-ਅਛੂਤਾਂ, ਬੋਧੀਆਂ, ਜੈਨੀਆਂ ਤੇ ਕਬਾਇਲੀ ਕੌਮਾਂ ਦਾ ਨਸਲਘਾਤ ਕਰਨਾ ਚਾਹੁੰਦੇ ਹਨ। ਬਾਦਲ ਪਰਵਾਰ ਤੇ ਉਸਦੇ ਆਸੇ-ਪਾਸੇ ਇਕੱਠੇ ਹੋਏ ਲਾਲਚੀ-ਸਵਾਰਥੀ ਲੋਕ ਵੀ ਆਪਣੀ ਔਕਾਤ ਨੂੰ ਪਛਾਨਣ ਵਿਚ ਪੱਛੜ ਗਏ ਹਨ। ਪਹਿਲਾਂ ਤਾਂ ਉਹ ਆਰ ਐਸ ਐਸ ਰਾਹੀਂ ਖਰੀਦੇ ਗਏ ਤੇ ਸਵਾਸਤਿਕਾ-ਸੁਭਾਅ ਦੇ ਹੁਕਮ ਅਨੁਸਾਰ ਹੁਣ ਉਨ੍ਹਾਂ ਨੇ ਮੀਰੀ ਪੀਰੀ ਦੇ ਸਿਧਾਂਤ ਨੂੰ ਰੋਲਣ ਲਈ ਪੂਰਾ ਜ਼ੋਰ ਲਾ ਦਿਤਾ ਹੈ। ਇਸਦਾ ਸਬੂਤ ਜਥੇਦਾਰ ਨੂੰ ਜ਼ਲੀਲ ਕਰਕੇ ਕਢੱਣ ਤੋਂ ਮਿਲਦਾ ਹੈ। ਪਰ ਇਹ ਅਕਾਲੀ ਆਪਣੀ ਹੋਂਦ ਦੀ ਹੱਦ ਨੂੰ ਵਿਸਾਰ ਬੈਠੇ ਹਨ ਤੇ ਆਪਣੀ ਹੋਂਦ ਦੇ ਅੰਤ ਹੋ ਜਾਣ ਤੋਂ ਪਾਸਾ ਵੱਟ ਬੈਠੇ ਹਨ। ਮੀਰੀ ਪੀਰੀ ਸਿਧਾਂਤ ਨੇ ਸਦਾ ਰਹਿਣਾ ਹੈ ਪਰ ਬਾਦਲੀ ਸੈਨਾ ਨੇ ਮਰ ਮੁੱਕ ਜਾਣਾ ਹੈ। ਇਤਿਹਾਸ ਨੇ ਇਨ੍ਹਾਂ ਦਾ ਨਾਮ ਕਾਲੇ ਅੱਖਰਾਂ ਵਿਚ ਲਿਖ਼ਣਾ ਹੈ ਕਿਉਂਕਿ ਕੰਮ ਹੀ ਕਾਲੇ ਕਰ ਰਹੇ ਹਨ।
ਸੰਘ ਪਰਵਾਰ ਭਾਵ ਆਰ ਐਸ ਐਸ ਤੇ ਭਾਜਪਾ ਵਾਲੇ, ਸਿੱਖਾਂ ਦਾ ਸਰੀਰਕ ਨਸਲਘਾਤ (1978-2008) ਕਰਨ ਤੋਂ ਬਾਅਦ, ਬਚੇ ਹੋਏ ਸਿੱਖਾਂ ਦਾ ਮਾਨਸਿਕ ਨਸਲਘਾਤ ਚਾਹੁੰਦੇ ਹਨ ਜਿਸ ਵਿਚ ਸੰਘ ਦਾ ਟੁੱਕੜਬੋਚ ਬਾਦਲ ਪਰਵਾਰ ਤੇ ਅਗਾਂਹ ਉਸਦੇ ਹੋਰ ਤਲਵੇ ਚੱਟ ਚੇਲੇ ਬਾਲਕੇ ਆਰ ਐਸ ਐਸ ਦੇ ਜ਼ਮੀਰ ਫ਼ਰੋਸ਼ ਸੰਦ ਬਣੇ ਹੋਏ ਹਨ। ਆਰ ਐਸ ਐਸ ਕਿਉਂਕਿ ਹਿੰਦੂ-ਮੋਨੇ ਰੂਪ ਵਿਚ ਹੈ, ਇਸ ਕਰਕੇ ਉਸਨੇ ਖਰੀਦੇ ਹੋਏ ਪੱਗਾਂ ਵਾਲੇ ਅੱਗੇ ਲਾਕੇ ਖ਼ਾਲਸਾ ਪੰਥ ਨੂੰ ਰੋਲਣ ਲਈ ਕੋਈ ਕਸਰ ਬਾਕੀ ਨਹੀਂ ਛੱਡੀ। ਬਹੁਗਿਣਤੀ ਸਿੱਖਾਂ ਨੂੰ ਇਸਦੀ ਸਮਝ ਨਹੀਂ ਆ ਰਹੀ ਕਿ ਇਹ ਸਭ ਕੀ ਹੋ ਰਿਹਾ ਹੈ। ਅਗਿਆਨਤਾ ਦਾ ਹਨੇਰਾ ਹੋਰ ਸੰਘਣਾ ਹੁੰਦਾ ਜਾ ਰਿਹਾ ਹੈ। ਸਿੱਖ ਕੌਮ ਦੀ ਸੋਚ ਦਾ ਹੌਲੀ ਹੌਲੀ ਬ੍ਰਾਹਮਣਵਾਦੀ ਸੋਚ ਵਿਚ ਤਬਦੀਲ ਹੋ ਜਾਣਾ, ਸਿੱਖ ਕੌਮ ਦਾ ਮਾਨਸਿਕ ਨਸਲਘਾਤ ਹੈ। ਇਹ ਡੂੰਘੀ ਗ਼ੁਲਾਮੀ ਦੀ ਨਿਸ਼ਾਨੀ ਹੈ ਤੇ ਜੇ ਸਾਡੇ ਲੇਖਕ, ਸੰਪਾਦਕ, ਖ਼ਬਰਾਂ ਲਿਖ਼ਣ ਵਾਲੇ, ਵਿਦਵਾਨ ਹੋਣ ਦਾ ਭਰਮ ਪਾਲੀ ਬੈਠੇ ਯੂਨੀਵਰਸਿਟੀਆਂ ਦੇ ਪ੍ਰੋਫ਼ੈਸਰ ਤੇ ਡਾਕਟਰ, ਅਧਿਆਪਕ, ਵਕੀਲ, ਕਥਾਕਾਰ, ਪ੍ਰਚਾਰਕ ਤੇ ਗੁਰਦੁਆਰਾ ਪ੍ਰਬੰਧਕ ਕਮੇਟੀਆਂ ਆਦਿ ਸਮੇਂ ਸਿਰ ਨਾ ਜਾਗੇ ਤਾਂ ਆਮ ਸਿੱਖ ਨੂੰ ਜਗਾਉਣ ਕੌਣ ਆਏਗਾ? ਕੁਝ ਵਿਰਲੇ ਹੀ ਹਨ। ਇਸ ਗੰਭੀਰ ਹੁੰਦੀ ਸਥਿਤੀ ਵਿਚੋਂ ਨਿਕਲਣ ਲਈ ਹੋਕਾ ਦੇਣ ਵਾਲਿਆਂ ਵਿਚੋਂ ਕੁਝ ਗੁਰੂ ਚਰਨਾਂ ਵਿਚ ਜਾ ਬਿਰਾਜੇ ਤੇ ਕੁਝ ਹਾਲੇ ਵੀ ਦੇ ਰਹੇ ਹਨ। ਇਨ੍ਹਾਂ ਦੇ ਨਾਮ ਸਾਰੇ ਹੀ ਜਾਣਦੇ ਹਨ, ਜਿਵੇਂ ਮਹਾਨ ਸ਼ਹੀਦ ਸੰਤ ਜਰਨੈਲ ਜੀ ਖ਼ਾਲਸਾ ਭਿੰਡਰਾਂਵਾਲੇ-ਭਾਈ ਅਮਰੀਕ ਸਿੰਘ ਤੇ ਖ਼ਾਲਿਸਤਾਨ ਲਈ ਜਾਨਾਂ ਵਾਰਨ ਵਾਲੇ ਮਹਾਨ ਸ਼ਹੀਦ ਯੋਧੇ, ਜਿਨ੍ਹਾਂ ਦਾ ਸੰਦੇਸ਼ ਭਾਈ ਜਿੰਦਾ-ਸੁੱਖਾ ਦੁਆਰਾ ਲਿਖੇ ਮਹਾਨ ਦਸਤਾਵੇਜ਼ ਰੂਪੀ ਚਿੱਠੀ ਵਿਚ ਦਰਜ ਹੈ-ਸਵਰਗਵਾਸੀ ਸ੍ਰ: ਜਗਜੀਤ ਸਿੰਘ-ਮੇਜਰ ਜਨਰਲ ਨਰਿੰਦਰ ਸਿੰਘ-ਸ੍ਰ:ਕਪੂਰ ਸਿੰਘ-ਗਿਆਨੀ ਦਿੱਤ ਸਿੰਘ-ਗੁਰਮੁਖ ਸਿੰਘ-ਪ੍ਰੋ: ਪੂਰਨ ਸਿੰਘ-ਜਸਵੰਤ ਸਿੰਘ ਖ਼ਾਲੜਾ।
ਸਿਮਰਨਜੀਤ ਸਿੰਘ ਮਾਨ, ਦਲਜੀਤ ਸਿੰਘ ਬਿੱਟੂ, ਹਰਪਾਲ ਸਿੰਘ ਚੀਮਾ, ਭਾਈ ਗਜਿੰਦਰ ਸਿੰਘ ਤੇ ਉਨ੍ਹਾਂ ਦੇ ਸਾਥੀ, ਦਰਵੇਸ਼ ਚਿੰਤਕ ਪ੍ਰੋ: ਹਰਿੰਦਰ ਸਿੰਘ ਮਹਿਬੂਬ, ਅਜਮੇਰ ਸਿੰਘ, ਡਾ: ਅਮਰਜੀਤ ਸਿੰਘ, ਹਰਸਿਮਰਨ ਸਿੰਘ ਦਲ ਖ਼ਾਲਸਾ ਵਾਲੇ ਤੇ ਡਾ: ਗੁਰਮੀਤ ਸਿੰਘ। ਸਾਨੂੰ ਇਨ੍ਹਾਂ ਜਿਊਂਦਿਆਂ ਪਰ ਵਿਰਲਿਆਂ ਨੂੰ ਸੰਭਾਲਣ ਲਈ ਯਤਨ ਕਰਨਾ ਚਾਹੀਦਾ ਹੈ। ਸਾਡੇ ਕੋਲ ਹੋਰ ਕੋਈ ਚਾਰਾ ਵੀ ਤਾਂ ਨਹੀਂ। ਜਥੇਦਾਰ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਰੁਤਬੇ ਨੂੰ ਤਹਿਸ ਨਹਿਸ ਕਰਨ ਲਈ ਸਿੱਖ ਕੌਮ ਨੂੰ ਅੱਗੇ ਵਧ ਕੇ ਅਕਾਲੀ ਲੀਡਰਾਂ ਨੂੰ ਵੱਧ ਤੋਂ ਵੱਧ ਭੰਡਣਾ ਚਾਹੀਦਾ ਹੈ।ਇਨ੍ਹਾਂ ਦੀ ਨਿੰਦਿਆਂ ਕਰਨੀ ਚਾਹੀਦੀ ਹੈ ਤੇ ਕਿਸੇ ਵੀ ਅਕਾਲੀ ਨੂੰ ਵਿਦੇਸ਼ਾਂ ਵਿਚਲੀ ਅਜ਼ਾਦ ਧਰਤੀ ਤੇ ਗ਼ੁਲਾਮੀ ਦਾ ਪੈਗ਼ਾਮ ਨਹੀਂ ਦੇਣ ਦੇਣਾ ਚਾਹੀਦਾ। ਪਰਦੇਸੀ ਧਰਤੀ ਤੇ ਅਕਾਲੀਆਂ ਦਾ ਸਾਥ ਦੇਣ ਵਾਲਾ ਵੀ ਗ਼ੁਲਾਮੀ ਦੀ ਧੁੰਦ ਪਸਾਰਨ ਵਿਚ ਮਦਦ ਕਰਨ ਵਾਲਾ ਗਿਣਿਆ ਜਾਣਾ ਚਾਹੀਦਾ ਹੈ।

ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੂੰ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦਾ ਜਥੇਦਾਰ ਨਿਯੁਕਤ ਕਰਨ ਦਾ ਕੋਈ ਅਧਿਕਾਰ ਨਹੀਂ : ਜਥੇ: ਪੰਜੋਲੀ

ਫਤਿਹਗੜ੍ਹ ਸਾਹਿਬ/7 ਅਗਸਤ/ਰਣਜੋਧ ਸਿੰਘ ਔਜਲਾ- ਸਿੱਖਾਂ ਦੀ ਸਰਵਉਚ ਅਦਾਲਤ ਸ੍ਰੀ ਅਕਾਲ ਤਖ਼ਤ ਸਾਹਿਬ ਜਾਂ ਕਿਸੇ ਹੋਰ ਤਖ਼ਤ ਦੇ ਜਥੇਦਾਰ ਦੀ ਨਿਯੁਕਤੀ ਕਰਨ ਦਾ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੂੰ ਕੋਈ ਅਧਿਕਾਰ ਨਹੀਂ ਹੈ ਕਿਉਂਕਿ ਕਿਉਂਕਿ ਸ੍ਰੀ ਅਕਾਲ ਤਖ਼ਤ ਸਾਹਿਬ ਅਤੇ ਦੂੁਸਰੇ ਤਖ਼ਤ ਸਾਹਿਬਾਨ ਗੁਰਦੁਆਰਾ ਐਕਟ ਦੇ ਘੇਰੇ ਵਿਚ ਨਹੀਂ ਆਉਂਦੇ। ਇਨ੍ਹਾਂ ਸ਼ਬਦਾਂ ਦਾ ਪ੍ਰਗਟਾਵਾ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਅੰਤ੍ਰਿਗ ਕਮੇਟੀ ਦੇ ਮੈਂਬਰ ਜਥੇਦਾਰ ਕਰਨੈਲ ਸਿੰਘ ਪੰਜੋਲੀ ਨੇ ਇੱਥੇ ਪੱਤਰਕਾਰਾਂ ਨਾਲ਼ ਗੱਲਬਾਤ ਕਰਦਿਆਂ ਕੀਤਾ। ਉਨ੍ਹਾਂ ਕਿਹਾ ਕਿ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਖਾਲਸਾ ਪੰਥ ਦੀ ਪ੍ਰਤੀਨਿਧ ਹੋਣ ਦੀ ਹੈਸੀਅਤ ਵਿਚ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦਾ ਜਥੇਦਾਰ ਨਿਯੁਕਤ ਕਰਨ ਲਈ ਉਨ੍ਹਾਂ ਤਿੰਨ ਮੈਂਬਰਾਂ ਦਾ ਪੈਨਲ ਕੌਮ ਸਾਹਮਣੇ ਰੱਖ ਸਕਦੀ ਹੈ, ਜਿਨ੍ਹਾਂ ਦਾ ਪਿਛੋਕੜ ਧਾਰਮਿਕ ਅਤੇ ਸਿੱਖ ਪੰਥ ਵਿਚ ¦ਮੀ ਸੇਵਾ ਵਾਲਾ ਹੋਵੇ। ਉਨ੍ਹਾਂ ਆਖਿਆ ਕਿ ਇਸ ਜਥੇਦਾਰੀ ਲਈ ਤਿੰਨ ਵਿਅਕਤੀਆਂ ਦਾ ਪੈਨਲ ਬਣਾ ਕੇ ਸਿੱਖ ਜਥੇਬੰਦੀਆਂ ਸਾਹਮਣੇ ਰੱਖ ਕੇ ਗੰਭੀਰਤਾ ਨਾਲ਼ ਇਸ ’ਤੇ ਵਿਚਾਰ ਕੀਤਾ ਜਾਵੇ ਅਤੇ ਕਿ ਇਸ ਅਹਿਮ ਅਹੁਦੇ ਲਈ ਕਿਹੜੀ ਸਖ਼ਸ਼ੀਅਤ ਯੋਗ ਹੈ ਅਤੇ ਜਿਸ ਨੂੰ ਖਾਲਸਾ ਪੰਥ ਪ੍ਰਵਾਨਗੀ ਦੇਵੇ ਅਤੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਉਸ ’ਤੇ ਅਮਲ ਕਰੇ।
ਸ੍ਰੀ ਪੰਜੋਲੀ ਨੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਨਵੇਂ ਥਾਪੇ ਗਏ ਕਾਰਜਕਾਰੀ ਜਥੇਦਾਰ ਗੁਰਬਚਨ ਸਿੰਘ ਨੂੰ ਇਹ ਸਵਾਲ ਕੀਤਾ ਹੈ ਕਿ ਕੀ ਉਹ ਸ਼੍ਰੋਮਣੀ ਕਮੇਟੀ ਦੇ ਮੁਲਾਜ਼ਮ ਹਨ? ਅਤੇ ਜੇਕਰ ਉਹ ਮੁਲਾਜ਼ਮ ਹਨ ਤਾਂ ਉਹ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਨੌਕਰ ਹਨ ਅਤੇ ਕੋਈ ਜਥੇਦਾਰ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦਾ ਨੌਕਰ ਨਹੀਂ ਹੋ ਸਕਦਾ ਅਤੇ ਸ਼੍ਰੋਮਣੀ ਕਮੇਟੀ ਅਧੀਨ ਰਹਿ ਕੇ ਉਹ ਕੌਮ ਦੀਆਂ ਭਾਵਨਾਵਾਂ ਉਪਰ ਖ਼ਰ੍ਹਾ ਨਹੀਂ ਉਤਰ ਸਕਦਾ, ਕਿਉਂਕਿ ਸ਼੍ਰੋਮਣੀ ਕਮੇਟੀ ਦੀ ਚੋਣ ਪੰਜਾਬ, ਹਰਿਆਣਾ, ਹਿਮਾਚਲ ਅਤੇ ਚੰਡੀਗੜ੍ਹ ਤੱਕ ਹੀ ਸੀਮਿਤ ਹੈ ਅਤੇ ਫਿਰ ਸ਼੍ਰੋਮਣੀ ਕਮੇਟੀ ਉਨ੍ਹਾਂ ਦੀ ਨਿਯੁਕਤੀ ਕਿਵੇਂ ਕਰ ਸਕਦੀ ਹੈ? ਕਿਉਂਕਿ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦਾ ਜਥੇਦਾਰ ਪੂਰੇ ਦੁਨੀਆਂ ਭਰ ਵਿਚ ਰਹਿ ਰਹੇ ਖਾਲਸਾ ਪੰਥ ਦੇ ਜ਼ਜ਼ਬਾਤਾਂ ਦਾ ਪ੍ਰਗਟਾਓ ਕਰਨ ਦਾ ਪ੍ਰਤੀਨਿਧ ਹੈ। ਸ੍ਰੀ ਪੰਜੋਲੀ ਨੇ ਕਿਹਾ ਕਿ ਅੱਜ ਸ੍ਰੀ ਅਕਾਲ ਤਖ਼ਤ ਸਾਹਿਬ ’ਤੇ ਨਵੇਂ ਥਾਪੇ ਗਏ ਕਾਰਜਕਾਰੀ ਜਥੇਦਾਰ ਵੱਲੋਂ ਸੇਵਾ ਸੰਭਾਲੇ ਜਾਣ ਮੌਕੇ ਕਰਵਾਏ ਸਮਾਗਮ ਵਿਚ ਵੀ ਇਕ ਵੱਡੀ ਉ¦ਘਣਾ ਕਰਕੇ ਸਿੱਖ ਕੌਮ ਦਾ ਸਿਰ ਨੀਂਵਾਂ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਹਮੇਸ਼ਾਂ ਨਵੇਂ ਥਾਪੇ ਜਾਣ ਵਾਲੇ ਜਥੇਦਾਰ ਦੇ ਸੇਵਾ ਸੰਭਾਲਣ ਮੌਕੇ ਸ੍ਰੀ ਆਖੰਡ ਪਾਠ ਸਾਹਿਬ ਆਰੰਭ ਕਰਵਾਉਣਾ ਜ਼ਰੂਰੀ ਹੁੰਦਾ ਹੈ ਜੋ ਨਹੀਂ ਕਰਵਾਇਆ ਗਿਆ।
ਸ੍ਰੀ ਪੰਜੋਲੀ ਨੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਕਾਰਜਕਾਰੀ ਜਥੇਦਾਰ ਗੁਰਬਚਨ ਸਿੰਘ ਨੂੰ ਇਹ ਵੀ ਸਵਾਲ ਕੀਤਾ ਹੈ ਕਿ ਉਹ ਕੌਮ ਨੂੰ ਸ਼ਪੱਸ਼ਟ ਕਰਨ ਕਿ ਸ਼੍ਰੋਮਣੀ ਅਕਾਲੀ ਦਲ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਤਾਬੇ ਬਣਾਇਆ ਗਿਆ ਸੀ, ਜਿਸ ਦਾ ਮੁਢਲਾ ਸਿਧਾਂਤ ਗੁਰਮਤਿ ਪ੍ਰਚਾਰ ਅਤੇ ਮਨਮਤ ਦਾ ਪ੍ਰਹਾਰ ਕਰਨਾ ਸੀ। ਉਨ੍ਹਾਂ ਕਿਹਾ ਕਿ ਅੱਜ ਦੀ ਘੜੀ ਇਸ ਅਕਾਲੀ ਦਲ ਦਾ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਜਿਸ ਨੂੰ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਸਾਬਕਾ ਜਥੇਦਾਰ ਵੇਦਾਂਤੀ ਤਾਂ ਅੰਮ੍ਰਿਤ ਛਕਾ ਨਹੀਂ ਸਕੇ ਅਤੇ ਕੀ ਹੁਣ ਉਹ ਪਹਿਲਾਂ ਉਸ ਨੂੰ ਖੰਡੇ ਬਾਟੇ ਦਾ ਅੰਮ੍ਰਿਤ ਛਕਾ ਕੇ ਅਕਾਲੀ ਦਲ ਦੇ ਮੁਢਲੇ ਸਿਧਾਂਤਾਂ ’ਤੇ ਖ਼ਰਾ ਉਤਰਨ ਲਈ ਪ੍ਰੇਰਿਤ ਕਰਨਗੇ?

ਪੰਜਾਬ ਸਟੇਟ ਕਰਮਚਾਰੀ ਦਲ ਵੱਲੋਂ ਪਰਾਵੀਡੈਂਟ ਫੰਡ ਨੂੰ ਨਿੱਜੀ ਕੰਪਨੀਆਂ ਦੇ ਹਵਾਲੇ ਕਰਨ ਲਈ ਬਣਾਈ ਨੀਤੀ ਦੀ ਅਲੋਚਨਾ

ਫਤਿਹਗੜ੍ਹ ਸਾਹਿਬ/ 7 ਅਗਸਤ/ਰਣਜੋਧ ਸਿੰਘ ਔਜਲਾ ਕੇਂਦਰ ਸਰਕਾਰ ਵੱਲੋਂ ਮੁਲਾਜ਼ਮ ਵਰਗ ਦੇ ਪਰਾਵੀਡੈਂਟ ਫੰਡ ਨੂੰ ਦੇਸ਼ ਦੀਆਂ ਚਾਰ ਨਿੱਜੀ ਕੰਪਨੀਆਂ ਦੇ ਹਵਾਲੇ ਕਰਨ ਲਈ ਬਣਾਈ ਨੀਤੀ ਦੀ ਪੰਜਾਬ ਦੀ ਪ੍ਰਮੁੱਖ ਮੁਲਾਜ਼ਮ ਜਥੇਬੰਦੀ ਪੰਜਾਬ ਸਟੇਟ ਕਰਮਚਾਰੀ ਦਲ ਨੇ ਸਖ਼ਤ ਸ਼ਬਦਾਂ ਨਿਖੇਧੀ ਕਰਦਿਆਂ ਕਿਹਾ ਹੈ ਕਿ ਕੇਂਦਰ ਸਰਕਾਰ ਦੀ ਪਰਾਵੀਡੈਂਟ ਫੰਡ ਨੂੰ ਨਿੱਜੀ ਹੱਥਾਂ ਵਿਚ ਦੇਣ ਦੀ ਨੀਤੀ ਤੋਂ ਲੱਗਦਾ ਹੈ ਕਿ ਭਾਰਤ ਸਰਕਾਰ ਵੀ ਮਾਲੀ ਤੌਰ ਤੇ ਦੀਵਾਲੀਆਪਣ ਨਿਕਲ ਗਿਆ ਹੈ, ਜਿਸ ਕਾਰਨ ਪੰਜਾਬ ਦੀਆਂ ਮੁਲਾਜ਼ਮ ਜਥੇਬੰਦੀਆਂ ਨੂੰ ਚਾਹੀਦਾ ਹੈ ਕਿ ਉਹ ਕੇਂਦਰ ਦੀ ਇਸ ਨੀਤੀ ਦੇ ਖਿਲਾਫ਼ ਇਕੱਠੇ ਹੋ ਕੇ ਜ਼ੋਰਦਾਰ ਢੰਗ ਨਾਲ਼ ਆਵਾਜ਼ ਬੁ¦ਦ ਕਰਨ ਤਾਂ ਜੋ ਕੇਂਦਰ ਸਰਕਾਰ ਦੀ ਨੀਤੀ ’ਤੇ ਰਾਜ ਸਰਕਾਰਾਂ ਨੂੰ ਚੱਲਣ ਤੋਂ ਰੋਕਿਆ ਜਾ ਸਕੇ।
ਦਲ ਦੀ ਜ਼ਿਲਾ ਇਕਾਈ ਦੀ ਕਾਰਜਕਾਰਨੀ ਕਮੇਟੀ ਦੀ ਮੀਟਿੰਗ ਨੂੰ ਸੰਬੋਧਨ ਕਰਦਿਆਂ ਸੂਬਾਈ ਪ੍ਰਧਾਨ ਹਰੀ ਸਿੰਘ ਟੌਹੜਾ ਨੇ ਕਿਹਾ ਕਿ ਕੇਂਦਰ ਸਰਕਾਰ ਨੇ ਜੋ ਨਿੱਜੀ ਕੰਪਨੀਆਂ ਨੂੰ ਮੁਲਾਜ਼ਮਾਂ ਦੇ ਪਰਾਵੀਡੈਂਟ ਫੰਡ ਨੂੰ ਨਿੱਜੀ ਕੰਪਨੀਆਂ ਦੇ ਹਵਾਲੇ ਕਰਨ ਦੀ ਚੋਣ ਕੀਤੀ ਹੈ, ਉਨ੍ਹਾਂ ਵਿਚ ਰਿਲਾਇੰਸ ਕੈਪੀਟਲ, ਐਸ.ਬੀ.ਆਈ., ਆਈ.ਸੀ.ਆਈ.ਸੀ.ਆਈ. ਪਰੂਡੈਂਸੀਅਲ ਅਤੇ ਐਚ.ਐਸ.ਬੀ. ਨੂੰ ਲਿਆ ਗਿਆ ਹੈ। ਸ੍ਰੀ ਟੌਹੜਾ ਨੇ ਕਿਹਾ ਕਿ ਮੁਲਾਜ਼ਮ ਦਾ ਤਨਖਾਹ ਵਿਚ ਕੱਟੇ ਜਾਣ ਵਾਲਾ ਪਰਾਵੀਡੈਂਟ ਫੰਡ ਸਰਕਾਰ ਵ¤ਲੋਂ ਆਪਣੇ ਆਪ ਮੁਲਾਜ਼ਮਾਂ ਤੋਂ ਬਗੈਰ ਪੁੱਛੇ ਕਿਸੇ ਪ੍ਰਾਈਵੇਟ ਕੰਪਨੀ ਦੇ ਹਵਾਲੇ ਕਰਨਾ ਜਿੱਥੇ ਉਨ੍ਹਾਂ ਨਾਲ਼ ਵਿਸ਼ਵਾਸ਼ਘਾਤ ਕਰਨਾ ਹੈ, ਉ¤ਥੇ ਇਨ੍ਹਾਂ ਕੰਪਨੀਆਂ ਨਾਲ਼ ਸਰਕਾਰ ਵਿਚ ਬੈਠੇ ਵੱਡੇ ਵੱਡੇ ਆਗੂਆਂ ਦੀ ਸੌਦੇਬਾਜ਼ੀ ਹੋਈ ਲੱਗਦੀ ਹੈ। ਉਨ੍ਹਾਂ ਖਦਸ਼ਾ ਪ੍ਰਗਟ ਕੀਤਾ ਕਿ ਸਰਕਾਰ ਦੀ ਇਸ ਸਕੀਮ ਤੋਂ ਬਾਅਦ ਹੁਣ ਵੱਖ ਵੱਖ ਵਿਭਾਗਾਂ ਨੂੰ ਪ੍ਰਾਈਵੇਟ ਕੰਪਨੀਆਂ ਦੇ ਹਵਾਲੇ ਕਰਨ ਦੀ ਨੀਤੀ ਅੰਦਰ ਖ਼ਾਤੇ ਪੂਰੀ ਤਰ੍ਹਾਂ ਬਣੀ ਜਾਪਦੀ ਹੈ।
ਇਸ ਮੀਟਿੰਗ ਵਿਚ ਕਰਮਚਾਰੀ ਦਲ ਦੇ ਸੂਬਾਈ ਜਨਰਲ ਸਕੱਤਰ ਕੁਲਬੀਰ ਸਿੰਘ ਸੈਦਖੇੜੀ, ਪ੍ਰੈ¤ਸ ਕਸੱਤਰ ਅਸ਼ੋਕ ਟੂਲਾਨੀ, ਜ਼ਿਲਾ ਪ੍ਰਧਾਨ ਸੁੱਚਾ ਸਿੰਘ ਰੈਲੋਂ, ਸੁਖਪਾਲ ਸਿੰਘ ਚਨਾਰਥਲ, ਸਰਦੂਲ ਸਿੰਘ ਜੱਲ੍ਹਾ, ਵਿਜੈ ਸਿੰਘ, ਗਰੀਬ ਸਿੰਘ ਮੈੜਾਂ, ਮੰਗਤ ਰਾਮ ਸ਼ਰਮਾ, ਮਲਕੀਤ ਸਿੰਘ ਰੈਲੋਂ, ਰਾਜਿੰਦਰ ਕੁਮਾਰ ਸਮੇਤ ਵੱਡੀ ਗਿਣਤੀ ਵਿਚ ਮੁਲਾਜ਼ਮ ਆਗੂ ਹਾਜ਼ਰ ਸਨ। ਮੀਟਿੰਗ ਦੌਰਾਨ ਉਨ੍ਹਾਂ ਅਕਾਲੀ ਭਾਜਪਾ ਸਰਕਾਰ ਤੋਂ ਮੰਗ ਕੀਤੀ ਕਿ ਉਹ ਤੇਜ਼ੀ ਨਾਲ਼ ਵਧ ਰਹੀ ਮਹਿੰਗਾਈ ਨੂੰ ਮੁੱਖ ਰੱਖਦਿਆਂ ਤੁਰੰਤ ਮੁਲਾਜ਼ਮਾਂ ਦੀਆਂ ਮੰਗਾਂ ਦਾ ਕੋਈ ਢੁਕਵਾਂ ਹੱਲ ਕੱਢੇ। ਮੀਟਿੰਗ ਤੋਂ ਪਹਿਲਾਂ ਮਾਤਾ ਨੈਣਾਂ ਦੇਵੀ ਮੰਦਰ ਵਿਖੇ ਮਚੀ ਭਗਦੜ ਦੌਰਾਨ 150 ਤੋਂ ਲੱਗਭਗ ਸ਼ਰਧਾਲੂਆਂ ਦੇ ਮਾਰੇ ਜਾਣ ਕਾਰਨ ਦੋ ਮਿੰਟ ਦਾ ਮੌਨ ਧਾਰ ਕੇ ਸ਼ਰਧਾਂਜ਼ਲੀ ਅਰਪਣ ਕੀਤੀ ਅਤੇ ਹਿਮਾਚਲ ਤੇ ਪੰਜਾਬ ਸਰਕਾਰ ਨੂੰ ਅਪੀਲ ਕੀਤੀ ਕਿ ਅੱਗੋਂ ਲਈ ਇਹੋ ਜਿਹੇ ਹਾਦਸੇ ਵਾਪਰਨ ਤੋਂ ਰੋਕਣ ਲਈ ਢੁਕਵਾਂ ਹੱਲ ਕੀਤਾ ਜਾਵੇ।

ਓਬਾਮਾ-ਮੈਕੇਨ ਇਸ਼ਤਿਹਾਰਾਂ ਜਰੀਏ ਭਿੜ ਰਹੇ ਹਨ

ਅਮਰੀਕਾ ਵਿੱਚ ਰਾਸ਼ਟਰਪਤੀ ਅਹੁਦੇ ਦੇ ਦਾਅਵੇਦਾਰ ਬਰਾਕ ਓਬਾਮਾ ਦੇ ਨਵੇਂ ਇਸ਼ਤਿਹਾਰ ਵਿੱਚ ਇੱਕ ਵਾਰ ਫਿਰ ਆਪਣੇ ਵਿਰੋਧੀ ਅਤੇ ਰੀਪਬਲੀਕਨ ਪਾਰਟੀ ਦੇ ਉਮੀਦਵਾਰ ਜਾਨ ਮੈਕੇਨ ਨੂੰ ਰਾਸ਼ਟਰਪਤੀ ਬੁਸ਼ ਦੀਆਂ ਲੋਕ ਹਿਤੂ ਨੀਤੀਆਂ ’ਤੇ ਚਲਦੇ ਦੱਸਿਆ ਗਿਆ ਹੈ। ਉਧਰ ਮੈਕੇਨ ਵੀ ਪਿੱਛੇ ਨਹੀਂ ਹੈ। ਉਨ੍ਹਾਂ ਨੇ ਆਪਣੇ ਨਵੇਂ ਇਸ਼ਤਿਹਾਰ ਵਿੱਚ ਓਬਾਮਾ ਤੋਂ ਪੁੱਛਿਆ ਹੈ ਕਿ ਕੀ ਉਹ ਅਮਰੀਕਾ ਦੇ ਪਰਿਵਾਰਾਂ ਦੀ ਮੱਦਦ ਕਰਨ ਲਈ ਤਿਆਰ ਹਨ? ਇਸ਼ਤਿਹਾਰ ਵਿੱਚ ਓਬਾਮਾ ਦੇ ਵਿਦੇਸ਼ ਦੌਰੇ ਨੂੰ ਅਧਾਰ ਬਣਾ ਕੇ ਇਹ ਸੰਦੇਸ਼ ਦੇਣ ਦੀ ਕੋਸ਼ਿਸ਼ ਕੀਤੀ ਗਈ ਹੈ ਕਿ ਇਲੀਨੋਇਸ ਦੇ ਸੀਨੇਟਰ ਭਲਾ ਹੀ ਵਿਸ਼ਵ ਭਰ ਵਿੱਚ ਸੈਲੀਬ੍ਰਿਟੀ ਸਮਝੇ ਜਾਣ ਪਰ ਉਹ ਅਮਰੀਕਾ ਰਾਸ਼ਟਰਪਤੀ ਬਣਨ ਲਈ ਤਿਆਰ ਨਹੀਂ ਹਨ। ਰਾਸ਼ਟਰਪਤੀ ਅਹੁਦੇ ਦੇ ਲਈ ਚੋਣਾਂ ਦੀ ਤਾਰੀਕ ਜਿਉਂ-ਜਿਉਂ ਕਰੀਬ ਆਉਂਦੀ ਜਾ ਰਹੀ ਹੈ ਪ੍ਰਚਾਰ ਨਕਰਾਤਮਕ ਹੁੰਦਾ ਜਾ ਰਿਹਾ ਹੈ।

ਅਬ ਅੰਜ਼ਾਮ-ਏ-ਗੁਲਸਿਤਾ ਕਯਾ ਹੋਗਾ…
ਸੱਚਮੁੱਚ ਹੁਣ ਤਾਂ ਰੱਬ ਵੀ ਭਾਰਤ ਦੇਸ਼ ਨੂੰ ਨਹੀਂ ਬਚਾਅ ਸਕਦਾ – ਐਡਵੋਕੇਟ ਮੰਝਪੁਰ

ਤਰੀਕ – 7 ਅਗਸਤ, 2008- ‘ਭਾਰਤ ਦੀ ਸਰਵਉੱਚ ਅਦਾਲਤ ਵੱਲੋਂ ਕੀਤੀ ਗਈ ਇਹ ਟਿੱਪਣੀ ਕਿ ‘ਰੱਬ ਵੀ ਇਸ ਦੇਸ਼ ਨੂੰ ਨਹੀਂ ਬਚਾਅ ਸਕਦਾ’ ਬਿਲਕੁਲ ਸਹੀ ਅਤੇ ਤੱਥਾਂ ’ਤੇ ਅਧਾਰਤ ਹੈ ਕਿਉਂਕਿ ਨਿਆਂ ਦੀਆਂ ਉੱਚ ਕੁਰਸੀਆਂ ’ਤੇ ਬੈਠੇ ਜੱਜਾਂ ਨੂੰ ਵੀ ਹੁਣ ਤੱਕ ਦੀਆਂ ਸਥਿਤੀਆਂ ਨੂੰ ਦੇਖ ਕੇ ਇਹ ਗੱਲ ਸਪੱਸ਼ਟ ਹੋ ਚੁੱਕੀ ਹੈ ਕਿ ਹਰ ਪੱਖ ਤੋਂ ਡੂੰਘੀ ਖੱਡ ਵਿੱਚ ਡਿੱਗ ਚੁੱਕੇ ਭਾਰਤ ਨੂੰ ਬਚਾਉਣ ਲਈ ਸ਼ਾਇਦ ਹੁਣ ਰੱਬ ਵੀ ਨਹੀਂ ਬਹੁੜੇਗਾ।’ ਇਹ ਟਿੱਪਣੀ ਯੂਥ ਅਕਾਲੀ ਦਲ ਅੰਮ੍ਰਿਤਸਰ (ਪੰਚ ਪ੍ਰਧਾਨੀ) ਦੇ ਮੁੱਖ ਬੁਲਾਰੇ ਐਡਵੋਕੇਟ ਜਸਪਾਲ ਸਿੰਘ ਮੰਝਪੁਰ ਨੇ ਸੁਪਰੀਮ ਕੋਰਟ ਵੱਲੋਂ ਇੱਕ ਕੇਸ ਦੇ ਫੈਸਲੇ ਦੌਰਾਨ ਭਾਰਤ ਦੀ ਹੋਂਦ ਸਬੰਧੀ ਸ਼ੰਕਾ ਜਤਾਉਂਣ ’ਤੇ ਕੀਤੀ।
ਉਨ੍ਹਾਂ ਕਿਹਾ ਕਿ 1950 ਵਿੱਚ ਭਾਰਤੀ ਸੰਵਿਧਾਨ ਦੇ ਲਾਗੂ ਹੋਣ ਤੋਂ ਲੈ ਕੇ ਹੁਣ ਤੱਕ ਭਾਰਤ ਦੇਸ਼ ਦੇ ਅਧੀਨ ਵੱਖ-ਵੱਖ ਸੱਭਿਆਚਾਰਾਂ, ਬੋਲੀਆਂ, ਧਰਮਾਂ ਅਤੇ ਕੌਮਾਂ ਨੂੰ ਜ਼ਬਰਦਸਤੀ ਨੂੜਿਆ ਗਿਆ ਹੈ ਅਤੇ ਇਨ੍ਹਾਂ ਸਾਰਿਆਂ ਨੂੰ ਇੱਕ ਹੀ ਰੰਗ ਵਿੱਚ ਰੰਗਣ ਦੇ ਉਪਰਾਲੇ ਕੀਤੇ ਗਏ ਹਨ ਅਤੇ ਇਸ ਦੇਸ਼ ਦੇ ਕਾਨੂੰਨ ਨੇ ਗਰੀਬਾਂ, ਦਲਿਤਾਂ ਅਤੇ ਘੱਟ ਗਿਣਤੀ ਕੌਮਾਂ ਪ੍ਰਤੀ ਹਮੇਸ਼ਾਂ ਹੀ ਪੱਖਪਾਤੀ ਰਵੱਈਆ ਅਪਣਾਈ ਰੱਖਿਆ ਹੈ, ਜਿਸ ਕਾਰਨ ਆਮ ਲੋਕਾਂ ਦਾ ਇਸ ਸਿਸਟਮ ਤੋਂ ਵਿਸ਼ਵਾਸ਼ ਉੱਠਦਾ ਜਾ ਰਿਹਾ ਹੈ ਅਤੇ ਕਿੰਨੀ ਤ੍ਰਾਸਦੀ ਦੀ ਗੱਲ ਹੈ ਕਿ ਨਿਆਂ ਦੀ ਸਭ ਤੋਂ ਉੱਚੀ ਕੁਰਸੀ ’ਤੇ ਬੈਠੇ ਵਿਅਕਤੀਆਂ ਨੂੰ ਵੀ ਇਹ ਗੱਲ ਕਹਿਣੀ ਪੈ ਰਹੀ ਹੈ ਕਿ ‘ਰੱਬ ਵੀ ਇਸ ਦੇਸ਼ ਨੂੰ ਹੁਣ ਨਹੀਂ ਬਚਾਅ ਸਕਦਾ।’
ਉਨ੍ਹਾਂ ਕਿਹਾ ਕਿ ਸਾਰੇ ਸਿਸਟਮ ਵਿੱਚ ਭ੍ਰਿਸ਼ਟਾਚਾਰ, ਅਨੈਤਿਕਤਾ, ਅਪਰਾਧੀਪੁਣਾ ਅਤੇ ਹੋਰ ਸਾਰੀਆਂ ਕੁਰੀਤੀਆਂ ਆ ਚੁੱਕੀਆਂ ਹਨ ਅਤੇ ਇਸ ਨੂੰ ਸੁਧਾਰਨਾ ਇਸ ਹੱਦ ਤੱਕ ਅਸੰਭਵ ਹੋ ਚੁੱਕਿਆ ਹੈ ਕਿ ਸ਼ਾਇਦ ਰੱਬ ਵੀ ਇਸ ਨੂੰ ਸੁਧਾਰਨ ਤੋਂ ਪਾਸਾ ਵੱਟ ਜਾਵੇ। ਉਨ੍ਹਾਂ ਕਿਹਾ ਕਿ ਭਾਰਤੀ ਲੋਕਤੰਤਰ ਕੇਵਲ ਦਿਖਾਵੇ ਮਾਤਰ ਹੀ ਦੁਨੀਆਂ ਦਾ ਸਭ ਤੋਂ ਵੱਡਾ ਲੋਕਤੰਤਰ ਹੈ ਪਰ ਅਸਲ ਤਸਵੀਰ ਬਹੁਤ ਭਿਆਨਕ ਹੈ, ਜਿਸ ਵਿੱਚ ਸਾਰਾ ਪ੍ਰਬੰਧਕੀ ਸਿਸਟਮ ਸਿਰਫ਼ ਕੁਝ ਹੱਥਾਂ ਤੱਕ ਹੀ ਸੀਮਤ ਹੈ ਅਤੇ ਉਹ ਆਪਣੇ ਸਵਾਰਥ ਦੀ ਖਾਤਰ ਹੀ ਸਭ ਕੁਝ ਕਰ ਰਹੇ ਹਨ।

ਜ਼ਰਦਾਰੀ-ਸ਼ਰੀਫ ਗੱਲਬਾਤ ਸ਼ੁਰੂ

ਇਸਲਾਮਾਬਾਦ, 7 ਅਗਸਤ (ਏਜੰਸੀਆਂ) ਪਾਕਿਸਤਾਨ ਪੀਪਲਜ਼ ਪਾਰਟੀ ਦੇ ਸਹਿਯੋਗੀ ਪ੍ਰਧਾਨ ਆਸਿਫ ਅਲੀ ਜ਼ਰਦਾਰੀ ਅਤੇ ਪੀ.ਐ¤ਮ.ਐਲ. (ਐ¤ਨ) ਮੁਖੀ ਨਵਾਜ ਸ਼ਰੀਫ ਨੇ ਗਠਬੰਧਨ ਸਰਕਾਰ ਲਈ ਮੁਸ਼ਕਿਲ ਬਣੇ ਵਿਵਾਦਤ ਮੁੱਦਿਆਂ ’ਤੇ ਗੱਲਬਾਤ ਦਾ ਨਵਾਂ ਦੌਰ ਬੀਤੀ ਰਾਤ ਤੋਂ ਮੁੜ ਤੋਂ ਸ਼ੁਰੂ ਕੀਤਾ। ਇਸ ਤੋਂ ਪਹਿਲੇ ਦਿਨ ਦੀ ਗੱਲਬਾਤ ਵਿਚ ਸ਼ਰੀਫ ਇਸ ਗੱਲ ਤੋਂ ਨਾਰਾਜ਼ ਵਿਖਾਈ ਦਿੱਤੇ ਕਿ ਸਰਕਾਰ ਰਾਸ਼ਟਰਪਤੀ ਦੇ ਇਕ ਆਦੇਸ਼ ਰਾਹੀਂ ਸਿੰਧ ਹਾਈਕੋਰਟ ਦੇ ਬਰਖ਼ਾਸਤ ਜੱਜਾਂ ਨੂੰ ਬਹਾਲ ਕਰਨਾ ਚਾਹੁੰਦੀ ਹੈ। ਉਨ੍ਹਾਂ ਆਪਣੇ ਭਰਾ ਅਤੇ ਪੰਜਾਬ ਦੇ ਮੁੱਖ ਮੰਤਰੀ ਸ਼ਹਿਬਾਜ਼ ਸ਼ਰੀਫ ਨੂੰ ਇਥੇ ਪੀ.ਪੀ.ਪੀ. ਮੁਖੀ ਦੇ ਨਿਵਾਸ ਸਥਾਨ ’ਤੇ ਗੱਲਬਾਤ ਲਈ ਭੇਜਿਆ, ਗੱਲਬਾਤ ਤੋਂ ਬਾਅਦ ਦੋਵਾਂ ਨੇਤਾਵਾਂ ਵੱਲੋਂ ਇਕ ਪੱਤਰਕਾਰ ਸੰਮੇਲਨ ਨੂੰ ਸੰਬੋਧਨ ਕਰਨ ਦੀ ਆਸ ਹੈ। ਸੂਤਰਾਂ ਨੇ ਦੱਸਿਆ ਕਿ ਗਠਬੰਧਨ ਸਰਕਾਰ ਦੇ ਸੀਨੀਅਰ ਨੇਤਾ ਕੱਲ੍ਹ ਸਿਧਾਂਤਕ ਰੂਪ ਨਾਲ ਇਸ ਗੱਲ ’ਤੇ ਸਹਿਮਤ ਹੋਏ ਕਿ ਉਹ ਰਾਸ਼ਟਰਪਤੀ ਪ੍ਰਵੇਜ਼ ਮੁਸ਼ੱਰਫ ਖ਼ਿਲਾਫ਼ ਮੁਕੱਦਮਾਂ ਚਲਾਉਣਗੇ। ਹਾਲਾਂਕਿ ਮੁਸ਼ੱਰਫ ਵੱਲੋਂ ਐਮਰਜੈਂਸੀ ਦੌਰਾਨ ਬਰਖ਼ਾਸਤ ਜੱਜਾਂ ਦੀ ਬਹਾਲੀ ਦੇ ਮੁੱਦੇ ’ਤੇ ਵੀ ਦੋਵਾਂ ਨੇਤਾਵਾਂ ਵਿਚਕਾਰ ਮਤਭੇਦ ਹਨ।

ਪਾਕਿਸਤਾਨ ਦੇ ਰਾਸ਼ਪਰਪਤੀ ਪਰਵੇਜ਼ ਮੁਸ਼ੱਰਫ ਦੀ ਛੇਤੀ ਹੀ ਛੁੱਟੀ

ਇਸਲਾਮਾਬਾਦ, 7 ਅਗਸਤ - ਪਾਕਿਸਤਾਨ ਦੇ ਰਾਸ਼ਪਰਪਤੀ ਪਰਵੇਜ਼ ਮੁਸ਼ੱਰਫ ਦੀ ਛੇਤੀ ਹੀ ਛੁੱਟੀ ਹੋਣ ਵਾਲੀ ਹੈ। ਸਾਂਝੀ ਸਰਕਾਰ ਨੇ ਮੁਸ਼ੱਰਫ ਨੂੰ ਕੁਰਸੀ ਤੋਂ ਲਾਉਣ ਲਈ ਕਮਰ ਕਸ ਲਈ ਹੈ। ਸਰਕਾਰ ਸੰਸਦ ਦੇ ਵਿਚ 11 ਅਗਸਤ ਨੂੰ ਮੁਸ਼ੱਰਫ ਦੇ ਖਿਲਾਫ ਪ੍ਰਸਤਾਵ ਰੱਖੇਗੀ। ਇਹ ਫੈਸਲਾ ਪੀ ਪੀ ਪੀ ਦੇ ਪ੍ਰਧਾਨ ਆਸਿਫ ਅਲੀ ਜਰਦਾਰੀ ਤੇ ਪਾਕਿਸਤਾਨ ਮੁਸਲਿਮ ਲੀਗ-ਨਵਾਜ਼ ਦੇ ਪ੍ਰਮੁੱਖ ਨਵਾਜ਼ ਸ਼ਰੀਫ ਦੇ ਵਿਚ ਹੋਈ ਬੈਠਕ ਵਿਚ ਲਿਆ ਗਿਆ। ਜਰਦਾਰੀ ਨੇ ਪ੍ਰੈਸ ਕਾਨਫੰਰਸ ਵਿਚ ਕਿਹਾ ਕਿ ਮੁਸ਼ਰੱਫ ਦੇ ਖਿਲਾਫ ਚਾਰਜਸ਼ੀਟ ਦਾਇਰ ਕੀਤੀ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਮੁਸ਼ਰੱਫ ਨੇ ਲੋਕਤੰਤਰ ਦੇ ਖਿਲਾਫ ਕੰਮ ਕੀਤਾ ਹੈ ਜਿਸ ਨੂੰ ਕਦੇ ਵੀ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ। ਇਸ ਤੋਂ ਇਲਾਵਾ ਉਨ੍ਹਾਂ ਕਿਹਾ ਕਿ ਸੁਪਰਿਮ ਕੋਰਟ ਦੇ ਬਰਖਾਸਤ ਜੱਜਾਂ ਦੀ ਬਹਾਲੀ ਕੀਤੀ ਜਾਵੇਗੀ। ਜਾਣਕਾਰੀ ਰਹੇ ਕਿ ਮੁਸ਼ੱਰਫ ਨੇ ਬਿਜਿੰਗ ਓੁਲਪਿੰਕ ਖੇਡਾ ਦੇ ਉਦਘਾਟਨੀ ਸਮਾਰੋਹ ਵਿਚ ਭਾਗ ਲੈ ਲਈ ਆਪਣੀ ਚੀਨ ਯਾਤਰਾ ਰੱਦ ਕਰ ਦਿੱਤੀ ਹੈ।

ਭਾਜਪਾ ਸੰਸਦਾਂ ਨੇ ਕਿਹਾ ਟੇਪ ਨਾਲ ਛੇੜਛਾੜ ਹੋਈ ਹੈ

ਨਵੀਂ ਦਿੱਲੀ : 7 ਅਗਸਤ - ਲੋਕ ਸਭਾ ਦੇ ਵਿਸ਼ਵਾਸ ਮਤ ਤੇ ਚਰਚਾ ਦੇ ਦੌਰਾਨ ਨੋਟਾ ਦੇ ਬੰਡਲ ਦਿਖਾ ਕੇ ਤਹਿਕਲਾ ਮਚਾਉਣ ਵਾਲੇ ਤਿੰਨ ਸੰਸਦਾਂ ਵਿਚੋਂ ਦੋ ਨੇ ਸਟਿੰਗ ਅਪਰੇਸ਼ਨ ਦੀ ਟੇਪ ਨਾਲ ਛੇੜਛਾੜ ਕੀਤੇ ਜਾਣ ਦਾ ਆਰੋਪ ਲਾਇਆ ਹੈ। ਇਸ ਮਾਮਲੇ ਦੀ ਜਾਂਚ ਕਰ ਰਹੀ ਸੱਤ ਮੈਂਬਰਾਂ ਦੀ ਸਮਿਤੀ ਦੇ ਸਾਹਮਣੇ 7 ਅਗਸਤ ਨੂੰ ਪੇਸ਼ ਹੋਏ ਭਾਜਪਾ ਸੰਸਦ ਅਸ਼ੋਕ ਅਗਰਲ ਅਤੇ ਫਗਨ ਸਿੰਘ ਕੁਲਸਤੇ ਨੇ ਮੀਡਿਆ ਦੇ ਸਾਹਮਣੇ ਤਾਂ ਟੇਪ ਨਾਲ ਛੇੜਛਾੜ ਦਾ ਆਰੋਪ ਲਾਇਆ ਹੈ, ਪਰ ਸਮੀਤੀ ਨੂੰ ਦਿੱਤੇ ਗਏ ਬਿਆਨ ਵਿਚ ਇਸ ਦਾ ਕੋਈ ਜ਼ਿਕਰ ਨਹੀਂ ਕੀਤਾ। ਸਮਿਤੀ ਦੇ ਚੇਅਰਮੈਨ ਵੀ ਕੇ ਕਿਸ਼ੋਰ ਚੰਦਰ ਦੇਵ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਸੰਸਦਾਂ ਨੇ ਬਿਆਨ ਦੇ ਦੌਰਾਨ ਇਸ ਟੇਪ ਨਾ ਛੇੜਛਾੜ ਹੋਣ ਦਾ ਕੋਈ ਦੋਸ਼ ਨਹੀਂ ਲਾਇਆ
ਕਰੀਬ ਢਾਈ ਘੰਟੇ ਚੱਲੀ ਇਸ ਪੁੱਛ ਗਿੱਛ ਵਿਚ ਸਮੀਤੀ ਨੇ ਉਨ੍ਹਾਂ ਨੂੰ ਇਹ ਦੋਸ਼ ਸਾਬਿਤ ਕਰਨ ਲਈ ਕਿਹਾ ਹੈ ਕਿ ਉਨ੍ਹਾਂ ਨੂੰ ਯੂ.ਪੀ.ਏ. ਸਰਕਾਰ ਦੇ ਪੱਖ ਵਿਚ ਵੋਟ ਪਾਉਣ ਲਈ ਰਿਸ਼ਵਤ ਦਿੱਤੀ ਗਈ। ਆਮ ਤੌਰ ਤੇ ਬਿਆਨ ਦੇਣ ਵਾਲਾ ਸੰਸਦ ਮੈਂਬਰ ਸਮਿਤੀ ਦੇ ਸਾਹਮਣੇ ਇਕਲਾ ਪੇਸ਼ ਹੁੰਦਾ ਹੈ, ਪਰ ਅਰਗਲ ਅਤੇ ਕੁਲਸਤੇ ਸਮਿਤੀ ਦੇ ਸਾਹਮਣੇ ਇਕੱਠੇ ਪੇਸ਼ ਹੋਏ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਉਨ੍ਹਾਂ ਨੇ ਸ਼ਿਕਾਇਤ ਵੀ ਇੱਕਠਿਆ ਨੇ ਦਰਜ ਕਰਵਾਈ ਹੈ ਇਸ ਲਈ ਉਹ ਪੇਸ਼ ਵੀ ਇਕੱਠੇ ਹੋਣਗੇ।

ਕੈਲਗਰੀ ਸੜਕ ਹਾਦਸੇ ‘ਚ ਪੰਜਾਬਣ ਦੀ ਮੌਤ

ਕੈਲਗਰੀ (ਅਲਬਰਟਾ, ਕੈਨੇਡਾ), 7 ਅਗਸਤ- ਇੱਥੇ ਇੱਕ ਸੜਕ ਹਾਦਸੇ ‘ਚ ਅਮਨਦੀਪ ਕੌਰ ਬਰਾੜ (24) ਦੀ ਮੌਤ ਹੋਣ ਦੀ ਖ਼ਬਰ ਮਿਲ਼ੀ ਹੈ। ਸੈਡਲਕ੍ਰੈਸਟ ਇਲਾਕੇ ‘ਚ ਇਹ ਮੰਦਭਾਗੀ ਘਟਨਾ ਉਸ ਦੀ ਚਾਰ ਸਾਲਾ ਧੀ ਅੰਮ੍ਰਿਤ ਦੇ ਸਾਹਮਣੇ ਵਾਪਰੀ। ਮ੍ਰਿਤਕਾ ਦੇ ਪਤੀ ਸ. ਰਣਜੀਤ ਸਿੰਘ ਅਤੇ ਭਰਾ ਪਰਮਜੀਤ ਸਿੰਘ ਬਰਾੜ ਤੋਂ ਪ੍ਰਾਪਤ ਜਾਣਕਾਰੀ ਮੁਤਾਬਕ ਬੀਬਾ ਅਮਨਦੀਪ ਕੌਰ ਹਾਲ਼ੇ ਡਰਾਇਵਿੰਗ ਸਿੱਖ ਰਹੀ ਸੀ। ਉਸ ਕੋਲ਼ ਕਿਸੇ ਵੀ ਕਿਸਮ ਦਾ ਡਰਾਇਵਿੰਗ ਲਾਇਸੈਂਸ ਵੀ ਨਹੀਂ ਸੀ। ਸੋਮਵਾਰ ਦੀ ਰਾਤ ਨੂੰ ਅਚਾਨਕ ਕਾਰ ਉਸ ਦੇ ਕਾਬੂ ਤੋਂ ਬਾਹਰ ਹੋ ਗਈ ਅਤੇ ਗੁਆਂਢੀਆਂ ਦੇ ਘਰ ‘ਚ ਜਾ ਵੜੀ। ਉਸ ਦੀ ਛੋਟੀ ਧੀ ਆਪਣੇ ਘਰ ‘ਚ ਮੌਜੂਦ ਸੀ। ਪਰਮਜੀਤ ਸਿੰਘ ਨੇ ਹੀ ਸਪਾਂਸਰਸ਼ਿਪ ਦੇ ਕੇ ਆਪਣੀ ਭੈਣ ਅਮਨਦੀਪ ਕੌਰ ਨੂੰ ਕੈਨੇਡਾ ਸੱਦਿਆ ਸੀ। ਪੁਲਿਸ ਵੱਲੋਂ ਸ਼ਾਇਦ ਇਸ ਮਾਮਲੇ ‘ਚ ਕਿਸੇ ‘ਤੇ ਵੀ ਕੋਈ ਦੋਸ਼ ਆਇਦ ਨਾ ਕੀਤੇ ਜਾਣ।

ਕੈਪਟਨ ਅਮਰਿੰਦਰ ਸਿੰਘ ਪਾਰਲੀਮਾਨੀ ਚੋਣਾਂ ਲਈ ਰਾਜ ਵਿਚ ਪਾਰਟੀ ਦੀ ਚੋਣ ਮੁਹਿੰਮ ਅਤੇ ਉਮੀਦਵਾਰ ਚੋਣ ਕਮੇਟੀ ਦੇ ਚੇਅਰਮੈਨ
ਮਹਿੰਦਰ ਸਿੰਘ ਕੇ. ਪੀ. ਨੂੰ ਮੁਕੰਮਲ ਪ੍ਰਧਾਨ ਦੇ ਅਧਿਕਾਰ ਸੌਂਪੇ
ਬੀਬੀ ਭੱਠਲ ਦਾ ਪ੍ਰਧਾਨਗੀ ਤੋਂ ਅਸਤੀਫ਼ਾ

ਨਵੀਂ ਦਿੱਲੀ/ ਚੰਡੀਗੜ੍ਹ, 6 ਅਗਸਤ -ਬੀਬੀ ਭੱਠਲ ਅਤੇ ਕੈਪਟਨ ਅਮਰਿੰਦਰ ਸਿੰਘ ਧੜਿਆਂ ਵਿਚਾਲੇ ਵੰਡੀ ਪੰਜਾਬ ਕਾਂਗਰਸ ਨੂੰ ਆ ਰਹੀਆਂ ਲੋਕ ਸਭਾ ਚੋਣਾਂ ਵਿੱਚ ਇੱਕ ਮੁੱਠ ਕਰਨ ਲਈ ਪੰਜਾਬ ਪੱਧਰ ਦੇ ਜਥੇਬੰਧਕ ਢਾਂਚੇ ਵਿੱਚ ਵੱਡੀ ਪੱਧਰ ’ਤੇ ਫੇਰ ਬਦਲ ਕਰ ਦਿੱਤਾ ਹੈ। ਅੱਜ ਨਵੀਂ ਦਿੱਲੀ ਵਿੱਚ ਸੋਨੀਆ ਗਾਂਧੀ ਦੇ ਆਦੇਸ਼ ’ਤੇ ਨਵੇਂ ਐਲਾਨੇ ਗਏ ਢਾਂਚੇ ਵਿੱਚ ਸ. ਮਹਿੰਦਰ ਸਿੰਘ ਕੇ. ਪੀ. ਹੁਰਾਂ ਨੂੰ ਪੰਜਾਬ ਕਾਂਗਰਸ ਦਾ ਮੁਕੰਮਲ ਪ੍ਰਧਾਨ ਥਾਪ ਦਿੱਤਾ ਗਿਆ ਹੈ। ਪਹਿਲਾਂ ਉਹ ਪੰਜਾਬ ਕਾਂਗਰਸ ਦੇ ਕਾਰਜਕਾਰੀ ਪ੍ਰਧਾਨ ਸਨ। ਕੇਂਦਰੀ ਹਾਈ ਕਮਾਂਡ ਨੇ ਬੀਬੀ ਰਜਿੰਦਰ ਕੌਰ ਭੱਠਲ ਵੱਲੋਂ ਸੂਬਾ ਪ੍ਰਧਾਨਗੀ ਦੇ ਅਹੁੱਦੇ ਤੋਂ ਦਿੱਤਾ ਅਸਤੀਫ਼ਾ ਪ੍ਰਵਾਨ ਕਰ ਲਿਆ ਹੈ। ਇਸੇ ਦੌਰਾਨ ਪੰਜਾਬ ਕਾਂਗਰਸ ਵਿੱਚ ਢੁੱਕਵਾਂ ਅਹੁਦਾ ਨਾ ਮਿਲਣ ਕਾਰਨ ਸਿਆਸੀ ਸਰਗਰਮੀਆਂ ਤੋਂ ਦੂਰੀ ਰੱਖੀ ਬੈਠੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੂੰ ਆ ਰਹੀਆਂ ਲੋਕ ਸਭਾ ਚੋਣਾਂ ਵਿੱਚ ਪੂਰੀ ਤਰ੍ਹਾਂ ਸਰਗਰਮ ਕਰਨ ਲਈ ਹਾਈ ਕਮਾਂਡ ਨੇ ਦੋ ਵੱਡੇ ਅਹੁਦਿਆਂ ਨਾਲ ਨਿਵਾਜ਼ਿਆ ਹੈ। ਪ੍ਰਾਪਤ ਸੂਚਨਾ ਅਨੁਸਾਰ ਸਾਬਕਾ ਮੁੱਖ ਮੰਤਰੀ ਪੰਜਾਬ ਕੈਪਟਨ ਅਮਰਿੰਦਰ ਸਿੰਘ ਨੂੰ ਪਾਰਲੀਮਾਨੀ ਚੋਣਾਂ ਲਈ ਰਾਜ ਵਿਚ ਪਾਰਟੀ ਦੀ ਚੋਣ ਮੁਹਿੰਮ ਅਤੇ ਉਮੀਦਵਾਰ ਚੋਣ ਕਮੇਟੀ ਦਾ ਚੇਅਰਮੈਨ ਬਣਾਇਆ ਗਿਆ ਹੈ।
ਸ੍ਰੀ ਅਸ਼ਵਨੀ ਸ਼ੇਖੜੀ ਨੂੰ ਇਨ੍ਹਾਂ ਦੋਵਾਂ ਕਮੇਟੀਆਂ ਕਨਵੀਨਰ ਬਣਾਇਆ ਗਿਆ ਹੈ। ਬੀਬੀ ਸ੍ਰੀਮਤੀ ਰਾਜਿੰਦਰ ਕੌਰ ਭੱਠਲ ਨੂੰ ਪੰਜਾਬ ਵਿਧਾਨ ਸਭਾ ਵਿਚ ਕਾਂਗਰਸ ਵਿਧਾਨਕਾਰ ਪਾਰਟੀ ਦਾ ਨੇਤਾ ਕਾਇਮ ਰੱਖਿਆ ਜਾਵੇਗਾ ਜਦੋਂਕਿ ਇਕ ਹੋਰ ਸੀਨੀਅਰ ਵਿਧਾਨਕਾਰ ਸ੍ਰੀ ਬ੍ਰਹਮ ਮਹਿੰਦਰਾ ਨੂੰ ਸ੍ਰੀਮਤੀ ਭੱਠਲ ਨਾਲ ਪਾਰਟੀ ਦਾ ਡਿਪਟੀ ਲੀਡਰ ਬਣਾਇਆ ਗਿਆ ਹੈ। ਉਕਤ ਤਿੰਨੇ ਅਹੁਦੇਦਾਰਾਂ ਪਾਰਟੀ ਦੀ ਚੋਣ ਕਮੇਟੀ ਦੇ ਮੈਂਬਰ ਵੀ ਹੋਣਗੇ ਜੋ ਆਉਂਦੀਆਂ ਪਾਰਲੀਮਾਨੀ ਚੋਣਾਂ ਲਈ ਪਾਰਟੀ ਟਿਕਟਾਂ ਦੀਆਂ ਸਿਫਾਰਸ਼ਾਂ ਕਰਨ ਤੋਂ ਇਲਾਵਾ ਸੂਬੇ ਵਿਚ ਪਾਰਟੀ ਦੀ ਚੋਣ ਮੁਹਿੰਮ ਨੂੰ ਵੀ ਚਲਾਏਗੀ। ਕੈਪਟਨ ਅਮਰਿੰਦਰ ਸਿੰਘ ਜੋ ਕਿ ਬੀਤੀ ਰਾਤ ਦੁਬਈ ਤੋਂ ਵਾਪਸ ਦਿੱਲੀ ਪਰਤ ਸਨ ਨੇ ਅੱਜ ਸਵੇਰੇ ਕਾਂਗਰਸ ਪ੍ਰਧਾਨ ਸ੍ਰੀਮਤੀ ਸੋਨੀਆ ਗਾਂਧੀ ਅਤੇ ਪਾਰਟੀ ਦੇ ਦੂਜੇ ਸੀਨੀਅਰ ਆਗੂਆਂ ਨਾਲ ਮੁਲਾਕਾਤਾਂ ਕੀਤੀਆਂ। ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਨੇ ਬੀਜ਼ਿੰਗ ਲਈ ਰਵਾਨਾ ਹੋਣ ਤੋਂ ਪਹਿਲਾਂ ਕੈਪਟਨ ਅਮਰਿੰਦਰ ਨਾਲ ਗੱਲਬਾਤ ਕਰਦਿਆਂ ਪੰਜਾਬ ਕਾਂਗਰਸ ਦੇ ਨਵੇਂ ਜਥੇਬੰਧਕ ਢਾਂਚੇ ਨੂੰ ਹਰੀ ਝੰਡੀ ਦੇ ਦਿੱਤੀ ਹੈ। ਬੀਬੀ ਭੱਠਲ ਵੀ ਆਪਣੇ ਇਟਲੀ ਦੇ ਦੌਰੇ ਤੋਂ ਅੱਜ ਵਾਪਸ ਪਰਤ ਰਹੇ ਹਨ। ਕਾਂਗਰਸ ਹਾਈ ਕਮਾਂਡ ਲੋਕ ਸਭਾ ਚੋਣਾਂ ਨੂੰ ਮੁੱਖ ਰੱਖਕੇ ਜਿਥੇ ਇਕ ਪਾਸੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਲੋਕਪ੍ਰਿਅਤਾ ਨੂੰ ਚੋਣ ਮੁਹਿੰਮ ਲਈ ਵਰਤਣਾ ਚਾਹੁੰਦੀ ਹੈ, ਉ¤ਥੇ ਪਾਰਟੀ ਦੇ ਸੂਬੇ ਵਿਚਲੇ ਦੂਜੇ ਧੜਿਆਂ ਨੂੂੰ ਵੀ ਨਰਾਜ਼ ਕੀਤੇ ਬਿਨਾਂ ਚੋਣ ਮੁਹਿੰਮ ਵਿੱਚ ਉਨ੍ਹਾਂ ਦਾ ਵੀ ਪੂਰਾ ਮਿਲਵਰਤਨ ਨਾਲ ਰੱਖਣਾ ਚਾਹੁੰਦੀ ਹੈ। ਇੱਥੇ ਇਹ ਵੀ ਜ਼ਿਕਰਯੋਗ ਹੈ ਕਿ ਕਿਸੇ ਵੀ ਤਰ੍ਹਾਂ ਦੀਆਂ ਹੋਣ ਵਾਲੀਆਂ ਚੋਣਾਂ ਵਿੱਚ ਸੱਤਾਧਾਰੀ ਅਕਾਲੀ ਦਲ ਬਾਦਲ ਨੂੰ ਜੇ ਕੋਈ ਆਗੂ ਸਿੱਧੀ ਟੱਕਰ ਦੇ ਸਕਦਾ ਹੈ ਤਾਂ ਉਹ ਸਿਰਫ਼ ਕੈਪਟਨ ਅਮਰਿੰਦਰ ਸਿੰਘ ਹੀ ਹਨ। ਪਿਛਲੇ ਕੁਝ ਸਮੇਂ ਤੋਂ ਉਨ੍ਹਾਂ ਦੇ ਸਰਗਰਮ ਸਿਆਸਤ ਤੋਂ ਦੂਰ ਰਹਿਣ ਕਾਰਨ ਪੰਜਾਬ ਕਾਂਗਰਸ ਨੂੰ ਜੋ ਅਨੇਕਾਂ ਚੋਣਾਂ ਵਿੱਚ ਹਾਰ ਦਾ ਸਾਹਮਣਾ ਕਰਨਾ ਪਿਆ ਉਸ ਪਿੱਛੇ ਕੈਪਟਨ ਦਾ ਸਰਗਰਮ ਨਾ ਹੋਣਾ ਵੀ ਮਹੱਤਵਪੂਰਨ ਹੈ। ਕੈਪਟਨ ਅਮਰਿੰਦਰ ਸਿੰਘ ਨੇ ਪ੍ਰਮਾਣੂ ਸਮਝੌਤੇ ਲਈ ਵਿਸ਼ਵਾਸ਼ ਮੱਤ ਹਾਸਲ ਕਰਨ ਵਿੱਚ ਕਾਂਗਰਸ ਪਾਰਟੀ ਅਤੇ ਕੇਂਦਰ ਸਰਕਾਰ ਦੀ ਵੱਡੇ ਪੱਧਰ ’ਤੇ ਮਦਦ ਕਰਕੇ ਆਪਣੀ ਸਥਿਤੀ ਮਜ਼ਬੂਤ ਬਣਾਉਣ ਵਿੱਚ ਹਾਸਲ ਕੀਤੀ। ਇਸੇ ਨੂੰ ਦੇਖਦਿਆਂ ਕੇਂਦਰ ਹਾਈ ਕਮਾਂਡ ਨੇ ਕੈਪਟਨ ਅਮਰਿੰਦਰ ਸਿੰਘ ਨੂੰ ਪੰਜਾਬ ਸਿਆਸਤ ਵਿੱਚ ਸਰਗਰਮ ਕਰਕੇ ਆ ਰਹੀਆਂ ਲੋਕ ਸਭਾ ਚੋਣਾਂ ਵਿੱਚ ਪਾਰਟੀ ਉਮੀਦਵਾਰਾਂ ਦੀ ਜਿੱਤ ਯਕੀਨੀ ਕਰਨ ਲਈ ਦੋ ਕਮੇਟੀਆਂ ਦੀ ਚੇਅਰਮੈਨੀ ਸੌਂਪ ਦਿੱਤੀ ਹੈ। ਪਾਰਟੀ ਦੇ ਕਾਰਜਕਾਰੀ ਪ੍ਰਧਾਨ ਸ. ਮਹਿੰਦਰ ਸਿੰਘ ਕੇ. ਪੀ. ਨੂੰ ਮੁਕੰਮਲ ਪ੍ਰਧਾਨ ਦੀਆਂ ਸ਼ਕਤੀਆਂ ਦੇ ਕੇ ਹਾਈ ਕਮਾਂਡ ਨੇ ਪਾਰਟੀ ਵਿੱਚ ਨਵੀਂ ਕਤਾਰਬੰਦੀ ਹੋਣ ਤੋਂ ਬਚਾਅ ਕਰ ਲਿਆ ਹੈ। ਕਿਉਂਕਿ ਸ੍ਰੀ ਕੇ. ਪੀ. ਭੱਠਲ ਅਤੇ ਅਮਰਿੰਦਰ ਦੋਵੇਂ ਧੜਿਆਂ ਵਿੱਚ ਨਿਰ ਵਿਵਾਦ ਅਤੇ ਸਰਵ ਪ੍ਰਵਾਨਿਤ ਆਗੂ ਹਨ।
ਹਾਈ ਕਮਾਂਡ ਨੇ ਬੀਬੀ ਭੱਠਲ ਤੋਂ ਸੂਬਾ ਪ੍ਰਧਾਨਗੀ ਲੈ ਕੇ ਉਨ੍ਹਾਂ ਨੂੰ ਵਿਰੋਧੀ ਧਿਰ ਦਾ ਲੀਡਰ ਬਣਾਈ ਰੱਖਣ ਅਤੇ ਕੈਪਟਨ ਅਮਰਿੰਦਰ ਨੂੰ ਆ ਰਹੀਆਂ ਲੋਕ ਸਭਾ ਚੋਣਾਂ ਦੀ ਤਿਆਰੀ ਲਈ ਚੋਣ ਮੁਹਿੰਮ ਦਾ ਜ਼ਿੰਮਾ ਸੌਂਪ ਕੇ ਪਾਰਟੀ ਵਿੱਚ ਨਵੀਂ ਸਿਆਸੀ ਸਰਗਰਮੀ ਨੂੰ ਹਲੂਣਾ ਦੇਣ ਦਾ ਯਤਨ ਕੀਤਾ ਹੈ।

ਨਵ-ਨਿਯੁਕਤ ਕਾਰਜਕਾਰੀ ਜੱਥੇਦਾਰ ਸਿੰਘ ਸਾਹਿਬ ਗਿ. ਗੁਰਬਚਨ ਸਿੰਘ ਹੋਰਾਂ ਦੀ ਤਾਜਪੋਸ਼ੀ ਅੱਜ

ਅੰਮ੍ਰਿਤਸਰ, 6 ਅਗਸਤ -ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਨਵ-ਨਿਯੁਕਤ ਕਾਰਜਕਾਰੀ ਜੱਥੇਦਾਰ ਗਿ. ਗੁਰਬਚਨ ਸਿੰਘ ਜੋ 7 ਅਗਸਤ ਨੂੰ ਸਿੱਖ ਪੰਥ ਦੇ ਸਰਵ-ਉਚ ਅਸਥਾਨ ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਕਾਰਗੁਜ਼ਾਰੀ ਜੱਥੇਦਾਰ ਵੱਜੋਂ ਸੇਵਾ ਸੰਭਾਲ ਰਹੇ ਹਨ, ਸਬੰਧੀ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਸੰਤ ਮਹਾਂਪੁਰਸ਼ਾਂ, ਸਿੱਖ ਸੰਪਰਦਾਵਾਂ ਪੰਥਕ ਜੱਥੇਬੰਦੀਆਂ ਨੂੰ ਸੱਦਾ-ਪੱਤਰ ਭੇਜੇ ਗਏ ਹਨ। ਸਿੱਖ ਪੰਥ ਦੀ ਸਭ ਤੋਂ ਸਿਰਮੌਰ ਮੰਨੀ ਜਾਂਦੀ ਸੰਸਥਾ ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਜੱਥੇਦਾਰ ਦੇ ਸੇਵਾ ਸੰਭਾਲ ਸਮਾਰੋਹ ਵਿੱਚ ਅਕਾਲੀ ਦਲ (ਬਾਦਲ) ਨਿਵਾਜ ਜੱਥੇਬੰਦੀਆਂ ਦੇ ਪ੍ਰਤੀਨਿਧਾਂ ਦੇ ਹੀ ਸ਼ਾਮਲ ਹੋਣ ਦੀ ਸੰਭਾਵਨਾ ਹੈ। ਕਿਸੇ ਵੀ ਸਾਬਕਾ ਜੱਥੇਦਾਰ ਦੀ ਇਸ ਸਮਾਰੋਹ ਵਿੱਚ ਸ਼ਾਮਲ ਹੋਣ ਦੀ ਆਸ ਘੱਟ ਹੀ ਨਜ਼ਰ ਆ ਰਹੀ ਹੈ। ਜਦ ਤੋਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਹੋਂਦ ਵਿੱਚ ਆਈ ਹੈ, ਜੱਥੇਦਾਰ ਅਕਾਲ ਤਖਤ ਸਾਹਿਬ ਦੀ ਨਿਯੁਕਤੀ ਇਹੋ ਜੱਥੇਬੰਦੀ ਕਰਦੀ ਆ ਰਹੀ ਹੈ ਅਤੇ ਸਮੇਂ ਸਮੇਂ ਤੇ ਅਹੁਦੇ ਤੋਂ ਮੁਕਤ ਕਰਦੀ ਰਹੀ ਹੈ, ਪਰ ਸਿੱਖ ਜੱਥੇਦਾਰ ਨੂੰ ਜਲੀਲ ਕਰਕੇ ਅਹੁਦੇ ਤੋਂ ਮੁਕਤ ਕਰਨ ਦੇ ਢੰਗ ਨੂੰ ਪਸੰਦ ਨਹੀਂ ਕਰਦੇ। ਜਦ ਕਿ ਅਕਾਲੀ ਦਲ (ਬਾਦਲ) ਦਾ ਸ਼੍ਰੋਮਣੀ ਕਮੇਟੀ ਤੇ ਕਬਜ਼ਾ ਹੈ। ਕਈ ਜੱਥੇਦਾਰਾਂ ਨੂੰ ਜਲੀਲ ਕਰਕੇ ਹਟਾਇਆ ਗਿਆ। ਸਿੱਖ ਚਾਹੁੰਦੇ ਹਨ ਕਿ ਇਸ ਧਾਰਮਿਕ ਸੰਸਥਾ ਦੇ ਜੱਥੇਦਾਰ ਨੂੰ ਰਾਜਨੀਤਕ ਪਾਰਟੀਆਂ ਦੇ ਹੱਥਾਂ ਤੋਂ ਦੂਰ ਰੱਖਿਆ ਜਾਵੇ।

ਵਿਵਾਦਾਂ ਤੋਂ ਦੂਰ ਰਹਿ ਕੇ ਸਾਰੇ ਪੰਥਕ ਮਸਲੇ ਹੱਲ ਕੀਤੇ ਜਾਣਗੇ : ਗਿ. ਗੁਰਬਚਨ ਸਿੰਘ

ਅੰਮ੍ਰਿਤਸਰ, 6 ਅਗਸਤ (ਮਹਿੰਦਰ ਸਿੰਘ ਸੀਟਾ) : ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਕਾਰਜਕਾਰੀ ਜਥੇਦਾਰ ਨਿਯੁਕਤ ਕੀਤੇ ਜਾਣ ਉਪਰੰਤ ਸਿੰਘ ਸਾਹਿਬ ਗਿਆਨੀ ਗੁਰਬਚਨ ਸਿੰਘ ਨੇ ‘ਹਮਦਰਦ‘ ਨਾਲ਼ ਖ਼ਾਸ ਗੱਲਬਾਤ ਦੌਰਾਨ ਕਿਹਾ ਕਿ ਉਹ ਵੱਖ ਵੱਖ ਪੰਥਕ ਮਸਲਿਆਂ ਦੇ ਹੱਲ ਲਈ ਸਿੰਘ ਸਾਹਿਬਾਨ ਨਾਲ਼ ਮੀਟਿੰਗ ਕਰਨਗੇ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦਾ ਜਤਨ ਹੋਵੇਗਾ ਕਿ ਵਾਦ ਵਿਵਾਦ ਤੋਂ ਨਿਰਲੇਪ ਰਹਿ ਕੇ ਸਾਰੇ ਮਸਲੇ ਹੱਲ ਕੀਤੇ ਜਾਣ ਅਤੇ ਸਮੂਹ ਸਿੱਖ ਜਥੇਬੰਦੀਆਂ ਨੂੰ ਨਾਲ਼ ਲੈ ਕੇ ਪੰਥ ਦੀ ਚੜ੍ਹਦੀ ਕਲਾ ਲਈ ਕੰਮ ਕੀਤਾ ਜਾਵੇ। ਇਸ ਮੌਕੇ ਸ਼੍ਰੋਮਣੀ ਕਮੇਟੀ ਮੈਂਬਰ ਜਸਵਿੰਦਰ ਸਿੰਘ ਐਡਵੋਕੇਟ, ਧਰਮ ਪ੍ਰਚਾਰ ਕਮੇਟੀ ਦੇ ਮੈਂਬਰ ਹਰਦਲਬੀਰ ਸਿੰਘ ਸ਼ਾਹ, ਬਲਵਿੰਦਰ ਸਿੰਘ ਜੌੜਾ, ਜ਼ਿਲ੍ਹਾ ਪ੍ਰਧਾਨ ਅਮਰਬੀਰ ਸਿੰਘ ਢੋਟ ਨੇ ਗੁਲਦਸਤਾ ਭੇਟ ਕਰਕੇ ਸੁਆਗਤ ਕੀਤਾ। ਇਸ ਤੋਂ ਪਹਿਲਾਂ ਗਿਆਨੀ ਗੁਰਬਚਨ ਸਿੰਘ ਨੇ ਸ਼ੁਕਰਾਨੇ ਵਜੋਂ ਸੱਚਖੰਡ ਸ੍ਰੀ ਹਰਿਮੰਦਰ ਸਾਹਿਬ ਵਿਖੇ ਨਤਮਸਤਕ ਹੋ ਕੇ ਗੁਰੂ ਘਰ ਦਾ ਸ਼ੁਕਰਾਨਾ ਕਰਦਿਆਂ ਕਿਹਾ ਕਿ ਉਨ੍ਹਾਂ ਲਈ ਇਹ ਫ਼ਖ਼ਰ ਵਾਲ਼ੀ ਗੱਲ ਹੈ ਕਿ ਇਸ ਮਹਾਨ ਤਖ਼ਤ ਦੀ ਸੇਵਾ ਦਾ ਮੌਕਾ ਉਨ੍ਹਾਂ ਨੂੰ ਬਖ਼ਸ਼ਿਆ ਗਿਆ ਹੈ।

ਗਿਆਨੀ ਗੁਰਬਚਨ ਸਿੰਘ ਪੰਥਕ ਰਵਾਇਤਾਂ ਵਿੱਚ ਆਈ ਹੋਈ ਖੜ੍ਹੋਤ ਨੂੰ ਤੋੜ੍ਹਨਗੇ ਜਾਂ ਜਥੇਦਾਰ ਵੇਦਾਂਤੀ ਦੇ ਵਿਰਸੇ ’ਤੇ ਹੀ ਪਹਿਰਾ ਦੇਣਗੇ-ਭਾਈ ਬਿੱਟੂ

ਫਤਿਹਗੜ੍ਹ ਸਾਹਿਬ/ 6 ਅਗਸਤ/ਰਣਜੋਧ ਸਿੰਘ ਔਜਲਾ ਸ੍ਰੀ ਅਕਾਲ ਤਖ਼ਤ ਦੇ ਜਥੇਦਾਰ ਜੋਗਿੰਦਰ ਸਿੰਘ ਵੇਦਾਂਤੀ ਤੋਂ ਲਿਆ ਗਿਆ ਜਬਰੀ ਅਸਤੀਫ਼ਾ ਕੋਈ ਹੈਰਾਨੀ ਦੀ ਗੱਲ ਨਹੀਂ ਕਿਉਂਕਿ ਮੌਜੂਦਾ ਪ੍ਰਬੰਧ ਪੰਥਕ ਰਵਾਇਤਾਂ ਤੋਂ ਬਿਲਕੁਲ ਸੱਖਣਾ ਹੈ ਅਤੇ ਇਸ ਪ੍ਰਬੰਧ ਅਧੀਨ ਅਕਾਲ ਤਖ਼ਤ ਦੀ ਜਥੇਦਾਰੀ ਵਰਗੇ ਅਹੁਦਿਆਂ ’ਤੇ ਨਿਯੁਕਤ ਕੀਤੇ ਜਾਂਦੇ ਜਥੇਦਾਰਾਂ ਨੂੰ ਇੱਕ ‘ਟੂਲ’ ਵਾਂਗ ਵਰਤਿਆ ਜਾਂਦਾ ਹੈ। ਇਹ ਤਾਂ ਹੁਣ ਆਉਣ ਵਾਲਾ ਸਮਾਂ ਹੀ ਦੱਸੇਗਾ ਕਿ ਗਿਆਨੀ ਗੁਰਬਚਨ ਸਿੰਘ ਪੰਥਕ ਰਵਾਇਤਾਂ ਵਿੱਚ ਆਈ ਹੋਈ ਖੜ੍ਹੋਤ ਨੂੰ ਤੋੜ੍ਹਨਗੇ ਜਾਂ ਜਥੇਦਾਰ ਵੇਦਾਂਤੀ ਦੇ ਵਿਰਸੇ ’ਤੇ ਹੀ ਪਹਿਰਾ ਦੇਣਗੇ। ਇਹ ਟਿੱਪਣੀ ਜਸਪਾਲ ਸਿੰਘ ਮੰਝਪੁਰ (ਐਡਵੋਕੇਟ) ਮੈਂਬਰ ਮੀਡੀਆ ਕਮੇਟੀ ਵੱਲੋਂ ਜਾਰੀ ਇਕ ਪ੍ਰੈ¤ਸ ਬਿਆਨ ਵਿਚ ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ (ਪੰਚ ਪ੍ਰਧਾਨੀ) ਦੇ ਚੇਅਰਮੈਨ ਭਾਈ ਦਲਜੀਤ ਸਿੰਘ ਬਿੱਟੂ ਨੇ ਜਥੇਦਾਰ ਜੋਗਿੰਦਰ ਸਿੰਘ ਵੇਦਾਂਤੀ ਨੂੰ ਅਕਾਲ ਤਖ਼ਤ ਦੀ ਜਥੇਦਾਰੀ ਤੋਂ ਰੁਖ਼ਸਤ ਅਤੇ ਗਿਆਨੀ ਗੁਰਬਚਨ ਸਿੰਘ ਨੂੰ ਕਾਰਜਕਾਰੀ ਜਥੇਦਾਰੀ ਸੌਂਪੇ ਜਾਣ ’ਤੇ ਕੀਤੀ।
ਭਾਈ ਬਿੱਟੂ ਨੇ ਕਿਹਾ ਕਿ ਅੱਜ ਸਿੱਖ ਸੰਸਥਾਵਾਂ ’ਤੇ ਕੇਵਲ ਇੱਕ ਪਰਿਵਾਰ ਦਾ ਕਬਜ਼ਾ ਹੋ ਚੁੱਕਾ ਹੈ ਅਤੇ ਉਹ ਆਪਣੀ ਮਰਜ਼ੀ ਅਤੇ ਲੋੜ ਮੁਤਾਬਿਕ ਅਹੁਦੇਦਾਰੀਆਂ ਦੀ ਵੰਡ ਕਰਦਾ ਹੈ ਜਾਂ ਬਦਲਦਾ ਰਹਿੰਦਾ ਹੈ। ਜਥੇਦਾਰ ਵੇਦਾਂਤੀ ਨੂੰ ਅਹੁਦੇ ਤੋਂ ਲਾਹੁਣ ਦੇ ਆਸਾਰ ਉਸ ਦਿਨ ਹੀ ਪੈਦਾ ਹੋ ਗਏ ਸਨ ਜਿਸ ਦਿਨ ਆਰ.ਐਸ.ਐਸ.-ਭਾਜਪਾ ਨੇ ਜਥੇਦਾਰ ਵੇਦਾਂਤੀ ਦੇ ਬਿਆਨਾਂ ’ਤੇ ਸ਼ਰ੍ਹੇਆਮ ਇਤਰਾਜ਼ ਜ਼ਾਹਰ ਕੀਤਾ ਸੀ। ਹੁਣ ਇਹ ਗੱਲ ਸਪੱਸ਼ਟ ਹੋ ਗਈ ਹੈ ਕਿ ਜਿਵੇਂ ਆਰ.ਐਸ.ਐਸ.-ਭਾਜਪਾ ਪੰਜਾਬ ਸਰਕਾਰ ਨੂੰ ਆਪਣੀ ਮਨਮਰਜ਼ੀ ਮੁਤਾਬਿਕ ਚਲਾ ਰਹੀ ਹੈ, ਉੱਥੇ ਉਸ ਦਾ ਦਖ਼ਲ ਸਿੱਖ ਸੰਸਥਾਵਾਂ ’ਚ ਵੀ ਉੱਘੜ ਕੇ ਸਾਹਮਣੇ ਆ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਅਕਾਲ ਤਖ਼ਤ ਦੇ ਜਥੇਦਾਰ ਦਾ ਅਹੁਦਾ ਸਨਮਾਨਯੋਗ ਹੈ, ਪਰ ਇਸ ਵਿਅਕਤੀਵਾਦੀ ਪ੍ਰਬੰਧ ਅਤੇ ਇਹਨਾਂ ਅਹੁਦਿਆਂ ’ਤੇ ਬਿਰਾਜਮਾਨ ਹੋਣ ਵਾਲਿਆਂ ਨੇ ਇਸ ਅਹੁਦੇ ਦੀ ਭਾਵਨਾ ਨੂੰ ਭਾਰੀ ਠੇਸ ਪਹੁੰਚਾਉਂਦਿਆ ਕੌਮ ਨੂੰ ਦੁਨੀਆਂ ਸਾਹਮਣੇ ਹਮੇਸ਼ਾਂ ਸ਼ਰਮਸ਼ਾਰ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਅੱਜ ਗੱਲ ਸਿਧਾਂਤਾਂ ਦੀ ਹੋਣੀ ਚਾਹੀਦੀ ਹੈ ਨਾ ਕਿ ਵਿਅਕਤੀਆਂ ਦੀ। ਪਿਛਲੇ ਲੰਬੇ ਸਮੇਂ ਤੋਂ ਇਸ ਪ੍ਰਬੰਧ ਅਧੀਨ ਜਿੰਨੇ ਵੀ ਜਥੇਦਾਰ ਆਏ, ਉਹ ਜਥੇਦਾਰ ਵੇਦਾਂਤੀ ਵਾਂਗ ਹੀ ਤੁਰਦੇ ਕੀਤੇ ਗਏ। ਉਨ੍ਹਾਂ ਕਿਹਾ ਕਿ ਇਸ ਪ੍ਰਬੰਧ ਲਈ ਜਿੱਥੇ ਕਸੂਰ ਬਾਦਲ ਦਾ ਹੈ, ਉੱਥੇ ਉਸ ਤੋਂ ਵੱਧ ਕਸੂਰਵਾਰ ਉਹ ਵਿਅਕਤੀ ਹਨ, ਜੋ ਇਨ੍ਹਾਂ ਉੱਚ ਸਨਮਾਨਯੋਗ ਪਦਵੀਆਂ ’ਤੇ ਰਹਿੰਦਿਆਂ ਵੀ ਇਹਨਾਂ ਪਦਵੀਆਂ ਦੇ ਸਤਿਕਾਰ ਨੂੰ ਕਾਇਮ ਨਹੀਂ ਰੱਖਦੇ ਅਤੇ ਬਾਦਲ ਉਨ੍ਹਾਂ ਨੂੰ ਇੱਕ ‘ਟੂਲ’ ਵਾਂਗ ਇਸਤੇਮਾਲ ਕਰਦਾ ਹੈ। ਭਾਈ ਦਲਜੀਤ ਸਿੰਘ ਨੇ ਕਿਹਾ ਕਿ ਬਾਦਲ ਵੱਲੋਂ ਆਪਣੇ ਪਰਿਵਾਰ ਅਤੇ ਨਿੱਜੀ ਸੁਆਰਥਾਂ ਦੀ ਖਾਤਰ ਸਿੱਖ ਸਿਧਾਤਾਂ ਅਤੇ ਸੰਸਥਾਵਾਂ ਦਾ ਡੂੰਘਾ ਨੁਕਸਾਨ ਕੀਤਾ ਗਿਆ ਹੈ ਅਤੇ ਇਹਨਾਂ ਸੰਸਥਾਵਾਂ ਨੂੰ ਆਪਣੀ ਨਿੱਜੀ ਜਾਇਦਾਦ ਵਾਂਗ ਵਰਤਿਆ ਹੈ। ਉਨ੍ਹਾਂ ਜਥੇਦਾਰ ਵੇਦਾਂਤੀ ਨੂੰ ਕਿਹਾ ਕਿ ਉਹ ਹੁਣ ਇਸ ਜ਼ਿੰਮੇਵਾਰ ਤੋਂ ਵਿਹਲੇ ਹੋ ਚੁੱਕੇ ਹਨ ਅਤੇ ਸਮਾਂ ਕੱਢ ਕੇ ਉਹ ਆਪਣੇ ਕਾਰਜਕਾਲ ਦੌਰਾਨ ਦਬਾਅ ਅਧੀਨ ਆ ਕੇ ਕੀਤੀਆਂ ‘ਕਾਰਵਾਈਆਂ’ ਬਾਰੇ ਵਿਚਾਰਨ ਲਈ ਆਪਣੇ ਅੰਦਰ ਝਾਤ ਮਾਰਨ, ਕਿ ਉਨ੍ਹਾਂ ਨੇ ਬਾਦਲ ਦਾ ‘ਟੂਲ’ ਬਣ ਕੇ ਹੁਣ ਕੀ ਹਾਸਲ ਕਰ ਲਿਆ ਹੈ? ਉਨ੍ਹਾਂ ਨਵ ਨਿਯੁਕਤ ਕਾਰਜਕਾਰੀ ਜਥੇਦਾਰ ਗਿਆਨੀ ਗੁਰਬਚਨ ਸਿੰਘ ਵੱਲੋਂ ਪੰਥ ਨੂੰ ਇੱਕ ਪਲੇਟਫਾਰਮ ’ਤੇ ਲਿਆਉਣ ਦੀ ਗੱਲ ਕਰਨ ਬਾਰੇ ਟਿੱਪਣੀ ਕਰਦਿਆਂ ਕਿਹਾ ਕਿ ਗਿਆਨੀ ਗੁਰਬਚਨ ਸਿੰਘ ਦੀ ਨਿਯੁਕਤੀ ਹੋਣ ਤੋਂ ਬਾਅਦ ਵੀ ਸਿੱਖ ਕੌਮ ਦੀ ਸਥਿਤੀ ਕੋਈ ਬਹੁਤੀ ਸੁਧਰਨ ਦੀ ਆਸ ਨਹੀਂ, ਕਿਉਂਕਿ ਉਨ੍ਹਾਂ ਦੀ ਨਿਯੁਕਤੀ ਵੀ ਉਸੇ ਪ੍ਰਬੰਧ ਅਧੀਨ ਹੋਈ ਹੈ ਅਤੇ ਜਥੇਦਾਰ ਵੇਦਾਂਤੀ ਦਾ ਵਰਤਮਾਨ ਗਿਆਨੀ ਗੁਰਬਚਨ ਸਿੰਘ ਦਾ ਭਵਿੱਖ ਵੀ ਹੋ ਸਕਦਾ ਹੈ।
ਅਖ਼ੀਰ ਵਿੱਚ ਭਾਈ ਬਿੱਟੂ ਨੇ ਕਿਹਾ ਕਿ ਸ੍ਰੀ ਅਕਾਲ ਤਖ਼ਤ ਦੇ ਜਥੇਦਾਰ ਦੀ ਪਦਵੀਂ ਮਨੁੱਖਤਾ ਲਈ ਇੱਕ ਚਾਨਣ ਮੁਨਾਰਾ ਹੈ ਅਤੇ ਇਸ ਨੇ ਖਾਲਸਾ ਪੰਥ ਅਤੇ ਸਰਬੱਤ ਦੇ ਭਲੇ ਲਈ ਸਮੁੱਚੀ ਲੋਕਾਈ ਨੂੰ ਸੇਧ ਦੇਣੀ ਹੁੰਦੀ ਹੈ ਅਤੇ ਜੇਕਰ ਸਿੱਖ ਪੰਥ ਆਪਣੇ ਸਿਧਾਂਤ ਅਤੇ ਸਰਬੱਤ ਖਾਲਸਾ, ਗੁਰਮਤਾ ਆਦਿ ਸੰਸਥਾਵਾਂ ਨੂੰ ਇੱਕ ਵਿਅਕਤੀ ਦੇ ਕਬਜ਼ੇ ’ਚੋਂ ਕੱਢਣਾ ਚਾਹੁੰਦਾ ਹੈ ਤਾਂ ਸਭ ਤੋਂ ਪਹਿਲਾਂ ਪੰਥ ਨੂੰ ਇੱਕ ਕੇਸਰੀ ਨਿਸ਼ਾਨ ਸਾਹਿਬ ਥੱਲੇ ਇਕੱਠੇ ਹੋ ਕੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦਾ ਪ੍ਰਬੰਧ ਪੰਥਕ ਹੱਥਾਂ ਵਿੱਚ ਲਿਆਉਣ ਲਈ ਯਤਨ ਕਰਨੇ ਪੈਣਗੇ।

ਸ. ਹਰਚਰਨਜੀਤ ਸਿੰਘ ਧਾਮੀ ਦਲ ਖ਼ਾਲਸਾ ਦੇ ਨਵੇਂ ਪ੍ਰਧਾਨ

ਦਲ ਖ਼ਾਲਸਾ ਨੇ ਅੱਜ ਸ. ਹਰਚਰਨਜੀਤ ਸਿੰਘ ਧਾਮੀ ਨੂੰ ਅਗਲੇ ਦੋ ਸਾਲਾਂ ਲਈ ਆਪਣਾ ਪ੍ਰਧਾਨ ਚੁਣਿਆ ਅਤੇ ਨਾਲ ਹੀ ਉਨਾਂ ਨੂੰ ਨਵਾਂ ਜਥੇਬੰਦਕ ਢਾਂਚਾ ਉਸਾਰਨ ਦੇ ਅਧਿਕਾਰ ਵੀ ਦਿਤੇ। ਪੰਜਾਬ ਅਤੇ ਚੰਡੀਗੜ੍ਹ ਤੋਂ ਆਏ ਕਰੀਬ 110 ਡੈਲੀਗੇਟਾਂ ਨੇ ਸਥਾਨਕ ਸੈਕਟਰ-35 ਦੇ ਗੁਰਦੁਆਰਾ ਅਕਾਲਗੜ੍ਹ ਸਾਹਿਬ ਵਿਖੇ ਕੀਤੀ ਇੱਕਤਰਤਾ ਵਿਚ ਸ. ਧਾਮੀ ਨੂੰ ਆਪਣਾ ਅਗਲਾ ਪ੍ਰਧਾਨ ਚੁਣਿਆ। ਸ. ਧਾਮੀ ਦਾ ਨਾਮ ਸਤਿਨਾਮ ਸਿੰਘ ਪਾਉਟਾ ਸਾਹਿਬ ਨੇ ਪੇਸ਼ ਕੀਤਾ, ਜਿਸ ਨੂੰ ਸਮੁੱਚੇ ਇਜਲਾਸ ਨੇ ਜੈਕਾਰਿਆਂ ਦੀ ਗੂੰਜ ਨਾਲ ਪ੍ਰਵਾਨਗੀ ਦਿਤੀ। ਆਪਣੇ 30ਵੇਂ ਸਥਾਪਨਾ ਦਿਵਸ ਮੌਕੇ ਪਾਰਟੀ ਡੈਲੀਗੇਟਾਂ ਨੇ ਜਥੇਬੰਦੀ ਦੀ ਚੜ੍ਹਦੀ ਕਲਾ ਲਈ ਅਰਦਾਸ ਕੀਤੀ ਅਤੇ ਖ਼ਾਲਸਾ ਰਾਜ ਦੀ ਪ੍ਰਾਪਤੀ ਲਈ ਆਪਣੀ ਪ੍ਰਤੀਬੱਧਤਾ ਨੂੰ ਮੁੜ ਦੁਹਰਾਇਆ। ਪਾਰਟੀ ਇਜਲਾਸ ਵਲੋਂ ਇਕ ਅਹਿਮ ਫ਼ੈਸਲਾ ਲੈਂਦੇ ਹੋਏ ਸਿਖ ਨੌਜਵਾਨਾਂ ਅੰਦਰ ਸਵੈਮਾਣ ਦੀ ਭਾਵਨਾ ਪੈਦਾ ਕਰਨ ਅਤੇ ਉਨ੍ਹਾਂ ਨੂੰ ਆਪਣੀ ਵਿਲੱਖਣ ਧਾਰਮਿਕ ਅਤੇ ਸਭਿਆਚਾਰਕ ਪਛਾਣ ਪ੍ਰਤੀ ਜਾਗਰਤ ਕਰਨ ਲਈ ਪਾਰਟੀ ਦਾ ਯੂਥ ਵਿੰਗ ਉਸਾਰਨ ਦਾ ਫ਼ੈਸਲਾ ਲਿਆ ਗਿਆ। ਇਹ ਵੀ ਫੈਸਲਾ ਲਿਆ ਗਿਆ ਕਿ ਨੌਜਵਾਨਾਂ ਦੀ ਇਸ ਜਥੇਬੰਦੀ ਦਾ ਨਾਂ ‘ਸਿਖ ਯੂਥ ਆਫ ਪੰਜਾਬ’ ਹੋਵੇਗਾ ਅਤੇ ਇਸ ਦੀ ਬਣਤਰ ਦਾ ਐਲਾਨ 28 ਨਵੰਬਰ (ਜਨਮ ਦਿਹਾੜਾ ਸਾਹਿਬਜ਼ਾਦਾ ਬਾਬਾ ਜ਼ੋਰਾਵਰ ਸਿੰਘ) ਨੂੰ ਕੀਤਾ ਜਾਵੇਗਾ। ਇਸ ਮੌਕੇ ਇਕ ਮਤੇ ਰਾਹੀਂ ਦਲ ਖ਼ਾਲਸਾ ਦੇ ਮੋਢੀ ਮੈਂਬਰ ਸ. ਗਜਿੰਦਰ ਸਿੰਘ ਅਤੇ ਸ. ਸਤਿਨਾਮ ਸਿੰਘ ਪਾਉਂਟਾ ਸਾਹਿਬ ਵਲੋਂ ਆਪਣੀ ਸਾਰੀ ਉਮਰ ਕੌਮ ਦੀ ਸੇਵਾ ਵਿੱਚ ਲਾਉਣ ਦੀ ਪ੍ਰਸੰਸਾ ਕੀਤੀ ਗਈ। ਸ. ਸਤਿਨਾਮ ਸਿੰਘ ਅਤੇ ਸ. ਕੰਵਰਪਾਲ ਸਿੰਘ ਨੇ ਇਹ ਜਾਣਕਾਰੀ ਪੱਤਰਕਾਰਾਂ ਨੂੰ ਦਿੰਦੇ ਹੋਏ ਕਿਹਾ ਕਿ ਪ੍ਰਭੂਸੱਤਾ ਅਤੇ ਅਜ਼ਾਦੀ ਦਾ ਸੰਕਲਪ ਸਾਡੇ ਧਾਰਮਿਕ ਸਿਧਾਂਤ ਨਾਲ ਡੂੰਘੀ ਤਰ੍ਹਾਂ ਜੁੜਿਆ ਹੈ।

ਤਿੰਨ ਸੌ ਸਾਲਾ ਸ਼ਤਾਬਦੀ ਮਨਾਉਣ ਲਈ ਸੰਗਤਾਂ ਰੇਲ ਗੱਡੀਆਂ ਰਾਹੀਂ ਭੇਜਾਂਗੇ-ਸਿੰਘ ਸਾਹਿਬ

ਤਲਵੰਡੀ ਸਾਬੋ, 6 ਅਗਸਤ (ਰਣਜੀਤ ਰਾਜੂ)-ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਗੁਰਤਾਗੱਦੀ ਦਿਵਸ ਦੀ ਤੀਸਰੀ ਸ਼ਤਾਬਦੀ ਨੂੰ ਵੱਡੇ ਪੱਧਰ ’ਤੇ ਮਨਾਉਣ ਦੀਆਂ ਤਿਆਰੀਆਂ ਸ਼ੁਰੂ ਕਰ ਦਿੱਤੀਆਂ ਗਈਆਂ ਹਨ, ਜਿਨ੍ਹਾਂ ਦੇ ਸਬੰਧ ਵਿੱਚ ਬਠਿੰਡਾ, ਮਾਨਸਾ ਜ਼ਿਲ੍ਹੇ ਦੇ ਸ਼੍ਰੋਮਣੀ ਕਮੇਟੀ ਮੈਂਬਰਾਂ ਅਤੇ ਹੋਰ ਪ੍ਰਮੁੱਖ ਸਖਸ਼ੀਅਤਾਂ ਦੀ ਇੱਕ ਮੀਟਿੰਗ ਅੱਜ ਇੱਥੇ ਤਖ਼ਤ ਸ੍ਰੀ ਦਮਦਮਾ ਸਾਹਿਬ ਦੇ ਸਿੰਘ ਸਾਹਿਬ ਜਥੇਦਾਰ ਬਲਵੰਤ ਸਿੰਘ ਨੰਦਗੜ੍ਹ ਦੀ ਸਰਪ੍ਰਸਤੀ ਹੇਠ ਹੋਈ। ਮੀਟਿੰਗ ਦੀ ਕਾਰਵਾਈ ਸਬੰਧੀ ਜਾਣਕਾਰੀ ਦਿੰਦਿਆਂ ਸਿੰਘ ਸਾਹਿਬ ਜਥੇਦਾਰ ਬਲਵੰਤ ਸਿੰਘ ਨੰਦਗੜ੍ਹ ਅਤੇ ਸ਼੍ਰੋਮਣੀ ਅਕਾਲੀ ਦਲ (ਬ) ਦੇ ਜਨਲ ਸਕੱਤਰ ਬਲਵਿੰਦਰ ਸਿੰਘ ਭੂੰਦੜ ਨੇ ਦੱਸਿਆ ਕਿ ਸ਼ਤਾਬਦੀ ਦੇ ਮੁੱਖ ਸਮਾਗਮਾਂ ਤੋਂ ਪਹਿਲਾਂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਸਰਬ ਸਾਂਝੀਵਾਲਤਾ ਦੇ ਫਲਸਫੇ ਨੂੰ ਪ੍ਰਚਾਰ ਦੇ ਵੱਖ-ਵੱਖ ਸਾਧਨਾਂ ਰਾਹੀਂ ਦੁਨੀਆਂ ਦੇ ਕੋਨੇ-ਕੋਨੇ ’ਚ ਪਹੁੰਚਾਇਆ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਪਹਿਲਾਂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦਾ 302 ਸਾਲਾ ਸੰਪੂਰਨਤਾ ਦਿਵਸ 30 ਅਗਸਤ ਨੂੰ ਅਤੇ ਗੁਰਤਾਗੱਦੀ ਦਿਵਸ ਪਹਿਲਾਂ 18 ਤੋਂ 20 ਅਕਤੂਬਰ ਨੂੰ ਤਖ਼ਤ ਸ੍ਰੀ ਦਮਦਮਾ ਸਾਹਿਬ ਜਾਣਗੇ ਅਤੇ ਇਸ ਉਪਰੰਤ ਤਖ਼ਤ ਸ੍ਰੀ ਹਜੂਰ ਸਾਹਿਬ (ਨਾਂਦੇੜ) ਵਿਖੇ 31 ਅਕਤੂਬਰ ਗੁਰਤਾਗੱਦੀ ਦੇ ਮਨਾਏ ਜਾ ਰਹੇ ਮੁੱਖ ਸਮਾਗਮਾਂ ਵਿੱਚ ਸੰਗਤਾਂ ਵੱਡੀ ਤਾਦਾਦ ਵਿੱਚ ਸ਼ਿਰਕਤ ਕਰਨਗੀਆਂ। ਸਿੰਘ ਸਾਹਿਬ ਅਤੇ ਅਕਾਲੀ ਆਗੂ ਨੇ ਦੱਸਿਆ ਕਿ ਸ੍ਰੀ ਹਜੂਰ ਸਾਹਿਬ ਵਿਖੇ ਪਹੁੰਚਣ ਦੇ ਲਈ ਤਿੰਨਾਂ ਤਖ਼ਤਾਂ ਸ੍ਰੀ ਕੇਸਗੜ੍ਹ ਸਾਹਿਬ ਆਨੰਦਪੁਰ, ਸ੍ਰੀ ਅਕਾਲ ਤਖ਼ਤ ਸਾਹਿਬ ਅੰਮ੍ਰਿਤਸਰ ਅਤੇ ਤਖ਼ਤ ਸ੍ਰੀ ਦਮਦਮਾ ਸਾਹਿਬ ਤਲਵੰਡੀ ਸਾਬੋ ਤੋਂ ਅਤੇ ਹੋਰ ਅਸਥਾਨਾਂ ਤੋਂ ਸੰਗਤਾਂ ਦੇ ਜਾਣ ਲਈ ਵਿਸ਼ੇਸ਼ ਰੇਲ ਗੱਡੀਆਂ ਦੇ ਪ੍ਰਬੰਧ ਕੀਤੇ ਜਾਣਗੇ। ਸ਼ਰਧਾਲੂਆਂ ਦੀ ਤਾਦਾਦ ਨੂੰ ਦੇਖਦਿਆਂ ਹੋਰ ਵੀ ਵਿਸ਼ੇਸ਼ ਰੇਲ ਗੱਡੀਆਂ ਦਾ ਪ੍ਰਬੰਧ ਵੀ ਕੀਤਾ ਜਾ ਸਕੇਗਾ। ਉਨ੍ਹਾਂ ਦੱਸਿਆ ਕਿ ਰੇਲ ਕਿਰਾਏ ’ਚ ਸ਼ਰਧਾਂਲੂਆਂ ਨੂੰ ਸ਼੍ਰੋਮਣੀ ਕਮੇਟੀ ਵੱਲੋਂ ਵਿਸ਼ੇਸ਼ ਛੋਟ ਕੀਤੀ ਜਾਵੇਗੀ। ਦਮਦਮਾ ਸਾਹਿਬ ਤੋਂ ਹਜੂਰ ਸਾਹਿਬ ਲਈ 27 ਅਕਤੂਬਰ ਨੂੰ ਵਿਸ਼ੇਸ਼ ਰੇਲ ਗੱਲੀ ਰਵਾਨਾ ਹੋਵੇਗੀ। ਜਥੇਦਾਰ ਬਲਵੰਤ ਸਿੰਘ ਨੰਦਗੜ੍ਹ ਨੇ ਦੱਸਿਆ ਕਿ ਸ਼ਤਾਬਦੀ ਸਮਾਗਮਾਂ ਸਬੰਧੀ ਉਲੀਕੀ ਗਈ ਰੂਪ ਰੇਖਾ ਨੂੰ ਅੰਤਿਮ ਰੂਪ ਦੇਣ ਦੇ ਲਈ ਇੱਕ ਮੀਟਿੰਗ 19 ਅਗਸਤ ਨੂੰ ਸ੍ਰੀ ਦਮਮਦਾ ਸਾਹਿਬ ਵਿਖੇ ਹੋਵੇਗੀ। ਜਿਸ ਵਿੱਚ ਬਠਿੰਡਾ, ਮਾਨਸਾ ਜ਼ਿਲ੍ਹਿਆ ਦੇ ਸ਼੍ਰੋਮਣੀ ਕਮੇਟੀ ਮੈਂਬਰ, ਵਿਧਾਇਕ, ਸੰਸਦ ਮੈਂਬਰ ਅਤੇ ਸਿੱਖ ਪੰਥ ਦੀਆਂ ਹੋਰ ਪ੍ਰਮੁੱਖ ਹਸਤੀਆਂ ਸ਼ਿਰਕਤ ਕਰਨਗੀਆਂ। ਅੱਜ ਦੀ ਮੀਟਿੰਗ ਵਿੱਚ ਹੋਰਨਾਂ ਤੋਂ ਇਲਾਵਾ ਮੇਜਰ ਸਿੰਘ ਐਡੀਸ਼ਨਲ ਸਕੱਤਰ ਸ਼੍ਰੋਮਣੀ ਕਮੇਟੀ ਬਲਕਾਰ ਸਿੰਘ ਸਕੱਤਰ, ਬਾਬਾ ਟੇਕ ਸਿੰਘ ਧਨੌਲਾ, ਸੂਬਾ ਸਿੰਘ ਡੱਬਵਾਲਾ (ਦੋਵੇਂ ਅੰਤ੍ਰਿਮ ਕਮੇਟੀ ਮੈਂਬਰ), ਪ੍ਰਿੰਸੀਪਲ ਅਮਰਜੀਤ ਸਿੰਘ, ਮੈਨੇਜਰ ਜਗਪਾਲ ਸਿੰਘ ਧਰਮ ਪ੍ਰਚਾਰ ਕਮੇਟੀ ਸਬ ਦਫਤਰ ਦੇ ਇੰਚਾਰਜ ਭਰਪੂਰ ਸਿੰਘ, ਭਰਪੂਰ ਸਿੰਘ ਖਾਲਸਾ, ਕਮੇਟੀ ਮੈਂਬਰ ਮੋਹਨ ਸਿੰਘ, ਸੁਰਜੀਤ ਸਿੰਘ ਰਾਏਪੁਰ, ਮੁੱਖ ਗ੍ਰੰਥੀ ਭਾਈ ਮਾਨ ਸਿੰਘ ਆਦਿ ਸਖਸ਼ੀਅਤਾਂ ਸ਼ਾਮਿਲ ਸਨ।

ਪੈਸੇ ਕਮਾਉਣ ਲਈ ਪਾਰਟੀਆਂ ਬਣਾ ਰਹੇ ਹਨ ਲੋਕ

ਚੇਨਈ, 6 ਅਗਸਤ 2008 - ਦੇਸ਼ ਵਿਚ 967 ਸਿਆਸੀ ਦਲ ਹਨ ਅਤੇ ਇਨ੍ਹਾਂ ਚੋਂ ਕਈ ਕੇਵਲ ਕਾਗਜ਼ਾਂ ਵਿਚ ਹੀ ਚਲਦੇ ਹਨ। ਇਨ੍ਹਾਂ ਨੂੰ ਬਣਾਉਣ ਦਾ ਮਕਸਦ ਕੇਵਲ ਕਾਲੇ ਧਨ ਨੂੰ ਸਫੇਦ ਕਰਨਾ ਹੈ। ਚੋਣ ਕਮਿਸ਼ਨ ਸਭ ਕੁਝ ਜਾਨਣ ਦੇ ਬਾਵਜੂਦ ਕੁਝ ਵੀ ਨਹੀਂ ਕਰ ਸਕਦਾ ਕਿਉਂਕਿ ਕਮਿਸ਼ਨ ਨੂੰ ਪਾਰਟੀਆਂ ਰੱਦ ਕਰਨ ਦਾ ਅਧਿਕਾਰ ਨਹੀਂ ਹੈ। ਜੋ ਪਾਰਟੀ ਪੰਜ ਸਾਲ ਤੱਕ ਕਿਸੇ ਵੀ ਚੋਣ ਵਿਚ ਹਿੱਸਾ ਨਹੀਂ ਲੈਂਦੀ, ਉਸਦੀ ਰਜਿਸਟ੍ਰੇਸ਼ਨ ਰੱਦ ਹੋ ਜਾਣੀ ਚਾਹੀਦੀ ਹੈ ਅਤੇ ਚੋਣ ਕਮਿਸ਼ਨ ਨੂੰ ਇਹ ਅਧਿਕਾਰ ਮਿਲ ਜਾਣਾ ਚਾਹੀਦਾ ਹੈ। ਇਹ ਕਹਿਣਾ ਹੈ ਦੇਸ਼ ਦੇ ਮੁੱਖ ਚੋਣ ਕਮਿਸ਼ਨ ਐਨ ਗੋਪਾਲਸਵਾਮੀ ਦਾ। ਮੁੱਖ ਚੋਣ ਕਮਿਸ਼ਨ ਨੇ ਬੁੱਧਵਾਰ ਨੂੰ ਇੱਥੇ ਇਕ ਸੈਮੀਨਾਰ ਵਿਚ ਕਿਹਾ ਕਿ ਕਾਲੇ ਧਨ ਨੂੰ ਸਫੇਦ ਕਰਨ ਲਈ ਪਾਰਟੀਆਂ ਦੀ ਗਿਣਤੀ ਵਧਦੀ ਜਾ ਰਹੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਚੋਣ ਕਮਿਸ਼ਨ ਸਿਆਸੀ ਪਾਰਟੀਆਂ ਦੀ ਰਜਿਸਟ੍ਰੇਸ਼ਨ ਤਾਂ ਕਰ ਸਕਦਾ ਹੈ ਪਰ ਰਜਿਸਟ੍ਰੇਸ਼ਨ ਰੱਦ ਕਰਨ ਦਾ ਅਧਿਕਾਰ ਉਸਦੇ ਕੋਲ ਨਹੀਂ ਹੈ। ਉਨ੍ਹਾਂ ਨੇ ਦੱਸਿਆ ਕਿ ਲੋਕਾਂ ਤੋਂ ਪੈਸੇ ਲੈਣ ਦੇ ਬਾਵਜੂਦ ਕਈ ਪਾਰਟੀਆਂ ਕਿਸੇ ਵੀ ਸਿਆਸੀ ਗਤੀਵਿਧੀ ਵਿਚ ਸ਼ਰੀਕ ਨਹੀਂ ਹਨ। ਬਸ ਇਕ ਮੇਜ਼, ਇਕ ਕੁਰਸੀ ਅਤੇ ਇਕ ਕਮਰੇ ਵਾਲੇ ਦਫਤਰ ਨਾਲ ਪਾਰਟੀਆਂ ਚਲ ਰਹੀਆਂ ਹਨ।ਗੋਪਾਲਸਵਾਮੀ ਨੇ ਕਿਹਾ ਕਿ ਸਾਨੂੰ ਪੰਜ ਸਾਲ ਤੋਂ ਵੱਧ ਸਮੇਂ ਤੱਕ ਕੋਈ ਚੋਣ ਨਹੀਂ ਲੜਨ ਵਾਲੀ ਪਾਰਟੀ ਦੀ ਰਜਿਸਟ੍ਰੇਸ਼ਨ ਰੱਦ ਕਰਨ ਦਾ ਅਧਿਕਾਰ ਦੇਵੋ। ਮੁੱਖ ਚੋਣ ਕਮਿਸ਼ਨ ਨੇ ਚੋਣਾਂ ਵਿਚ ਧਨ-ਸ਼ਕਤੀ ਦੇ ਵਧਦੇ ਇਸਤੇਮਾਲ ‘ਤੇ ਚਿੰਤਾ ਵੀ ਪ੍ਰਗਟਾਈ। ਉਨ੍ਹਾਂ ਨੇ ਹਾਲ ਹੀ ਵਿਚ ਕਰਨਾਟਕ ਵਿਧਾਨ ਸਭਾ ਵਿਚ ਹੋਈਆਂ ਚੋਣਾਂ ਦਾ ਜ਼ਿਕਰ ਕਰਦੇ ਹੋਏ ਕਿਹਾ ਕਿ ਇਕ ਉਮੀਦਵਾਰ ਦੇ ਲਈ ਖਰਚ ਦੀ ਸੀਮਾ ਵੱਧ ਤੋਂ ਵੱਧ 10 ਲੱਖ ਰੁਪਏ ਹਨ ਪਰ ਕੁਝ ਉਮੀਦਵਾਰਾਂ ਨੇ ਪੰਜ ਕੋਰੜ ਰੁਪਏ ਤੱਕ ਵੀ ਖਰਚ ਕੀਤੇ ਹਨ।

ਨੈਣਾ ਦੇਵੀ ਹਾਦਸਾ: ਸਾਹ ਘੁਟਣ ਨਾਲ ਹੋਈਆਂ ਜ਼ਿਆਦਾਤਰ ਮੌਤਾਂ

ਨੈਣਾ ਦੇਵੀ, 6 ਅਗਸਤ 2008 - ਨੈਣਾ ਦੇਵੀ ਮੰਦਿਰ ਭਗਦੜ ਹਾਦਸੇ ਵਿਚ ਮਾਰੇ ਗਏ ਲੋਕਾਂ ਦੀ ਪੋਸਟ ਮਾਰਟਮ ਰਿਪੋਰਟ ਦੇ ਅਨੁਸਾਰ ਮੌਤਾਂ ਦਾ ਕਾਰਨ ਸਾਹ ਘੁਟ ਹੋਣਾ ਰਿਹਾ ਹੈ। ਐਸ.ਡੀ.ਐਮ. ਪੀਸੀ ਅਕੇਲਾ ਨੇ ਦੱਸਿਆ ਕਿ 141 ਮ੍ਰਿਤਕਾਂ ਵਿਚੋਂ 101 ਦੀ ਪੋਸਟਮਾਰਟਮ ਦੀ ਰਿਪੋਰਟ ਤੋਂ ਪਤਾ ਲੱਗਾ ਹੈ ਕਿ ਛਾਤੀ ਦਬਣ ਦੇ ਕਾਰਨ ਦਮ ਘੁਟ ਹੋਣਾ ਮੌਤ ਦਾ ਕਾਰਨ ਰਿਹਾ ਹੈ। ਪੀੜਤਾਂ ਨੂੰ ਇੱਥੇ 18 ਕਿਲੋਮੀਟਰ ਦੂਰ ਪੰਜਾਬ ਦੇ ਅਨੰਦਪੁਰ ਸਾਹਿਬ ਦੇ ਸਰਕਾਰੀ ਹਸਪਤਾਲ ਵਿਚ ਭਰਤੀ ਕਰਵਾਇਆ ਗਿਆ ਸੀ। ਉੱਥੇ ਹੀ ਉਨ੍ਹਾਂ ਦਾ ਪੋਸਟਮਾਰਟਮ ਹੋਇਆ। ਉਨ੍ਹਾਂ ਨੇ ਦੱਸਿਆ ਕਿ 40 ਲਾਸ਼ਾਂ ਦਾ ਪੋਸਟਮਾਰਟਮ ਉਨ੍ਹਾਂ ਦੇ ਰਿਸ਼ਤੇਦਾਰਾਂ ਦੀ ਅਪੀਲ ‘ਤੇ ਨਹੀਂ ਕੀਤਾ ਗਿਆ ਹੈ ਅਤੇ ਜ਼ਿਲ੍ਹਾ ਪ੍ਰਸ਼ਾਸਨ ਨੇ ਇਨ੍ਹਾਂ ਲਾਸ਼ਾਂ ਨੂੰ ਉਨ੍ਹਾਂ ਦੇ ਰਿਸ਼ਤੇਦਾਰਾਂ ਦੇ ਹਵਾਲੇ ਕਰ ਦਿੱਤਾ ਹੈ। ਉੱਧਰ ਪੁਲਿਸ ਦੇ ਇਕ ਸੀਨੀਅਰ ਅਧਿਕਾਰੀ ਨੇ ਦੱਸਿਆ ਕਿ ਮ੍ਰਿਤਕਾਂ ਦੇ ਰਿਸ਼ਤੇਦਾਰਾਂ ਨੂੰ ਪੋਸਟਮਾਰਟਮ ਦੀ ਰਿਪੋਰਟ ਦੇ ਦਿੱਤੀ ਗਈ ਹੈ। ਨੈਣਾ ਧਾਰ ਪਹਾੜ ‘ਤੇ ਪੱਥਰ ਡਿੱਗਣ ਦੀ ਅਫਵਾਹ ਦੇ ਕਾਰਨ ਨੈਣਾ ਦੇਵੀ ਮੰਦਿਰ ਵਿਚ ਭਗਦੜ ਮਚ ਗਈ ਸੀ, ਜਿਸ ਵਿਚ ਕਰੀਬ 146 ਸਰਧਾਲੂਆਂ ਨੇ ਆਪਣੀ ਜਾਨ ਗਵਾਈ ਸੀ। ਮ੍ਰਿਤਕਾਂ ਵਿਚ ਜ਼ਿਆਦਾਤਰ ਪੰਜਾਬ ਦੇ ਵਾਸੀ ਹਨ। ਨਵਰਾਤਰਿਆਂ ਦੇ ਮੌਕੇ ‘ਤੇ ਸ਼ਰਧਾਲੂ ਨੈਣਾ ਦੇਵੀ ਮੰਦਿਰ ਵਿਚ ਦਰਸ਼ਨ ਲਈ ਆਏ ਹੋਏ ਸਨ। ਇਹ ਨਵਰਾਤਰੇ ਦੋ ਅਗਸਤ ਤੋਂ ਗਿਆਰਾਂ ਅਗਸਤ ਤੱਕ ਚਲ ਰਹੇ ਹਨ।

ਅਹਿਮਦਾਬਾਦ ਧਮਾਕੇ ਦੇ ਤਿੰਨ ਸ਼ੱਕੀਆਂ ਦੇ ਸਕੈਚ ਜਾਰੀ

ਅਹਿਮਦਾਬਾਦ, 6 ਅਗਸਤ 2008- ਅਹਿਮਦਾਬਾਦ ‘ਚ 26 ਜੁਲਾਈ ਨੂੰ ਤਿੰਨ ਥਾਵਾਂ ‘ਤੇ ਬੰਬ ਰੱਖਣ ਵਾਲੇ ਤਿੰਨ ਸ਼ੱਕੀਆਂ ਦੇ ਸਕੈਚ ਗੁਜਰਾਤ ਪੁਲਿਸ ਨੇ ਬੁੱਧਵਾਰ ਨੂੰ ਜਾਰੀ ਕੀਤੇ। ਗੁਜਰਾਤ ਪੁਲਿਸ ਨੇ ਇਕ ਸੀਨੀਅਰ ਪੁਲਿਸ ਅਧਿਕਾਰੀ ਨੇ ਅੱਜ ਦੱਸਿਆ ਕਿ ਅਸੀਂ ਤਿੰਨ ਸ਼ੱਕੀ ਵਿਅਕਤੀਆਂ ਦੇ ਸਕੈਚ ਜਾਰੀ ਕੀਤੇ ਹਨ, ਜਿਨ੍ਹਾਂ ‘ਤੇ ਨਾਰੋਲ, ਹਾਟਕੇਸ਼ਵਰ ਅਤੇ ਰਾਏਪੁਰ ਇਲਾਕਿਆਂ ਵਿਚ ਬੰਬ ਰੱਖਣ ਦਾ ਸ਼ੱਕ ਕੀਤਾ ਜਾ ਰਿਹਾ ਹੈ। ਸ਼ੱਕੀਆਂ ਦੇ ਸਕੈਚ ਪ੍ਰਤੱਖਦਰਸ਼ੀਆਂ ਦੁਆਰਾ ਦੱਸੇ ਗਏ ਹੁਲੀਏ ਦੇ ਆਧਾਰ ‘ਤੇ ਤਿਆਰ ਕੀਤੇ ਗਏ ਹਨ। ਸ਼ੱਕੀਆਂ ਦੇ ਸਕੈਚ ਇਸ ਲਈ ਦੇਰ ਨਾਲ ਜਾਰੀ ਕੀਤੇ ਗਏ ਹਨ ਕਿ ਉਹ ਚੌਕਸ ਨਾ ਹੋ ਜਾਣ। ਅਪਰਾਧ ਸ਼ਾਖਾ ਸ਼ਹਿਰ ਵਿਚ ਹੋਏ ਲੜੀਵਾਰ ਬੰਬ ਧਮਾਕਿਆਂ ਦੀ ਜਾਂਚ ਕਰ ਰਹੀ ਹੈ। ਇਨ੍ਹਾਂ ਧਮਾਕਿਆਂ ਵਿਚ ਘੱਟੋ-ਘੱਟ 50 ਤੋਂ ਵੱਧ ਵਿਅਕਤੀਆਂ ਦੀ ਮੌਤ ਹੋ ਗਈ ਸੀ। ਪੁਲਿਸ ਦੇ ਮੁਤਾਬਕ ਜਿਸ ਵਿਅਕਤੀ ਨੇ ਨਾਰੋਲ ਵਿਚ ਬੰਬ ਰੱਖਿਆ ਸੀ, ਉਸਦੀ ਉਮਰ 45 ਸਾਲ, ਕਦ ਸਾਢੇ ਪੰਜ ਫੁੱਟ, ਰੰਗ ਕਣਕ ਵੰਨਾ ਅਤੇ ਸਰੀਰ ਮਜ਼ਬੂਤ ਹੈ। ਉਸਦੇ ਸਿਰ ‘ਤੇ ਬਹੁਤ ਘੱਟ ਬਾਲ਼ ਹਨ। ਉਸਨੇ ਲੁੰਗੀ ਬੰਨ੍ਹੀ ਹੋਈ ਹੈ ਅਤੇ ਚਿੱਟੇ ਰੰਗ ਦੀ ਸ਼ਰਟ ਪਾਈ ਹੋਈ ਹੈ। ਪੁਲਿਸ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜੇਕਰ ਇਸ ਸਬੰਧੀ ਕੋਈ ਮਿਲਦਾ ਜੁਲਦਾ ਸ਼ੱਕੀ ਉਨ੍ਹਾਂ ਨੂੰ ਦਿਖਾਈ ਦੇਵੇ, ਤਾਂ ਉਹ ਫੋਰਨ ਪੁਲਿਸ ਕੰਟਰੋਲ ਰੂਪ ਵਿਚ ਸੂਚਿਤ ਕਰਨ।

ਸਿਮੀ ਤੋਂ ਪਾਬੰਧੀ ਹਟਾਉਣ ਦੇ ਫੈਸਲੇ ‘ਤੇ ਰੋਕ

ਨਵੀਂ ਦਿੱਲੀ, 6 ਅਗਸਤ 2008 - ਸੁਪਰੀਮ ਕੋਰਟ ਨੇ ਸਟੂਡੈਂਟਸ ਇਸਲਾਮਿਕ ਮੂਵਮੈਂਟ ਆਫ ਇੰਡੀਆ (ਸਿਮੀ) ਦੀਆਂ ਗਤੀਵਿਧੀਆਂ ‘ਤੇ ਲੱਗੀ ਪਾਬੰਦੀ ਹਟਾਉਣ ਦੇ ਵਿਸ਼ੇਸ਼ ਟ੍ਰਿਬਿਊਨਲ ਦੇ ਹੁਕਮ ‘ਤੇ ਰੋਕ ਲਗਾ ਦਿੱਤੀ ਹੈ। ਟ੍ਰਿਬਿਊਨਲ ਦੇ ਫੈਸਲੇ ਨੂੰ ਚੁਣੌਤੀ ਦੇਣ ਵਾਲੀ ਇਕ ਅਰਜ਼ੀ ਬੁੱਧਵਾਰ ਨੂੰ ਚੀਫ ਜਸਟਿਸ ਕੇ.ਜੀ. ਬਾਲਾਕ੍ਰਿਸ਼ਨਨ ਦੀ ਅਗਵਾਈ ਵਾਲੇ ਬੈਂਚ ਦੇ ਸਾਹਮਣੇ ਲਿਆਂਦੀ ਗਈ। ਬੈਂਚ ਨੇ ਕੇਂਦਰ ਦੇ ਉਸ ਫੈਸਲੇ ਨਾਲ ਸਹਿਮਤੀ ਜਤਾਈ ਹੈ, ਜਿਸ ਵਿਚ ਫੈਸਲੇ ‘ਤੇ ਅੰਤਰਿਮ ਰੋਕ ਲਗਾਉਣ ਦੀ ਮੰਗ ਕੀਤੀ ਗਈ ਸੀ। ਸੁਪਰੀਮ ਕੋਰਟ ਨੇ ਸਿਮੀ ਨੂੰ ਨੋਟਿਸ ਜਾਰੀ ਕਰਦੇ ਹੋਏ ਮਾਮਲੇ ਦੀ ਸੁਣਵਾਈ ਤਿੰਨ ਹਫਤੇ ਬਾਅਦ ਨਿਰਧਾਰਤ ਕੀਤੀ ਹੈ। ਦਿੱਲੀ ਹਾਈਕੋਰਟ ਦੀ ਜਸਟਿਸ ਗੀਤਾ ਮਿੱਤਲ ਦੀ ਅਗਵਾਈ ਵਾਲੇ ਬੈਂਚ ਨੇ ਮੰਗਲਵਾਰ ਨੂੰ ਉਹ ਨੋਟਿਸ ਖਾਰਜ ਕਰ ਦਿੱਤਾ ਸੀ ਜੋ ਸੱਤ ਫਰਵਰੀ ਨੂੰ ਸਰਕਾਰ ਦੁਆਰਾ ਜਾਰੀ ਕੀਤਾ ਗਿਆ ਸੀ। ਇਸ ਨੋਟੀਫਿਕੇਸ਼ਨ ਦੇ ਜ਼ਰੀਏ ਸਰਕਾਰ ਨੇ ਸਿਮੀ ਦੀਆਂ ਗਤੀਵਿਧੀਆਂ ‘ਤੇ ਲੱਗੀ ਪਾਬੰਦੀ ਨੂੰ ਅੱਗੇ ਵਧਾ ਦਿੱਤਾ ਸੀ। ਟ੍ਰਿਬਿਊਨਲ ਨੇ ਕਿਹਾ ਸੀ ਕਿ ਕੇਂਦਰ ਸਰਕਾਰ ਨੇ ਅਜਿਹਾ ਕੋਈ ਵੀ ਸਬੂਤ ਪੇਸ਼ ਨਹੀਂ ਕੀਤਾ ਹੈ, ਜਿਸ ਨਾਲ ਸੰਗਠਨ ‘ਤੇ ਲੱਗੀ ਪਾਬੰਦੀ ਨੂੰ ਜਾਇਜ਼ ਠਹਿਰਾਇਆ ਜਾ ਸਕੇ।

ਫ਼ਿਰੋਜ਼ਪੁਰ ਪੁਲਿਸ ਵੱਲੋਂ ਪੰਜਾਬੀਆਂ ਨੂੰ ਕਬੂਤਰ ਬਣਾ ਕੇ ਵਿਦੇਸ਼ ਭੇਜਣ ਵਾਲ਼ੇ ਦਿੱਲੀ ਦੇ 4 ਏਜੰਟ ਗ੍ਰਿਫ਼ਤਾਰ

ਫ਼ਿਰੋਜ਼ਪੁਰ, 6 ਅਗਸਤ - ਫ਼ਿਰੋਜ਼ਪੁਰ ਥਾਣਾ ਛਾਉਣੀ ਪੁਲਿਸ ਵੱਲੋਂ ਕਬੂਤਰਬਾਜ਼ੀ ਦੇ ਨਾਂਅ ‘ਤੇ ਵਿਦੇਸ਼ ਭੇਜਣ ਦੇ ਦੋਸ਼ ਹੇਠ ਦਿੱਲੀ ਨਿਵਾਸੀ ਸਮੇਤ ਕੁੱਲ ਚਾਰ ਵਿਅਕਤੀਆਂ ਖ਼ਿਲਾਫ਼ ਮਾਮਲਾ ਦਰਜ ਕਰ ਲਿਆ ਗਿਆ ਹੈ। ਮਾਮਲੇ ‘ਚ ਸ਼ਾਮਲ ਸਾਰੇ ਦੋਸ਼ੀ ਪੁਲਿਸ ਨੇ ਗ੍ਰਿਫ਼ਤਾਰ ਤਾਂ ਕਰ ਲਏ ਹਨ ਪਰ ਪੁਲਿਸ ਵੱਲੋਂ ਇਸ ਗੱਲ ਦੀ ਪੁਸ਼ਟੀ ਨਹੀਂ ਕੀਤੀ ਜਾ ਰਹੀ। ਥਾਣਾ ਛਾਉਣੀ ਤੋਂ ਮਿਲ਼ੀ ਜਾਣਕਾਰੀ ਮੁਤਾਬਕ ਛਾਉਣੀ ਦੀ ਗਲ਼ੀ ਨੰਬਰ 10 ਦੇ ਰਹਿਣ ਵਾਲ਼ੇ ਦੀਪਕ ਸ਼ਰਮਾ ਪੁੱਤਰ ਰਾਮ ਤੀਰਥ ਨੇ ਐਸ. ਐਸ. ਪੀ. ਦਿਨੇਸ਼ ਪ੍ਰਤਾਪ ਨੂੰ ਦੱਸਿਆ ਕਿ ਵਿਕਾਸ ਕੁਮਾਰ ਨਾਂਅ ਦਾ ਵਿਅਕਤੀ, ਜੋ ਆਪਣੇ ਆਪ ਨੂੰ ਤਾਇਕਵਾਂਡੋ ਐਸੋਸੀਏਸ਼ਨ ਦਾ ਸਕੱਤਰ ਅਤੇ ਕੋਚ ਦੱਸਦਾ ਹੈ ਅਤੇ ਸ਼ਹਿਰ ਦੇ ਸ਼ਹੀਦ ਭਗਤ ਸਿੰਘ ਸਟੇਡੀਅਮ ‘ਚ ਇਸ ਖੇਡ ਲਈ ਬੱਚਿਆਂ ਨੂੰ ਟ੍ਰੇਨਿੰਗ ਵੀ ਦਿੰਦਾ ਹੈ, ਉਸ ਨੇ ਆਪਣੀ ਇਟਲੀ ਜਾਣ ਇੱਛਾ ਵਿਕਾਸ ਸਾਹਵੇਂ ਜ਼ਾਹਿਰ ਕੀਤੀ। ਵਿਕਾਸ ਨੇ ਉਸ ਨੂੰ ਕਿਹਾ ਕਿ ਉਹ ਉਸ ਨੂੰ ਵਿਦੇਸ਼ ਭੇਜ ਸਕਦਾ ਹੈ, ਉਹ ਵੀ ਸਿਰਫ਼ 5 ਲੱਖ ਰੁਪਏ ਵਿੱਚ। ਇਸ ਲਈ ਵਿਕਾਸ ਨੇ ਦੀਪਕ ਤੋਂ ਉਸ ਦਾ ਪਾਸਪੋਰਟ ਮੰਗਿਆ ਅਤੇ ਨਾਲ਼ ਹੀ ਪੰਜ ਲੱਖ ਰੁਪਏ ਦੀ ਮੰਗ ਵੀ ਕੀਤੀ। ਸ਼ਿਕਾਇਤਕਰਤਾ ਨੇ ਦੱਸਿਆ ਕਿ ਉਸ ਨੇ ਵਿਕਾਸ ਨੂੰ ਢਾਈ ਲੱਖ ਰੁਪਏ ਨਕਦ ਅਤੇ ਢਾਈ ਲੱਖ ਰੁਪਏ ਦਾ ਚੈਕ ਆਪਣੇ ਸਾਥੀ, ਜੋ ਛਾਉਣੀ ਦੀ ਜੀ. ਟੀ. ਰੋਡ ਉਤੇ ਸੂਰਜ ਮੋਟਰ ਦੇ ਨਾਂਅ ਹੇਠ ਦੁਕਾਨ ਚਲਾ ਰਿਹਾ ਹੈ, ਉਸ ਦੇ ਨਾਂਅ ‘ਤੇ ਲੈ ਲਿਆ ਅਤੇ ਬਾਅਦ ਵਿੱਚ ਵਿਕਾਸ ਨੇ ਉਸ ਨੂੰ ਕਿਹਾ ਕਿ ਉਸ ਨੂੰ 10 ਹਜ਼ਾਰ ਰੁਪਏ ਵੱਖਰੇ ਤੌਰ ‘ਤੇ ਦੇਵੇ ਤਾਂ ਜੋ ਉਹ ਉਨ੍ਹਾਂ ਰੁਪਇਆਂ ਨਾਲ਼ ਡਬਲਿਊ ਟੀ ਐਫ਼ ‘ਚ ਬਲੈਕ ਬੈਲਟ ਕਰਵਾ ਸਕੇ। ਦੀਪਕ ਨੇ ਦੱਸਿਆ ਕਿ ਉਸ ਨੇ ਆਪਣਾ ਮਕਾਨ ਗਿਰਵੀ ਰੱਖ ਕੇ ਵਿਕਾਸ ਨੂੰ ਰੁਪਏ ਦੇ ਦਿੱਤੇ ਪਰ ਬਾਅਦ ‘ਚ ਉਹ ਇਟਲੀ ਦੀ ਬਜਾਏ ਜਰਮਨੀ ਲੈ ਗਏ, ਜਿੱਥੇ ਵਿਕਾਸ ਦੀ ਚਚੇਰੀ ਭੈਣ ਅਤੇ ਜੀਜਾ ਰਹਿੰਦੇ ਸਨ, ਜਿਨ੍ਹਾਂ ਦਾ ਨਾਂਅ ਲੈ ਕੇ ਵਿਕਾਸ ਨੇ ਪਿਛਲੇ ਸਾਲ ਮੈਨੂੰ ਇੰਟਰਨੈਸ਼ਨਲ ਚੈਂਪੀਅਨਸ਼ਿਪ ਖਿਡਾਉਣ ਲਈ ਖਿਡਾਰੀ ਬਣਾ ਕੇ ਫ਼ਿਰੋਜ਼ਪੁਰ ਤੋਂ ਇਟਲੀ ਦੀ ਬਜਾਏ ਜਰਮਨੀ ਲੈ ਗਿਆ। ਉਥੇ ਚਾਰ ਪੰਜ ਦਿਨ ਉਸ ਨੂੰ ਘੁਮਾ ਕੇ ਵਾਪਸ ਭਾਰਤ ਲੈ ਆਇਆ ਅਤੇ ਆਪਣੇ ਇੱਕ ਹੋਰ ਸਾਥੀ ਦੇਵਿੰਦਰ ਕੁਮਾਰ ਜੋ ਦਿੱਲੀ ‘ਚ ਕੋਚ ਹੈ, ਉਸ ਦੇ ਕੋਲ਼ ਲਿਜਾ ਕੇ ਉਸ ਨੂੰ ਉਥੇ ਦੋ ਤਿੰਨ ਮਹੀਨੇ ਕੈਦੀ ਬਣਾ ਕੇ ਕੈਦ ਵਿੱਚ ਰੱਖਿਆ। ਜਦੋਂ ਇਨ੍ਹਾਂ ਸਾਰਿਆਂ ਦੀ ਆਪਸੀ ਮਿਲ਼ੀਭੁਗਤ ਅਤੇ ਜਾਅਲਸਾਜ਼ੀ ਦਾ ਮੈਨੂੰ ਪਤਾ ਲੱਗਾ ਤਾਂ ਦੀਪਕ ਕਿਸੇ ਤਰੀਕੇ ਨਾਲ਼ ਉਨ੍ਹਾਂ ਦੀ ਕੈਦ ‘ਚੋਂ ਫ਼ਰਾਰ ਹੋ ਗਿਆ ਅਤੇ ਆਪਣੇ ਘਰ ਫ਼ਿਰੋਜ਼ਪੁਰ ਪਹੁੰਚ ਗਿਆ। ਉਸ ਨੇ ਆਪਣੇ ਪਰਿਵਾਰਕ ਮੈਂਬਰਾਂ ਨੂੰ ਸਾਰੀ ਗੱਲ ਦੱਸ ਦਿੱਤੀ। ਸ਼ਿਕਾਇਤਕਰਤਾ ਨੇ ਦੱਸਿਆ ਕਿ ਬਾਅਦ ‘ਚ ਜਦੋਂ ਉਹ ਅਤੇ ਉਸ ਦੇ ਪਰਿਵਾਰ ਦੇ ਮੈਂਬਰ ਵਿਕਾਸ ਦੇ ਘਰ ਆਪਣਾ ਪਾਸਪੋਰਟ ਅਤੇ ਰੁਪਏ ਅਤੇ ਬਲੈਕ ਬੈਲਟ ਦਾ ਸਰਟੀਫ਼ਿਕੇਟ ਮੰਗਣ ਗਏ ਤਾਂ ਵਿਕਾਸ ਨੇ ਉਸ ਨੂੰ ਇਹ ਸਭ ਨਾ ਦੇ ਕੇ ਜਾਨ ਤੋਂ ਮਾਰਨ ਦੀ ਧਮਕੀ ਦਿੱਤੀ। ਆਪਣੇ ਘਰ ਮੁੜ ਨਾ ਆਉਣ ਦੀ ਗੱਲ ਕਹੀ। ਇੱਥੋਂ ਤੱਕ ਵੀ ਕਿਹਾ ਕਿ ਉਸ ਦੀ ਪਹੁੰਚ ਪੁਲਿਸ ਦੇ ਉਚ ਅਧਿਕਾਰੀਆਂ ਤੱਕ ਹੈ। ਇਸ ਲਈ ਉਹ ਉਨ੍ਹਾਂ ਦਾ ਕੋਈ ਨੁਕਸਾਨ ਕਰਵਾ ਸਕੇਗਾ। ਦੀਪਕ ਵੱਲੋਂ ਕੀਤੀ ਗਈ ਸ਼ਿਕਾਇਤ ਦੇ ਆਧਾਰ ‘ਤੇ ਐਸ. ਐਸ. ਪੀ. ਵੱਲੋਂ ਮਾਮਲੇ ਦੀ ਜਾਂਚ ਦੀ ਜ਼ਿੰਮੇਵਾਰੀ ਇੱਕ ਹੋਰ ਪੁਲਿਸ ਅਧਿਕਾਰੀ ਨੂੰ ਸੌਂਪ ਦਿੱਤੀ ਗਈ। ਦੀਪਕ ਵੱਲੋਂ ਕੀਤੀ ਗਈ ਸ਼ਿਕਾਇਤ ਨੂੰ ਸਹੀ ਪਾਏ ਜਾਣ ਮਗਰੋਂ ਥਾਣਾ ਛਾਉਣੀ ਪੁਲਿਸ ਵੱਲੋਂ ਵਿਕਾਸ ਉਰਫ਼ ਸੋਨੂੰ ਉਸ ਦੇ ਚਚੇਰੇ ਭਰਾ ਵਿਸ਼ਾਲ ਸੂਰਜ ਮੋਟਰ ਦੇ ਮਾਲਕ ਰਾਜਿੰਦਰ ਕੁਮਾਰ ਅਤੇ ਦਿੱਲੀ ਨਿਵਾਸੀ ਦੇਵਿੰਦਰ ਕੁਮਾਰ ਉਤੇ ਧਾਰਾ 420, 346 ਅਤੇ 120 ਬੀ ਤਹਿਤ ਮਾਮਲਾ ਦਰਜ ਕਰ ਲਿਆ ਗਿਆ ਹੈ।

ਲਾਇਨਜ਼ ਕਲੱਬ ਵੱਲੋਂ ਵਣ ਮਹਾਂਉਤਸਵ ਦੌਰਾਨ ਪੌਦੇ ਲਗਾਏ

ਫਤਿਹਗੜ੍ਹ ਸਾਹਿਬ/ 6 ਅਗਸਤ/ਰਣਜੋਧ ਸਿੰਘ ਔਜਲਾ ਇਤਿਹਾਸਕ ਜ਼ਿਲਾ ਫਤਿਹਗੜ੍ਹ ਸਾਹਿਬ ਨੂੰ ਹਰਾ ਭਰਾ ਅਤੇ ਪ੍ਰਦੂਸ਼ਣ ਰਹਿਤ ਰੱਖਣ ਲਈ ਲਾਇਨਜ਼ ਕਲੱਬ ਆਮ ਖ਼ਾਸ ਬਾਗ਼ ਵੱਲੋਂ ਪੂਰੇ ਜ਼ਿਲੇ ਵਿਚ ਵਣ ਮਹਾਂਉਤਸਵ ਦੌਰਾਨ ਪੌਦੇ ਲਗਾਏ ਜਾ ਰਹੇ ਹਨ। ਇਸ ਗੱਲ ਦਾ ਪ੍ਰਗਟਾਵਾ ਕਲੱਬ ਦੇ ਪ੍ਰਧਾਨ ਦਲਜੀਤ ਸਿੰਘ ਜੱਸੜ ਨੇ ਪਿੰਡ ਮਹੱਦੀਆਂ ਵਿਖੇ ਪੌਦੇ ਲਗਾਉਣ ਉਪਰੰਤ ਆਪਣੇ ਸੰਬੋਧਨ ਵਿਚ ਕੀਤਾ।
ਸ੍ਰੀ ਜੱਸੜ ਨੇ ਕਿਹਾ ਕਿ ਹਰੇਕ ਮਨੁੱਖ ਨੂੰ ਇਕ ਪੌਦਾ ਜ਼ਰੂਰ ਲਗਾਉਣਾ ਚਾਹੀਦਾ ਹੈ ਅਤੇ ਉਸ ਦਾ ਪਾਲਣ ਪੋਸ਼ਣ ਵੀ ਕਰਨਾ ਜ਼ਰੂਰੀ ਹੈ। ਉਨ੍ਹਾਂ ਕਿਹਾ ਕਿ ਬੱਚੇ ਅੱਜ ਜਿਸ ਤਰ੍ਹਾਂ ਪ੍ਰਦੂਸ਼ਣ ਵਧ ਰਿਹਾ ਹੈ, ਨੂੰ ਕਾਬੂ ਕਰਨ ਲਈ ਜ਼ਰੂਰੀ ਹੋ ਗਿਆ ਹੈ ਕਿ ਵੱਧ ਤੋਂ ਵੱਧ ਰੁੱਖ ਲਗਾਏ ਜਾਣ। ਉਨ੍ਹਾਂ ਕਿਹਾ ਕਿ ਇਸ ਮੁਹਿੰਮ ਵਿਚ ਬੱਚਿਆਂ ਦੀ ਵੱਧ ਤੋਂ ਵੱਧ ਸ਼ਮੂਲੀਅਤ ਯਕੀਨੀ ਬਣਾਈ ਜਾਵੇ। ਪਿੰਡ ਦੇ ਸਰਪੰਚ ਬਲਵੰਤ ਸਿੰਘ ਗੋਗੀ ਨੇ ਲਾਇਨਜ਼ ਕਲੱਬ ਦੀ ਪ੍ਰਸ਼ੰਸ਼ਾ ਕਰਦਿਆਂ ਕਿਹਾ ਕਿ ਇਹ ਕਲੱਬ ਸਮਾਜ ਭਲਾਈ ਦੇ ਕੰਮਾਂ ਵਿਚ ਸਦਾ ਅੱਗੇ ਰਿਹਾ ਹੈ। ਇਸ ਮੌਕੇ ਪਿੰਡ ਵਿਚ 200 ਦੇ ਕਰੀਬ ਪੌਦੇ ਲਗਾਏ ਗਏ। ਇਸ ਮੌਕੇ ਪ੍ਰੋਜੈਕਟ ਚੇਅਰਮੈਨ ਰੌਸ਼ਨ ਖਾਨ, ਜਸਵੰਤ ਸਿੰਘ ਬਾਜਵਾ, ਐਸ.ਐਸ.ਬਲੱਗਣ, ਹਰੀਸ਼ ਕੁਮਾਰ ਧੁੱਪਰ ਸਕੱਤਰ, ਦੇਸਾ ਸਿੰਘ, ਇਸਮਾਈਲ ਖ਼ਾਨ, ਦਰਸ਼ਨ ਖ਼ਾਨ, ਜੀਤ ਸਿੰਘ ਅਤੇ ਹੋਰ ਪਤਵੰਤੇ ਸੱਜਣ ਵੀ ਹਾਜ਼ਰ ਸਨ। ਲਾਇਨਜ਼ ਕਲੱਬ ਦੇ ਪ੍ਰਧਾਨ ਦਲਜੀਤ ਸਿੰਘ ਜੱਸੜ ਨੇ ਦੱਸਿਆ ਕਿ ਇਸ ਲੜੀ ਤਹਿਤ ਦੋ ਹਜ਼ਾਰ ਬੂੁਟੇ ਲਗਾਏ ਜਾਣਗੇ।