ਪੰਥਕ ਜਥੇਬੰਦੀਆਂ ਵੱਲੋਂ ਕੀਤਾ ਪੰਜਾਬ ਬੰਦ, ਪੂਰੀ ਤਰ੍ਹਾਂ ਸਫ਼ਲ

ਜਲੰਧਰ/ਅੰਮ੍ਰਿਤਸਰ, 3 ਨਵੰਬਰ (ਸਰਬਜੀਤ ਵਾਲੀਆ/ਮੋਤਾ ਸਿੰਘ)-ਪੰਥਕ ਜਥੇਬੰਦੀਆਂ ਵੱਲੋਂ ਦਿੱਤੇ ਪੰਜਾਬ ਬੰਦ ਦੇ ਸੱਦੇ ਨੂੰ ਸਮੁੱਚੇ ਅੰਮ੍ਰਿਤਸਰ ਸ਼ਹਿਰ ਅਤੇ ਆਸ-ਪਾਸ ਦੇ ਕਸਬਿਆਂ ਵਿੱਚ ਵੀ ਭਰਵਾਂ ਹੁੰਗਾਰਾ ਮਿਲਿਆ ਹੈ। ਬੰਦ ਕਾਰਨ ਰੇਲਵੇ, ਸੜਕੀ ਆਵਾਜਾਈ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਣ ਦੇ ਨਾਲ-ਨਾਲ ਸ਼ਹਿਰ ਦੇ ਪ੍ਰੁਮੁੱਖ ਬਜ਼ਾਰ ਅਤੇ ਕਾਰੋਬਾਰੀ ਅਦਾਰੇ ਵੀ ਬੰਦ ਰਹੇ। ਚੀਫ ਖਾਲਸਾ ਦੀਵਾਨ ਦੇ ਆਨਰੇਰੀ ਸਕੱਤਰ ਸ੍ਰ. ਭਾਗ ਸਿੰਘ ਅਣਖੀ ਜਿਨ੍ਹਾਂ ਨੇ ਦੀਵਾਨ ਦੇ ਸਾਰੇ ਅਦਾਰੇ ਬੰਦ ਰਹੇ, ਨੇ ਕਿਹਾ ਕਿ ਰੋਸ ਇਨਸਾਫ ਵਾਸਤੇ ਹੈ। ਸ਼੍ਰੋਮਣੀ ਸਿੱਖ ਕੌਂਸਲ ਇੰਟਰਨੈਸ਼ਨਲ ਦੇ ਆਗੂਆਂ ਭਾਈ ਨਰਾਇਣ ਸਿੰਘ, ਸ੍ਰ. ਜਸਬੀਰ ਸਿੰਘ ਅਤੇ ਸ੍ਰ.ਅਮਰੀਕ ਸਿੰਘ ਨੇ ਕਿਹਾ ਕਿ ਲੋਕਾਂ ਨੇ ਬੰਦ ਨੂੰ 100 ਫੀਸਦੀ ਸਫਲ ਕਰਕੇ ਹਿੰਦੁਸਤਾਨੀ ਨਿਆਂਪਾਲਿਕਾ, ਲੋਕਤੰਤਰ ਅਤੇ ਹਕੂਮਤ ਵੱਲੋਂ ਸਿੱਖਾਂ ਨਾਲ ਕੀਤੇ ਗਏ ਅਨਿਆਏ ਨਾਲ ਅਤੇ ਧੱਕੇਸ਼ਾਹੀ ਵਿਰੁੱਧ ਫਤਵਾ ਦੇ ਕੇ ਦੁਨੀਆਂ ਅਤੇ ਸੰਯੁਕਤ ਰਾਸ਼ਟਰ ਤੱਕ ਅਵਾਜ਼ ਪਹੁੰਚਾ ਕੇ ਸਿੱਖਾਂ ਲਈ ਨਿਆਂ ਅਤੇ ਦੋਸ਼ੀਆਂ ਨੂੰ ਸਜ਼ਾਵਾਂ ਦੇਣ ਦੀ ਗੁਹਾਰ ਲਗਵਾਈ ਹੈ। ਬੰਦ ਕਾਰਨ ਅੰਮ੍ਰਿਤਸਰ ਸ਼ਹਿਰ ਅੰਦਰ ਨਾ ਕੋਈ ਵਸਤੂ ਆਈ ਤੇ ਨਾ ਹੀ ਕੋਈ ਸਮਾਨ ਸ਼ਹਿਰੋਂ ਬਾਹਰ ਗਿਆ। ਪਰ ਦੂਜੇ ਪਾਸੇ ਸਿੱਖਾਂ ਦੀ ਪ੍ਰੁਮੁੱਖ ਜਥੇਬੰਦੀ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਦਫਤਰ ਖੁੱਲ੍ਹੇ ਰਹੇ, ਜਿਸ ਦੀ ਸਿੱਖ ਹਲਕਿਆਂ ਅਤੇ ਆਮ ਲੋਕਾਂ ਵਿੱਚ ਕਈ ਤਰ੍ਹਾਂ ਦੀ ਚਰਚਾ ਦਾ ਬਾਜ਼ਾਰ ਗਰਮ ਰਿਹਾ। ਦਮਦਮੀ ਟਕਸਾਲ ਤੇ ਸਾਰੀਆਂ ਸਿੱਖ ਸਟੂਡੈਂਟਸ ਫੈਡਰੇਸ਼ਨ ਤੇ ਹੋਰ ਜਥੇਬੰਦੀਆਂ ਦੀ ਅਪੀਲ ’ਤੇ ਅੱਜ 3 ਨਵੰਬਰ ਦੇ ਪੰਜਾਬ ਬੰਦ ਨੂੰ ਪੂਰਾ ਭਰਵਾਂ ਹੁੰਗਾਰਾ ਮਿਲਿਆ। ਸੜਕਾਂ, ਬਾਜ਼ਾਰਾਂ ਤੇ ਗਲੀਆਂ ਵਿਚ ਪੂਰੀ ਤਰ੍ਹਾਂ ਸੰਨਾਟਾ ਪਸਰਿਆ ਰਿਹਾ। ਜ਼ਿਆਦਾਤਰ ਸਕੂਲ ਤੇ ਕਾਲਜਾਂ ਵਿਚ ਛੁੱਟੀ ਰਹੀ। ਬੰਦ ਦਾ ਅਸਰ ਰੇਲ ਤੇ ਸੜਕੀ ਆਵਾਜਾਈ ’ਤੇ ਵੀ ਦੇਖਿਆ ਗਿਆ। ਸਰਕਾਰੀ ਦਫਤਰਾਂ ਵਿਚ ਕੰਮ ਰੋਜ਼ਾਨਾ ਦੀ ਤਰ੍ਹਾਂ ਹੋਇਆ ਅਤੇ ਬੈਂਕ ਖੁੱਲ੍ਹੇ ਰਹੇ। ਪੰਜਾਬ ਬੰਦ ਦੌਰਾਨ ਕਿਤੋਂ ਵੀ ਕੋਈ ਬੁਰੀ ਘਟਨਾ ਦੀ ਖ਼ਬਰ ਨਹੀਂ ਹੈ ਅਤੇ ਬੰਦ ਸ਼ਾਂਤਮਈ ਢੰਗ ਨਾਲ ਰਿਹਾ। ਇਸ ਦੌਰਾਨ ਸ਼ਹਿਰਾਂ ਵਿਚ ਕੈਮਿਸਟਾਂ, ਡਾਕਟਰਾਂ ਦੇ ਕਲੀਨਕਾਂ ਤੇ ਉਹ ਪੈਲਸਾਂ ਜਿਥੇ ਬਰਾਤਾਂ ਆਈਆਂ ਸਨ ਤੇ ਕੁਝ ਚਾਹ ਦੀਆਂ ਦੁਕਾਨਾਂ ਨੂੰ ਛੱਡ ਕੇ ਸਾਰੀਆਂ ਦੁਕਾਨਾਂ ਬੰਦ ਸਨ। ਵਪਾਰੀ ਤੇ ਦੁਕਾਨਦਾਰਾਂ ਦੀਆਂ ਜਥੇਬੰਦੀਆਂ ਨੇ ਬੰਦ ਨੂੰ ਜਿਹੜੀ ਆਪਣੀ ਹਮਾਇਤ ਕੀਤੀ, ਉਸ ਦੇ ਕਾਰਨ ਦੁਕਾਨਾਂ ਵਪਾਰਕ ਅਦਾਰੇ, ਵਿਦਿਅਕ ਅਦਾਰੇ ਆਦਿ ਸਾਰੇ ਬੰਦ ਸਨ। ਸ਼ਹਿਰਾਂ ਵਿਚ ਕੇਵਲ ਸਾਇਕਲ, ਮੋਟਰਸਾਇਕਲ ਤੇ ਕਿਤੇ-ਕਿਤੇ ਛੋਟੇ ਵਾਹਨ ਚੱਲਦੇ ਹੋਏ ਦੇਖੇ ਗਏ ਜਦਕਿ ਬੱਸ ਸਰਵਿਸ ਪੂਰੀ ਬੰਦ ਸਨ। ਇਸ ਦੌਰਾਨ ਦਲ ਖਾਲਸਾ ਤੇ ਕੁਝ ਹੋਰ ਸੰਗਠਨਾਂ ਵੱਲੋਂ ਅੰਮ੍ਰਿਤਸਰ, ਫਿਰੋਜ਼ਪੁਰ ਅਤੇ ਲੁਧਿਆਣਾ ਤੋਂ ਚੱਲਣ ਵਾਲੀਆਂ ਕਈ ਰੇਲ ਗੱਡੀਆਂ ਨੂੰ ਰੱਦ ਕਰ ਦਿੱਤਾ, ਜਦੋਂਕਿ ਅੰਬਾਲਾ-ਲੁਧਿਆਣਾ ਮੁੱਖ ਰੇਲ ਮਾਰਗ ’ਤੇ ਰਾਜਪੁਰਾ ਤੇ ਸ਼ੰਭੂ ਵਿਚਾਲੇ ਪ੍ਰਦਰਸ਼ਨਕਾਰੀਆਂ ਵੱਲੋਂ ਜਾਮ ਲਗਾਏ ਜਾਣ ਤੋਂ ਬਾਅਦ ਰੇਲ ਗੱਡੀਆਂ ਨੂੰ ਵੀ ਰੱਦ ਕਰ ਦਿੱਤਾ ਗਿਆ। ਇਸ ਤੋਂ ਇਲਾਵਾ ਅੰਮ੍ਰਿਤਸਰ ਵਿਚ ਸ਼ਤਾਬਦੀ ਐਕਸਪ੍ਰੈਸ, ਸੱਚਖੰਡ ਐਕਸਪ੍ਰੈਸ, ਦਾਦਰ ਐਕਸਪ੍ਰੈਸ, ਸੁਪਰ ਐਕਸਪ੍ਰੈਸ ਅਤੇ ਡਿਲਕਸ ਟਰੇਨ ਸਮੇਤ ਵੱਖ-ਵੱਖ ਟਰੇਨਾਂ ਨੂੰ ਸਟੇਸ਼ਨਾਂ ’ਤੇ ਰੋਕ ਦਿੱਤਾ ਗਿਆ ਤੇ ਸੈਂਕੜੇ ਵਰਕਰਾਂ ਨੇ ਰੇਲ ਪਟੜੀਆਂ ’ਤੇ ਧਰਨਾ ਦਿੱਤਾ। ਇਸ ਦੌਰਾਨ ਸੱਚਖੰਡ ਐਕਸਪ੍ਰੈਸ ਲਗਪਗ ਛੇ ਘੰਟੇ ਤੱਕ ਰੁਕੀ ਰਹੀ, ਜਿਸ ਕਾਰਨ ਯਾਤਰੀਆਂ ਨੂੰ ਕਾਫੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪਿਆ।
ਜਲੰਧਰ ਤੋਂ ਹੁਸ਼ਿਆਰਪੁਰ, ਜਲੰਧਰ ਤੋਂ ਪਠਾਨਕੋਟ ’ਤੇ ਜਲੰਧਰ ਤੋਂ ਅੰਮ੍ਰਿਤਸਰ ਅਤੇ ਜਲੰਧਰ ਤੋਂ ਲੁਧਿਆਣਾ ਆਦਿ ਸ਼ਹਿਰਾਂ ਨੂੰ ਬੱਸਾਂ ਦੀ ਆਵਾਜਾਈ ਵੀ ਬੰਦ ਰਹੀ। ਇਸ ਤੋਂ ਇਲਾਵਾ ਪੰਜਾਬ ਦੇ ਕਈ ਇਲਾਕਿਆਂ ਵਿਚ ਨਿਜੀ ਬੱਸਾਂ ਨਹੀਂ ਚੱਲੀਆਂ। ਪੰਜਾਬ ਰੋਡਵੇਜ਼ ਦੀਆਂ ਕੁਝ ਸਰਕਾਰੀ ਬੱਸਾਂ ਮੁੱਖ ਸੜਕਾਂ ਤੇ ਰਾਸ਼ਟਰੀ ਰਾਜ ਮਾਰਗਾਂ ’ਤੇ ਦਿਖਾਈ ਦਿੱਤੀਆਂ। ਪ੍ਰਦਰਸ਼ਨਕਾਰੀਆਂ ਨੇ ਕੁਝ ਥਾਵਾਂ ’ਤੇ ਸੜਕੀ ਆਵਾਜਾਈ ਵੀ ਜਾਮ ਕੀਤੀ। ਬੰਦ ਹਮਾਇਤੀਆਂ ਵੱਲੋਂ ਸ਼ਹਿਰਾਂ ਦੇ ਵੱਖ ਵੱਖ ਥਾਵਾਂ ’ਤੇ ਇਕੱਠੇ ਹੋਏ 1984 ਦੇ ਦੰਗਿਆਂ ਦੇ ਸ਼ਹੀਦਾਂ ਨੂੰ ਸ਼ਰਧਾਂਜਲੀਆਂ ਭੇਂਟ ਕੀਤੀਆਂ ਤੇ ਇਨ੍ਹਾਂ ਦੇ ਕਾਤਲਾਂ ਨੂੰ ਸਜ਼ਾਵਾਂ ਦੇਣ ਦੀ ਪੁਰਜ਼ੋਰ ਮੰਗ ਕੀਤੀ। ਇਸ ਦੌਰਾਨ ਇਸ ਗੱਲ ’ਤੇ ਅਫਸੋਸ ਪ੍ਰਗਟ ਕੀਤਾ ਗਿਆ ਕਿ 1984 ਦੇ ਕਾਤਲਾਂ ਦੇ ਦੋਸ਼ੀ ਅਜੇ ਵੀ ਆਜ਼ਾਦ ਘੁੰਮ ਰਹੇ ਹਨ ਤੇ ਕਾਨੂੰਨੀ ਪੱਖ ਤੋਂ ਉਨ੍ਹਾਂ ਨੂੰ ਅਜੇ ਤੱਕ ਕਿਸੇ ਨੂੰ ਕੋਈ ਵੀ ਸਜ਼ਾ ਨਹੀਂ ਦਿੱਤੀ ਗਈ। ਅੱਜ ਦੇ ਬੰਦ ਦੇ ਹਮਾਇਤੀਆਂ ਦੀ ਮੰਗ ਹੈ ਕਿ ਸਿੱਖ ਕੌਮ ਨੂੰ ਇਨਸਾਫ ਦੁਆਇਆ ਜਾਏ ਤੇ ਕਾਤਲਾਂ ਨੂੰ ਸਖਤ ਤੋਂ ਸਖਤ ਸਜ਼ਾ ਦਿੱਤਾ ਜਾਏ। ਹੁਸ਼ਿਆਰਪੁਰ ਤੋਂ ਪ੍ਰਾਪਤ ਸੂਚਨਾ ਅਨੁਸਾਰ ਇਥੇ ਬੰਦ ਨੂੰ 95 ਪ੍ਰਤੀਸ਼ਤ ਹੁੰਗਾਰਾ ਮਿਲਿਆ ਜਦਕਿ ਕਸਬਾ ਆਦਮਪੁਰ ਵਿਚ ਬੰਦ ਨੂੰ ਕਾਫੀ ਅਸਰ ਦੇਖਣ ਨੂੰ ਮਿਲਿਆ। ਦੂਜੇ ਪਾਸੇ ਪੁਲਿਸ ਨੇ ਵੀ ਸੁਰੱਖਿਆ ਦੇ ਸਖਤ ਪ੍ਰਬੰਧ ਕੀਤੇ ਹੋਏ ਸਨ ਤਾਂ ਜੋ ਕਿਸੇ ਵੀ ਥਾਂ ’ਤੇ ਕੋਈ ਘਟਨਾ ਨਾ ਵਾਪਰੇ। ਇਸ ਗੱਲ ਦੀਆਂ ਅਫਵਾਹਵਾਂ ਵੀ ਫੈਲੀਆਂ ਹੋਈਆਂ ਸਨ ਕਿ ਬੰਦ ਦੌਰਾਨ ਅੱਤਵਾਦੀ ਕੋਈ ਵੱਡੀ ਘਟਨਾ ਕਰ ਸਕਦੇ ਹਨ ਪਰ ਕਿਸੇ ਵੀ ਥਾਂ ਤੋਂ ਕੋਈ ਮਾੜੀ ਘਟਨਾ ਹੋਣ ਵੀ ਕੋਈ ਸੂਚਨਾ ਨਹੀਂ ਮਿਲੀ।
ਚੰਡੀਗੜ੍ਹ, 3 ਨਵੰਬਰ (ਹਰੀਸ਼ ਚੰਦਰ ਬਾਗਾਂਵਾਲਾ)-ਅੱਜ ਦਮਦਮੀ ਟਕਸਾਲ ਅਤੇ ਹੋਰ ਸਿੱਖ ਜੱਥੇਬੰਦੀਆਂ ਵੱਲੋਂ ਪੰਜਾਬ ਬੰਦ ਦਾ ਸੱਦਾ ਦਿੱਤਾ ਸੀ, ਉਸਨੂੰ ਪੰਜਾਬ ਭਰ ਤੋਂ ਭਰਵਾਂ ਹੁੰਗਾਰਾ ਮਿਲਿਆ ਹੈ। ਬੰਦ ਪੂਰੀ ਤਰ੍ਹਾਂ ਕਾਮਯਾਬ ਰਿਹਾ ਹੈ। ਬੰਦ ਤਿੰਨ ਖਿੱਤਿਆਂ ਮਾਲਵਾ, ਮਾਝਾ ਅਤੇ ਦੁਆਬੇ ਵਿੱਚ ਪੂਰੀ ਤਰ੍ਹਾਂ ਸਫਲ ਰਿਹਾ ਅਤੇ ਹਰ ਵਰਗ ਵੱਲੋਂ ਭਰਵਾਂ ਹੁੰਗਾਰਾ ਦਿੱਤਾ ਗਿਆ। ਬੰਦ ਦਾ ਅਸਰ ਚੰਡੀਗੜ੍ਹ ਵਿੱਚ ਰਿਹਾ, ਉੱਥੇ ਬਹੁਤੀ ਜਗ੍ਹਾ ਅਦਾਰੇ ਬੰਦ ਸਨ। ਪੰਜਾਬ ਬੰਦ ਕਰਕੇ ਵੱਖ-ਵੱਖ ਰਾਜਾਂ ਤੇ ਆਉਣ ਵਾਲੀਆਂ ਰੇਲ ਗੱਡੀਆਂ ਨੂੰ ਰੇਲਵੇ ਵਿੱਚ ਰੱਦ ਕਰਨਾ ਪਿਆ, ਜਿਨ੍ਹਾਂ ਵਿੱਚ ਹਾਵੜਾ ਅੰਮ੍ਰਿਤਸਰ, ਕਾਦਮ ਅੰਮ੍ਰਿਤਸਰ, ਅੰਮ੍ਰਿਤਸਰ ਧੂਰੀ, ਕਟਿਹਾਰ ਐਕਸਪ੍ਰੈੱਸ ਨੂੰ ਅੰਬਾਲਾ ਹੀ ਖੜ੍ਹਾ ਲਿਆ। ਇਸ ਤਰ੍ਹਾਂ ਬਹੁਤੀਆਂ ਰੇਲਗੱਡੀਆਂ ਨੂੰ ਪੰਜਾਬ ਵਿੱਚ ਜਾਣ ਨਹੀਂ ਦਿੰਦਾ। ਇਸ ਪੰਜਾਬ ਵਿੱਚ ਖਾਸ ਕਰਕੇ ਮਾਲਵਾ ਖੇਤਰ ਵਿੱਚ ਵਿਆਪਕ ਅਤੇ ਭਰਵਾਂ ਹੁੰਗਾਰਾ ਮਿਲਿਆ। ਖਾਸ ਕਰਕੇ ਮਾਲਵਾ,ਮਾਝਾ ਅਤੇ ਦੁਆਬੇ ਵਿੱਚ ਸਾਰੇ ਵਪਾਰਕ ਅਦਾਰੇ, ਕਾਲਜ, ਸਕੂਲ ਪੂਰੀ ਤਰ੍ਹਾਂ ਬੰਦ ਰਹੇ। ਕਿਸਾਨ ਮੰਡੀਆਂ ਵਿੱਚ ਝੋਨਾ ਲੈ ਕੇ ਨਹੀਂ ਗਏ। ਲੱਗਭੱਗ ਸਾਰੇ ਜ਼ਿਲ੍ਹਿਆਂ ਦੀਆਂ ਅਨਾਜ ਮੰਡੀਆਂ ਵਿੱਚ ਸਿਰਫ ਨਾਮਾਤਰ ਹੀ ਝੋਨਾ ਗਿਆ। ਦੌਰਾ ਕਰਨ ਤੇ ਪਟਿਆਲਾ, ਲੁਧਿਆਣਾ, ਰੋਪੜ, ਫਤਹਿਗੜ੍ਹ ਸਾਹਿਬ ਮੁਹਾਲੀ, ਨਵਾਂ ਸ਼ਹਿਰ, ਸ਼ਹੀਦ ਭਗਤ ਸਿੰਘ ਨਗਰ ਸੰਗਰੂਰ, ਬਰਨਾਲਾ, ਬਠਿੰਡਾ ਵਿੱਚ ਪੂਰੀ ਤਰ੍ਹਾਂ ਕਾਮਯਾਬ ਰਿਹਾ। ਸੜਕਾਂ ਤੇ ਬੱਸਾਂ ਪੂਰੀ ਤਰ੍ਹਾਂ ਚੱਲਦੀਆਂ ਬੰਦ ਸਨ। ਸਾਰੇ ਵੱੜੇ ਸ਼ਹਿਰਾਂ ਤੇ ਕਸਬਿਆਂ ਵਿੱਚ ਵਪਾਰਕ ਅਦਾਰੇ ਪੂਰੀ ਤਰ੍ਹਾਂ ਬੰਦ ਸਨ। ਕੋਈ ਕੰਮਕਾਜ ਨਹੀਂ ਹੋਇਆ। ਇੱਥੋਂ ਤੱਕ ਕਿ ਲੰਿਕ ਸੜਕਾਂ ਤੇ ਵੀ ਬੱਸਾਂ ਦੀ ਆਵਾਜਾਈ ਪੂਰੀ ਤਰ੍ਹਾਂ ਠੱਪ ਸੀ। ਇਸ ਤਰ੍ਹਾਂ ਅੱਜ ਦਾ ਪੰਜਾਬ ਬੰਦ ਪੂਰੀ ਤਰ੍ਹਾਂ ਕਾਮਯਾਬ ਸੀ, ਜਿਸਨੂੰ ਪੰਜਾਬ ਦੇ ਹਰ ਵਰਗ ਨੇ ਭਰਵਾਂ ਹੁੰਗਾਰਾ ਦਿੱਤਾ।
ਤਲਵੰਡੀ ਸਾਬੋਂ, (ਪੱਤਰ ਪ੍ਰੇਰਕ)-ਸਿੱਖਾਂ ਦੀਆਂ ਕਰੀਬ ਸਾਰੀਆਂ ਧਾਰਮਿਕ ਅਤੇ ਸਿਆਸੀ ਜੱਥੇਬੰਦੀਆਂ ਵੱਲੋਂ ਅੱਜ (3 ਨਵੰਬਰ) ਦਿੱਤੇ ਪੰਜਾਬ ਬੰਦ ਦੇ ਸੱਦੇ ਨੂੰ ਬੇਮਿਸਾਲ ਹੁੰਗਾਰਾ ਮਿਲਿਆ। ਤਲਵੰਡੀ ਸਾਬੋਂ ਵਿੱਚ ਬੰਦ 100 ਫੀਸਦੀ ਸਫਲ ਰਿਹਾ। ਸਾਰੇ ਬਜਾਰ ਦੁਕਾਨਾਂ, ਵਪਾਰਕ ਅਤੇ ਹੋਰ ਅਦਾਰੇ ਪੂਰੀ ਤਰ੍ਹਾਂ ਬੰਦ ਰਹੇ। ਹਿੰਦੂ ਭਾਈਚਾਰੇ ਨੇ ਜਿੱਥੇ ਸਿੱਖ ਜੱਥੇਬੰਦੀਆਂ੍ਯ ਵੱਲੋਂ ਦਿੱਤੇ ਬੰਦ ਦੇ ਸੱਦੇ ਨੂੰ ਪੂਰੀ ਤਰ੍ਹਾਂ ਸਮਰੱਥਨ ਦਿੰਦਿਆਂ ਆਪੋ-ਆਪਣੇ ਵਪਾਰਕ ਅਦਾਰੇ ਬੰਦ ਰੱਖੇ, ਉੱਥੇ ਨਵੰਬਰ 1984 ਵਿੱਚ ਸਿੱਖ ਵਿਰੋਧੀ ਦੰਗਿਆਂ ਨੂੰ ਵਾਰ-ਵਾਰ ਕਾਂਗਰਸ ਨੂੰ ਦੋਸ਼ੀ ਠਹਿਰਾਉਣ ਵਾਲੀਆਂ ਸ਼੍ਰੋਮਣੀ ਅਕਾਲੀ ਦਲ ਅਤੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੇ ਪੰਜਾਬ ਬੰਦ ਦੇ ਸੱਦੇ ਦੇ ਬਾਵਜੂਦ ਇਸ ਵਿੱਚ ਕੋਈ ਯੋਗਦਾਨ ਨਹੀਂ ਦਿੱਤਾ। ਅਕਾਲੀ ਆਗੂ ਪ੍ਰੇਮ ਸਿੰਘ ਚੰਦੂਮਜਾਰਾ ਨੇ ਅਕਾਲੀ ਦਲ ਵੱਲੋਂ ਬੰਦ ਨੂੰ ਸਮਰੱਥਨ ਦਿੱਤਾ ਸੀ। ਸਰਕਾਰ ਨੇ ਬੰਦ ਰੋਕਣ ਦੀ ਕੋਸ਼ਿਸ਼ ਕੀਤੀ। ਤਲਵੰਡੀ ਸਾਬੋਂ ਵਿੱਚ ਵੀ ਇੱਕ ਵਾਰ ਸਵੇਰੇ-ਸਵੇਰੇ ਪੰਥਕ ਪੁਲਿਸ ਨੇ ਆ ਕੇ ਦੁਕਾਨਾਂ ਖੁੱਲਵਾਉਣ ਦੀ ਨਾਕਾਮ ਕੋਸ਼ਿਸ ਕੀਤੀ, ਉੱਥੇ ਪੰਜਾਬ ਸਰਕਾਰ ਦੇ ਸਾਰੇ ਵਿੱਦਿਅਕ ਅਤੇ ਹੋਰ ਅਦਾਰੇ ਖੁੱਲ੍ਹੇ ਰਹੇ। ਉੱਧਰ ਕੇਵਲ ਪੰਜਾਬ ਰੋਡਵੇਜ਼ ਦੀਆਂ ਬੱਸਾਂ ਚੱਲਦੀਆਂ ਰਹੀਆਂ। ਹੋਰ ਤਾਂ ਹੋਰ ਸਿੱਖਾਂ ਦੀ ਮਿੰਨੀ ਪਾਰਲੀਮੈਂਟ ਕਹਾਉਣ ਵਾਲੀ ਸਿੱਖਾਂ ਦੀ ਸਭ ਤੋਂ ਵੱਡੀ ਸੰਸਥਾ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੂੰ ਵੀ ਨਵੰਬਰ 84 ਵਿੱਚ ਮਾਰੇ ਗਏ ਸਿੱਖਾਂ ਦਾ ਕੋਈ ਹੇਜ ਨਾ ਆਇਆ ਤੇ ਉਸ ਦੇ ਸਾਰੇ ਅਦਾਰੇ ਖੁੱਲ੍ਹੇ ਰਹੇ ਅਤੇ ਇਸ ਸਬੰਧੀ ਪੰਜ ਤਖਤਾਂ ਦੇ ਜੱਥੇਦਾਰ ਸਾਹਿਬਾਨਾਂ ਨੇ ਵੀ ਕੁੱਝ ਬੋਲਣ ਤੋਂ ਗੁਰੇਜ ਕੀਤਾ। ਸ਼ਹਿਰ ਵਿੱਚ ਸ਼੍ਰੋਮਣੀ ਕਮੇਟੀ ਦੇ ਇੱਕੋ-ਇੱਕ ਵਿੱਦਿਅਕ ਅਦਾਰੇ ਮਾਤਾ ਸਾਹਿਬ ਕੌਰ ਗਰਲਜ਼ ਕਾਲਜ ਵਿੱਚ ਵੀ ਆਮ ਵਾਂਗ ਕਲਾਸਾਂ ਲੱਗੀਆਂ। ਸ਼ਹਿਰ ਵਿੱਚ ਸਿਰਫ ਕੁੱਝ ਮੈਡੀਕਲ ਸਟੋਰ ਅਤੇ ਪ੍ਰੈੱਸ ਦਫਤਰ ਹੀ ਖੁੱਲ੍ਹੇ ਦੇਖੇ ਗਏ, ਹੋਰ ਤਾਂ ਹੋਰ ਜ਼ਰੂਰੀ ਵਸਤਾਂ ਦੀਆਂ ਚੀਜ਼ਾਂ ਇਨ੍ਹਾਂ ਨੂੰ ਬੰਦ ਤੋਂ ਛੋਟ ਦਿੱਤੀ ਗਈ ਸੀ, ਉਹ ਵੀ ਬੰਦ ਰਹੀਆਂ। ਸਰਕਾਰੀ ਸਕੂਲ ਅਤੇ ਕਾਲਜਾਂ ਵਿੱਚ ਵਿਦਿਆਰਥੀਆਂ ਦੀ ਗਿਣਤੀ ਨਾਮਾਤਰ ਰਹੀ, ਉੱਥੇ ਡਿਊਟੀ ਤੇ ਆਉਣ ਵਾਲੇ ਮੁਲਾਜ਼ਮਾਂ ਨੂੰ ਬੱਸਾਂ ਦੇ ਨਾ ਚੱਲਣ ਕਾਰਣ ਡਿਊਟੀ ਤੇ ਪਹੁੰਚਣ ਲਈ ਕਈ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ, ਭਾਵੇਂ ਕਿ ਕਿਸੇ ਵੀ ਸਿੱਖ ਜੱਥੇਬੰਦੀ ਦਾ ਕੋਈ ਵੀ ਵਰਕਰ ਦੁਕਾਨਾਂ ਬੰਦ ਕਰਵਾਉਂਦਾ ਨਹਂੀਂ ਦੇਕਿਆ ਗਿਆ, ਫਿਰ ਵੀ ਦੁਕਾਨਦਾਰਾਂ ਨੇ ਖੁਦ ਹੀ ਦਕਾਨਾਂ ਬੰਦ ਰੱਖਣ ਦਾ ਫੈਸਲਾ ਲਿਆ। ਬੰਦ ਨੂੰ 100 ਫੀਸਦੀ ਹੁੰਗਾਰਾ ਮਿਲਣ ਤੇ ਸਿੱਖ ਆਗੂਆਂ ਨੇ ਸਾਰੇ ਧਰਮਾਂ ਤੇ ਵਰਗਾਂ ਦੇ ਆਗੂਆਂ ਦਾ ਧੰਨਵਾਦ ਕੀਤਾ ਹੈ। ਬੈਲਜੀਅਮ ਤੋਂ ਇਸ ਪੱਤਰਕਾਰ ਨਾਲ ਫੋਨ ਤੇ ਗੱਲ ਕਰਦਿਆਂ ਬਾਬਾ ਬਲਜੀਤ ਸਿੰਘ ਦਾਦੂਵਾਲਿਆਂ ਨੇ ਕਿਹਾ ਕਿ ਇਸ ਬੰਦ ਨੂੰ ਮਿਲੀ ਸਫਲਤਾ ਨਾਲ ਹਿੰਦੂ ਸਿੱਖ ਭਾਈਚਾਰੇ ਵਿੱਚ ਪਿਆਰ ਵਧੇਗਾ।
ਮੁਕਤਸਰ -(ਸ਼ਮਿੰਦਰਪਾਲ/ਪਰਮਜੀਤ) – ਸਿੱਖ ਜੱਥੇਬੰਦੀਆਂ ਦੇ ਸੱਦੇ ਤੇ ਅੱਜ ਮੁਕਤਸਰ ਸ਼ਹਿਰ ਵਿਖੇ ਦੁਕਾਨਾਂ ਪੂਰੀ ਤਰ੍ਹਾਂ ਸਵੇਰ ਵੇਲੇ ਤੋਂ ਹੀ ਬੰਦ ਰਹੀਆਂ। ਜਦੋਂਕਿ ਸਰਕਾਰੀ ਦਫ਼ਤਰ ਆਮ ਵਾਂਗ ਖੁੱਲੇ ਰਹੇ ਤੇ ਮੁਲਾਜਮਾਂ ਨੂੰ ਆਉਂਣ ਸਮੇਂ ਭਾਰੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ ਕਿਉਂਕਿ ਕੋਈ ਵਿਰਲੀ ਟਾਵੀ ਬੱਸ ਹੀ ਚੱਲੀ ਅਤੇ ਪ੍ਰਾਈਵੇਟ ਬੱਸਾਂ ਬੰਦ ਰਹੀਆਂ। ਸਿੱਖ ਨੌਜਵਾਨਾਂ ਦੇ ਜੱਥੇ ਮੋਟਰਸਾਇਕਲਾਂ ਤੇ ਸਵਾਰ ਹੋ ਕੇ ਅਤੇ ਪੈਦਲ ਬਜਾਰਾਂ ਵਿੱਚੋਂ ਦੀ ਲੰਘ ਰਹੇ ਸਨ ਤਾਂ ਕਿ ਖੁੱਲੀਆਂ ਹੋਈਆਂ ਦੁਕਾਨਾਂ ਨੂੰ ਬੰਦ ਕਰਵਾਇਆ ਜਾ ਸਕੇ। ਪੁਲਿਸ ਦੀ ਗਸਤ ਲਗਾਤਾਰ ਜਾਰੀ ਸੀ ਤਾਂ ਕਿ ਕੋਈ ਅਣਸੁਖਾਵੀਂ ਘਟਨਾ ਨਾ ਵਾਪਰੇ। ਪੁਲਿਸ ਦੇ ਉਚ ਅਧਿਕਾਰੀਆਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਜਿਲ੍ਹੇ ਭਰ ਵਿੱਚ ਅਮਨ ਇਮਾਨ ਰਿਹਾ ਤੇ ਕੋਈ ਮਾੜੀ ਘਟਨਾ ਨਹੀਂ ਵਾਪਰੀ। ਲੋਕਾਂ ਤੇ ਬੰਦ ਦਾ ਪੂਰਾ ਅਸਰ ਵੇਖਣ ਨੂੰ ਮਿਲਿਆ ਕਿਉਂਕਿ ਦੁਕਾਨਾਂ ਬੰਦ ਹੋ ਕਰਕੇ ਕੋਈ ਸਮਾਨ ਨਹੀਂ ਮਿਲ ਰਿਹਾ ਸੀ ਤੇ ਸਬਜੀ ਆਦਿ ਵੀ ਕਿਸੇ ਪਾਸੇ ਦਿਖਾਈ ਨਹੀਂ ਦਿੱਤੀ। ਇਸ ਮੌਕੇ ਤੇ ਸਰਬ ਖਾਲਸਾ ਨੌਜਵਾਨ ਪੀੜ੍ਹੀ ਦੇ ਆਗੂਆਂ ਹਰਜਿੰਦਰ ਸਿੰਘ ਖਾਲਸਾ, ਰਣਜੀਤ ਸਿੰਘ, ਜਸਵੀਰ ਸਿੰਘ, ਭਾਈ ਤਿਲੋਕ ਸਿੰਘ, ਗੁਰਜੰਟ ਸਿੰਘ, ਗੁਰਫਤਿਹ ਸਿੰਘ ਬਲਵੀਰ ਸਿੰਘ, ਜਰਨੈਲ ਸਿੰਘ ਤੇ ਪਰਮਜੀਤ ਆਦਿ ਨੇ ਆਮ ਲੋਕਾਂ ਦਾ ਧੰਨਵਾਦ ਕੀਤਾ ਹੈ ਜਿਨਾਂ ਨੇ ਬੰਦ ਨੂੰ ਭਰਮਾ ਹੁਗਾਰਾ ਦਿਵਾਇਆ ਹੈ।
ਗੋਨਿਆਣਾ ਮੰਡੀ (ਵਨੀਤ, ਸਤਪਾਲ ਬਾਂਸਲ) : 25 ਸਾਲ ਬੀਤਣ ਤੇ ਵੀ ਹਜ਼ਾਰਾ ਦੀ ਗਿਣਤੀ ਵਿਚ ਹੋਏ ਨਿਰਦੋਸ਼ ਸਿਖਾਂ ਦੇ ਕਾਤਲਾਂ ਨੂੰ ਸ਼ਜਾ ਨਾ ਦਿਤੇ ਜਾਣ ਦੇ ਰੋਸ ਵਜੋਂ ਦਲ ਖਾਲਸਾ ਦੇ ਸੱਦੇ ਤੇ ਸਮੁੱਚੀਆਂ ਪੰਥਕ ਜਥੇਬੰਦੀਆਂ ਵਲੋਂ ਪੰਜਾਬ ਬੰਦ ਦੇ ਸੰਦੇ ਦੀ ਅਪੀਲ ਤੇ ਫੁੱਲ ਚੜ੍ਹਾਉਦਿਆ , ਅੱਜ ਬਠਿੰਡਾ ਸ਼ਹਿਰ ਮੁਕੰਮਲ ਅਤੇ ਸਾਂਤੀ ਪੂਰਨ ਬੰਦ ਰਿਹਾ , ਕਿਸੇ ਕਿਸਮ ਦੀ ਕੋਈ ਗੜਬੜ੍ਹ ਹੋਣ ਦਾ ਕੋਈ ਸਮਾਚਾਰ ਨਹੀ ਮਿਲਿਆ। ਜ਼ਿਲ੍ਹਾ ਪੁਲਿਸ ਵਲੋਂ ਵੀ ਸੁੱਰਖਿਆਂ ਦੇ ਵਧੀਆ ਪ੍ਰਬੰਧ ਕੀਤੇ ਗਏ ਸਨ। ਇਸ ਬੰਦ ਨੂੰ ਸਫਲ ਬਣਾਉਣ ਲਈ ਆਯੋਜਿਕਾਂ ਵਲੋ ਕੋਈ ਸ਼ਕਤੀ ਪ੍ਰਦਰਸ਼ਨ ਨਹੀ ਕੀਤਾ ਗਿਆ । ਬਲਕਿ ਸ਼ਹਿਰ ਦੇ ਸਾਰੇ ਦੁਕਾਨਦਾਰਾਂ ਨੇ ਸ਼ਹਿਰ ਦਾ ਮਹੌਲ ਬਣਾਈ ਰੱਖਣ ਲਈ ਆਪਣੇ ਕਾਰੋਬਾਰੀ ਅਦਾਰੇ ਬੰਦ ਰੱਖੇ । ਟਾਵੀਆਂ ਟੱਲੀਆਂ ਸਰਕਾਰੀ ਅਤੇ ਪ੍ਰਾਈਵੇਟ ਬੱਸਾਂ ਜਰੂਰ ਚੱਲੀਆਂ ਉਹ ਵੀ ਸਵਾਰੀਆਂ ਦੀ ਘਾਟ ਕਾਰਨ ਬੰਦ ਹੀ ਕਰਨੀਆਂ ਪਈਆਂ । ਰੇਲਵੇ ਸਟੇਸ਼ਨ ਵਾਲੇ ਢਾਬੇ ਜਰੂਰ ਖੁੱਲ੍ਹੇ ਰਹੇ ਅਤੇ ਇੱਕਾ ਦੁੱਕਾ ਫਲਾਂ ਵਾਲੀਆਂ ਰੇੜ੍ਹੀਆਂ ਤੋ ਬਗੈਰ ਸਾਰਾ ਸ਼ਹਿਰ ਮੁਕੰਮਲ ਬੰਦ ਰਿਹਾ ।
ਜੰਮੂ, 3 ਨਵੰਬਰ (ਸਰਬਜੀਤ ਸਿੰਘ ) – ਹਰ ਸਾਲ ਦੀ ਤਰ੍ਹਾਂ ਇਸ ਵਾਰ ਵੀ 1947 ਦੇ ਸ਼ਹੀਦਾਂ ਨੂੰ ਯਾਦ ਕਰਦੇ ਹੋਏ ਗੁਰਦੁਆਰਾ ਡੇਰਾ ਸੰਤ ਪੁਰਾ ਡੰਨਾ ਵਿਖੇ ਸ੍ਰੀ ਅਖੰਡ ਪਾਠ ਸਾਹਿਬਾਂ ਦੀ ਲੜੀ ਦੀ ਸਮਾਪਤੀ ਤੋਂ ਬਾਦ ਦੀਵਾਨ ਸਜਾਏ ਗਏ ਅਤੇ ਸ਼ਹੀਦ ਹੋਏ ਲੋਕਾਂ ਨੂੰ ਯਾਦ ਕੀਤਾ ਗਿਆ । ਇਸ ਮੌਕੇ ਤੇ ਭਾਈ ਕੁਲਦੀਪ ਸਿੰਘ ਨੇ 1947 ਦੇ ਘਲੂਘਾਰੇ ਦੀ ਜਾਣਕਾਰੀ ਸੰਗਤਾਂ ਨੂੰ ਦੇਂਦੇ ਹੋਏ ਕਿਹਾ ਕਿ ਡੇਰਾ ਸੰਤਪੁਰਾ ਡੰਨਾ ਦੇ ਸੰਤ ਗੁਰਬੱਖਸ਼ ਸਿੰਘ ਜੀ ਨੇ ਆਪਣੀ ਜਾਨ ਦੀ ਪ੍ਰਵਾਹ ਨਾ ਕਰਦੇ ਹੋਏ ਮੁਜ਼ਫਰਾਬਾਦ ਅਤੇ ਪੁਣਛ ਦੇ ਹਜ਼ਾਰਾਂ ਲੋਕਾਂ ਨੂੰ ਇਕੱਠਿਆਂ ਕੀਤਾ ਅਤੇ ਉਨ੍ਹਾਂ ਨੂੰ ਸੁਰੱਖਿਅਤ ਸਥਾਨਾਂ ਤੇ ਪਹੁੰਚਿਆਂ । ਬਾਦ ਵਿਚ ਭਾਰਤੀ ਫੌਜ ਦੇ ਬ੍ਰਿਗੇਡੀਅਰ ਪ੍ਰੀਤਮ ਸਿੰਘ ਨੇ ਪੁਣਛ ਪਹੁੰਚ ਕੇ ਹਵਾਈ ਜਹਾਜ਼ ਰਾਹੀ ਲੋਕਾਂ ਨੂੰ ਜੰਮੂ ਪਹੁੰਚਾਇਆ। ਉਨ੍ਹਾਂ ਦੱਸਿਆ ਕਿ ਜੰਮੂ ਆ ਕੇ ਸੰਤ ਗੁਰਬੱਖਸ਼ ਸਿੰਘ ਜੀ ਨੇ ਸ਼ਰਨਾਰਥੀਆਂ ਦੇ ਮੁੜਵਸੇਵੇ ਲਈ ਕਾਫੀ ਯੋਗਦਾਨ ਪਾਇਆ ਅਤੇ ਹੁਣ ਵੀ ਸਿੱਖ ਭਾਈਚਾਰੇ ਲਈ ਕੰਮ ਕਰ ਰਹੇ ਹਨ। ਉਨ੍ਹਾਂ ਦੱਸਿਆ ਕਿ ਹਰ ਸਾਲ 1947 ਦੇ ਸ਼ਹੀਦਾਂ ਨੂੰ ਯਾਦ ਕਰਦੇ ਹੋਏ ਸੰਤ ਗੁਰਬੱਖਸ਼ ਸਿੰਘ ਦੀ ਸ੍ਰਪਰਸਤੀ ਹੇਠ ਦੀਵਨ ਸਜਾਇਆ ਜਾਂਦਾ ਹੈ ਅਤੇ ਲੰਗਰ ਲਗਾਇਆ ਜਾਂਦਾ ਹੈ। ਬੁਢਲਾਡਾ, (ਦਵਿੰਦਰ ਸਿੰਘ ਕੋਹਲੀ)- 1984 ਵਿੱਚ ਦਿੱਲੀ ਵਿੱਚ ਹੋਏੇ ਸਿੱਖਾਂ ਦੇ ਦੰਗਿਆਂ ਦੇ ਵਿਰੋਧੀ ਦੋਸ਼ੀਆਂ ਨੂੰ 25 ਸਾਲ ਬੀਤਣ ’ਤੇ ਸਜਾ ਨਾ ਮਿਲਣ ਦੇ ਵਿਰੋਧ ਵਿੱਚ ਸਿੱਖ ਜਥੇਬੰਦੀਆਂ ਵੱਲੋਂ ਪੰਜਾਬ ਬੰਦ ਦੇ ਸੱਦੇ ’ਤੇ ਬੋਹਾ, ਬੁਢਲਾਡਾ, ਪੂਰਨ ਤੌਰ ’ਤੇ ਬੰਦ ਰਿਹਾ। ਇਸ ਮੌਕੇ ਸ਼ਹਿਰ ਵਿੱਚ ਅਮਨ ਸ਼ਾਂਤੀ ਜਲੂਸ ਕੱਢਿਆ ਗਿਆ, ਜਿਸ ਵਿੱਚ ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਦੇ ਜ਼ਿਲ੍ਹਾ ਪ੍ਰਧਾਨ ਬਲਵਿੰਦਰ ਸਿੰਘ ਮੰਡੇਰ, ਟਿਕਾਣਾ ਭਾਈ ਜਗਤਾ ਗੁਰਦੁਆਰਾ ਸਾਹਿਬ ਦੇ ਪ੍ਰਧਾਨ ਦੀਵਾਨ ਸਿੰਘ ਗੁਲਿਆਨੀ, ਮੁਖਿੰਦਰ ਸਿੰਘ ਮਨੀ ਮਨਿੰਦਰ ਸਿੰਘ, ਸ੍ਰੀ ਗੁਰੂ ਨਾਨਕ ਸਭਾ ਦੇ ਪ੍ਰਧਾਨ ਮਿਸਤਰੀ ਜਰਨੈਲ ਸਿੰਘ, ਪਰਮਜੀਤ ਸਿੰਘ ਅਨੇਜਾ, ਮਿਸਤਰੀ ਹਰਭਜਨ ਸਿੰਘ, ਅਵਤਾਰ ਸਿੰਘ ਗੁਲਿਆਨੀ, ਕੁਲਦੀਪ ਸਿੰਘ ਗੋਲਡੀ, ਮਿਸਤਰੀ ਹਰਜੀਤ ਸਿੰਘ , ਜਸਵੰਤ ਸਿੰਘ ਜਸਾ, ਬਲਬੀਰ ਸਿੰਘ ਬੀਰੀ, ਪ੍ਰੀਤਿੰਦਰ ਸਿੰਘ, ਮਿਸਤਰੀ ਮਿਠੂ ਸਿੰਘ, ਹੰਸਾ ਸਿੰਘ ਆਦਿ ਅਨੇਕਾਂ ਆਗੂਆਂ ਨੇ ਸ਼ਹਿਰ ਬੁਢਲਾਡਾ ’ਚ ਸ਼ਾਂਤਮਈ ਰੋਸ ਮਾਰਚ ਕੱਢਿਆ।
ਮਹਿਲ ਕਲਾਂ, (ਬਲਵਿੰਦਰ ਵਜੀਦਕੇ)- ਦਮਦਮੀ ਟਕਸਾਲ ਅਤੇ ਹੋਰ ਵੱਖ-ਵੱਖ ਪੰਥਕ ਧਿਰਾਂ ਤੇ ਸਿੱਖ ਫੈਡਰੇਸ਼ਨਾਂ ਵੱਲੋਂ 1984 ਦੇ ਸਿੱਖ ਵਿਰੋਧੀ ਦੰਗਿਆਂ ਦੇ ਜ਼ੁੰਮੇਵਾਰ ਦੋਸ਼ੀਆਂ ਨੂੰ 25 ਸਾਲ ਬੀਤ ਜਾਣ ਉਪਰੰਤ ਵੀ ਸਜਾਵਾਂ ਨਾਂ ਦਿੱਤੇ ਜਾਣ ਵਿਰੁੱਧ ਅੱਜ ਕਸਬਾ ਮਹਿਲ ਕਲਾਂ ਵਿਖੇ ਦੁਕਾਨਦਾਰਾਂ ਵਲੋਂ ਭਰਪੂਰ ਸਮ੍ਰਥਨ ਮਿਲਿਆ ਜਦਕਿ ਸਵੇਰ ਤੋਂ ਹੀ ਲੱਗਭਗ ਸਾਰੀਆਂ ਦੁਕਾਨਾਂ ਬੰਦ ਰਹੀਆਂ । ਸਿਰਫ਼ ਜ਼ਰੂਰੀ ਲੋੜਾਂ ਲਈ ਚਾਹੀਦੀਆਂ ਮੈਡੀਕਲ ਸਟੋਰ ਅਤੇ ਸਬਜ਼ੀ ਵਾਲੀਆਂ ਦੁਕਾਨਾਂ ਹੀ ਖੁੱਲ੍ਹੀਆਂ ਸਨ। ਸਰਕਾਰੀ ਬੱਸਾਂ ਤੇ ਵਿਦਿਅਕ ਅਦਾਰੇ ਆਮ ਵਾਂਗ ਖੁੱਲ੍ਹੇ ਚਲਦੇ ਦੇਖੇ ਗਏ ਜਦਕਿ ਮੰਡੀਆਂ ਵਿੱਚ ਝੋਨੇ ਦੀ ਆਮਦ ਲਈ ਟ੍ਰੈਕਟਰ ਟਰਾਲੀਆਂ ਤੇ ਕੰਬਾਈਨਾਂ ਤੇ ਬਾਕੀ ਵਹੀਕਲ ਸੜਕਾਂ †ਤੇ ਆਮ ਵਾਂਗ ਚੱਲ ਰਹੇ ਸਨ। ਪੰਜਾਬ ਦੀ ਵੱਡੀ ਬੱਸ ਕੰਪਨੀ ਔਰਬਿਟ ਤੇ ਬਠਿੰਡਾ ਟਰਾਂਸਪੋਰਟ ਦੀ ਕੋਈ ਬੱਸ ਅੱਜ ਨਜ਼ਰੀ ਨਹੀਂ ਪਈ ਜਦ ਕਿ ਪਹਿਲਾਂ ਰੋਜ਼ਾਨਾਂ ਬਠਿੰਡਾ -ਲੁਧਿਆਣਾ ਮਾਰਗ ਉੱਪਰ ਇੰਨ੍ਹ੍ਵਾਂ ਦੀ ‘ਸਰਦਾਰੀ’ ਹੁੰਦੀ ਹੈ। ਇਸ ਬੰਦ ਦੌਰਾਨ ਕੋਈ ਅਣ-ਸੁਖਾਵੀਂ ਘਟਨਾਂ ਨਾ ਵਾਪਰੇ ਇਸ ਲਈ ਥਾਣਾ ਮੁਖੀ ਰਛਪਾਲ ਸਿੰਘ ਦੀ ਅਗਵਾਈ ਵਿੱਚ ਪੁਲਿਸ ਪਾਰਟੀ ਲਗਾਤਾਰ ਚੌਕਸ ਸੀ ਤੇ ਗਸ਼ਤ ਵੀ ਤੇਜ਼ ਕੀਤੀ ਗਈ ਸੀ ਜਿਸ ਕਰਕੇ ਸਮੁੱਚੇ ਇਲਾਕੇ ਵਿੱਚ ਅਮਨ ਸ਼ਾਂਤੀ ਰਹੀ। ਇਸ ਬਲਾਕ ਮਹਿਲ ਕਲਾਂ ਦੇ ਪਿੰਡ ਵਜੀਦਕੇ ਖੁਰਦ ਵਿਖੇ ਮੁੱਖ ਸੜਕ ਉੱਪਰ ਥਾਣਾ ਸਦਰ ਬਰਨਾਲਾ ਦੇ ਮੁੱਖੀ ਸੁਖਦੇਵ ਸਿੰਘ ਦੀ ਅਗਵਾਈ ਵਿੱਚ ਨਾਕਾ ਲਾਇਆ ਹੋਇਆ ਸੀ ਤੇ ਪੁਲਿਸ ਪੈਟਰੋਲੰਿਗ ਪਾਰਟੀ ਲਗਾਤਾਰ ਗਸ਼ਤ ਕਰ ਰਹੀ ਸੀ। ਦੁਕਾਨਦਾਰਾਂ ਵੱਲੋਂ ਬੰਦ ਨੂੰ ਭਰਪੂਰ ਸਹਿਯੋਗ ਦੇਣ ਬਦਲੇ ਵੱਖ-ਵੱਖ ਪੰਥਕ ਆਗੂਆਂ ਨੇ ਦੁਕਾਨਦਾਰਾਂ ਦਾ ਧੰਨਵਾਦ ਕੀਤਾ।
ਫਗਵਾੜਾ, (ਜਸਵਿੰਦਰ ਢੱਡਾ)- ਪੰਥਕ ਜਥੇਬੰਦੀਆਂ ਵੱਲੋਂ ਪੀੜ੍ਹਤ ਸਿੱਖਾਂ ਨੂੰ ਇਨਸਾਫ਼ ਲਈ ਦਿੱਤੇ ਗਏ ਪੰਜਾਬ ਬੰਦ ਦੇ ਤਹਿਤ ਅੱਜ ਫਗਵਾੜਾ ਬੰਦ ਨੂੰ ਭਰਵਾਂ ਹੁੰਗਾਰਾ ਮਿਲਿਆ, ਦੁਕਾਨਦਾਰਾਂ ਨੇ ਆਪਣੀਆਂ ਦੁਕਾਨਾਂ ਸਵੇਰ ਤੋਂ ਹੀ ਬੰਦ ਰੱਖੀਆਂ। ਮੇਨ ਰੋਡ ਤੇ ਬੱਸਾ ਚਲੱਦੀਆਂ ਰਹੀਆਂ ਪਰ ਸਵਾਰੀਆਂ ਘੱਟ ਹੀ ਸਨ। ਬੰਦ ਦੌਰਾਨ ਫਗਵਾੜਾ ’ਚ ਅਮਨ ਚੈਨ ਰਿਹਾ ਤੇ ਖਬਰ ਵਿਕੇ ਜਾਣ ਤੱਕ ਕੋਈ ਵੀ ਘਟਨਾ ਨਹੀਂ ਵਾਪਰੀ।
ਮੌੜ ਮੰਡੀ ਤੋਂ ਪੱਤਰ ਪ੍ਰੇਰਕ ਅਨੁਸਾਰ-ਸਮੂਹ ਸਿੱਖ ਜਥੇਬੰਦੀਆਂ ਵੱਲੋਂ ਨਵੰਬਰ 1984 ਦੇ ਸਿੱਖ ਕਤਲੇਆਮ ਦੇ ਦੋਸ਼ੀਆਂ ਨੂੰ 25 ਸਾਲ ਬੀਤ ਜਾਣ ’ਤੇ ਵੀ ਕੋਈ ਸਜ਼ਾ ਨਾ ਦਿੱਤੇ ਜਾਣ ਕਾਰਨ ਅੱਜ ਪੰਜਾਬ ਬੰਦ ਦੇ ਦਿੱਤੇ ਸੱਦੇ ਨੂੰ ਮੌੜ ਮੰਡੀ ਵਿੱਚ ਪੂਰਨ ਹੁੰਗਾਰਾ ਮਿਲਿਆ। ਮੌੜ ਮੰਡੀ ਦੇ ਬਜ਼ਾਰਾਂ ਵਿੱਚ ਸਾਰੀਆਂ ਦੁਕਾਨਾਂ ਅਤੇ ਹੋਰ ਅਦਾਰੇ ਅੱਜ ਸਵੇਰ ਤੋਂ ਹੀ ਪੂਰੀ ਤਰ੍ਹਾਂ ਬੰਦ ਰਹੇ। ਭਾਵੇਂ ਕਿ ਕਿਸੇ ਵੀ ਜਥੇਬੰਦੀ ਨੇ ਜਾਂ ਵਰਕਰ ਨੇ ਧੱਕੇ ਨਾਲ ਕਿਸੇ ਵੀ ਦੁਕਾਨ ਨੂੰ ਬੰਦ ਕਰਵਾਉਣ ਦਾ ਯਤਨ ਨਹੀਂ ਕੀਤਾ, ਪ੍ਰੰਤੂ ਫਿਰ ਵੀ ਵਪਾਰੀ ਵਰਗ ਨੇ ਆਪਣੀ ਮਰਜ਼ੀ ਨਾਲ ਹੀ ਦੁਕਾਨਾਂ ਬੰਦ ਕਰਨ ਦਾ ਫੈਸਲਾ ਕੀਤਾ ਸੀ। ਮੰਡੀ ਵਿੱਚ ਸਿਰਫ ਮੈਡੀਕਲ ਸਟੋਰ ਆਦਿ ਹੀ ਖੁੱਲ੍ਹੇ ਰਹੇ ਬਾਕੀ ਸਾਰੀਆਂ ਦੁਕਾਨਾਂ ਬੰਦ ਰਹੀਆਂ। ਦੁਕਾਨਦਾਰ ਆਪਣੀਆਂ ਦੁਕਾਨਾਂ ਅੱਗੇ ਬੈਠ ਕੇ ਤਾਸ਼ ਆਦਿ ਖਡ ਕੇ ਟਾਈਮ ਪਾਸ ਕਰਦੇ ਦੇਖੇ ਗਏ। ਲੋਕਾਂ ਨੇ ਬੰਦ ਨੂੰ ਇਤਨਾ ਹੁੰਗਾਰਾ ਦਿੱਤਾ ਕਿ ਛੋਟ ਦਿੱਤੇ ਜਾਣ ਦੇ ਬਾਵਜੂਦ ਅਖਬਾਰਾਂ ਤੇ ਜ਼ਰੂਰੀ ਵਸਤਾਂ ਆਦਿ ਦੀਆਂ ਦੁਕਾਨਾਂ ਵੀ ਬੰਦ ਰਹੀਆਂ। ਪਿੰਡਾਂ ਵਿੱਚ ਭਾਵੇਂ ਇੱਕਾ-ਦੁੱਕਾ ਦੁਕਾਨਾਂ ਖੁੱਲ੍ਹੀਆਂ ਪ੍ਰੰਤੂ ਸ਼ਹਿਰ ਵਿੱਚ ਪੂਰੀ ਤਰ੍ਹਾਂ 100 ਫੀਸਦੀ ਬੰਦ ਰਿਹਾ। ਖਬਰ ਲਿਖੇ ਜਾਣ ਤੱਕ ਕਿਤੋਂ ਵੀ ਕਿਸੇ ਵੀ ਕਿਸਮ ਦੀ ਗੜਬੜ ਦੀ ਖਬਰ ਨਹੀਂ ਮਿਲੀ।
ਬੁਢਲਾਡਾ, 3 ਨਵੰਬਰ (ਦਵਿੰਦਰ ਸਿੰਘ ਕੋਹਲੀ)-ਸਰਕਾਰੀ ਹਾਈ ਸਕੂਲ ਬੱਛੋਆਣਾ ਦੋਦੜਾ ਦੇ ਮੁੱਖ ਅਧਿਆਪਕ ਸ੍ਰ. ਸ਼ਮਸ਼ੇਰ ਸਿੰਘ ਦੀ ਅਗਵਾਈ ਵਿੱਚ 50 ਬੱਚਿਆਂ ਦਾ ਟੂਰ ਇੱਕ ਬੱਸ ਰਾਹੀਂ ਤਿੰਨ ਦਿਨਾਂ ਲਈ ਧਾਰਮਿਕ ਅਸਥਾਨਾਂ ਸ੍ਰੀ ਬੰਗਲਾ ਸਾਹਿਬ ਦਿੱਲੀ, ਸ੍ਰੀ ਰਕਾਬ ਗੰਜ ਦਿੱਲੀ, ਸ੍ਰੀ ਸ਼ੀਸ ਗੰਜ ਸਾਹਿਬ ਦਿੱਲੀ, ਆਗਰਾ, ਮਥਰਾ ਦੇ ਦਰਸ਼ਨਾਂ ਲਈ ਗਿਆ। ਇਸ ਯਾਤਰਾ ਵਿੱਚ ਮੈਡਮ ਗੁਰਵਿੰਦਰ ਕੌਰ, ਮੈਡਮ ਕਮਲੇਸ਼ ਰਾਣੀ, ਮਨਦੀਪ ਸਿੰਘ, ਅਰੁਣ ਕੁਮਾਰ ਨੇ ਧਾਰਮਿਕ ਅਸਥਾਨਾਂ ਦੇ ਦਰਸ਼ਨ ਕੀਤੇ। ਕਪੂਰਥਲਾ ਤੋਂ ਵਧਵਾ ਅਨੁਸਾਰ-84 ਦੇ ਦੰਗਾ ਪੀੜਤਾਂ ਵੱਲੋਂ ਪੰਜਾਬ ਬੰਦ ਨੂੰ ਦਿੱਤੇ ਗਏ ਸੱਦੇ ’ਤੇ ਕਪੂਰਥਲਾ ਸ਼ਹਿਰ ਪੂਰਨ ਬੰਦ ਰਿਹਾ ਅਤੇ ਸਾਰੇ ਸ਼ਹਿਰ ਦੇ ਦੁਕਾਨਦਾਰਾਂ ਨੇ ਆਪਣੀਆਂ ਦੁਕਾਨਾਂ ਬੰਦ ਰੱਖ ਕੇ ਪੂਰਾ ਸਹਿਯੋਗ ਦਿੱਤਾ। ਕੋਈ ਵੀ ਪ੍ਰਾਈਵੇਟ ਬੱਸ ਨਹੀਂ ਚੱਲੀ । ਇੱਥੋਂ ਤੱਕ ਕਿ ਕਪੂਰਥਲਾ ਦਾ ਕੋਈ ਵੀ ਬੈਂਕ ਅੱਜ ਨਹੀਂ ਖੁੱਲ੍ਹਿਆ। ਖਬਰ ਲਿਖੇ ਜਾਣ ਤੱਕ ਸ਼ਹਿਰ ਵਿੱਚ ਕੋਈ ਵੀ ਮਾੜੀ ਘਟਨਾ ਨਹੀਂ ਵਾਪਰੀ। ਪੁਲਿਸ ਵੱਲੋਂ ਵੱਖ-ਵੱਖ ਬਜ਼ਾਰਾਂ ਵਿੱਚੋਂ ਭਾਰੀ ਫੋਰਸ ਤਾਇਨਾਤ ਸੀ ਤਾਂ ਕਿ ਕੋਈ ਮਾੜਾ ਅਨਸਰ ਇਸ ਬੰਦ ਦੇ ਸੱਦੇ ’ਤੇ ਕੋਝੀ ਹਰਕਤ ਨਾ ਕਰ ਸਕੇ। ਸ਼ਹਿਰ ਦੀਆਂ ਸਾਰੀਆਂ ਸਿਆਸੀ ਪਾਰਟੀਆਂ ਨੇ ਬੰਦ ਦੇ ਸੱਦੇ ਦਾ ਪੂਰਨ ਸਹਿਯੋਗ ਦਿੱਤਾ।
ਬਾਘਾਪੁਰਾਣਾ ਤੋਂ ਬਲਜਿੰਦਰ ਭੱਲਾ ਅਨੁਸਾਰ-ਦਲ ਖਾਲਸਾ ਅਤੇ ਖਾਲਸਾ ਐਕਸ਼ਨ ਕਮੇਟੀ ਵੱਲੋਂ 3 ਨਵੰਬਰ ਪੰਜਾਬ ਬੰਦ ਦੇ ਸੱਦੇ ਨੂੰ ਬਾਘਾਪੁਰਾਣਾ ਅੰਦਰ ਵੀ ਸੰਪੂਰਨ ਹੁੰਗਾਰਾ ਮਿਲਿਆ। ਦਲ ਖਾਲਸਾ ਅਤੇ ਖਾਲਸਾ ਐਕਸ਼ਨ ਕਮੇਟੀ ਦੀ ਮੰਗ ਸੀ ਕਿ 3 ਨਵੰਬਰ 1984 ਨੂੰ ਦਿੱਲੀ ਵਿਖੇ ਮਾਰੇ ਗਏ ਬੇਦੋਸ਼ੋ ਲੋਕਾਂ ਦੇ ਕਾਤਲਾਂ ਨੂੰ 25 ਸਾਲ ਬੀਤ ਜਾਣ ਬਾਅਦ ਵੀ ਕੋਈ ਸਜ਼ਾ ਨਹੀਂ ਹੋਈ। ਉਕਤ ਦੋਸ਼ੀਆਂ ਨੂੰ ਸਜ਼ਾ ਦਿਵਾਉਣ ਲਈ ਕੇਂਦਰ ਦੇ ਕੰਨਾਂ ਤੱਕ ਅਵਾਜ਼ ਪਹੁੰਚਾਉਣ ਲਈ ਇਹ ਬੰਦ ਦੀ ਕਾਲ ਕੀਤੀ ਗਈ ਹੈ। ਸ਼ਹਿਰ ਅੰਦਰ ਕਈ ਥਾਵਾਂ ’ਤੇ ਦਲ ਖਾਲਸਾ ਅਤੇ ਖਾਲਸਾ ਐਕਸ਼ਨ ਕਮੇਟੀ ਨੇ ਪੰਜਾਬ ਬੰਦ ਦੇ ਪੋਸਟਰ ਵੀ ਲਗਾਏ। ਸਥਾਨਿਕ ਥਾਣਾ ਮੁਖੀ ਨੇ ਸ਼ਹਿਰ ਦੀਆਂ ਚਾਰੇ ਸੜਕਾਂ ਉਪਰ ਨਾਲੇ ਲਗਾਏ ਅਤੇ ਆਪ ਪੁਲਿਸ ਪਾਰਟੀ ਸਮੇਤ ਸਾਰਾ ਦਿਨ ਗਸ਼ਤ ਕੀਤੀ। ਰੇਹੜੀਆਂ ਫੜੀਆਂ ਵਾਲੇ ਵੀ ਬਜ਼ਾਰਾਂ ਅੰਦਰੋਂ ਅਲੋਪ ਹੀ ਰਹੇ। ਕੁੱਲ ਮਿਲਾ ਕੇ ਇਸ ਬੰਦ ਨੂੰ ਭਰਵਾਂ ਹੁੰਗਾਰਾ ਮਿਲਿਆ।
ਬੰਗਾ ਤੋਂ ਰਾਜ ਮਜਾਰੀ ਅਨੁਸਾਰ-1984 ਦੌਰਾਨ ਦਿੱਲੀ ਸਮੇਤ ਦੇਸ਼ ਦੇ ਹੋਰ ਭਾਗਾਂ ਵਿੱਚ ਹੋਏ ਸਿੱਖ ਕਤਲੇਆਮ ਲਈ ਜ਼ਿੰੇਮੇਵਾਰ ਦੋਸ਼ੀਆਂ ਨੂੰ 25 ਸਾਲ ਬੀਤ ਜਾਣ ’ਤੇ ਵੀ ਸਜ਼ਾਵਾਂ ਨਾ ਦਿੱਤੇ ਜਾਣ ਦੇ ਰੋਸ ਵਜੋਂ ਸਿੱਖ ਜਥੇਬੰਦੀਆਂ ਵੱਲੋਂ ਦਿੱਤੇ ਬੰਦ ਦੇ ਸੱਦੇ ਭਰਪੂਰ ਹੁੰਗਾਰਾ ਮਿਲਿਆ। ਬੰਦ ਦੇ ਸੱਦੇ ’ਤੇ ਬੰਗਾ ਸ਼ਹਿਰ ਵਿੱਚ ਮੈਡੀਕਲ ਸਟੋਰਾਂ ਅਤੇ ਬੈਂਕਾਂ ਨੂੰ ਛੱਡ ਕੇ ਸਾਰੇ ਵਿਦਿਅਕ ਅਦਾਰੇ ਦੁਕਾਨਾਂ ਅਤੇ ਹੋਰ ਵਪਾਰਕ ਅਦਾਰੇ ਪੂਰਨ ਤੌਰ ’ਤੇ ਮੁਕੰਮਲ ਬੰਦ ਰਹੇ । ਬੰਦ ਮੌਕੇ ਬੱਸਾਂ, ਗੱਡੀਆਂ ਅਤੇ ਹੋਰ ਵਾਹਨ ਵੀ ਲੱਗਭੱਗ ਬੰਦ ਰਹੇ। ਇਸ ਦੌਰਾਨ ਸਿੱਖ ਜਥੇਬੰਦੀਆਂ ਦੇ ਆਗੂਆਂ ਵੱਲੋਂ ਵਿੱਚ ਗਿਣਤੀ ਵਿੱਚ ਸੰਗਤਾਂ ਸਮੇਤ ਸਥਾਨਕ ਗੁਰਦੁਆਰਾ ਸਿੰਘ ਸਭਾ ਤੋਂ ਅਰਦਾਸ ਉਪਰੰਤ ਮੁੱਖ ਸੜਕ ਤੇ ਆ ਕੇ ਰੋਸ ਧਰਨਾ ਦਿੱਤਾ ਅਤੇ ਟ੍ਰੈਫਿਕ ਜਾਮ ਕੀਤਾ। ਧਰਨੇ ਨੂੰ ਸੰਬੋਧਨ ਕਰਦਿਆਂ ਜਥੇਦਾਰ ਸਵਰਨਜੀਤ ਸਿੰਘ ਖਾਲਸਾ ਪਠਲਾਵਾ ਮਿਸਲ ਸ਼ਹੀਦ ਤਰਨਾ ਦਲ, ਜਗਜੀਤ ਸਿੰਘ ਖਾਲਸਾ ਸ਼ਹਿਰੀ ਪ੍ਰਧਾਨ ਨੇ ਸੰਬੋਧਨ ਕਰਦਿਆਂ ਕਿਹਾ ਕਿ ਸ਼ਰਮ ਵਾਲੀ ਗੱਲ ਹੈ ਕਿ 1984 ਦੌਰਾਨ ਹੋਏ ਸਿੱਖ ਕਤਲੇਆਮ ਦੇ ਦੋਸ਼ੀਆਂ ਦੇ ਖਿਲਾਫ 25 ਸਾਲ ਬੀਤ ਜਾਣ ’ਤੇ ਵੀ ਕੇਂਦਰ ਸਰਕਾਰ ਵੱਲੋਂ ਕੋਈ ਕਾਰਵਾਈ ਨਹੀਂ ਕੀਤੀ ਗਈ। ਉਨ੍ਹਾਂ ਮੰਗ ਕੀਤੀ ਕਿ ਜ਼ਿੰਮੇਵਾਰ ਦੋਸ਼ੀਆਂ ਖਿਲਾਫ ਜਲਦੀ ਤੋਂ ਜਲਦੀ ਸਖਤ ਤੋਂ ਸਖਤ ਕਾਰਵਾਈ ਕੀਤੀ ਜਾਵੇ। ਧਰਨੇ ਉਪਰੰਤ ਸ਼ਹਿਰ ਦੇ ਵੱਖ-ਵੱਖ ਬਜ਼ਾਰਾਂ ਵਿੱਚ ਰੋਸ ਮਾਰਚ ਵੀ ਕੀਤਾ ਗਿਆ। ਧਰਨੇ ਅਤੇ ਰੋਸ ਮਾਰਚ ਦੌਰਾਨ ਸੰਗਤਾਂ ਨੇ ਸਤਿਨਾਮ ਵਾਹਿਗੁਰੂ ਦਾ ਜਾਪ ਕੀਤਾ। ਮੌਕੇ ਦਵਿੰਦਰ ਸਿੰਘ ਖਾਨਖਾਨਾ ਜ਼ਿਲ੍ਹਾ ਪ੍ਰਧਾਨ ਅਕਾਲੀ ਦਲ (ਅ), ਭਾਈ ਮਨਜੀਤ ਸਿੰਘ ਰਸੂਲਪੁਰ ਅਕਾਲੀ ਦਲ ਪੰਚ ਪ੍ਰਧਾਨੀ, ਜਥੇਦਾਰ ਜੋਗਿੰਦਰ ਸਿੰਘ, ਅਮਰੀਕ ਸਿੰਘ ਪੂਨੀਆਂ, ਗੁਰਨਾਮ ਸਿੰਘ ਬੰਗਾ, ਬਲੀਤ ਸਰੋਆ ਚੱਕ ਰਾਮੂ, ਹਰਜਾਪ ਸਿੰਘ ਮੰਡੇਰ ਚੱਕ ਰਾਮੂ, ਅਮਰਜੀਤ ਸਿੰਘ ਚਾਹਲ, ਸ਼ਮਸ਼ੇਰ ਸਿੰਘ, ਸਤਨਾਮ ਸਿੰਘ ਭੋਰਾ, ਮਨਦੀਪ ਸਿੰਘ ਸੋਢੀਆਂ, ਪ੍ਰਿੰਸੀਪਲ ਹਰਭਜਨ ਸਿੰਘ ਕਰਨਾਣਾ, ਤਰਲੋਕ ਸਿੰਘ ਨਾਗਪਾਲ, ਹਰਬੰਸ ਸਿੰਘ ਖਾਨਪੁਰ, ਖੜਕ ਸਿੰਘ ਬੰਗਾ ਪ੍ਰਧਾਨ ਟੈਂਪੂ ਯੂਨੀਅਨ, ਅਵਤਾਰ ਸਿੰਘ ਜਗਤਪੁਰ, ਹਘਹਾਜ਼ਰ ਸਨ। ਨੂਰਪੁਰ ਬੇਦੀ ਤੋਂ ਜਗਦੀਪ ਸ਼ਰਮਾ ਅਨੁਸਾਰ-1984 ਦੇ ਸਿੱਖ ਵਿਰੋਧੀ ਕਤਲੇਆਮ ਦੇ ਰੋਸ ਵਜੋਂ ਦਿੱਤੇ ਬੰਦ ਦੇ ਸੱਦੇ ਨੂੰ ਖੇਤਰ ਵਿੱਚ ਰਲਵਾਂ-ਮਿਲਵਾਂ ਹੁੰਗਾਰਾ ਮਿਲਿਆ। ਇਸ ਦੌਰਾਨ ਕਸਬਾ ਨੂਰਪੁਰ ਬੇਦੀ, ਬੈਂਸ, ਡੂੰਮੇਵਾਲ ਆਦਿ ਵਿੱਚ ਜਿੱਥੇ ਦੁਕਾਨਾਂ ਆਮ ਵਾਂਗ ਖੁੱਲ੍ਹੀਆਂ ਰਹੀਆਂ, ਉਥੇ ਝੱਜ ਚੌਂਕ, ਕਾਹਨਪੁਰ ਖੂਹੀ ਆਦਿ ’ਚ ਬੰਦ ਨੂੰ ਭਰਪੂਰ ਹੁੰਗਾਰਾ ਮਿਲਿਆ। ਇਸੇ ਦੌਰਾਨ ਹੀ ਅੱਜ ਬਸ ਸੇਵਾਵਾਂ ਪੂਰੀ ਤਰ੍ਹਾਂ ਠੱਪ ਰਹਿਣ ਕਾਰਨ ਸਵਾਰੀਆਂ ਨੂੰ ਭਾਰੀ ਦਿੱਕਤ ਦਾ ਸਾਹਮਣਾ ਕਰਨਾ ਪਿਆ। ਖੇਤਰ ਵਿੱਚ ਮਾਹੌਲ ਆਮ ਤੌਰ ’ਤੇ ਸ਼ਾਂਤ ਰਿਹਾ। ਫਗਵਾੜਾ ਤੋਂ ਕਮਲ ਰਾਏ ਅਨੁਸਾਰ-1984 ਦੇ ਸਿੱਖ ਵਿਰੋਧੀ ਦੰਗਿਆਂ ਦੇ ਦੋਸ਼ੀਆਂ ਨੂੰ ਸਜ਼ਾ ਦਿਵਾਉਣ ਅਤੇ ਇਨਸਾਫ ਦੇਣ ਵਿੱਚ ਹੋਈ ਦੇਰੀ ਦੇ ਵਿਰੋਧ ਵਿੱਚ ਦਮਦਮੀ ਟਕਸਾਲ ਅਤੇ ਸਾਰੀਆਂ ਸਿੱਖ ਸਟੂਡੈਂਟਸ ਫੈਡਰੇਸ਼ਨਾਂ ਵੱਲੋਂ ਸਾਂਝੇ ਤੌਰ ’ਤੇ ਦਿੱਤੇ ਪੰਜਾਬ ਬੰਦ ਦੇ ਸੱਦੇ ਨੂੰ ਅੱਜ ਫਗਵਾੜਾ ਸ਼ਹਿਰ ਅਤੇ ਆਸ ਪਾਸ ਦੇ ਇਲਾਕਿਆਂ ਵਿੱਚ ਭਰਵਾਂ ਹੁੰਗਾਰਾ ਮਿਲਿਆ ਤੇ ਜ਼ਿਆਦਾਤਰ ਬਹੁਤੀਆਂ ਦੁਕਾਨਾਂ ਬੰਦ ਰਹੀਆਂ, ਉਕਤ ਬੰਦ ਸ਼ਾਂਤੀਪੂਰਵਕ ਮੁਕੰਮਲ ਰਿਹਾ। ਬੰਦ ਦੇ ਬਾਵਜੂਦ ਐਮਰਜੌੈਂਸੀ ਸੇਵਾਵਾਂ ਤੇ ਸਰਕਾਰੀ ਅਦਾਰੇ ਖੁੱਲ੍ਹੇ ਹੋਏ ਸਨ ਅਤੇ ਬੱਸਾਂ, ਟੈਂਪੂ, ਟਰੱਕ ਆਦਿ ਨਾ ਮਾਤਰ ਹੀ ਚੱਲ ਰਹੇ ਸਨ ਅਤੇ ਬਾਜ਼ਾਰਾਂ, ਸੜਕਾਂ ’ਤੇ ਬੇਰੌਣਕੀ ਰਹੀ।
ਲੁਧਿਆਣਾ, 3 ਨਵੰਬਰ (ਰਾਜ ਜੋਸ਼ੀ)-ਅੱਜ ਸਿੱਖ ਸਟੂਡੈਂਟਸ ਫੈਡਰੇਸ਼ਨ ਮਹਿਤਾ ਅਤੇ ਸਿੱਖ ਪੰਥਕ ਜਥੇਬੰਦੀਆਂ ਵੱਲੋਂ ਦਿੱਤੇ ਗਏ ਪੰਜਾਬ ਬੰਦ ਦੇ ਸੱਦੇ ਨੂੰ ਮੁੱਖ ਰੱਖਦਿਆਂ ਸਿੱਖ ਸਟੂਡੈਂਟਸ ਮਹਿਤਾ ਦੇ ਪ੍ਰਧਾਨ ਭਾਈ ਪਰਮਜੀਤ ਸਿੰਘ ਖਾਲਸਾ ਦੀ ਅਗਵਾਈ ਵਿੱਚ ਫੈਡਰੇਸ਼ਨ ਦੇ ਨੌਜਵਾਨਾਂ ਵੱਲੋਂ ਲੁਧਿਆਣਾ ਸ਼ਹਿਰ ਦੇ ਜਿੱਥੇ ਸਰਕਾਰੀ ਅਤੇ ਗੈਰ-ਸਰਕਾਰੀ ਵਿੱਦਿਅਕ ਅਦਾਰੇ, ਉਦਯੋਗਾਂ ਜਗਤ ਨਾਲ ਸੰਬੰਧਿਤ ਕਾਰਖਾਨੇ ਬੱਸਾਂ, ਰੇਲਾਂ ਅਤੇ ਸ਼ਹਿਰ ਦੇ ਸਾਰ ੇਬਜ਼ਾਰ ਬੰਦ ਕਰਵਾਏ ਗਏ। ਉਤੇ ਪੰਜਾਬ ਦੇ ਵੱਖ-ਵੱਖ ਸ਼ਹਿਰਾਂ ਵਿੱਚ ਫੈਡਰੇਸ਼ਨ ਦੇ ਆਗੂਆਂ ਵੱਲੋਂ ਪੂਰਨ ਬੰਦ ਕਰਵਾਇਆ ਗਿਆ।
ਇਸ ਦੌਰਾਨ ਅੱਜ ਲੁਧਿਆਣਾ ਵਿਖੇ ਕੌਮੀ ਪ੍ਰਧਾਨ ਭਾਈ ਪਰਮਜੀਤ ਸਿੰਘ ਖਾਲਸਾ ਕੌਮੀ ਆਗੂ ਭਾਈ ਮੇਜਰ ਸਿੰਘ ਖਾਲਸਾ, ਬਲਜੀਤ ਸਿੰਘ ਬੀਤਾ, ਜਸਪਾਲ ਸਿੰਘ ਇਸਲਾਮ ਗੰਜ ਅਤੇ ਜ਼ਿਲ੍ਹਾ ਪ੍ਰਧਾਨ ਭਾਈ ਗੁਰਦੀਪ ਸਿੰਘ ਗੋਸ਼ਾ ਦੀ ਅਗਵਾਈ ਵਿੱਚ ਸੈਂਕੜੇ ਨੌਜਵਾਨਾਂ ਨੇ ਜਗਰਾਓਂ ਪੁਲ ’ਤੇ ਧਰਨਾ ਦੇ ਕੇ ਅਵਾਜਾਈ ਠੱਪ ਕੀਤੀ ਇਸ ਤੋਂ ਬਾਅਦ ਫੈਡਰੇਸ਼ਨ ਦੇ ਨੌਜਵਾਨਾਂ ਵੱਲੋਂ ਸ਼ਹਿਰ ਦੇ ਵੱਖ-ਵੱਖ ਹਿੱਸਿਆਂ ਵਿੱਚ ਜਾ ਕੇ ਸਾਰੇ ਬਜ਼ਾਰ ਬੰਦ ਕਰਵਾਏ ਗਏ। ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਚਰਨਪ੍ਰੀਤ ਸਿੰਘ ਮਿੱਕੀ, ਖੁਸ਼ਜੀਤ ਸਿੰਘ, ਬਲਵਿੰਦਰ ਸਿੰਘ ਭੁੱਲਰ, ਪਰਵਿੰਦਰ ਸਿੰਘ ਬੰਗਾ, ਮਨਿੰਦਰ ਸਿੰਘ ਅਹੂਜਾ, ਜਗਮੀਤ ਸਿੰਘ ਜੱਗੀ, ਪਰਮਜੀਤ ਸਿੰਘ ਪੰਮਾ, ਪ੍ਰਿਤਪਾਲ ਸਿੰਘ ਹਨੀ, ਸੁਖਵਿੰਦਰ ਸਿੰਘ ਪ੍ਰਧਾਨ,ਪਰਮਿੰਦਰ ਸਿੰਘ ਮਾਂਟਾ, ਇੰਦਰਦੀਪ ਸਿੰਘ, ਗੁਰਪ੍ਰੀਤ ਸਿੰਘ ਬਲੀ, ਪ੍ਰਭਜੋਤ ਸਿੰਘ ਗੋਰਾ, ਮਨਿੰਦਰਪਾਲ ਸਿੰਘ ਸੋਨੂੰ, ਜਸਵੰਤ ਸਿੰਘ ਸੰਮੀ, ਪਰਮਜੀਤ ਸਿੰਘ ਸੰਤ, ਜਸਵੀਰ ਸਿੰਘ, ਜੋਤੀ ਗਗਨਪ੍ਰੀਤ ਸਿੰਘ, ਗਗਨਦੀਪ ਸਿੰਘ ਸੰਨੀ, ਕੰਵਲਪ੍ਰੀਤ ਸਿੰਘ ਸੋਨੀ, ਹਰਸ਼ਰਨਦੀਪ ਸਿੰਘ ਲਾਲੀ, ਜਤਿੰਦਰ ਸਿੰਘ ਗੋਗੀ, ਪ੍ਰਵੀਨ ਸਿੰਘ ਲਾਲਾ, ਅਮਰੀਕ ਸਿੰਘ, ਗੁਰਪ੍ਰੀਤ ਸਿੰਘ ਬੱਬਲ, ਜਸਪਾਲ ਸਿੰਘ ਮਾਛੀਵਾੜਾ, ਇੰਦਰਮੋਹਨ ਸਿੰਘ, ਜਸਵੀਰ ਸਿੰਘ ਮੱਕੜ, ਕੰਵਲਜੀਤ ਸਿੰਘ ਸੇਠੀ, ਗਗਨਦੀਪ ਸਿੰਘ ਜਿੰਮੀ ਆਦਿ ਹਾਜ਼ਰ ਸਨ।

ਇਟਲੀ ਵਿਚ ਸੰਤ ਦਾਦੂ ਸਾਹਿਬ ਵਾਲਿਆਂ ਵੱਲੋਂ ਸਜਾਏ ਗਏ ਕੀਰਤਨ ਦੀਵਾਨ ਅਤੇ ਅੰਮ੍ਰਿਤ ਸੰਚਾਰ

ਨੋਵੈਲਾਰਾ, ਇਟਲੀ (ਬਿਊਰੋ)-ਸਿੱਖ ਧਰਮ ਦੇ ਉਘੇ ਪ੍ਰਚਾਰਕ ਅਤੇ ਦੇਹਧਾਰੀ ਗੁਰੂਡੰਮ੍ਹ ਨੂੰ ਠੱਲ੍ਹ ਪਾਉਣ ਵਾਲੇ ਸੰਤ ਬਾਬਾ ਬਲਜੀਤ ਸਿੰਘ ਜੀ ਖਾਲਸਾ ਦਾਦੂ ਸਾਹਿਬ ਵਾਲਿਆਂ ਵੱਲੋਂ ਯੂਰਪ ਦੇ ਵੱਖ-ਵੱਖ ਦੇਸ਼ਾਂ ਵਿਚ ਧਰਮ ਪ੍ਰਚਾਰ ਦੇ ਚੱਲ ਰਹੇ ਨਿਰੰਤਰ ਪ੍ਰਵਾਹ ਦੌਰਾਨ ਗੁਰਦੁਆਰਾ ਸਿੰਘ ਸਭਾ ਫਲੇਰੋ ਬਰੇਸ਼ੀਆ ਅਤੇ ਗੁਰਦੁਆਰਾ ਸਿੰਘ ਸਭਾ ਨੋਵੈਲਾਰਾ ਰਿਜ਼ੋਇਮਲੀਆ ਵਿਖੇ ਦੋ ਰੋਜ਼ਾ ਵਿਸ਼ੇਸ਼ ਕੀਰਤਨ ਦੀਵਾਨ ਸਜਾਏ ਗਏ । ਜਿਸ ਵਿਚ ਸੰਤ ਦਾਦੂ ਸਾਹਿਬ ਵਾਲਿਆਂ ਨੇ ਕਥਾ-ਕੀਰਤਨ ਰਾਹੀਂ ਸੰਗਤਾਂ ਨੂੰ ਪਤਿਤਪੁਣਾ, ਦੇਹਧਾਰੀ ਗੁਰੂਡੰਮ੍ਹ, ਨਸ਼ਿਆਂ ਅਤੇ ਭਰੂਣ ਹੱਤਿਆ ਵਰਗੀਆਂ ਸਮਾਜਿਕ ਕੁਰੀਤੀਆਂ ਤੋਂ ਬਚਣ ਅਤੇ ਸਾਬਤ ਸੂਰਤ ਹੋ ਕੇ ਖੰਡੇ ਬਾਟੇ ਦਾ ਅੰਮ੍ਰਿਤ ਛਕ ਕੇ ਸਾਹਿਬ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਲੜ ਲੱਗਣ ਦੀ ਪ੍ਰੇਰਨਾ ਕੀਤੀ । ਭਾਰੀ ਗਿਣਤੀ ਵਿਚ ਪੁੱਜੀਆਂ ਸੰਗਤਾਂ ਨੇ ਬੜੇ ਉਤਸ਼ਾਹ ਸਹਿਤ ਇਨ੍ਹਾਂ ਦੀਵਾਨਾਂ ਦੀਆਂ ਹਾਜ਼ਰੀਆਂ ਭਰੀਆਂ । ਗੁਰਦੁਆਰਾ ਸਿੰਘ ਸਭਾ ਨੋਵੈਲਾਰਾਵਿਖੇ ਹੋਏ ਅੰਮ੍ਰਿਤ ਸੰਚਾਰ ਵਿਚ ਬਾਬਾ ਜੀ ਦੀ ਪ੍ਰੇਰਨਾ ਤੋਂ ਪ੍ਰਭਾਵਿਤ ਹੋ ਕੇ 35 ਪ੍ਰਾਣੀ ਖੰਡੇ ਬਾਟੇ ਦਾ ਅੰਮ੍ਰਿਤ ਛਕ ਕੇ ਗੁਰੂ ਵਾਲੇ ਬਣੇ । ਪੰਜ ਪਿਆਰਿਆਂ ਦੀ ਸੇਵਾ ਭਾਈ ਸਤਨਾਮ ਸਿੰਘ ਚੜ੍ਹਦੀਕਲਾ, ਭਾਈ ਮਨਦੀਪ ਸਿੰਘ, ਭਾਈ ਸੁਖਪਾਲ ਸਿੰਘ, ਭਾਈ ਰਾਜਪਾਲ ਸਿੰਘ ਅਤੇ ਭਾਈ ਸੇਵਾ ਸਿੰਘ ਨੇ ਨਿਭਾਈ । ਸਮਾਪਤੀ ਉਪਰੰਤ ਸਿੱਖ ਸੰਗਤਾਂ ਅਤੇ ਗੁਰੂ ਘਰ ਦੇ ਪ੍ਰਬੰਧਕਾਂ ਵੱਲੋਂ ਪ੍ਰਧਾਨ ਭਾਈ ਨਿਸ਼ਾਨ ਸਿੰਘ ਸਰਪੰਚ, ਸੁਰਿੰਦਰਜੀਤ ਸਿੰਘ ਪੰਡੋਰੀ, ਪਰਮਜੀਤ ਸਿੰਘ ਕਰਮੋਨਾ, ਭੁਪਿੰਦਰ ਸਿੰਘ ਖਾਲਸਾ, ਸੰਤ ਬਾਬਾ ਪ੍ਰੇਮਸਿੰਘ ਯਾਦਗਾਰੀ ਕਮੇਟੀ ਵੱਲੋਂ ਭਾਈ ਬਲਕਾਰ ਸਿੰਘ, ਭਾਈ ਨਿਸ਼ਾਨ ਸਿੰਘ, ਗ੍ਰੰਥੀ ਬਾਬਾ ਦਲਬਾਰਾ ਸਿੰਘ, ਭਾਈ ਚਰਨਜੀਤ ਸਿੰਘ, ਸਤਨਾਮ ਸਿੰਘ ਲਾਂਬਾ, ਸੁਖਵਿੰਦਰ ਸਿੰਘ ਨਿਹੰਗ ਨੇ ਬਾਬਾ ਜੀ ਅਤੇ ਜਥੇ ਦੇ ਸਿੰਘਾਂ ਨੂੰ ਸਿਰੋਪਾਉ ਦੇ ਕੇ ਸਨਮਾਨਿਤ ਕੀਤਾ । ਗੁਰੂ ਕਾ ਲੰਗਰ ਅਤੁੱਟ ਵਰਤਿਆ ।

ਸਿੱਖ ਫੈਡਰੇਸ਼ਨ ਜਰਮਨੀ ਵਲੋਂ ਪੰਜਾਬ ਬੰਦ ਨੂੰ ਕਾਮਯਾਬ ਕਰਨ ਲਈ ਸਮੁੱਚੀ ਕੌਮ ਅਤੇ ਕੌਮ ਦੇ ਭਲੇ ਲਈ ਤਤਪਰ ਸਮੂਹ ਪੰਥਕ ਜਥੇਬੰਦੀਆਂ ਦਾ ਧੰਨਵਾਦ

ਫਰੈਂਕਫਰਟ 3 ਨਵੰਬਰ ( ਸੁਖਪ੍ਰੀਤ ਸਿੰਘ ) - ਸਿੱਖ ਫੈਡਰੇਸ਼ਨ ਜਰਮਨੀ ਦੇ ਮੁੱਖ ਆਗੂ ਭਾਈ ਗੁਰਮੀਤ ਸਿੰਘ ਖਨਿਆਣ, ਭਾਈ ਗੁਰਦਿਆਲ ਸਿੰਘ ਲਾਲੀ, ਭਾਈ ਮਨਜੀਤ ਸਿੰਘ ਹੋਠੀ, ਭਾਈ ਸਤਪਾਲ ਸਿੰਘ ਪੱਡਾ, ਬਾਬਾ ਜਸਵੀਰ ਸਿੰਘ, ਭਾਈ ਅਵਤਾਰ ਸਿੰਘ ਸਟੁਟਗਾਰਟ, ਭਾਈ ਸੁਖਦੇਵ ਸਿੰਘ ਛੋਟੂ, ਭਾਈ ਜਤਿੰਦਰਬੀਰ ਸਿੰਘ, ਭਾਈ ਮਨਜੀਤ ਸਿੰਘ ਜੋਧਪੁਰੀ ਅਤੇ ਭਾਈ ਅਮਰਜੀਤ ਸਿੰਘ ਮੰਗਪੁਰ ਨੇ ਪੰਥਕ ਵਿਚਾਰਾਂ ਸਾਂਝੇ ਕਰਦੇ ਹੋਏ ਧੰਨ ਧੰਨ ਸ਼੍ਰੀ ਗੁਰੂ ਨਾਨਕ ਦੇਵ ਜੀ ਪ੍ਰਕਾਸ਼ ਉਤਸਵ ਦਿਹਾੜੇ ਦੀਆਂ ਸਮੁੱਚੀ ਕੌਮ ਨੂੰ ਵਧਾਈਆਂ ਦਿੰਦਿਆ ਅੱਜ ਪੰਜਾਬ ਬੰਦ ਦੇ ਸੱਦੇ ਨੂੰ ਮਿਲੇ ਭਰਵੇਂ ਹੁਗਾਰੇ ਨੂੰ ਕੌਮ ਨਾਲ ਹੋ ਰਹੀਆਂ ਬੇਇਨਸਾਫੀਆਂ ਖਿਲਾਫ ਫਤਵਾ ਕਰਾਰ ਦਿੱਤਾ।ਉਹਨਾਂ ਕਿਹਾ ਕਿ ਅਜਿਹੇ ਪੰਥ ਪੱਧਰੀ ਹੰਭਲੇ ਉਹਨਾਂ ਗੈਰਪੰਥਕ ਸਿਂਖੀ ਵਿਰੋਧੀ ਤਾਕਤਾਂ, ਜੋ ਇਹ ਸਮਝ ਰਹੀਆਂ ਹਨ ਕਿ ਕੌਮ ਦੀਆਂ ਵੰਢੀਆਂ ਪਾ ਕੌੰ ਨੂੰ ਖੇਰੂੰ ਖੇਰੂੰ ਕਰ ਸਕਦੀਆਂ ਹਨ, ਲਈ ਮੂੰਹ ਤੋੜ ਜਵਾਬ ਹੈ।ਉਹਨਾਂ ਕਿਹਾ ਕਿ ਅੱਜ ਸਮੁਂਚੀ ਕੌਮ ਨੇ ਜਿਵੇਂ ਪੰਜਾਬ ਬੰਦ ਨੂੰ ਇਕ ਜੁੱਟ ਹੋ ਕਾਮਯਾਬ ਕੀਤਾ ਇਸ ਤੋਂ ਅੰਦਾਜਾ ਲਗਾਇਆ ਜਾ ਸਕਦਾ ਹੈ ਕਿ ਕੌਮ ਵਿੱਚ 1970 ਤੋਂ 1990 ਦੇ ਦਹਾਕਿਆਂ ਦੌਰਾਨ ਹੋਏ ਸਿੱਖਾਂ ਦੇ ਕਤਲੇਆਮ ਪ੍ਰਤੀ ਭਾਰੀ ਰੋਹ ਹੈ ਅਤੇ ਸਮੁਚੀ ਕੌਮ ਪੰਥ ਦੋਖੀਆਂ ਨੂੰ ਢੁਕਵੀਆਂ ਸਜਾਵਾਂ ਦਵਾਉਣ ਲਈ ਤਤਪਰ ਹੈ ਅਤੇ ਰਹੇਗੀ।ਉਹਨਾਂ ਕਿਹਾਂ ਸ਼੍ਰੋਮਣੀ ਕਮੇਟੀ ਅਤੇ ਮੌਜੂਦਾ ਅਖੌਤੀ ਪੰਥਕ ਬਾਦਲ/ਭਾਜਪਾ ਸਰਕਾਰ ਵਲੋਂ ਪੰਜਾਬ ਬੰਦ ਦੇ ਸੱਦੇ ਦਾ ਬਾਇਕਾਟ ਕਰਨਾ ਇਹ ਸਾਬਿਤ ਕਰਦਾ ਹੈ ਕਿ ਵਿਕ ਚੁੱਕੇ ਇਹ ਅਖੌਤੀ ਅਕਾਲੀ ਕੌੰਮ ਪ੍ਰਤੀ ਬਣਦੀਆਂ ਆਪਣੀਆਂ ਜਿੰਮੇਵਾਰੀਆਂ ਤੋਂ ਕਿਂਵੇ ਮੂੰਹ ਮੋੜੀ ਬੈਠੇ ਹਨ।ਕੌਮ ਇਹ ਭਲੀ ਭਾਂਤ ਜਾਣਦੀ ਹੈ ਕਿ ਅੱਜ ਤਕ ਕੌਮ ਹੱਕ ਵਿੱਚ ਅਰੰਭੇ ਗਏ ਕਿਸੇ ਵੀ ਮੋਰਚੇ ਨੂੰ ਇਹਨਾਂ ਅਖੌਤੀ ਅਕਾਲੀਆਂ ਨੇ ਸਰ ਨਹੀ ਕੀਤਾ ਪਰ ਕੌਮ ਦੀਆਂ ਜੜ੍ਹਾਂ ਵਿੱਚ ਬੈਠੇ ਝੂਠੇ ਸੌਦੇ ਸਾਧ ਵਰਗਿਆਂ ਦੋਖੀਆਂ ਨਾਲ ਇਹਨਾ ਦੀ ਗਲਵਕੜੀ ਹੋਰ ਵੀ ਮਜਬੂਤ ਹੋ ਰਹੀ ਹੈ। ਉਹਨਾਂ ਕਿਹਾ ਕਿ ਅਗਰ ਹਰ ਸਿੱਖ, ਹਰ ਪੰਥਕ ਸੋਚ ਤੇ ਪਹਿਰਾ ਦੇ ਰਹੀ ਜਥੇਬੰਦੀ, ਹਰ ਸੰਪਰਦਾ ਇਸੇ ਤਰਾਂ ਇਕ ਜੁੱਟ ਹੋ ਪੰਥ ਦੀ ਅਵਾਜ ਨੂੰ ਬੁਲੰਦ ਕਰਦੀ ਰਹੀ ਤਾਂ ਦੁਨੀਆਂ ਦੀ ਕੋਈ ਤਾਕਤ ਸਿੱਖਾਂ ਨੂੰ ਗੁਲਾਮ ਨਹੀ ਕਰ ਸਕਦੀ। ਮੌਜੂਦਾ ਸਰਕਾਰ ਨੂੰ ਤਾੜਨਾ ਦਿੰਦਿਆ ਕੌਮ ਦੇ ਗੁਨਾਹਗਾਰਾਂ ਨੂੰ ਉਹਨਾਂ ਦੀਆਂ ਬਣਦੀਆਂ ਸਜਾਵਾਂ ਦੇਣ ਦੀ ਮੰਗ ਕਰਦਿਆਂ ਉਹਨਾਂ ਕਿਹਾ ਕਿ ਅਗਰ ਇਸ ਸਬੰਧੀ ਸਰਕਾਰ ਨੇ ਕੋਈ ਠੋਸ ਨਿਰਣਾਂ ਨਾ ਲਿਆ ਤਾਂ ਕੌਮ ਖੁਦ ਨਿਆਂ ਲੈਣ ਦੇ ਸਮਰੱਥ ਹੈ।

ਕਲਗੀਧਰ ਸੇਵਕ ਜੱਥਾ (ਰਜ਼ਿ) ਵਲੋ ਮਿਟੀ ਧੁੰਧ ਜਾਗਿ ਚਾਨਣ ਹੋਆ ਗੁਰਸ਼ਬਦ ਸਮਾਗਮ

ਧੰਨ ਧੰਨ ਸਾਹਿਬ ਸ੍ਰੀ ਗੁਰੂ ਨਾਨਕ ਦੇਵ ਦੇ ਪ੍ਰਕਾਸ਼ ਪੁਰਬ ਦੇ ਸਬੰਧ ਵਿਚ ਸਮੂੰਹ ਸਾਧ ਸਗਤ ਅਤੇ ਕਲਗੀਧਰ ਸੇਵਕ ਜੱਥਾ (ਰਜ਼ਿ) ਵਲੋ ਮਿਟੀ ਧੁੰਧ ਜਾਗਿ ਚਾਨਣ ਹੋਆ ਗੁਰਸ਼ਬਦ ਸਮਾਗਮ ਗੁਰਦੁਆਰਾ ਸ੍ਰੀ ਅੰਬ ਸਾਹਿਬ, ਫੇਸ 8, ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ ਵਿਖ ਸ਼ਾਮ 5 ਵਜੇ ਤੋਂ ਰਾਤ 10 ਵਜੇ ਤੱਕ ਕਰਵਾਇਆ ਜਾ ਰਿਹਾ ਹੈ। ਜਤਿੰਦਰ ਪਾਲ ਸਿੰਘ (ਜੇ ਪੀ ਪ੍ਰਧਾਨ ਕਲਗੀਧਰ ਸੇਵਕ ਜੱਥਾ ਨੇ ਦਸਿਆ ਕਿ ਇਸ ਵਿੱਚ ਭਾਈ ਸੁਰਜੀਤ ਸਿੰਘ ਜੀ ਹਜ਼ੂਰੀ ਰਾਗੀ ਗੁ: ਅੰਬ ਸਾਹਿਬ, ਭਾਈ ਨਿਰਮਲ ਸਿੰਘ ਜੀ ਅੰਮ੍ਰਿਤਸਰ ਵਾਲੇ, ਭਾਈ ਜਗਤਾਰ ਸਿੰਘ ਜੀ ਹਜ਼ੂਰੀ ਰਾਗੀ ਸ਼੍ਰੀ ਹਰਿਮੰਦਰ ਸਾਹਿਬ, ਅੰਮ੍ਰਿਤਸਰ, ਜੱਥੇਦਾਰ ਗੁਰਪ੍ਰਤਾਪ ਸਿੰਘ ਜੀ ਰਿਆੜ (ਮੈਂਬਰ ਸ੍ਰੋ ਭਾਈ ਸਤਿੰਦਰਪਾਲ ਸਿੰਘ ਜੀ ਲੁਧਿਆਣੇ ਵਾਲੇ ਗੁਰਬਾਣੀ ਕੀਰਤਨ ਅਤੇ ਗੁਰੂ ਜਸ ਸੁਣਾ ਸੰਗਤਾਂ ਨੂੰ ਗੁਰੂ ਸ਼ਬਦ ਨਾਲ ਜੋੜਣਗੇ।ਨਾਲਜੋੜਣਗੇ।

ਨਨਕਾਣਾ ਸਾਹਿਬ ਵਿਖੇ ਪ੍ਰਕਾਸ਼ ਉਤਸਵ ਸ਼ਰਧਾ ਉਤਸ਼ਾਹ ਤੇ ਸਤਿਕਾਰ ਨਾਲ ਮਨਾਇਆ ।

ਪਾਕਿਸਤਾਨ (ਬਲਵਿੰਦਰਪਾਲ ਸਿੰਘ ਖ਼ਾਲਸਾ) ਪਾਕਿਸਤਾਨ ਦੇ ਅੰਦਰੂਨੀ ਹਾਲਾਤ ਠੀਕ ਨਾ ਹੋਣ ਦੇ ਬਾਵਜੂਦ ਵੀ ਦੇਸ਼-ਵਿਦੇਸ਼ ਤੋਂ ਨਨਕਾਣਾ ਸਾਹਿਬ ਪਹੁੰਚੇ ਹਜ਼ਾਰਾਂ ਸਿੱਖ ਸ਼ਰਧਾਲੂਆਂ ਨੇ ਬੜੇ ਉਤਸ਼ਾਹ, ਸ਼ਰਧਾ ਤੇ ਸਤਿਕਾਰ ਨਾਲ ਸਿੱਖ ਧਰਮ ਦੇ ਬਾਨੀ, ਪਹਿਲੇ ਪਾਤਸ਼ਾਹ ਸਾਹਿਬ ਸ੍ਰੀ ਗੁਰੂ ਨਾਨਕ ਸਾਹਿਬ ਦਾ 540ਵਾਂ ਪ੍ਰਕਾਸ਼ ਉਤਸਵ ਮਨਾਇਆ ਗਿਆ।
ਭਾਰਤੀ ਸਰਕਾਰ ਦੁਆਰਾ ਸਿੱਖਾਂ ਨੂੰ ਪਾਕਿਸਤਾਨ ਨਾ ਜਾਣ ਦੀ ਦਿੱਤੀ ਸਲਾਹ ਦੇ ਬਾਵਜੂਦ ਵੀ ਦੋ ਹਜ਼ਾਰ ਤੋਂ ਜ਼ਿਆਦਾ ਸਿੱਖ ਸੰਗਤਾਂ ਬੱਸਾਂ ਤੇ ਰੇਲਾਂ ਰਾਹੀਂ ਗੁਰਪੁਰਬ ਮਨਾਉਣ ਪਹੁੰਚੀਆਂ। ਇਸ ਤੋਂ ਇਲਾਵਾ, ਅਮਰੀਕਾ, ਕੈਨੇਡਾ, ਇੰਗਲੈਂਡ, ਫ਼ਰਾਂਸ, ਸਪੇਨ, ਨਿਊਜ਼ੀਲੈਂਡ, ਆਸਟਰੇਲੀਆ, ਇਟਲੀ, ਦੁਬਈ, ਅਫ਼ਗਾਨਿਸਤਾਨ, ਇਰਾਨ ਆਦਿ ਦੇਸ਼ਾਂ ਤੋਂ ਭਰਵੀਆਂ ਸਿੱਖ ਸੰਗਤਾਂ ਪਹੁੰਚੀਆਂ। ਪਾਕਿਸਤਾਨ ਦੇ ਸੂਬੇ ਸਿੰਧ, ਬਲੋਚਿਸਤਾਨ, ਪੰਜਾਬ ਤੇ ਇਲਾਕਾ ਗੈਰ ਤੋਂ ਵੀ ਭਾਰੀ ਸਿੱਖ ਸੰਗਤਾਂ ਦੀ ਸ਼ਮੂਲੀਅਤ ਨਾਲ ਗੁਰਪੁਰਬ ਮਨਾਉਣ ਵਾਲਿਆਂ ਦੀ ਗਿਣਤੀ 15 ਹਜ਼ਾਰ ਤੱਕ ਪਹੁੰਚ ਗਈ।
ਦਿੱਲੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ, ਐਸ.ਜੀ.ਪੀ.ਸੀ. ਹਰਿਆਣਾ ਸਿੱਖ ਸੁਸਾਇਟੀ, ਖ਼ਾਲੜਾ ਮਿਸ਼ਨ, ਸਾਈਂ ਮੀਆਂ ਮੀਰ ਸੰਸਥਾ, ਭਾਈ ਮਰਦਾਨਾ ਜੀ ਸੰਸਥਾ, ਬਾਬਾ ਸੇਵਾ ਸਿੰਘ-ਬਾਬਾ ਜਗਤਾਰ ਸਿੰਘ ਕਾਰ ਸੇਵਾ ਸੰਸਥਾਵਾਂ, ਅਮਰੀਕਨ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਤੇ ਦਲ ਖ਼ਾਲਸਾ ਇੰਗਲੈਂਡ ਵਾਲਿਆਂ ਦੇ ਉਤਸ਼ਾਹੀ ਜਥਿਆਂ ਨੇ ਨਨਕਾਣਾ ਸਾਹਿਬ ਦੀ ਧਰਤੀ ਨੂੰ ਸਿੱਖ ਸੰਗਤਾਂ ਨਾਲ ਭਰ ਦਿਤਾ ਜਿਸ ਕਰਕੇ ਪ੍ਰਕਾਸ਼ ਉਤਸਵ ਦੀ ਖ਼ੁਸ਼ੀ ਵਿਚ ਨਿਕਲਣ ਵਾਲੇ ਨਗਰ ਕੀਰਤਨ ਲਈ ਬੇਹੱਦ ਰੌਣਕ ਸੀ, ਜੋ ਇਤਿਹਾਸਕ ਗੁਰਦੁਆਰਾ ਸਾਹਿਬ ਦੇ ਵਡੇ ਚੌਗਿਰਦੇ ਵਿਚ ਕਢਿਆ ਗਿਆ।
ਸੁਰਖਿਆ ਪੱਖੋਂ ਪਾਕਿਸਤਾਨ ਸਰਕਾਰ ਨੇ ਬੇਹੱਦ ਮਜ਼ਬੂਤ ਪ੍ਰਬੰਧ ਕੀਤੇ ਹੋਏ ਸਨ, ਕਿਉਂਕਿ ਉਹ ਕਿਸੇ ਵੀ ਕਿਸਮ ਦਾ ਖ਼ਤਰਾ ਮੁੱਲ ਲੈਣ ਲਈ ਤਿਆਰ ਨਹੀਂ ਸਨ। ਹਰ ਥਾਂ ਪੁਲਿਸ, ਰੇਂਜਰਜ਼, ਕਮਾਂਡੋ ਦਸਤਿਆਂ ਦਾ ਜਾਲ ਵਿਛਿਆ ਹੋਇਆ ਸੀ। ਕਿਸੇ ਥਾਂ ਵੀ ਡਰ ਦਾ ਮਾਹੌਲ ਨਹੀਂ ਪਾਇਆ ਗਿਆ।
ਗੁਰਦੁਆਰਾ ਸਾਹਿਬ ਦੇ ਦੀਵਾਨ ਹਾਲ ਵਿਚ ਪਾਕਿਸਤਾਨ ਇਵੈਕਿਊ ਟਰਸਟ ਪ੍ਰਾਪਰਟੀ ਬੋਰਡ ਦੇ ਚੇਅਰਮੈਨ ਜਨਾਬ ਆਸਿਫ਼ ਹਾਸ਼ਮੀ, ਬੋਰਡ ਦੇ ਵਧੀਕ ਸੱਕਤਰ ਖੁਰਮ ਸਦੀਕੀ, ਏ.ਜੀ.ਪੀ.ਸੀ ਦੇ ਕੋ ਆਰਡੀਨੇਟਰ ਡਾਕਟਰ ਪ੍ਰਿਤਪਾਲ ਸਿੰਘ, ਦਲ ਖ਼ਾਲਸਾ ਇੰਗਲੈਂਡ ਮਨਮੋਹਨ ਸਿੰਘ, ਡਾਕਟਰ ਸਵਰਨ ਸਿੰਘ ਸਾਬਕਾ ਪ੍ਰਧਾਨ ਗੁਰਦੁਆਰ ਪ੍ਰਬੰਧਕ ਕਮੇਟੀ, ਸ਼ਾਮ ਸਿੰਘ, ਬਿਸ਼ਨ ਸਿੰਘ, ਸਈਅਦ ਫ਼ਰਾਜ਼ ਅਬਾਸ ਉਪ ਸੱਕਤਰ ਧਾਰਮਿਕ ਮਹਿਕਮਾ ਪਾਕਿਸਤਾਨ, ਬਲਵਿੰਦਰ ਸਿੰਘ ਝਬਾਲ ਆਦਿ ਨੇ ਸੰਬੋਧਨ ਕੀਤਾ। ਜਨਾਬ ਹਾਸ਼ਮੀ ਹੁਰਾਂ ਕਿਹਾ ਕਿ ਪਾਕਿਸਤਾਨ ਸਰਕਾਰ ਸਿੱਖ ਕੌਮ ਦੀਆਂ ਸਾਰੀਆਂ ਹੱਕੀ-ਮੰਗਾਂ ਨੂੰ ਪੂਰਿਆਂ ਕਰਨ ਦੀ ਪੁਰਜ਼ੋਰ ਕੋਸ਼ਿਸ਼ ਕਰ ਰਹੀ ਹੈ। ਡਾ: ਪ੍ਰਿਤਪਾਲ ਸਿੰਘ ਤੇ ਹੋਰ ਸਿੱਖ ਬੁਲਾਰਿਆਂ ਨੇ ਪਾਕਿਸਤਾਨ ਸਰਕਾਰ ਦਾ ਸੁਰਖਿਆ ਪ੍ਰਬੰਧਾਂ ਲਈ ਬੇਹੱਦ ਧੰਨਵਾਦ ਕੀਤਾ। ਵਾਘਾ ਬਾਰਡਰ ਭਾਰਤ ਵਾਲੇ ਪਾਸੇ ਤੋਂ ਆਉਣ ਵਾਲੇ ਸਿੱਖ ਸ਼ਰਧਾਲੂਆਂ ਨੂੰ ਜਦੋਂ ਸਰਕਾਰੀ ਅਧਿਕਾਰੀਆਂ ਵੱਲੋਂ ਇਹ ਕਿਹਾ ਜਾਂਦਾ ਕਿ ਜੇ ਤੁਹਾਨੂੰ ਉਥੇ ਕੁਝ ਹੋ ਗਿਆ ਤਾਂ ?? ਜਵਾਬ ਵਿਚ ਸਿੱਖ ਸ਼ਰਧਾਲੂ ਇਹ ਕਹਿੰਦੇ ਕਿ ਜੇ ਜਾਨ ਨਨਕਾਣਾ ਸਾਹਿਬ ਦੀ ਪਵਿਤਰ ਧਰਤੀ ਤੇ ਨਿਕਲ ਜਾਵੇ ਤਾਂ ਹੋਰ ਕੀ ਚਾਹੀਦੈ।

ਗੁਰਗੱਦੀ ਦਿਵਸ ਤੇ ਯੂਬਾ ਸਿਟੀ ਵਿੱਚ ਰਿਕਾਰਡ ਤੋੜ ਇੱਕਠ

ਯੂਬਾ ਸਿਟੀ-ਕੈਲੇਫੋਨਰੀਆ (ਬਲਵਿੰਦਰਪਾਲ ਸਿੰਘ ਖ਼ਾਲਸਾ) ਪੈਗ਼ੰਬਰਾਂ ਦੇ ਸ਼ਹਿਨਸ਼ਾਹ, ਸਾਹਿਬ ਸ੍ਰੀ ਗੁਰੂ ਗੋਬਿੰਦ ਸਿੰਘ ਸਾਹਿਬ ਨੇ ਆਪਣੇ ਤੋਂ ਬਾਅਦ ਗੁਰਿਆਈ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਨੂੰ ਸੌਂਪ ਕੇ ਸਰੀਰਕ ਰੂਪ ਦਾ ਸਦਾ ਵਾਸਤੇ ਭੋਗ ਪਾ ਦਿਤਾ ਤੇ ਖ਼ਾਲਸਾ ਪੰਥ ਨੂੰ ਰੱਬੀ ਆਵਾਜ਼ ਸ਼ਬਦ -ਨਾਦ ਨਾਲ ਜੋੜ ਦਿਤਾ, ਜਿਸ ਕਰਕੇ 1708 ਤੋਂ ਲੈ ਕੇ ਅੱਜ ਤੱਕ ਹਰ ਸਾਲ ਗੁਰਗੱਦੀ ਦਿਵਸ ਬੜੇ ਰੂਹਾਨੀ ਤੇ ਖ਼ੁਸ਼ੀਆਂ ਭਰੇ ਮਾਹੌਲ ਵਿਚ ਮਨਾਇਆ ਜਾਂਦਾ ਹੈ।
ਅਮਰੀਕਾ ਦੇ ਕੈਲੇਫ਼ੋਨਰੀਆ ਸੂਬੇ ਵਿਚਲੇ ਯੂਬਾ ਸਿਟੀ ਸ਼ਹਿਰ ਵਿਚ ਵੀ ਪਿਛਲੇ ਤੀਹਾਂ ਵਰਿਆਂ ਤੋਂ ਇਹ ਦਿਨ ਹਰ ਸਾਲ ਨਗਰ ਕੀਰਤਨ ਤੇ ਦੀਵਾਨਾਂ ਰਾਹੀਂ ਬੜੇ ਚਾਅ ਤੇ ਸ਼ਰਧਾ ਨਾਲ ਮਨਾਇਆਂ ਜਾਂਦਾ ਹੈ। ਇਸ ਵਾਰ ਦੇ ਗੁਰਗੱਦੀ ਦਿਵਸ ਵਿਚ ਸ਼ਾਮਲ ਸੰਗਤਾਂ ਨੇ ਪਿਛਲੇ ਸਾਲਾਂ ਦੇ ਰਿਕਾਰਡ ਨੂੰ ਮਾਤ ਪਾ ਦਿਤਾ। ਪੁਲਿਸ ਵੀ ਸੰਗਤਾਂ ਦੇ ਇੱਕਠ ਤੋਂ ਹੈਰਾਨ ਪਰੇਸ਼ਾਨ ਸੀ, ਕਿਉਂਕਿ ਉਸਦਾ ਕੰਮ ਵਧ ਗਿਆ ਸੀ।
ਹੈਲੀਕਾਪਟਰਾਂ ਦੁਆਰਾ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਉਤੇ ਫ਼ੁੱਲਾਂ ਦੀ ਵਰਖਾ ਵੱਖਰਾ ਹੀ ਵਜਦ ਪੈਦਾ ਕਰ ਰਹੀ ਸੀ। ਕੈਲੇਫ਼ੋਰਨੀਆ ਗਤਕਾ ਦਲ ਦੇ ਵਡੇ ਅਖਾੜੇ ਨੇ ਇਕ ਵਖਰਾ ਹੀ ਮਾਹੌਲ ਪੈਦਾ ਕੀਤਾ ਹੋਇਆ ਸੀ। ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਤੋਂ ਬਾਅਦ ਸੰਗਤਾਂ ਦਾ ਸਭ ਤੋਂ ਜ਼ਿਆਦਾ ਇੱਕਠ ਗਤਕਾ ਵੇਖਣ ਵਾਲਿਆਂ ਨੂੰ ਘੇਰੀ ਬੈਠਾ ਸੀ ਜਿਥੇ ਢਾਲਾਂ ਤੇ ਵਜੱਦੀਆਂ ਕਿਰਪਾਨਾਂ, ਲਿਸ਼ਕਦੇ ਖੰਡਿਆਂ ਦੀ ਗੜਗੜਾਹਟ ਤੇ ਡਾਂਗਾਂ ਦੀ ਸ਼ੂਕ, ਜੰਗੀ ਮਾਹੌਲ ਸਿਰਜ ਰਹੀ ਸੀ। ਗਤਕੇ ਦੇ ਮਾਹਿਰ ਗਤਕਾ ਜਥੇਦਾਰਾਂ ਵਿਚ, ਜਥੇਦਾਰ ਜਸਪ੍ਰੀਤ ਸਿੰਘ ਲਵਲਾ, ਬਲਜੀਤ ਸਿੰਘ, ਹਰਪ੍ਰੀਤ ਸਿੰਘ, ਅੰਮ੍ਰਿਤ ਸਿੰਘ, ਰਾਜ ਸਿੰਘ, ਪੁਨੀਤ ਕੌਰ ਖ਼ਾਲਸਾ ਤੇ ਕੈਨੇਡਾ ਤੋਂ ਜਸਦੇਵ ਸਿੰਘ ,ਤੇਗਬੀਰ ਸਿੰਘ,ਨਵਦੀਪ ਸਿੰਘ ਤੇ ਹੋਰ ਕਈ ਸਿੰਘ ਸਰੀ ਕਨੈਡਾ ਤੇ ਜਥੇਦਾਰ ਸਤਿਨਾਮ ਸਿੰਘ ਦਾ ਭਜੰਗੀ ਰਾਣਾ ਸਿੰਘ ਸਿਆਟਲ ਤੋ ਸਾਮਲ ਹੋਏ
ਖ਼ਾਲਿਸਤਾਨ ਦੇ ਸ਼ਹੀਦਾਂ ਦੀਆਂ ਝਾਕੀਆਂ ਉਨਾਂ ਦੀ ਕੁਰਬਾਨੀ ਨੂੰ ਸਿਜਦਾ ਕਰਨ ਲਈ ਮਜਬੂਰ ਕਰ ਰਹੀਆਂ ਸਨ। ਸੰਤ ਜਰਨੈਲ ਸਿੰਘ ਜੀ ਖ਼ਾਲਸਾ ਭਿੰਡਰਾਂਵਲਿਆਂ ਦੀਆਂ ਤਸਵੀਰਾਂ ਤੇ ਵਡੇ ਪੋਸਟਰਾਂ ਨੇ ਉਨਾਂ ਦੀਆਂ ਪੈੜਾਂ ਦੇ ਨਿਸ਼ਾਨਾਂ ਦੀ ਭਰਵੀਂ ਗਵਾਹੀ ਦਿਤੀ। ਬਾਸ ਇੰਗਲੈਂਡ ਵਾਲਿਆਂ ਦੇ ਖ਼ਾਲਿਸਤਾਨੀ ਸ਼ਹੀਦੀ ਗੀਤਾਂ ਤੇ ਵਾਰਾਂ ਨੇ ਸਾਰਾ ਮਾਹੌਲ ਹੀ ਖ਼ਾਲਿਸਤਾਨੀ ਬਣਾ ਦਿਤਾ ਸੀ। ਹਰ ਫ਼ਲੋਟ ਤੇ ਸਿੱਖ ਸੂਰਮਗਤੀ ਦੇ ਗੀਤ ਵੱਜ ਰਹੇ ਸਨ। ਬਿਨਾ ਸ਼ੱਕ ਗੁਰਬਾਣੀ ਦੇ ਮਧੁਰ ਨਾਦ ਨੇ ਨਗਰ ਕੀਰਤਨ ਦੌਰਾਨ ਸਾਰੇ ਆਲੇ ਦੁਆਲੇ ਨੂੰ ਇਕ ਵੱਖਰੀ ਹੀ ਅਨੰਦ ਪੈਦਾ ਕਰ ਦਿਤਾ। ਜੈਕਾਰੇ ਤੇ ਨਾਹਰੇ ਲਗਾਤਾਰ ਗੂੰਜਦੇ ਰਹੇ। ਅਮਰੀਕਾ ਦੀ ਹਰ ਜਥੇਬੰਦੀ ਤੇ ਦਲ ਹਾਜ਼ਰ ਸੀ।
ਇੱਥੋ ਤੱਕ ਕਿ ਸਿੱਖ ਸਿਧਾਂਤਾਂ ਦੇ ਵਿਰੋਧ ਵਿਚ ਉਤਰ ਆਉਣ ਵਾਲੀ ਅਕਾਲੀ ਪਾਰਟੀ ਵੀ ਇਸ ਵਾਰ ਸ਼ਾਮਲ ਸੀ ਜਿਸ ਵਿਚ ਖ਼ਾਲਿਸਤਾਨ ਦੇ ਨਾਮ ਤੇ ਅਮਰੀਕਾ ਵਿਚ ਰਾਜਨੀਤਕ ਸ਼ਰਨ ਲੈ ਕੇ ਪੱਕੇ ਹੋਣ ਵਾਲੇ ਅਤੇਖ਼ਾਲਿਸਤਾਨ ਲਈ ਜਾਨਾਂ ਵਾਰਨ ਵਾਲਿਆਂ ਦੇ ਪਵਿੱਤਰ ਲਹੂ ਨਾਲ ਸੌਦਾ ਕਰਨ ਵਾਲੇ ਕੁਝ ਕੁਰਾਹੇ ਪਏ ਅਕ੍ਰਿਤਘਣ ਵੀ ਸ਼ਾਮਲ ਸਨ।
ਓਧਰ, ਸੰਗਤਾਂ ਦੀ ਸੇਵਾ ਕਰਨ ਵਾਲਿਆਂ ਨੇ ਇਸ ਵਾਰ ਕਮਾਲ ਹੀ ਕਰ ਦਿਤੀ। ਸੰਗਤਾਂ ਲਈ ਗੰਨੇ ਤੇ ਸੰਤਰਿਆਂ ਦਾ ਤਾਜ਼ਾ ਰੱਸ ਮਿਲ ਰਿਹਾ ਸੀ। ਤਾਜ਼ੀ ਬਰਫ਼ੀ, ਗਰਮ ਗਜਰੇਲਾ, ਸਮੋਸੇ, ਟਿੱਕੀਆਂ, ਛੋਲੇ ਭਠੂਰੇ, ਸਾਗ, ਦਹੀਂ ਤੇ ਮਕਈ ਦੀਆਂ ਰੋਟੀਆਂ, ਚਾਟ, ਦਹੀਂ ਭੱਲੇ, ਗਰਮ ਭੁੱਜੀਆਂ ਛੱਲੀਆਂ ਤੇ ਉਬਲੀ ਹੋਈ ਮਸਾਲੇਦਾਰ ਸ਼ਕਰਕੰਦ, ਕਚਾਲੂ, ਪੂੜੀਆਂ, ਭੁੱਜੇ ਮਕਈ ਦੇ ਦਾਣੇ, ਕੁਲਫ਼ੀਆਂ, ਆਈਸ ਕਰੀਮ, ਹਰ ਤਰਾਂ ਦੇ ਠੰਡੇ ਤੇ ਕੈਨ ਜੂਸ ਹਾਜ਼ਰ ਸੀ। ਠੰਢਾ ਪਾਣੀ ਤਾਂ ਹਰ ਥਾਂ ਹੀ ਮਿਲ ਰਿਹਾ ਸੀ। ਲਾਚੀਆਂ ਤੇ ਅਧਰਕ ਵਾਲੀ ਗਰਮ ਚਾਹ, ਦੁੱਧ-ਬਦਾਮ, ਰੂਹ ਅਫ਼ਜ਼ਾ ਤੇ ਸੁੱਕੇ ਬਾਦਾਮ ਹਾਜ਼ਰ ਸਨ। ਰਾਹ ਰੋਕ ਕੇ ਸੇਵਾ ਹੋ ਰਹੀ ਸੀ। ਸਰੀਰਕ ਲੰਗਰਾਂ ਦੇ ਨਾਲ ਹੀ ਗਿਆਨ ਦੇ ਲੰਗਰ ਲਈ ਕਿਤਾਬਾਂ ਮਿਲ ਰਹੀਆਂ ਸਨ। ਸੀ.ਡੀਆਂ, ਕੰਬਲਾਂ ਤੇ ਪੰਜਾਬੀ ਸੂਟਾਂ ਤੇ ਪੰਜਾਬ ਦੇ ਇਤਿਹਾਸ ਨਾਲ ਸੰਬਧਿਤ ਤਸਵੀਰਾਂ ਮਿਲ ਰਹੀਆਂ ਸਨ। ਵਾਸ਼ਿੰਗਟਨ ਡੀ.ਸੀ. ਤੋਂ ਨੌਜਵਾਨ ਸਿੰਘ ਕਮੀਜ਼ਾਂ ਤੇ ਜੈਕਟਾਂ ਵੇਚਣ ਆਏ ਹੋਏ ਸਨ ਜਿਨਾਂ ਉਤੇ ਸਿੱਖ ਪ੍ਰੇਰਨਾ ਦੇ ਸੰਦੇਸ਼ ਲਿਖੇ ਹੋਏ ਸਨ ਤੇ ਜਿਨਾਂ ਦੀ ਵਿਕਰੀ ਬੜੇ ਜ਼ੋਰਾਂ ਸ਼ੋਰਾਂ ਨਾਲ ਹੋ ਰਹੀ ਸੀ।
ਸੰਗਤਾਂ ਦਾ ਠਾਠਾਂ ਮਾਰਦਾ ਸਮੁੰਦਰ ਜਾਪਦਾ ਸੀ ਯੂਬਾ ਸਿਟੀ। ਏਡੇ ਵਡੇ ਸੰਗਤਾਂ ਦੇ ਹੜ ਬੇਕਾਬੂ ਹੋਏ ਹੋਏ ਵੀ ਬੜੇ ਅਨੁਸ਼ਾਸਨ ਵਿਚ ਸਨ। ਅਮਰੀਕੀ ਤੇ ਪੰਜਾਬੀ ਮੀਡੀਆ ਛਾਇਆ ਹੋਇਆ ਸੀ। ਨਗਰ ਕੀਰਤਨ ਦੀ ਸਮਾਪਤੀ ਤੇ ਗਤਕੇ ਵਾਲੇ ਸਿੰਘਾਂ-ਸਿੰਘਣੀਆਂ ਨੇ ਆਖ਼ਰੀ ਅਖਾੜੇ ਲਈ ਢੋਲ ਦੇ ਡਗ਼ੇ ਨਾਲ ਹਥਿਆਰਾਂ ਦੀ ਜੰਗ ਦੇ ਚੰਗੇ ਜ਼ੌਹਰ ਵਿਖਾਏ। ਨਗਰ ਕੀਰਤਨ ਦੀ ਸਮਾਪਤੀ ਤੇ ਅਰਦਾਸ ਹੋਈ ਤੇ ਇੰਜ ਇਹ ਨਗਰ ਕੀਰਤਨ ਅਗਲੇ ਸਾਲ ਵਾਸਤੇ ਫ਼ਿਰ ਜੁੜਨ ਲਈ ਸਮਾਪਤ ਹੋ ਗਿਆ।