ਹਿਊਸਟਨ-ਟੈਕਸਸ (ਹਰਦੀਪ ਸਿੰਘ) ਜੂਨ 13 ਦਿਨ ਐਤਵਾਰ ਨੂੰ ਗੁਰਦੁਆਰਾ ਸਿੱਖ ਸੈਂਟਰ ਵਿਖੇ ਸੰਗਤ ਦੀ ਵਡੀ ਇਕਤ੍ਰਤਾ ਨੇ ਅਸਲ ਨਾਨਕਸ਼ਾਹੀ ਕੈਲੰਡਰ ਦੀ ਸੱਚਾਈ ਨੂੰ ਬਣਾਈ ਰਖਣ ਲਈ ਅਮਰੀਕਨ ਗੁਰਦੁਆਰਾ ਪ੍ਰਬੰਧਕ ਕਮੇਟੀ, ਹੋਰ ਗੁਰਦੁਆਰਾ ਪ੍ਰਬੰਧਕ ਕਮੇਟੀਆਂ, ਸਿੱਖ ਜਥੇਬੰਦੀਆਂ, ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਸਾਬਕਾ ਜਥੇਦਾਰ, ਖ਼ਾਲਿਸਤਾਨ ਅਫ਼ੇਅਰਜ਼ ਸੈਂਟਰ ਤੇ ਹੋਰ ਸਿੱਖ ਆਗੂਆਂ ਦੀ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ ਹਜ਼ੂਰੀ ਵਿਚ ਕਰਵਾਈ ਸਮਾਗਮ-ਵਿਚਾਰ ਗੋਸ਼ਟੀ ਹਿਊਸਟਨ ਦੀ ਧਰਤੀ ਉਪੱਰ ਇਕ ਇਤਿਹਾਸਕ ਇਕੱਠ ਹੋ ਨਿਬੜੀ। ਤਿੰਨ ਘੰਟੇ ਦੇ ਸਰਗਰਮ ਸਮਾਗਮ ਵਿਚ ਵੱਖ ਵੱਖ ਬੁਲਾਰਿਆਂ ਨੂੰ ਸੰਗਤਾਂ ਵੱਲੋਂ ਬੜੇ ਸ਼ਾਂਤ ਚਿੱਤ ਨਾਲ ਸੁਨਣਾ ਇਸ ਗੱਲ ਦੀ ਗਵਾਹੀ ਭਰਦਾ ਹੈ ਕਿ ਅਮਰੀਕੀ ਧਰਤੀ ਤੇ ਵੱਸਦਾ ਖ਼ਾਲਸਾ ਬਾਜ਼ ਵਾਲੀ ਅੱਖ ਨਾਲ ਹਰ ਉਸ ਗਤੀਵਿਧੀ ਨੂੰ ਬੜੇ ਗਹੁ ਨਾਲ ਵਾਚਦਾ ਹੈ ਜਿਹੜੀ ਸਿੱਖੀ ਦੇ ਨਿਆਰੇਪਣ ਨੂੰ ਮਾਰ ਮੁਕਾਉਣ ਲਈ ਹਰ ਵਕਤ ਤਤੱਪਰ ਹੈ।
ਹਫ਼ਤਾਵਾਰੀ ਰੱਬੀ ਬਾਣੀ ਦੇ ਕੀਰਤਨ ਤੋਂ ਬਾਅਦ ਏ.ਜੀ.ਪੀ.ਸੀ. ਦੇ ਕੋਆਰਡੀਨੇਟਰ ਡਾ: ਪ੍ਰਿਤਪਾਲ ਸਿੰਘ ਨੇ ਨਾਨਕਸ਼ਾਹੀ ਕੈਲੰਡਰ ਦੀ ਭੂਮਿਕਾ ਤੇ ਇਸਦੇ ਪਿਛੋਕੜ ਬਾਰੇ ਸੰਗਤਾਂ ਨੂੰ ਜਾਣੂੰ ਕਰਵਾਇਆ ਤੇ ਕੈਲੰਡਰ ਤੇ ਕਰਵਾਏ ਜਾ ਰਹੇ ਵਿਸ਼ੇਸ਼ ਸਮਾਗਮ ਦੀ ਰੂਪਰੇਖਾ ਸੰਗਤਾਂ ਨਾਲ ਸਾਂਝੀ ਕੀਤੀ। ਆਪਣੇ ਸੰਖੇਪ ਵੀਚਾਰਾਂ ਵਿਚ ਉਨਾਂ ਸਿੱਖ ਕੈਲੰਡਰ ਮਾਹਰ ਸ੍ਰ: ਪਾਲ ਸਿੰਘ ਪੁਰੇਵਾਲ ਦੁਆਰਾ ਤਿਆਰ ਕੀਤੇ ਅਤੇ ਪਾਕਿਸਤਾਨ 'ਚ ਲਾਗੂ ਹਿਜਰੀ ਕੈਲੰਡਰ ਬਾਰੇ ਵੀ ਭਰਪੂਰ ਜਾਣਕਾਰੀ ਦਿੱਤੀ।
ਇਸ ਸਮਾਗਮ ਦੇ ਵਿਸ਼ੇਸ਼ ਬੁਲਾਰੇ, ਨਾਨਕਸ਼ਾਹੀ ਜੰਤਰੀ ਦੇ ਰਚੇਤਾ ਸ੍ਰ: ਪਾਲ ਸਿੰਘ ਪੁਰੇਵਾਲ ਦੇ ਵਿਚਾਰਾਂ ਨੂੰ ਸੁਨਣ ਲਈ ਸੰਗਤਾਂ ਵਿਚ ਕਾਫ਼ੀ ਉਤਸ਼ਾਹ ਨਜ਼ਰ ਆਇਆ। ਆਪਣੇ ਵੀਚਾਰਾਂ 'ਚ ਸ੍ਰ: ਪੁਰੇਵਾਲ ਹੁਰਾਂ ਉਨਾਂ ਲੋੜਾਂ ਤੇ ਕਾਰਨਾਂ ਦਾ ਜ਼ਿਕਰ ਕੀਤਾ, ਜਿਨ੍ਹਾਂ ਕਰਕੇ ਸਿੱਖ ਕੌਮ ਨੂੰ ਆਪਣਾ ਕੈਲੰਡਰ ਬਣਾਉਣ ਦੀ ਲੋੜ ਪਈ। ਪੁਰਾਣੇ ਬਿਕਰਮੀ ਕੈਲੰਡਰ ਨਾਲ ਮਨਾਏ ਜਾਂਦੇ ਸਿੱਖਾਂ ਦੇ ਗੁਰਪੁਰਬ ਤੇ ਇਤਿਹਾਸਕ ਦਿਹਾੜੇ ਮਨਾਉਣ ਦੀ ਗੱਲ ਇੰਜ ਸੀ ਜਿਵੇਂ ਕੋਈ ਮੰਗਵੇਂ ਚੁੱਲ੍ਹੇ ਤੋਂ ਰੋਟੀਆਂ ਸੇਕ ਕੇ ਖਾ ਰਿਹਾ ਹੋਵੇ। ਪੁਰੇਵਾਲ ਹੁਰਾਂ ਅਖੌਤੀ ਸੰਤ ਸਮਾਜ ਦੀ ਉਸ ਮੰਗ ਕਿ ਕੈਲੰਡਰ ਵਿਚ ਸੋਧਾਂ ਪੰਥਕ ਏਕਤਾ ਵਾਸਤੇ ਕੀਤੀਆਂ ਗਈਆਂ ਹਨ ਨੂੰ ਸਿਰੇ ਤੋਂ ਨਕਾਰਦਿਆਂ ਹੋਇਆਂ ਆਖਿਆ ਕਿ ਕਿਉਂ ਨਹੀਂ ਦਮਦਮੀ ਟਕਸਾਲ ਤੇ ਹੋਰ ਸੰਤ ਸਮਾਜ ਨਾਨਕਸ਼ਾਹੀ ਕੈਲੰਡਰ ਨੂੰ ਮੰਨ ਕੇ ਏਕਤਾ ਦਾ ਸਬੂਤ ਦਿੰਦੇ। ਉਨਾਂ ਕੈਲੰਡਰ 'ਚ ਸ਼੍ਰੋਮਣੀ ਕਮੇਟੀ ਪ੍ਰਧਾਨ ਤੇ ਅਖੌਤੀ ਸੰਤ ਸਮਾਜ ਦੇ ਹਰਨਾਮ ਸਿੰਘ ਧੁੰਮੇ ਵੱਲੋਂ ਕੀਤੀਆਂ ਅਖੌਤੀ ਸੋਧਾਂ ਨੂੰ ਸਿੱਖ ਸਿਧਾਂਤਾਂ ਦੇ ਉਲਟ ਦੱਸਦਿਆਂ ਸ੍ਰ: ਪੁਰੇਵਾਲ ਨੇ ਸੰਗਤਾਂ ਨੂੰ ਦੱਸਿਆ ਕਿ ਕਿਵੇਂ ਅਖੌਤੀ ਸੋਧਾਂ ਕਰਨ ਵੇਲੇ ਉਨਾਂ ਨੂੰ (ਪੁਰੇਵਾਲ) ਨਜ਼ਰ ਅੰਦਾਜ਼ ਕੀਤਾ। ਉਨਾਂ ਇਕ ਗੱਲ ਖ਼ਾਸ ਤੌਰ ਤੇ ਦੱਸੀ ਕਿ ਕਿਵੇਂ ਕੈਲੰਡਰ ਦੀ ਸਟਡੀ ਕਰਨ ਦਾ ਕੰਮ ਉਨ੍ਹਾਂ 1950 ਦੇ ਲਾਗੇ ਚਾਗੇ ਸ਼ੁਰੂ ਕੀਤਾ।
ਇਸ ਤੋਂ ਬਾਅਦ ਨਾਨਕਸ਼ਾਹੀ ਕੈਲੰਡਰ ਦੀ ਸਥਾਪਤੀ ਬਾਰੇ ੧੧ ਮੈਂਬਰੀ ਕਮੇਟੀ ਦੇ ਕਨਵੀਨਰ ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ ਦੇ ਵਿਦਵਾਨ ਡਾਕਟਰ ਦਰਸ਼ਨ ਨੇ ਬੜੇ ਹੀ ਸੁਲਝੇ ਹੋਏ ਢੰਗ ਨਾਲ ਵਿਚਾਰ ਪੇਸ਼ ਕਰਦਿਆਂ ਸਿੱਖ ਕੌਮ ਨੂੰ ਡੇਰਾਵਾਦ, ਬਾਬਾ ਵਾਦ ਅਤੇ ਹੋਰ ਅਖੌਤੀ ਸੰਤਾਂ ਕੋਲੋਂ ਸਿੱਖਾਂ ਨੂੰ ਖ਼ਬਰਦਾਰ ਕੀਤਾ। ਉਨਾਂ ਸਿੱਖ ਸੰਗਤਾਂ ਨੂੰ ਅਪੀਲ ਕੀਤੀ ਕਿ ਮੌਜੂਦਾ ਮਹੰਤਾਂ ਨਾਲ ਸਖ਼ਤੀ ਨਾਲ ਨਿਪਟਿਆ ਜਾਵੇ। ਭਾਵਕ ਹੁੰਦਿਆਂ ਉਨਾਂ ਕਿਹਾ ਕਿ ਸਿੱਖ ਕੌਮ ਨੂੰ ਵਾਹਿਗੁਰੂ ਦਾ ਸ਼ੁਕਰ ਕਰਨਾ ਚਾਹੀਦਾ ਹੈ ਕਿ ਉਨਾਂ ਨੂੰ ਪਾਲ ਸਿੰਘ ਪੁਰੇਵਾਲ ਦੇ ਰੂਪ ਵਿਚ ਨਿਪੁੰਨ ਵਿਦਵਾਨ ਤੇ ਜ਼ਹੀਨ ਬੁੱਧੀ ਵਾਲਾ ਗੁਣਕਾਰੀ ਇਨਸਾਨ ਮਿਲਿਆ ਹੈ ਪਰ ਉਨਾਂ ਗਿਲਾ ਕੀਤਾ ਕਿ ਸਿੱਖਾਂ ਦੀਆਂ ਮੋਹਰੀ ਸੰਸਥਾਵਾਂ ਤੇ ਇਸਦੇ ਕਬਜ਼ਾ ਕਰੀ ਬੈਠੇ ਬ੍ਰਾਹਮਣਵਾਦੀ ਸੋਚ ਤੇ ਗ਼ੁਲਾਮ ਪ੍ਰਵਿਰਤੀ ਵਾਲੇ ਚੌਧਰੀਆਂ ਨੇ ਸ੍ਰ: ਪਾਲ ਸਿੰਘ ਪੁਰੇਵਾਲ ਦੀ ਕਦਰ ਨਹੀਂ ਪਾਈ ਤੇ ਅੰਤ ਆਪਣੇ ਸੌੜੇ ਨਿੱਜੀ ਹਿੱਤਾਂ ਕਾਰਨ ਉਹ ਆਰ.ਐਸ.ਐਸ ਦੇ ਹੱਥਾਂ ਵਿਚ ਖੇਡ ਗਏ। ਡਾਕਟਰ ਸਾਹਿਬ ਨੇ ਨਾਨਕਸ਼ਾਹੀ ਕੈਲੰਡਰ ਦੇ ਪਿਛੋਕੜ ਵਿਚਲੇ ਡੂੰਘੇ ਕਾਰਨਾਂ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਕੈਲੰਡਰ ਸਿੱਖ ਕੌਮ ਦੀ ਅੱਡਰੀ ਹਸਤੀ ਨੂੰ ਕਾਇਮ ਰੱਖਣ ਦਾ ਇਕ ਉਪਰਾਲਾ ਹੈ। ਉਨਾਂ ਸਾਫ਼ ਲਫ਼ਜ਼ਾਂ 'ਚ ਕਿਹਾ ਕਿ ਕੱਚੀ ਬਾਣੀ, ਕੱਚੀ ਬੋਲੀ, ਕੱਚਾ ਪਹਿਰਾਵਾ, ਕੱਚੇ ਸਾਜ਼ ਤੇ ਕੱਚੇ ਸਿੱਖਾਂ ਦੇ ਰੂਪ ਵਿਚ ਘੁੰਮ ਰਹੇ ਬਾਬਿਆਂ ਤੋਂ ਸੁਚੇਤ ਹੋਇਆ ਜਾਵੇ। ਆਪਣੇ ਵੀਚਾਰਾਂ ਦੇ ਅਖ਼ੀਰ ਵਿਚ ਬੜੇ ਹੀ ਜੋਸ਼ ਨਾਲ ਵਾਅਦਾ ਕੀਤਾ ਕਿ ਅਸੀਂ ਸਿੱਖੀ ਸਿਧਾਂਤਾਂ ਨਾਲ ਖਿਲਵਾੜ ਨਹੀਂ ਹੋਣ ਦੇਣੀ। ਜਿਹੜੇ ਲੋਕ ਸ੍ਰ: ਪੁਰੇਵਾਲ ਵੱਲੋਂ ਕੀਤੇ ਸਿਧਾਂਤਕ ਸੇਧ ਵਾਲੇ ਦਰੁਸਤ ਕਾਰਜਾਂ ਵਿਚ ਰੁਕਾਵਟ ਬਣਦੇ ਹਨ ਅਸੀਂ ਉਨਾਂ ਨੂੰ ਟਿਕਣ ਨਹੀਂ ਦਿਆਂਗੇ।
ਉਪਰੰਤ ਖ਼ਾਲਿਸਤਾਨ ਅਫ਼ੇਅਰਜ਼ ਸੈਂਟਰ ਦੇ ਸੰਚਾਲਕ ਡਾ: ਅਮਰਜੀਤ ਸਿੰਘ ਹੁਰਾਂ ਨਾਨਕਸ਼ਾਹੀ ਕੈਲੰਦਰ ਦੇ ਰੂਪ ਵਿਚ ਹਾਸਲ ਹੋਈਆਂ ਪ੍ਰਾਪਤੀਆਂ ਦਾ ਜ਼ਿਕਰ ਕੀਤਾ ਜੋ ਇਸ ਜੰਤਰੀ ਨਾਲ ਜੁੜੀਆਂ ਹੋਈਆਂ ਹਨ। ਉਨਾਂ ਖ਼ਾਲਸਾ ਪੰਥ ਨੂੰ ਸਾਵਧਾਨ ਕੀਤਾ ਕਿ ਬਿਰਪਵਾਦੀ ਤਾਕਤਾਂ ਦਾ ਅਗਲਾ ਨਿਸ਼ਾਨਾ ਸ੍ਰੀ ਅਕਾਲ ਤਖ਼ਤ ਸਾਹਿਬ ਤੋਂ ਪ੍ਰਵਾਨਿਤ ਸਿੱਖ ਰਹਿਤ ਮਰਿਆਦਾ ਹੈ। ਵਿਸਥਾਰ 'ਚ ਜਾਂਦਿਆਂ ਉਨਾਂ ਕਿਹਾ ਕਿ ਸਿੱਖ ਰਹਿਤ ਮਰਿਆਦਾ ਲਾਗੂ ਹੋਣ ਤੋਂ ਬਾਅਦ ਨਾਨਕਸ਼ਾਹੀ ਕੈਲੰਡਰ ਦਾ ਲਾਗੂ ਹੋਣਾ ਦੂਜੀ ਵਡੀ ਪ੍ਰਾਪਤੀ ਸੀ ਜੋ ਸਿੱਖਾਂ ਦੇ ਨਿਆਰੇਪਣ ਨੂੰ ਸਥਾਪਤ ਕਰ ਰਹੀ ਸੀ ਪਰ ਸਿੱਖਾਂ ਦੇ ਜਿਨ੍ਹਾਂ ਅਖੌਤੀ, ਫ਼ਰੇਬੀ ਤੇ ਲਾਲਚੀ ਆਗੂਆਂ ਨੇ ਸਿੱਖੀ ਦਾ ਭਗਵਾਂਕਰਨ ਦਾ ਜੋ ਠੇਕਾ ਲਿਆ ਹੋਇਆ ਉਨਾਂ ਕੋਲੋਂ ਨਾਨਾਕਸ਼ਾਹੀ ਕੈਲੰਡਰ ਬਰਦਾਸ਼ਤ ਨਹੀਂ ਹੋਇਆ ਇਸ ਲਈ ਅਖੌਤੀ ਸੋਧਾਂ ਦੇ ਨਾਮ ਹੇਠ ਇਸਦਾ ਹਿੰਦੂਕਰਨ ਕਰ ਦਿੱਤਾ ਗਿਆ। ਸਮਾਗਮ ਵਿਚ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਸਾਬਕਾ ਜਥੇਦਾਰ ਗਿਆਨੀ ਜੋਗਿੰਦਰ ਸਿੰਘ ਵੇਦਾਂਤੀ ਵੀ ਬੈਠੇ ਸਨ ਅਤੇ ਜਿਨਾਂ ਹਾਲੇ ਸੰਗਤਾਂ ਨਾਲ ਵੀਚਾਰ ਸਾਂਝੇ ਕਰਨੇ ਸਨ। ਡਾਕਟਰ ਅਮਰਜੀਤ ਸਿੰਘ ਹੁਰਾਂ ਸੰਗਤਾਂ ਨੂੰ ਦੱਸਿਆ ਕਿ ਬੇਸ਼ੱਕ ਪਿਛਲੇ ਸਮੇਂ ਵਿਚ ਸਾਡੇ ਜਥੇਦਾਰ ਸਾਹਿਬ ਨਾਲ ਬਹੁਤ ਸਾਰੇ ਮਸਲਿਆਂ ਦੇ ਗੰਭੀਰ ਮੱਤਭੇਦ ਰਹੇ ਹਨ ਪਰ ਜਥੇਦਾਰ ਸਾਹਿਬ ਨੇ ਤਿੰਨ ਅਜਿਹੇ ਫ਼ੈਸਲੇ ਲਏ ਹਨ ਜੋ ਅੱਜ ਦੇ ਸਮੇਂ ਵਿਚ ਚੱਲ ਰਹੇ ਸੰਘਰਸ਼ ਵਿਚ ਇਕ ਮਿਸਾਲ ਹਨ। ਸਭ ਤੋਂ ਪਹਿਲਾਂ ਨਾਨਕਸ਼ਾਹੀ ਕੈਲੰਡਰ ਜਥੇਦਾਰ ਵੇਦਾਂਤੀ ਵੱਲੋਂ 14 ਅਪ੍ਰੈਲ, 2003 ਨੂੰ ਦਮਦਮਾ ਸਾਹਿਬ ਤੋਂ ਭਾਰੀ ਵਿਰੋਧ ਦੇ ਬਾਵਜੂਦ ਲਾਗੂ ਕਰਨਾ, ਦੂਜਾ ਆਰ.ਐਸ.ਐਸ. ਖ਼ਿਲਾਫ਼ ਹੁਕਮਨਾਮਾ ਜਾਰੀ ਕਰਨਾ ਅਤੇ ਤੀਜਾ ਜਥੇਦਾਰ ਹੁਰਾਂ ਵੱਲੋਂ ਨਿਊਯਾਰਕ ਵਿਚ ਸਿੱਖਾਂ ਦੇ ਵੱਖਰੇ ਘਰ ਖ਼ਾਲਿਸਤਾਨ ਦੀ ਹਿਮਾਇਤ ਕਰਨਾ ਜਿਸ ਕਰਕੇ ਬਾਦਲ ਨੇ ਉਨਾਂ ਨੂੰ ਬਾਅਦ ਵਿਚ ਜਥੇਦਾਰੀ ਤੋਂ ਬਰਖ਼ਾਸਤ ਵੀ ਕਰ ਦਿੱਤਾ। ਅਖ਼ੀਰ ਵਿਚ ਜਥੇਦਾਰ ਵੇਦਾਂਤੀ ਨੇ ਆਪਣੇ ਵਿਚਾਰ ਸੰਗਤਾਂ ਨਾਲ ਸਾਂਝੇ ਕਰਦਿਆਂ ਦੱਸਿਆ ਕਿ ਕਿਵੇਂ ਨਾਨਕਸ਼ਾਹੀ ਕੈਲੰਡਰ ਲਾਗੂ ਹੋਣ ਤੋਂ ਪਹਿਲਾਂ ਰੁਕਾਵਟਾਂ ਖੜੀਆਂ ਕੀਤੀਆਂ ਗਈਆਂ। ਭਾਜਪਾ ਦੇ ਲੀਡਰਾਂ ਵੱਲੋਂ ਤਾਂ ਕੈਲੰਡਰ ਦਾ ਵਿਰੋਧ ਹੋ ਹੀ ਰਿਹਾ ਸੀ ਪਰ ਮੱਕੜ-ਧੁੰਮੇ ਵੱਲੋਂ ਵੀ ਕਾਫ਼ੀ ਰੁਕਾਵਟਾਂ ਪੈਦਾ ਕੀਤੀਆਂ ਗਈਆਂ। ਮੌਜੂਦਾ ਸੋਧਾਂ ਨੂੰ ਨਕਾਰਦਿਆਂ ਉਨਾਂ ਕਿਹਾ ਕਿ ਇਹ ਇਕ ਪਾਸੜ ਕਾਰਵਾਈ ਸੀ ਜੋ ਇਕ ਖ਼ਾਸ ਟੋਲੇ ਨੂੰ ਖ਼ੁਸ਼ ਕਰਨ ਲਈ ਕੀਤੀ ਗਈ ਸੀ। ਜਥੇਦਾਰ ਜੀ ਨੇ ਸੋਧਾਂ ਕਰਨ ਵਾਲੇ ਮੱਕੜ ਧੁੰਮਾ ਕਮੇਟੀ ਨੂੰ ਸਵਾਲ ਕੀਤਾ ਕਿ ਉਨਾਂ ਨੇ ਕਿਹੜੀ ਖਗੋਲ, ਭਗੋਲ ਤੇ ਹਿਸਾਬ ਕਿਤਾਬ ਦੀ ਪੜਾਈ ਕੀਤੀ ਹੈ। ਉਨਾਂ ਸੋਧਾਂ ਵਾਲੇ ਅਖੌਤੀ ਕੈਲੰਡਰ ਵਿਚ ਰਾਮ ਨੌਮੀ ਤੇ ਕ੍ਰਿਸ਼ਨ ਜਨਮ-ਅਸ਼ਟਮੀ ਸ਼ਾਮਿਲ ਕਰਨ ਦਾ ਸਖ਼ਤ ਇਤਰਾਜ਼ ਵੀ ਕੀਤਾ। ਉਨਾਂ ਕਿਹਾ ਕਿ ਇਨਾਂ ਦੋ ਹਿੰਦੂ ਤਿਓਹਾਰਾਂ ਦਾ ਸਿੱਖਾਂ ਨਾਲ ਕੀ ਵਾਸਤਾ ਹੈ। ਉਨਾਂ ਕਿਹਾ ਕਿ ਇਥੋਂ ਪਤਾ ਲਗਦਾ ਹੈ ਕਿ ਸੋਧਾਂ ਕਰਨ ਵਾਲਿਆਂ ਦੀ ਤਾਰ ਕਿੱਥੋਂ ਹਿਲਦੀ ਹੈ। ਸੋਧਾਂ ਦੇ ਨਾਮ ਸਿੱਖ ਕੌਮ ਨੂੰ ਭੰਬਲਭੂਸੇ 'ਚ ਪਾਇਆ ਗਿਆ ਹੈ। ਉਨਾਂ ਮੱਕੜ-ਧੁੰਮੇ ਨੂੰ ਸਲਾਹ ਦਿੱਤੀ ਕਿ ਇਸ ਕੈਲੰਡਰ ਦਾ ਨਾਮ ਕੁਝ ਹੋਰ ਰੱਖ ਲੈਣ। ਵੀਚਾਰਾਂ ਦੇ ਅਖ਼ੀਰ 'ਚ ਜਥੇਦਾਰ ਸਾਹਿਬ ਨੇ ਸਿੱਖਾਂ ਨੂੰ ਗੁਰਬਾਣੀ ਪੜ੍ਹਨ, ਨਿੱਤਨੇਮ ਕਰਨ ਪੰਜਾਬੀ ਮਾਂ ਬੋਲੀ ਨਾਲ ਜੁੜਨ ਦੀ ਅਪੀਲ ਕੀਤੀ। ਉਨਾਂ ਕਿਹਾ ਕਿ ਸਿੱਖ ਜੋ ਰੋਜ਼ ਰਾਜ ਕਰੇਗਾ ਖ਼ਾਲਸਾ ਦਾ ਦੋਹਰਾ ਪੜਦੇ ਹਨ, ਇਕ ਦਿਨ ਸਿੱਖਾਂ ਦਾ ਰਾਜ ਭਾਗ ਜ਼ਰੂਰ ਆਵੇਗਾ, ਜਿਸਤੇ ਸੰਗਤਾਂ ਨੇ ਜੈਕਾਰੇ ਗਜਾ ਕੇ ਇਸਾ ਸੁਆਗਤ ਕੀਤਾ।
ਸਮਾਗਮ ਨੂੰ ਜਥੇਦਾਰ ਜੀ ਦੇ ਸਹਿਯੋਗੀ ਪ੍ਰਿਥੀਪਾਲ ਸਿੰਘ ਸੰਧੂ ਨੇ ਵੀ ਸੰਬੋਧਨ ਕੀਤਾ। ਬੁਲਾਰਿਆਂ ਤੋਂ ਬਾਅਦ ਸਿੱਖ ਸੈਂਟਰ ਹਿਊਸਟਨ ਦੇ ਮੁੱਖ ਸੇਵਾਦਾਰ ਪ੍ਰੋ: ਸੰਪੂਰਨ ਸਿੰਘ ਜੀ ਨੇ ਟੈਕਸਸ ਦੇ ਹੋਰ ਗੁਰੂ ਦੇ ਨੁਮਾਂਇੰਦਿਆਂ ਨੂੰ ਨਾਲ ਲੈ ਕੇ ਸਟੇਜ ਤੋਂ ਜੈਕਾਰਿਆਂ ਦੀ ਗੂੰਜ ਨਾਲ ਇਕ ਮਤਾ ਕਰਕੇ ਸੋਧਾਂ ਵਾਲੇ ਕੈਲੰਡਰ ਨੂੰ ਰੱਦ ਕਰਕੇ ਪਹਿਲਾਂ ਵਾਲੇ ਬੁਨਿਆਦੀ ਨਾਨਕਸ਼ਾਹੀ ਕੈਲੰਡਰ ਨਾਲ ਹੀ ਸਾਰੇ ਗੁਰਪੁਰਬ ਤੇ ਇਤਿਹਾਸਕ ਦਿਹਾੜੇ ਮਨਾਉਣ ਦਾ ਪ੍ਰਣ ਕੀਤਾ।
ਗੁਰਦੁਆਰਾ ਸਾਹਿਬ ਬਰੀਨ ਰੋਡ ਦੇ ਪ੍ਰਧਾਨ ਭਾਈ ਹੀਰਾ ਸਿੰਘ ਚਮਦਲ, ਨੈਸ਼ਨਲ ਸਿੱਖ ਸੈਂਟਰ ਦੇ ਭਾਈ ਹਰਮਦ ਸਿੰਘ ਅਜ਼ਾਦ, ਸਿੱਖ ਸੈਂਟਰ ਸਨ ਐਂਟੋਨੀਓ ਦੇ ਭਾਈ ਬਲਵਿੰਦਰ ਸਿੰਘ ਢਿੱਲੋਂ, ਅਤੇ ਡਾਲਾਸ ਗੁਰਦੁਆਰਾ ਸਾਹਿਬ ਤੋਂ ਭਾਈ ਸੰਤੋਖ ਸਿੰਘ ਜੀ ਨੇ ਸਟੇਜ ਤੋਂ ਪ੍ਰੋ: ਸੰਪੂਰਨ ਸਿੰਘ ਦਾ ਸਾਥ ਦਿੱਤਾ। ਇਸ ਮੌਕੇ ਸ੍ਰ: ਸੰਤੋਖ ਸਿੰਘ ਵੱਲੋਂ ਬੜੇ ਹੀ ਜੋਸ਼ ਨਾਲ ਖ਼ਾਲਿਸਤਾਨ ਜ਼ਿੰਦਾਬਾਦ ਦੇ ਨਾਹਰੇ ਵੀ ਲਾਏ ਜਿਸਦਾ ਬੜੇ ਹੀ ਹੋਸ਼ ਨਾਲ ਸਿੱਖ ਸੰਗਤਾਂ ਜਵਾਬ ਦਿੱਤਾ। ਨਿਊਯਾਕਰ ਦੇ ਗੁਰਦੁਆਰਾ ਸਾਹਿਬ ਰਿਚਮੰਡ ਹਿੱਲ ਦੇ ਮੁੱਖ ਸੇਵਾਦਾਰ ਭਾਈ ਟਹਿਲ ਸਿੰਘ ਨੇ ਵੀ ਫ਼ੋਨ ਉਤੇ ਸੰਗਤਾਂ ਨੂੰ ਸੰਬੋਧਨ ਕਰਕੇ ਅਸਲੀ ਨਾਨਕਸ਼ਾਹੀ ਕੈਲੰਡਰ ਨੂੰ ਅਪਨਾਉਣ ਅਤੇ ਧੂਮਾਂ-ਮਕੱੜ ਕੈਲੰਡਰ ਨੂੰ ਰੱਦ ਕਰਨ ਦਾ ਐਲਾਨ ਕੀਤਾ। ਇਸ ਮੌਕੇ ਸਾਂਝਾ ਪੰਜਾਬ ਟੈਲੀਵੀਜ਼ਨ ਦੇ ਸ੍ਰ: ਬਲਵਿੰਦਰ ਸਿੰਘ ਬਾਜਵਾ ਵੀ ਹਾਜ਼ਰ ਸਨ। ਸੰਗਤਾਂ ਦੇ ਭਾਰੀ ਇਕੱਠ ਨੇ ਇਕ ਗੱਲ ਸਾਫ਼ ਕਰ ਦਿੱਤੀ ਕਿ ਪੰਜਾਬ ਵਿਚ ਧੱਕੇ ਜ਼ੋਰ ਨਾਲ ਬਾਦਲ-ਮਕੱੜ-ਧੁੰਮਾ ਤਿੱਕੜੀ ਜੋ ਮਰਜ਼ੀ ਕਰ ਲਵੇ ਪਰ ਪਰਦੇਸੀ ਸਿੱਖ ਇਨ੍ਹਾਂ ਬੁਕੱਲ ਦੇ ਸੱਪਾਂ ਨੂੰ ਪਛਾਣਦਾ ਹੈ ਅਤੇ ਇਨ੍ਹਾਂ ਦੀ ਹਰ ਉਸ ਕੋਸ਼ਿਸ਼ ਤੇ ਚਾਲ ਨੂੰ ਪਛਾੜ ਦੇਵੇਗਾ ਜਿਸ ਨਾਲ ਸਿੱਖੀ ਨੂੰ ਹਿੰਦੂਵਾਦ ਦੇ ਖਾਰੇ ਸਮੁੰਦਰ ਵਿਚ ਡੋਬਾ ਮਿਲਦਾ ਹੋਵੇ।

ਹੂਸਟਨ-ਟੈਕਸਸ ਦੇ ਗੁਰਦੁਆਰਾ ਸਾਹਿਬ 'ਚ ਅਸਲ ਨਾਨਕਸ਼ਾਹੀ ਕੈਲੰਡਰ ਦੇ ਹੱਕ ਵਿੱਚ ਪਾਸ ਕੀਤਾ ਮਤਾ

ਹੂਸਟਨ-ਟੈਕਸਸ (ਬਲਵਿੰਦਰਪਾਲ ਸਿੰਘ ਖਾਲਸਾ) ਅਮਰੀਕਨ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਤੇ ਸਿੱਖ ਸੈਂਟਰ ਆਫ ਗਲਫ ਕੋਸਟ ਗੁਰਦੁਆਰਾ ਸਾਹਿਬ ਦੀ ਪ੍ਰਬੰਧਕ ਕਮੇਟੀ ਦੇ ਸਹਿਯੋਗ ਨਾਲ ਨਾਨਕਸ਼ਾਹੀ ਕੈਲੰਡਰ ਬਾਰੇ ਇੱਕ ਵਿਚਾਰ ਗੋਸ਼ਟੀ ਕਰਵਾਈ ਗਈ ਜਿਸ ਵਿਚ ਬੜੇ ਸੁਲਝੇ ਹੋਏ ਵਿਦਵਾਨਾਂ ਨੇ ਭਾਗ ਲਿਆ। ਇਸ ਵਿਚਾਰ ਗੋਸ਼ਟੀ 'ਚ ਹਿੱਸਾ ਲੈਣ ਲਈ ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਸਾਬਕਾ ਜਥੇਦਾਰ ਗਿਆਨੀ ਜੋਗਿੰਦਰ ਸਿੰਘ ਵੇਦਾਂਤੀ,ਕੈਨੇਡਾ ਤੋਂ ਨਾਨਕਸ਼ਾਹੀ ਕੈਲੰਡਰ ਦੇ ਰਚੇਤਾ ਸ੍ਰ: ਪਾਲ ਸਿੰਘ ਪੁਰੇਵਾਲ, ਡਾਕਟਰ ਦਰਸ਼ਨ ਸਿੰਘ ਪੰਜਾਬ ਯੂਨੀਵਰਸਿਟੀ ਚੰਡੀਗੜ, ਖਾਲਿਸਤਾਨ ਅਫੇਅਰਜ਼ ਸੈਂਟਰ ਦੇ ਸੰਚਾਲਕ ਡਾਕਟਰ ਅਮਰਜੀਤ ਸਿੰਘ ਤੇ ਅਮਰੀਕਨ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਕੋਆਰਡੀਨੇਟਰ ਡਾ: ਪਿ੍ਤਪਾਲ ਸਿੰਘ ਵਿਸ਼ੇਸ਼ ਤੌਰ ਤੇ ਪਹੁੰਚੇ ਹੋਏ ਸਨ । ਵਿਚਾਰ ਗੋਸ਼ਟੀ ਤੋਂ ਬਾਅਦ ਇਕ ਵਿਸ਼ੇਸ਼ ਮਤਾ ਅਸਲ ਨਾਨਕਸ਼ਾਹੀ ਕੈਲੰਡਰ ਦੇ ਹੱਕ ਵਿਚ ਸੰਗਤਾਂ ਦੇ ਸਨਮੁੱਖ ਪੜਿਆ ਗਿਆ, ਜਿਸਦੀ ਇਬਾਰਤ ਇਸ ਤਰਾਂ ਹੈ :
ਦ ਸਿੱਖ ਸੈਂਟਰ ਆਫ਼ ਗਲਫ਼ ਕੋਸਟ ਹੂਸਟਨ (ਟੈਕਸਸ) ਅੱਜ ਜੂਨ 13, 2010 ਨੂੰ ਦ ਸਿੱਖ ਸੈਂਟਰ ਆਫ਼ ਗਲਫ਼ ਕੋਸਟ ਹੂਸਟਨ-ਟੈਕਸਸ ਦੇ ਗੁਰਦੁਆਰਾ ਸਾਹਿਬ ਵਿਚ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਸਾਬਕਾ ਜਥੇਦਾਰ ਗਿਆਨੀ ਜੋਗਿੰਦਰ ਸਿੰਘ ਵੇਦਾਂਤੀ, ਡਾਕਟਰ ਦਰਸ਼ਨ ਸਿੰਘ ਪੰਜਾਬ ਯੁਨੀਵਰਸਿਟੀ, ਪਾਲ ਸਿੰਘ ਪੁਰੇਵਾਲ ਰਚੇਤਾ ਨਾਨਕਸ਼ਾਹੀ ਕੈਲੰਡਰ, ਡਾ: ਪ੍ਰਿਤਪਾਲ ਸਿੰਘ ਏ.ਜੀ.ਪੀ.ਸੀ. ਡਾਕਟਰ ਅਮਰਜੀਤ ਸਿੰਘ ਖ਼ਾਲਿਸਤਾਨ ਅਫ਼ੇਅਰਜ਼ ਸੈਂਟਰ ਅਤੇ ਗੁਰਦੁਆਰਾ ਸਾਹਿਬ ਵਿਚ ਰਲ ਮਿਲ ਬੈਠੀਆਂ ਸੰਗਤਾਂ, ਹੋਰ ਗੁਰਦੁਆਰਾ ਪ੍ਰਬੰਧਕ ਕਮੇਟੀਆਂ, ਪੰਥਕ ਜਥੇਬੰਦੀਆਂ ਤੇ ਸਾਧ-ਸੰਗਤ ਦੇ ਭਾਰੀ ਇਕੱਠ ਦੀ ਸਹਿਮਤੀ ਨਾਲ ਬੁਨਿਆਦੀ ਨਾਨਕਸ਼ਾਹੀ ਕੈਲੰਡਰ ਦੇ ਹੱਕ ਵਿਚ ਇਹ ਮਤਾ ਪਾਸ ਕਰਨ ਲਈ ਪੜ ਕੇ ਸੁਣਾਇਆ ਜਾਂਦਾ ਹੈ:
ਸਿੱਖ ਕੌਮ ਦੇ ਨਿਆਰੇਪਨ ਦੇ ਪ੍ਰਤੀਕ ਅਤੇ ਸਿੱਖ ਸੰਘਰਸ਼ ਦੀਆਂ ਪ੍ਰਾਪਤੀਆਂ ਵਿੱਚ ਇੱਕ ਮੀਲ ਪੱਥਰ ਬਣ ਚੁੱਕੇ ਨਾਨਕਸ਼ਾਹੀ ਕੈਲੰਡਰ ਨੂੰ, ਦੁਸ਼ਮਣ ਤਾਕਤਾਂ ਦੇ ਹਮਲੇ ਤੋਂ ਬਚਾਉਣ ਲਈ, ਇਹ ਜ਼ਰੂਰੀ ਹੈ ਕਿ ਜਿਸ ਰੂਪ ਵਿੱਚ ਇਸ ਨੂੰ, ਖਾਲਸਾ ਪੰਥ ਨੇ 14 ਅਪ੍ਰੈਲ, 2003 ਨੂੰ ਲਾਗੂ ਕੀਤਾ ਸੀ, ਇੰਨ ਬਿੰਨ ਇਸ ਨੂੰ ਇਵੇਂ ਹੀ ਲਾਗੂ ਰੱਖਿਆ ਜਾਵੇ। ਅੱਜ ਦੇ ਇਸ ਇਕੱਠ ਵਿੱਚ, ਇਤਿਹਾਸਕ ਨਾਨਕਸ਼ਾਹੀ ਕੈਲੰਡਰ ਨੂੰ ਜਾਰੀ ਰੱਖਣ ਲਈ, ਇਹ ਵਿਸ਼ੇਸ਼ ਮਤਾ ਸਾਧ ਸੰਗਤ ਦੇ ਸਨਮੁੱਖ ਰੱਖਿਆ ਜਾਂਦਾ ਹੈ। ਜੈਕਾਰਿਆਂ ਦੀ ਗੂੰਜ ਵਿੱਚ ਇਸ ਨੂੰ ਪ੍ਰਵਾਨਗੀ ਦਿੱਤੀ ਜਾਵੇ - ਮਤਾ ਇਸ ਤਰਾਂ ਹੈ :
''ਅੱਜ ਦਾ ਸਿੱਖ ਸੰਗਤ ਦਾ ਇਹ ਇਕੱਠ ਸਿੱਖ ਕੌਮ ਵਲੋਂ ਮਾਨਤਾ-ਪ੍ਰਾਪਤ ਨਾਨਕਸ਼ਾਹੀ ਕੈਲੰਡਰ ਨੂੰ ਬਿਨਾਂ ਕਿਸੇ ਤਬਦੀਲੀ ਤੋਂ ਜਾਰੀ ਰੱਖਣ ਦੇ ਹੱਕ ਵਿੱਚ ਮਤਾ ਪਾਸ ਕਰਦਾ ਹੈ। ਨਾਨਕਸ਼ਾਹੀ ਕੈਲੰਡਰ, ਖਾਲਸਾ ਪੰਥ ਵਲੋਂ ਸ੍ਰੀ ਅਕਾਲ ਤਖਤ ਸਾਹਿਬ ਦੀ ਛਤਰ-ਛਾਇਆ ਹੇਠ, ਲੰਬੇ ਵਿਚਾਰ-ਵਟਾਂਦਰੇ ਤੋਂ ਬਾਅਦ ਪ੍ਰਵਾਣਿਤ ਕੀਤਾ ਗਿਆ ਸੀ ਅਤੇ 14 ਅਪ੍ਰੈਲ, 2003 ਨੂੰ ਤਖਤ ਸ੍ਰੀ ਦਮਦਮਾ ਸਾਹਿਬ ਤੋਂ ਪੰਥ ਦੇ ਨਾਮ ਜਾਰੀ ਕੀਤਾ ਗਿਆ ਸੀ। ਪਿਛਲੇ ਸਮੇਂ ਦੌਰਾਨ ਕੁਝ ਧਿਰਾਂ ਨੇ, ਜਾਣੇ-ਅਣਜਾਣੇ, ਪੰਥ ਵਿਰੋਧੀ ਸ਼ਕਤੀਆਂ ਦੇ ਇਸ਼ਾਰੇ 'ਤੇ, 'ਸੋਧਾਂ ਦੇ ਨਾਮ ਹੇਠ, ਨਾਨਕਸ਼ਾਹੀ ਕੈਲੰਡਰ ਨੂੰ ਖਤਮ ਕਰਨ ਲਈ ਜੋ ਕਾਰਵਾਈਆਂ ਕੀਤੀਆਂ ਹਨ, ਅਸੀਂ ਉਨਾਂ ਦੀ ਨਿਖੇਧੀ ਕਰਦੇ ਹਾਂ ਅਤੇ ਇਨਾਂ ਅਖੌਤੀ ਸੋਧਾਂ ਨੂੰ ਪੂਰੀ ਤਰਾਂ ਰੱਦ ਕਰਦੇ ਹਾਂ। ਨਾਨਕਸ਼ਾਹੀ ਕੈਲੰਡਰ, ਕਈ ਵਰਿਆਂ ਦੀ ਡੂੰਘੀ ਖੋਜ, ਅਤੇ ਵਿਚਾਰ ਤੋਂ ਬਾਅਦ, ਪੰਥ ਪ੍ਰਵਾਣਿਤ ਹੋਣ ਦਾ ਰੁਤਬਾ ਹਾਸਲ ਕਰ ਚੁੱਕਾ ਹੈ। ਇਹ ਖਾਲਸਾ ਪੰਥ ਦੀ ਵਿਲੱਖਣ ਪਛਾਣ ਅਤੇ ਨਵੇਂ ਯੁੱਗ ਵਿੱਚ ਇੱਕ 'ਅੱਡਰੀ ਕੌਮ' ਵਜੋਂ ਪ੍ਰਵੇਸ਼ ਕਰਨ ਦਾ ਅਧਾਰ ਪ੍ਰਦਾਨ ਕਰਦਾ ਹੈ, ਇਸ ਲਈ ਦੋਖੀ ਤਾਕਤਾਂ ਨੇ ਇਸ ਦਾ ਰੂਪ ਵਿਗਾੜਨ ਦੀ ਕੋਝੀ ਸਾਜ਼ਿਸ਼ ਰਚੀ ਹੈ। ਅਸੀਂ ਕੈਲੰਡਰ ਵਿਚ ਸੋਧਾਂ ਕਰਨ ਦੀ ਕਾਰਵਾਈ ਨੂੰ ਪੂਰੀ ਤਰਾਂ ਰੱਦ ਕਰਦੇ ਹਾਂ।
ਅਸੀਂ ਸਿੱਖ ਸੰਗਤ ਨੂੰ ਅਪੀਲ ਕਰਦੇ ਹਾਂ ਕਿ ਉਹ ਆਪਣੇ ਹਰ ਗੁਰਦੁਆਰਾ ਸਾਹਿਬ ਵਿੱਚ ਗੁਰਪੁਰਬ, ਸ਼ਹੀਦੀ ਦਿਵਸ ਤੇ ਹੋਰ ਇਤਿਹਾਸਕ ਦਿਹਾੜੇ ਨਾਨਕਸ਼ਾਹੀ ਕੈਲੰਡਰ ਅਨੁਸਾਰ ਹੀ ਮਨਾਉਣ ।''
ਹੁਣ 5 ਜੈਕਾਰਿਆਂ ਦੀ ਗੂੰਜ ਵਿੱਚ ਸ੍ਰੀ ਅਕਾਲ ਤਖਤ ਸਾਹਿਬ ਵਲੋਂ ਪ੍ਰਵਾਣਿਤ, 14 ਅਪ੍ਰੈਲ, 2003 ਦੇ ਅਸਲੀ ਨਾਨਕਸ਼ਾਹੀ ਕੈਲੰਡਰ ਨੂੰ ਮਾਨਤਾ ਦਿੱਤੀ ਜਾਵੇ ਜੀ :
ਉਪਰੰਤ ਸੰਗਤਾਂ ਨੇ ਪੰਜਾਂ ਜੈਕਾਰਿਆਂ ਨਾਲ ਮਤੇ ਨੂੰ ਪ੍ਰਵਾਨਗੀ ਦਿੱਤੀ।

ਪਾਕਿਸਤਾਨੀ ਸਿੱਖਾਂ ਨੂੰ ਹਿੰਦੋਸਤਾਨ ਵਿੱਚ ਸਥਿਤ ਆਪਣੇ ਗੁਰਧਾਮਾਂ ਦੇ ਦਰਸ਼ਨਾਂ ਦੀ ਖੁੱਲ੍ਹ ਹੋਣੀ ਚਾਹੀਦੀ ਹੈ :- ਮਾਨ

ਫਤਿਹਗੜ੍ਹ ਸਾਹਿਬ, 15 ਜੂਨ :- “ਭਾਵੇਂ ਪਾਕਿਸਤਾਨ ਵਿੱਚ ਦਹਿਸ਼ਤਗਰਦ ਦੀਆਂ ਕਾਰਵਾਈਆਂ ਹੋ ਰਹੀਆਂ ਹਨ। ਪਰ ਫਿਰ ਵੀ ਉੱਥੇ ਰਹਿਣ ਵਾਲੇ ਸਿੱਖਾਂ ਨੂੰ ਉੱਥੋ ਦੀ ਹਕੂਮਤ ਅਤੇ ਇਸਲਾਮਿਕ ਖਾੜਕੂ ਗਰੁੱਪਾਂ ਤੋਂ ਇਸ ਸਮੇਂ ਕਿਸੇ ਤਰ੍ਹਾ ਦਾ ਕੋਈ ਡਰ ਭੈ ਨਹੀਂ ਹੈ। ਉੱਥੇ ਸਿੱਖ ਆਜ਼ਾਦੀ ਨਾਲ ਘੁੰਮ ਫਿਰ ਸਕਦੇ ਹਨ ਅਤੇ ਉਨ੍ਹਾ ਉੱਤੇ ਹੁਣ ਕਿਸੇ ਤਰ੍ਹਾ ਦਾ ਵੀ “ਜ਼ਜੀਆ” ਨਹੀਂ ਲਿਆ ਜਾਂਦਾ। ਪਰ ਬਹੁਤ ਦੁੱਖ ਅਤੇ ਅਫਸੋਸ ਨਾਲ ਕਹਿਣਾ ਪੈ ਰਿਹਾ ਹੈ ਕਿ ਪਾਕਿਸਤਾਨ ਮੁਲਕ ਵਿੱਚ ਰਹਿਣ ਵਾਲੇ ਸਿੱਖਾਂ ਨੂੰ ਹਿੰਦੋਸਤਾਨ ਵਿੱਚ ਸਥਿਤ ਆਪਣੇ ਇਤਿਹਾਸਿਕ ਗੁਰਧਾਮਾਂ ਦੇ ਦਰਸ਼ਨ ਕਰਨ ਲਈ ਹਿੰਦ ਹਕੂਮਤ ਪਹਿਲੇ ਤਾਂ ਵੀਜ਼ੇ ਹੀ ਨਹੀਂ ਦਿੰਦੀ, ਜੇ ਅਜਿਹੀ ਇਜ਼ਾਜਤ ਦਿੰਦੀ ਹੈ ਤਾਂ ਪਾਕਿਸਤਾਨੀ ਸਿੱਖਾਂ ਨੂੰ ਆਪਣੇ ਗੁਰਧਾਮਾਂ ਦੀ ਯਾਤਰਾ ਕਰਦੇ ਸਮੇ ਇੱਥੋ ਦੀਆਂ ਖੁਫੀਆ ਏਜੰਸੀਆਂ ਦੀ ਨਿਗਰਾਨੀ ਹੇਠ ਰਹਿ ਕੇ ਦਿਮਾਗੀ ਤਸ਼ੱਦਦ ਝੱਲਣ ਲਈ ਮਜ਼ਬੂਰ ਹੋਣਾ ਪੈਦਾ ਹੈ। ਜਿਸ ਨਾਲ ਉਨ੍ਹਾ ਦੀ ਧਾਰਮਿਕ ਯਾਤਰਾ ਦੇ ਆਤਮਿਕ ਅਨੰਦ ਪ੍ਰਾਪਤ ਕਰਨ ਵਿੱਚ ਵੱਡੀ ਖਲਲ ਪੈਦਾ ਹੁੰਦੀ ਹੈ।”
ਇਹ ਉਪਰੋਕਤ ਵਿਚਾਰ ਅੱਜ ਇੱਥੇ ਸ: ਸਿਮਰਨਜੀਤ ਸਿੰਘ ਮਾਨ ਪ੍ਰਧਾਨ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਨੇ 136 ਪਾਕਿਸਤਾਨੀ ਸਿੱਖਾਂ ਦੇ ਆਏ ਜੱਥੇ ਨੂੰ ਦਰਪੇਸ਼ ਆਈਆਂ ਮੁਸ਼ਕਿਲਾਂ ਅਤੇ ਇੱਥੋ ਦੀ ਹਕੂਮਤ ਵੱਲੋਂ ਉਨ੍ਹਾ ਨੂੰ ਜਲੀਲ ਕਰਨ ਦੀਆਂ ਕਾਰਵਾਈਆਂ ਦੀ ਪੁਰਜ਼ੋਰ ਨਿਖੇਧੀ ਕਰਦੇ ਹੋਏ ਇੱਕ ਬਿਆਨ ਵਿੱਚ ਪ੍ਰਗਟ ਕੀਤੇ। ਉਨ੍ਹਾ ਕਿਹਾ ਕਿ ਸਿੱਖ ਕੌਮ ਤਾਂ ਪਹਿਲੋ ਹੀ 1947 ਵਿੱਚ ਅਣਵੰਡੇ ਪਾਕਿਸਤਾਨ ਵਿੱਚ ਬ੍ਰਿਟਿਸ਼ ਹਕੂਮਤ ਦੇ ਸਮੇਂ, ਅੰਗਰੇਜ਼ਾਂ, ਮੁਸਲਿਮ ਅਤੇ ਹਿੰਦੂ ਕੌਮ ਦੇ ਜ਼ੁਲਮਾਂ ਤੋਂ ਪੀੜ੍ਹਤ ਰਹੀ ਹੈ, ਜਦੋਂ ਕਿ ਉਸ ਸਮੇਂ 1947 ਵਿੱਚ ਸਿੱਖ ਕੌਮ ਦੀ ਨਸਲੀ ਸਫਾਈ ਕੀਤੀ ਗਈ ਅਤੇ ਅੱਜ ਵੀ ਸਿੱਖ ਕੌਮ ਹਿੰਦੂ ਹੁਕਮਰਾਨਾਂ ਦੇ ਜ਼ੁਲਮ ਦਾ ਸਿ਼ਕਾਰ ਹੁੰਦੀ ਆ ਰਹੀ ਹੈ। ਉਨ੍ਹਾ ਕਿਹਾ ਕਿ ਜਦੋਂ ਤੱਕ ਸਿੱਖਾਂ ਦੀ ਆਪਣੀ ਬਾਦਸ਼ਾਹੀ “ਆਜ਼ਾਦ ਬਾਦਸ਼ਾਹੀ ਸਿੱਖ ਰਾਜ” ਆਪਣਾ ਮੁਲਕ ਕਾਇਮ ਨਹੀਂ ਹੋ ਜਾਂਦਾ, ਉਦੋ ਤੱਕ ਸਿੱਖਾਂ ਦੀਆਂ ਮੁਸਕਿਲਾਂ ਦਾ ਹੱਲ ਨਹੀਂ ਹੋ ਸਕਦਾ ਅਤੇ ਨਾ ਹੀ ਇਸ ਏਸ਼ੀਆ ਦੇ ਉਪ ਮਹਾਂਦੀਪ ਵਿੱਚ ਅਮਨ-ਚੈਨ ਅਤੇ ਜਮਹੂਰੀਅਤ ਕਾਇਮ ਹੋ ਸਕਦੀ ਹੈ। ਇਸ ਲਈ ਇਹ ਜ਼ਰੁਰੀ ਹੈ ਕਿ ਦੋਵੇ ਦੁਸ਼ਮਣ ਮੁਲਕਾਂ ਹਿੰਦੂ ਹਿੰਦੋਸਤਾਨ ਅਤੇ ਮੁਸਲਿਮ ਪਾਕਿਸਤਾਨ ਜੋ ਖਤਰਨਾਕ ਨਿਯੂਕਲੀਅਰ ਤਾਕਤਾਂ ਦੇ ਭੰਡਾਰਾਂ ਦੇ ਮਾਲਕ ਹਨ, ਦੇ ਵਿਚਕਾਰ ਇੱਕ “ਬੱਫਰ ਸਟੇਟ” ਕਾਇਮ ਹੋਵੇ। ਜਿੱਥੇ ਸਿੱਖ ਕੌਮ ਆਪਣੀ ਆਜ਼ਾਦੀ ਨਾਲ ਵਿਚਰ ਸਕੇ। ਅਜਿਹਾ ਪ੍ਰਬੰਧ ਕਰਕੇ ਹੀ ਹਿੰਦੋਸਤਾਨ ਅਤੇ ਪਾਕਿਸਤਾਨ ਦੀ ਪੁਰਾਣੀ ਦੁਸ਼ਮਣੀ ਦਾ ਅੰਤ ਕੀਤਾ ਜਾ ਸਕਦਾ ਹੈ। ਇੱਥੇ ਇਹ ਵਰਣਨ ਕਰਨਾ ਜ਼ਰੂਰੀ ਹੈ ਕਿ 22 ਫਰਵਰੀ 2010 ਨੂੰ ਪੱਛਮੀ ਪਾਕਿਸਤਾਨ ਦੇ ਵਿੱਚ ਮਾਰੇ ਗਏ ਦੋ ਸਿੱਖ ਭਾਈ ਜਸਪਾਲ ਸਿੰਘ ਅਤੇ ਭਾਈ ਮਹਿਲ ਸਿੰਘ ਦਾ ਦੋਵੇ ਮੁਲਕਾਂ ਦੀਆਂ ਹਕੂਮਤਾਂ ਨੇ ਸਾਨੂੰ ਅੱਜ ਤੱਕ ਕੋਈ ਜਾਣਕਾਰੀ ਨਹੀਂ ਦਿੱਤੀ ਕਿ ਉਨ੍ਹਾ ਨੂੰ ਕਿਉਂ ਅਤੇ ਕਿੱਥੇ ਮਾਰਿਆ ਗਿਆ ਹੈ ਅਤੇ ਉਨ੍ਹਾ ਦਾ ਕੀ ਕਸੂਰ ਸੀ। ਹੁਣ ਉਪਰੋਕਤ ਹਿੰਦੋਸਤਾਨ ਦੀ ਯਾਤਰਾ ਉੱਤੇ ਆਏ ਸਿੱਖਾਂ ਦੀ ਤਾਜ਼ਾ ਰਿਪੋਰਟ ਨੇ ਇਹ ਗੱਲ ਜਗ ਜ਼ਾਹਿਰ ਕਰ ਦਿੱਤੀ ਹੈ ਕਿ ਅੱਜ ਵੀ ਹਿੰਦ ਹਕੂਮਤ ਸਿੱਖਾਂ ਨੂੰ ਵੀਜ਼ੇ ਦੇਣ ਲੱਗਿਆ ਅਤੇ ਉਨ੍ਹਾ ਨੂੰ ਇੱਥੇ ਵਿਚਰਦੇ ਹੋਏ ਦੂਸਰੇ ਦਰਜੇ ਦੇ ਸ਼ਹਿਰੀ ਗਰਦਾਨ ਕੇ ਰਾਅ ਅਤੇ ਆਈ ਬੀ ਖੁਫੀਆ ਏਜੰਸੀਆਂ ਨੂੰ ਪ੍ਰਛਾਵੇ ਦੀ ਤਰ੍ਹਾ ਉਨ੍ਹਾ ਦੇ ਮਗਰ ਲਗਾ ਕੇ ਦਿਮਾਗੀ ਤੌਰ ਤੇ ਤਸ਼ੱਦਦ ਕੀਤਾ ਗਿਆ ਅਤੇ ਕੀਤਾ ਜਾ ਰਿਹਾ ਹੈ। ਇਸ ਲਈ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਇਹ ਮਹਿਸੂਸ ਕਰਦਾ ਹੈ ਕਿ ਸਿੱਖ ਕੌਮ ਦੇ ਆਪਣੇ ਮੁਲਕ ਬਣਨ ਤੋਂ ਬਿਨ੍ਹਾ ਸਿੱਖਾਂ ਦੀਆਂ ਮੁਸ਼ਕਿਲਾਂ ਦਾ ਅੰਤ ਨਹੀਂ ਹੋ ਸਕਦਾ। ਇਸ ਲਈ ਆਜ਼ਾਦ ਬਾਦਸ਼ਾਹੀ ਸਿੱਖ ਰਾਜ ਨੂੰ ਹੋਂਦ ਵਿੱਚ ਲਿਆਉਣਾ ਅੱਜ ਹੋਰ ਵੀ ਅਤਿ ਜ਼ਰੂਰੀ ਬਣ ਗਿਆ ਹੈ।

ਚੋਣ ਕਮਿਸ਼ਨ ਵੱਲੋਂ ਜਾਰੀ ਕੀਤੇ ਫਾਰਮ ਗੁਰਦੁਆਰਾ ਐਕਟ ਅਨੁਸਾਰ ਹੀ ਹਨ : ਅਵਤਾਰ ਸਿੰਘ

. ਅੰਮ੍ਰਿਤਸਰ, 15 ਜੂਨ - ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਜਥੇਦਾਰ ਅਵਤਾਰ ਸਿੰਘ ਨੇ ਸ਼੍ਰੋਮਣੀ ਕਮੇਟੀ ਦੀਆਂ ਚੋਣਾਂ ਸਬੰਧੀ ਵੋਟਾਂ ਬਣਾਏ ਜਾਣ ਲਈ ਗੁਰਦੁਆਰਾ ਚੋਣ ਕਮਿਸ਼ਨ ਵਲੋਂ ਪ੍ਰਕਾਸ਼ਤ ਕੀਤੇ ਫਾਰਮਾਂ 'ਤੇ ਸ. ਮਨਜੀਤ ਸਿੰਘ ਕਲਕੱਤਾ ਵਲੋਂ ਕਿੰਤੂ ਕੀਤੇ ਜਾਣ ਨੂੰ ਮੂਲੋਂ ਹੀ ਰੱਦ ਕਰਦਿਆਂ ਕਿਹਾ ਹੈ ਕਿ ਇਹ ਫਾਰਮ ਗੁਰਦੁਆਰਾ ਐਕਟ ਅਨੁਸਾਰ ਹਨ ਪਰ ਸ. ਮਨਜੀਤ ਸਿੰਘ ਕਲਕੱਤਾ ਤੇ ਉਨ੍ਹਾਂ ਦੇ ਸਾਥੀਆਂ ਨੂੰ ਚੋਣਾਂ ਦੌਰਾਨ ਹੋਣ ਵਾਲਾ ਹਸ਼ਰ ਸਪਸ਼ਟ ਨਜ਼ਰ ਆ ਰਿਹਾ ਹੈ, ਜਿਸ ਤੋਂ ਘਬਰਾਹਟ 'ਚ ਆ ਕੇ ਬਿਨਾਂ ਕਿਸੇ ਸਿਰ ਪੈਰ ਦੇ ਅਜਿਹੇ ਬਿਆਨ ਦੇ ਰਹੇ ਹਨ। ਉਨ੍ਹਾਂ ਸ਼੍ਰੋਮਣੀ ਕਮੇਟੀ ਦੇ ਮੌਜੂਦਾ ਹਾਊਸ ਦੇ ਨਾਮਜ਼ਦ ਮੈਂਬਰ ਸ. ਮਨਜੀਤ ਸਿੰਘ ਕਲਕੱਤਾ ਨੂੰ ਸਵਾਲ ਕੀਤਾ ਕਿ 1996 'ਚ ਜਦੋਂ ਉਹ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਸਕੱਤਰ ਵਜੋਂ ਸੇਵਾ ਨਿਭਾ ਰਹੇ ਸਨ, ਉਦੋਂ ਉਨ੍ਹਾਂ ਦੇ ਆਦੇਸ਼ਾਂ ਅਨੁਸਾਰ ਇਹੋ ਫਾਰਮ ਛਪਿਆ ਸੀ ਕਿ ਉਦੋਂ ਇਹ ਫਾਰਮ ਠੀਕ ਸੀ? ਉਨ੍ਹਾਂ ਕਿਹਾ ਕਿ 2004 ਦੀ ਇਲੈਕਸ਼ਨਾਂ ਤੋਂ ਪਹਿਲਾਂ ਬਣੀਆਂ ਵੋਟਾਂ ਲਈ ਵੀ ਬਿਲਕੁਲ ਹੂ-ਬ-ਹੂ ਫਾਰਮ ਛਪਿਆ ਸੀ ਅਤੇ ਇਨ੍ਹਾਂ ਫਾਰਮਾਂ ਰਾਹੀਂ ਬਣੀਆਂ ਵੋਟਾਂ ਦੁਆਰਾ ਚੁਣੇ ਮੌਜੂਦਾ ਹਾਊਸ ਦੇ ਮੈਂਬਰਾਂ ਨੇ ਸ. ਕਲਕੱਤਾ ਨੂੰ ਸ਼੍ਰੋਮਣੀ ਕਮੇਟੀ ਦੇ ਮੈਂਬਰ ਵਜੋਂ ਨਾਮਜ਼ਦ ਕੀਤਾ ਹੈ, ਸ. ਕਲਕੱਤਾ ਨੇ ਉਸ ਸਮੇਂ ਇਤਰਾਜ਼ ਕਿਉਂ ਨਾ ਕੀਤਾ? ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਫਾਰਮਾਂ 'ਤੇ ਕਿੰਤੂ ਕਰਨ ਵਾਲਿਆਂ 'ਚ ਰਤਾ ਵੀ ਦਮ ਹੈ ਤਾਂ ਉਹ ਮੈਦਾਨ ਵਿਚ ਆਉਣ, ਜ਼ੋਰ ਲਾ ਕੇ ਵੋਟਾਂ ਬਨਾਉਣ ਅਤੇ ਚੋਣ ਨਤੀਜਿਆਂ ਤੋਂ ਪਤਾ ਲੱਗੇਗਾ ਕਿ ਸੰਗਤਾਂ ਕਿਸ ਨੂੰ ਫਤਵਾ ਦਿੰਦੀਆਂ ਹਨ। ਉਨ੍ਹਾਂ ਕਿਹਾ ਕਿ ਸ਼੍ਰੋਮਣੀ ਕਮੇਟੀ ਦੀਆਂ ਸਮੇਂ-ਸਮੇਂ ਹੋਈਆਂ ਚੋਣਾਂ ਦੌਰਾਨ ਪੰਥ ਵਿਰੋਧੀਆਂ ਵਲੋਂ ਸੰਗਤਾਂ ਨੂੰ ਗੁੰਮਰਾਹ ਕਰਨ ਦੀ ਪੂਰੀ ਕੋਸ਼ਿਸ਼ ਕੀਤੀ ਜਾਂਦੀ ਰਹੀ ਪਰ ਇਤਿਹਾਸ ਗਵਾਹ ਹੈ ਕਿ ਸੰਗਤਾਂ ਨੇ ਉਨ੍ਹਾਂ ਨੂੰ ਕਦੇ ਵੀ ਮੂੰਹ ਨਹੀਂ ਲਾਇਆ। ਉਨ੍ਹਾਂ ਕਿਹਾ ਕਿ ਸ਼੍ਰੋਮਣੀ ਅਕਾਲੀ ਦਲ ਸਿੱਖਾਂ ਦੀਆਂ ਭਾਵਨਾਵਾਂ ਦੀ ਤਰਜਮਾਨੀ ਕਰਦਾ ਹੈ ਅਤੇ ਸ਼੍ਰੋਮਣੀ ਅਕਾਲੀ ਦਲ ਹੀ ਪੰਥਕ ਮਸਲਿਆਂ ਦੇ ਹੱਲ ਲਈ ਹੁਣ ਤੀਕ ਯਤਨਸ਼ੀਲ ਰਿਹਾ ਹੈ, ਸੰਗਤਾਂ ਇਸ ਦੇ ਉਮੀਦਵਾਰਾਂ ਨੂੰ ਵੋਟਾਂ ਪਾ ਕੇ ਸਫਲ ਬਨਾਉਂਦੇ ਹਨ। ਉਨ੍ਹਾਂ ਕਿਹਾ ਕਿ ਗੁਰਦੁਆਰਾ ਪ੍ਰਬੰਧ ਬੜਾ ਵਿਸ਼ਾਲ ਤੇ ਜ਼ਿੰਮੇਵਾਰੀ ਵਾਲਾ ਪ੍ਰਬੰਧ ਹੈ ਅਤੇ ਸੰਗਤਾਂ ਇਸ ਸਬੰਧੀ ਕਿਸੇ ਨੁਮਾਇੰਦੇ ਦੀ ਚੋਣ ਕਰਨ ਵੇਲੇ ਉਸ ਦੀ ਜਥੇਬੰਦੀ ਦੇ ਪਿਛੋਕੜ ਨੂੰ ਧਿਆਨ 'ਚ ਰੱਖਦੀਆਂ ਹਨ।