ਖਾਲਿਸਤਾਨ ਜਿੰਦਾਬਾਦ ਦੇ ਅਕਾਸ਼ ਗੁੰਜਾਊ ਨਾਹਰਿਆਂ ਨਾਲ ਸੰਪੂਰਨ ਹੋਈ ਖਾਲਿਸਤਾਨ ਨਾਈਟ
ਖਾਲਸਾ ਰਾਜ ਦੀ ਸਥਾਪਤੀ ਗੁਰੂ ਗੋਬਿੰਦ ਸਿੰਘ ਦੀ ਬਖਸਿ਼ਸ਼ ਨਾਲ ਹੀ ਹੋਈ ਅਗਰ 1710 ‘ਚ ਖਾਲਸਾ ਰਾਜ ਦੀ ਸਥਾਪਤੀ ਮਾਣਮੱਤੀ ਸੀ ਤਾਂ 2010 ਵਿੱਚ ਖਾਲਸਾ ਰਾਜ ਬਾਰੇ ਕਿਉਂ ਚੁੱਪ
ਸਰਕਾਰੀ ਪ੍ਰਾਪੇਗੰਡਾ ਮਸ਼ੀਨਰੀ ਦੀ ਨਿਖੇਧੀ

ਬਰੈਂਪਟਨ/ਡੇਲੀ ਬਿਊਰੋ/ਮਈ 12 -2010:- ਯੂਨਾਈਟਡ ਫਰੰਟ ਆਫ ਸਿੱਖਸ ਵਲੋਂ ਦੂਸਰੀ ਸਲਾਨਾ ਖਾਲਿਸਤਾਨ ਨਾਈਟ ਚਾਂਦਨੀ ਕੰਨਵੈਸ਼ਨ ਸੈਂਟਰ ਵਿੱਚ ਅੱਜ ਬੜੀ ਸਿ਼ੱਦਤ, ਸ਼ਰਧਾ, ਦੂਰ ਅੰਦੇਸ਼ੀ ਅਤੇ ਧੂਮ ਧਾਮ ਨਾਲ ਹੋਈ। ਵੀਕਡੇਜ਼ ਹੋਣ ਦੇ ਬਾਵਜੂਦ 300 ਤੋਂ ਵੱਧ ਲੋਕਾਂ ਨੇ ਪ੍ਰੀਵਾਰਾਂ ਸਮੇਤ ਸ਼ਮੂਲੀਅਤ ਕੀਤੀ। ਕੌਮਾਂ ਦੇ ਨਿਸ਼ਾਨਿਆਂ ਪ੍ਰਤੀ ਦ੍ਰਿੜਤਾ ਅਤੇ ਸੁਹਿਰਦਤਾ ਪ੍ਰਗਟਾਉਣ ਦਾ ਇਹ ਇਕ ਨਿਵੇਕਲ੍ਹਾ ਅਤੇ ਸੰਦਰ ਤਰੀਕਾ ਹੈ ਕਿ ਕੌਮੀਅਤ ਨੂੰ ਪ੍ਰਣਾਏ ਲੋਕਾਂ ਦਾ ਇਕੱਠ ਬੁਲਾ ਕੇ ਜਸ਼ਨ ਦੇ ਰੂਪ ਵਿੱਚ ਉਸਨੂੰ ਤਰਤੀਬ ਦਿੱਤੀ ਜਾਵੇ। ਦਿਲਾਂ ਅੰਦਰ ਕਈ ਸੂਰਜਾਂ ਜਿਨੀ ਗਰਮੀ ਅਤੇ ਸੀਤਲ ਸੋਮਿਆਂ ਜਿਹੀ ਠੰਡ ਸਮੋਣ ਦੀ ਸਮਰੱਥਾ ਰੱਖਣ ਵਾਲਾ ਖਾਲਸਾ ਅਜਿਹੇ ਸਮਾਗਮਾਂ ਨੂੰ ਤਰਤੀਬ ਅਕਾਲ ਪੁਰਖ ਦੀ ਰਜ਼ਾ ਵਿੱਚ ਰਹਿੰਦਿਆਂ ਕਰਦਾ ਹੈ। ਸੰਨ 1699 ਵਿੱਚ ਕੇਸਗੜ੍ਹ ਦੇ ਮੈਦਾਨ ਵਿੱਚ ਤਲਵਾਰ ਦੀ ਨੋਕ ਚੋਂ, ਹਵਾਵਾਂ ਦੀ ਤਾਜ਼ਗੀ ਅਤੇ ਅਸਮਾਨ ਦੀ ਤਾਣੀ ਚਾਦਰ ਹੇਠ ਧਰਤੀ ਦੀ ਬੁੱਕਲ ਵਿੱਚ ਗੁਰੂ ਦੀ ਮਰਜ਼ੀ ਅਨੁਸਾਰ ਜ਼ੁਲਮ ਅਤੇ ਜਬਰ ਲਈ ਇੱਕ ਲਲਕਾਰ ਬਣ ਕੇ ਖਾਲਸਾ ਪ੍ਰਗਟ ਹੋਇਆ ਸੀ। ਇਸ ਲਲਕਾਰ ਨੇ ਮੁੱਢ ਕਦੀਮ ਤੋਂ ਹੀ ਦਿੱਲੀ ਤਖਤ ਬੈਠਣ ਵਾਲੇ ਹਰ ਹਾਕਮ ਨੂੰ ਵਖਤ ਪਾਈ ਰੱਖਿਆ ਹੈ। ਅਜੋਕੇ ਸਮ੍ਹੇਂ ਅੰਦਰ ਵੀ ਦਿੱਲੀ ਤਖਤ ਤੇ ਬੈਠੇ ਹਾਕਮਾਂ ਦੀ ਨੀਂਦ ਖਾਲਸੇ ਨੇ ਹਰਾਮ ਕੀਤੀ ਹੋਈ ਹੈ। ਇਸੇ ਕਰਕੇ ਦਿੱਲੀ ਦਰਬਾਰ ਦੇ ਮੁੱਖੀ ਮਨਮੋਹਣ ਸਿੰਘ ਨੇ ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਸਟੀਫਂ ਹਾਰਪਰ ਨੂੰ ਬੇਨਤੀ ਕੀਤੀ ਹੈ ਕਿ ਉਹ ਕੈਨੇਡਾ ਵਿੱਚ ਆਪਣੇ ਹੱਕਾਂ ਲਈ ਸਰਗਰਮ ਸਿੱਖਾਂ ਉਪਰ ਨਜ਼ਰ ਰੱਖੇ।
ਅੱਜ ਦੇ ਸਮਾਗਮ ਦੀ ਵਿਲੱਖਤਾ ਇਸ ਕਰਕੇ ਵੀ ਵੱਧ ਹੈ ਕਿਊਂਕਿ 300 ਸਾਲ ਪਹਿਲਾਂ ਬਾਬਾ ਬੰਦਾ ਸਿੰਘ ਬਹਾਦਰ ਨੇ ਸਿੱਖ ਰਾਜ ਸਥਾਪਤ ਕਰਕੇ ਸੰਸਾਰ ਦੇ ਲੋਕਾਂ ਨੂੰ ਦਿਖਾ ਦਿੱਤਾ ਸੀ ਕਿ ਖਾਲਸਾ ਚੌਕੀਦਾਰੀ ਹੀ ਨਹੀਂ ਸਗੋਂ ਬਾਦਸ਼ਾਹੀ ਵੀ ਕਰ ਸਕਦਾ ਹੈ। ਇਸ ਸਥਾਪਨਾ ਨੂੰ ਸਮਰਪਿਤ ਅੱਜ ਦੇ ਸਮਾਗਮ ਵਿੱਚ ਬੁਲਾਰਿਆਂ ਦੀ ਜਬਰਦਸਤ ਲਾਈਨ ਅੱਪ ਸਦਕਾ ਵਿਚਾਰਾਂ ਬੜੀਆਂ ਹੀ ਸਾਰਥਕ ਅਤੇ ਤੱਥ ਭਰਪੂਰ ਸਨ।
ਯੂਨਾਈਟਡ ਫਰੰਟ ਆਫ ਸਿੱਖਸ ਸੀਨੀਅਰ ਆਗੂ ਅਵਤਾਰ ਸਿੰਘ ਪੂਨੀਆ ਨੇ ਆਈਆਂ ਸੰਗਤਾਂ ਨੂੰ ਜੀ ਆਇਆਂ ਕਿਹਾ ਅਤੇ ਸਭ ਦਾ ਧੰਨਵਾਦ ਕੀਤਾ, ਜਿੰਨ੍ਹਾਂ ਨੇ ਮੀਡੀਏ ਰਾਹੀਂ ਦਿੱਤੇ ਸੱਦੇ ਨੂੰ ਸਵਿਕਾਰ ਕਰਦਿਆਂ ਕੌਮ ਦੇ ਦਰਦ ਦੀ ਦਾਸਤਾਨ ਨੂੰ ਮਹਿਸੂਸ ਕੀਤਾ। ਸ੍ਰ. ਪੂਨੀਆ ਨੇ ਕਿਹਾ ਕਿ ਸਿੱਖ ਕੌਮ ਦੀ ਤਰਾਸਦੀ ਰਹੀ ਹੈ ਕਿ ਜਿੰਨ੍ਹਾਂ ਅਲਾਮਤਾਂ ਨੂੰ ਸਾਨੂੰ ਗੁਰੂ ਨੇ ਵਰਜ੍ਹਿਆ ਸੀ, ਉਨ੍ਹਾਂ ਅਲਾਮਤਾਂ ਦੀ ਮਿਕਦਾਰ ਜਿਵੇਂ ਹਊਮੈ, ਹੰਕਾਰ ਅਤੇ ਧੜੇਬਾਜ਼ੀ ਸਾਡੀਆਂ ਆਗੂ ਸਖ਼ਸ਼ੀਅਤਾਂ ਵਿੱਚ ਵੱਧ ਮਿਲਦੀ ਹੈ।
ਸਟੇਜ ਦੇ ਸੰਚਾਲਕ ਰਾਮਪਾਲ ਸਿੰਘ ਢਿਲੋਂ ਨੇ ਅੱਜ ਦੇ ਪ੍ਰੋਗ੍ਰਾਮ ਨੂੰ ਤਰਤੀਬ ਦਿੱਤੀ। ਸ਼ੁਰੂ ਵਿੱਚ ਤਰਲੋਚਨ ਸਿੰਘ ਮੰਝ ਨੇ ਇੱਕ ਕਵਿਤਾ ਰਾਹੀਂ ਇਸ ਇਨਕਲਾਬੀ ਮੰਚ ਦਾ ਆਗਾਜ਼ ਕੀਤਾ। ਉਪਰੰਤ ਗੁਰਪ੍ਰੀਤ ਸਿੰਘ ਨੇ ਆਪਣੀ ਨਜ਼ਮ ਪੇਸ਼ ਕੀਤੀ ਅਤੇ ਇਸ ਮੰਚ ਨੂੰ ਹੋਰ ਰੌਣਕ ਪ੍ਰਦਾਨ ਕੀਤੀ। ਅੱਜ ਦੇ ਬੁਲਾਰਿਆਂ ਦੀ ਲਿਸਟ ਵਿੱਚ ਪਲੇਠੇ ਬੁਲਾਰੇ ਮਨੋਹਰ ਸਿੰਘ ਬੱਲ ਨੇ ਕੈਨੇਡਾ ਦੇ ਸਾਬਕਾ ਸਿਹਤ ਮੰਤਰੀ ਅਤੇ ਬ੍ਰਿਟਿਸ਼ ਕੋਲੰਬੀਆ ਦੇ ਪ੍ਰੀਮੀਅਰ ਉੱਜਲ ਦੁਸਾਂਝ ਵਲੋਂ ਕੀਤੀ ਗਈ ਬਿਆਨਬਾਜ਼ੀ ਤੇ ਕਟਾਰ ਮਾਰੀ। ਉਨ੍ਹਾਂ ਕਿਹਾ ਕਿ ਦੁਸਾਂਝ ਇੱਕ ਪੁਰਾਣਾ ਸਿਆਸਤਦਾਨ ਹੈ ਪਰ ਉਸਨੂੰ ਗੈਰ ਜਿ਼ੰਮੇਵਾਰਨਾ ਬਿਆਨਬਾਜ਼ੀ ਤੋਂ ਗੁਰੇਜ਼ ਕਰਨਾ ਚਾਹੀਦਾ ਹੈ। ਸ੍ਰੀ ਬੱਲ ਨੇ ਉਨ੍ਹਾਂ ਵਲੋਂ ਬਣਾਏ ਫੇਸਬੁੱਕ ਗਰੁੱਪ ਦਾ ਜਿ਼ਕਰ ਕਰਦਿਆਂ ਕਿਹਾ ਕਿ ਸਭ ਨੂੰ ਇਸ ਗਰੁੱਪ ਦੇ ਮੈਂਬਰ ਬਣਨਾ ਚਾਹੀਦਾ ਹੈ। ਉਨ੍ਹਾਂ ਦੱਸਿਆ ਕਿ ਨਿਕਟ ਭਵਿੱਖ ਵਿੱਚ ਉਹ ਲਿਬਰਲ ਲੀਡਰ ਨਾਲ ਮੀਟਿੰਗ ਕਰਕੇ ਉੱਜਲ ਦੁਸਾਂਝ ਦੀਆਂ ਟਿੱਪਣੀਆਂ ਬਾਰੇ ਇਤਰਾਜ਼ ਪ੍ਰਗਟ ਕਰਨਗੇ। ਉਨ੍ਹਾਂ ਕਿਹਾ ਕਿ ਅਗਰ ਅਸੀਂ ਆਪਣੇ ਬੱਚਿਆਂ ਨੂੰ ਸਿੱਖ ਇਤਹਾਸ ਬਾਰੇ ਦੱਸਦੇ ਹਾਂ ਤਾਂ ਕੀ ਅਸੀਂ ਉਨ੍ਹਾਂ ਦੇ ਦਿਲ੍ਹਾਂ ਵਿੱਚ ਜ਼ਹਿਰ ਭਰ ਰਹੇ ਹਾਂ। ਇਹ ਪਹਿਲੀ ਵਾਰ ਹੈ ਕਿ ਕਿਸੇ ਨੇ ਸਾਡੇ ਯੂਥ ਨੂੰ ਉਨ੍ਹਾਂ ਦੇ ਅਤੀਤ ਬਾਰੇ ਦੱਸਣ ਤੇ ਟਿੱਪਣੀ ਕੀਤੀ ਹੈ। ਸ੍ਰ. ਬੱਲ ਨੇ ਕਿਹਾ ਕਿ ਜਦ ਤੱਕ ਦੁਸਾਂਝ ਆਪਣੀ ਟਿੱਪਣੀ ਦੇ ਖੇਦ ਨਹੀਂ ਪ੍ਰਗਟਾਉਂਦਾ, ਉਦੋਂ ਤੱਕ ਅਸੀਂ ਇਸ ਮੁਹਿੰਮ ਨੂੰ ਜਾਰੀ ਰੱਖਾਂਗੇ।
ਟੂਲੀਡੋ ਓਹਾਇਓ ਤੋਂ ਉਚੇਚੇ ਤੌਰ ਤੇ ਪਹੁੰਚੇ ਸਿੱਖ ਕੌਮ ਦੇ ਬੁੱਧੀਜੀਵੀ ਸ੍ਰ. ਕੁਲਦੀਪ ਸਿੰਘ ਟੁਲੀਡੋ ਨੇ ਸਿੱਖ ਇਤਹਾਸ ਦੇ ਝਰੋਖੇ ਚੋਂ ਖਾਲਸਾ ਪੰਥ ਦੀਆਂ ਪ੍ਰਾਪਤੀਆਂ ਦਾ ਜਿ਼ਕਰ ਕੀਤਾ। ਉਨ੍ਹਾਂ ਕਿਹਾ ਕਿ ਜਿਹੜਾ ਖਾਲਸਾ ਰਾਜ ਬਾਬਾ ਬੰਦਾ ਸਿੰਘ ਬਹਾਦਰ ਨੇ ਸਥਾਪਤ ਕੀਤੀ ਹੈ ਇਹ ਗੁਰੂ ਗੋਬਿੰਦ ਸਿੰਘ ਜੀ ਦੀ ਬਖਸਿ਼ਸ਼ ਸੀ ਜਿਸ ਦਾ ਉਨਾਂ ਨੇ ਜਫ਼ਰਨਾਮਾ ਵਿੱਚ ਜਿ਼ਕਰ ਕੀਤਾ ਹੈ। ਟੂਲੀਡੋ ਨੇ ਵੱਡੇ ਵੱਡੇ ਇਤਹਾਸਕਾਰਾਂ ਦੇ ਹਵਾਲਿਆਂ ਨਾਲ ਇਹ ਦਰਸਾਇਆ ਕਿ ਗੁਰੂ ਦੀ ਬਖਸਿ਼ਸ਼ ਨਾਲ ਖਾਲਸੇ ਦੇ ਮੁੱਠੀ ਭਰ ਸਿੰਘਾਂ ਨੇ ਦੁਸ਼ਮਣ ਦੀਆਂ ਹਜ਼ਾਰਾਂ ਦੀਆਂ ਫੌਜ਼ਾਂ ਦੇ ਛੱਕੇ ਛੁਡਾ ਦਿੱਤੇ।
ਕੁਲਦੀਪ ਸਿੰਘ ਨੇ ਬੜੇ ਵਿਸਥਾਰ ਨਾਲ ਸਿੱਖ ਕੌਮ ਦੇ ਇਸ ਮਾਣਮੱਤੇ ਇਤਹਾਸ ਤੇ ਚਾਨਣਾ ਪਾਇਆ। ਉਨ੍ਹਾਂ ਦੱਸਿਆ ਕਿ ਸਿੱਖਾਂ ਨੂੰ ਹਿੰਦੂ ਬਣਾਉਣ ਲਈ ਕਈ ਸਿੱਖਾਂ ਨੂੰ ਵੀ ਵਰਤਿਆ ਗਿਆ। ਸ੍ਰੀ ਦਰਬਾਰ ਸਾਹਿਬ ਵਿੱਚ ਮੂਰਤੀਆਂ ਦੀ ਪੂਜਾ ਦਾ ਸਿਲਸਿਲਾ ਵੀ ਭਾਰੂ ਰਿਹਾ ਜਿਸ ਨੂੰ ਸਿੱਖਾਂ ਨੇ ਬੰਦ ਕਰਵਾ ਕੇ ਸਿੱਖ ਪੰਥ ਦੀ ਅੱਡਰੀ ਹਸਤੀ ਨੂੰ ਉਭਾਰਿਆ। ਅਕਾਲੀ ਦਲ ਤੇ ਕਟਾਕਸ ਕਸਦਿਆਂ ਟੂਲੀਡੋ ਨੇ ਕਿਹਾ ਕਿ ਅਸੀਂ ਕੁਰਬਾਨੀਆਂ ਦੇ ਕੇ ਇਸ ਸੰਸਥਾ ਨੂੰ ਹੋਂਦ ਵਿੱਚ ਲਿਆਂਦਾ ਸੀ ਜੋ ਹੁਣ ਫਿਰਕਾਪ੍ਰਸਤ ਹਿੰਦੂ ਸੰਸਥਾ ਦੀ ਝੋਲ੍ਹੀ ਵਿੱਚ ਬੈਠੀ ਹੈ।
ਉਨ੍ਹਾਂ ਕਿਹਾ ਕਿ ਭਾਰਤ ਦੀ ਸਰਕਾਰ ਰਾਸ਼ਟਰਪਤੀ ਗਿਆਨੀ ਜੈਲ ਸਿੰਘ ਦੇ ਫੋਨ ਨੂੰ ਸੁਣਿਆ ਜਾਂਦਾ ਸੀ। ਸਿੱਖ ਉਸਨੂੰ ਗਦਾਰ ਮੰਨਦੇ ਹਨ, ਪਰ ਰਾਜੀਵ ਗਾਂਧੀ ਉਸਤੇ ਵੀ ਯਕੀਨ ਨਹੀਂ ਸੀ ਕਰਦਾ। ਕੀ ਫਾਇਦਾ ਅਜਿਹੀ ਸਰਦਾਰੀ ਲੈਣਦਾ?
ਅਖੀਰ ਵਿੱਚ ਸੁਆਲ ਕਰਨੇ ਚਾਹਾਂਗਾ ਕਿ ਖਾਲਿਸਤਾਨ ਵਿੱਚ ਰੂਪ ਰੇਖਾ ਕੀ ਹੋਵੇਗੀ, ਕਿਹੜੇ ਕਿਹੜੇ ਇਲਾਕੇ ਹੋਣਗੇ, ਕਿਸ ਕਿਸਮ ਦੀ ਸਰਕਾਰ ਹੋਵੇਗੀ, ਵਿਧਾਨ ਕਿਹੋ ਜਿਹਾ ਹੋਵੇਗਾ, ਖਾਲਿਸਤਾਨ ਦੀ ਆਰਥਿਕ ਨੀਤੀ ਦੀ ਰੂਪਰੇਖਾ ਕੀ ਹੋਵੇਗੀ ਅਤੇ ਮੌਕਾ ਪ੍ਰਸਤ ਵੀਰਾਂ ਪ੍ਰਤੀ ਕੀ ਜਜ਼ਬਾਤ ਹੋਣਗੇ। ਟੂਲੀਡੋ ਨੇ ਕਿਹਾ ਕਿ ਇਨ੍ਹਾਂ ਮਸਲਿਆਂ ਤੇ ਸਾਨੂੰ ਹੁਣ ਤੋਂ ਹੀ ਵਿਚਾਰਾਂ ਕਰਨੀਆਂ ਸ਼ੁਰੂ ਕਰ ਦੇਣੀਆਂ ਚਾਹੀਦੀਆਂ ਹਨ। ਅੱਜ ਦੀ ਆਵਾਜ਼ ਦੇ ਸੰਚਾਲਕ ਸੁਖਦੇਵ ਸਿੰਘ ਗਿੱਲ ਨੇ ਸਿੱਖ ਕੌਮ ਦੇ ਇਸ ਕੌਮੀ ਸੰਘਰਸ਼ ਵਿੱਚ ਮੀਡੀਏ ਦੇ ਰੋਲ ਦੀ ਚਰਚਾ ਕੀਤੀ। ਉਂਨ੍ਹਾਂ ਦੱਸਿਆ ਕਿ ਸਰਕਾਰਾਂ ਵਲੋਂ ਕੌਮੀ ਲਹਿਰਾਂ ਨੂੰ ਪੱਟੜੀ ਤੋਂ ਲਾਹੁਣ ਲਈ ਮੀਡੀਏ ਦੀ ਖਰੀਦੋ ਫਰੋਖਤ ਕੀਤੀ ਜਾਂਦੀ ਹੈ। ਗਿੱਲ ਨੇ ਕਿਹਾ ਕਿ ਇਨਸਾਨ ਸੰਘਰਸ਼ ਕਰਦਾ ਕਰਦਾ ਸੰਸਾਰ ਚੋਂ ਕੂਚ ਕਰ ਜਾਂਦਾ ਹੈ ਪਰ ਦੁਨੀਆਂ ਚੱਲਦੀ ਰਹਿੰਦੀ ਹੈ ਇਵੇਂ ਹੀ ਸਿੱਖ ਕੌਮ ਦੇ ਆਜ਼ਾਦੀ ਦੇ ਸੰਘਰਸ਼ ਨੇ ਉਦੋਂ ਤੱਕ ਚਲਦੇ ਹੀ ਰਹਿਣਾ ਹੈ। ਮੀਡੀਆ ਲੋਕਾਂ ਦੇ ਕੰਨ ਅਤੇ ਅੱਖਾਂ ਹੁੰਦੇ ਹਨ ਇਸ ਕਰਕੇ ਸਾਡੀ ਅੱਖਾਂ ਅਤੇ ਕੰਨ੍ਹਾਂ ਦਾ ਸਹੀ ਸਲਾਮਤ ਅਤੇ ਕੌਮ ਪੱਖੀ ਹੋਣਾ ਜਰੂਰੀ ਹੈ। ਹੱਕ, ਸੱਚ ਅਤੇ ਇਨਸਾਫ਼ ਦੀ ਗੱਲ ਕਰਨ ਦੀ ਲੋੜ ਹੈ। ਬਾਬਾ ਬੰਦਾ ਸਿੰਘ ਬਹਾਦਰ ਨੂੰ ਗੁਰੂ ਗੋਬਿੰਦ ਸਿੰਘ ਨੇ ਥਾਪੜਾ ਦੇ ਕੇ ਸਰਹੰਦ ਦੀ ਇੱਟ ਨਾਲ ਇੱਟ ਖੜਕਾਉਣ ਲਈ ਤੋਰਿਆ ਸੀ ਪਰ ਅੱਜ ਸਾਡੀ ਆਗੂ ਪ੍ਰਣਾਲੀ, ਕੌਮ ਵਿਰੋਧੀ ਮੀਡੀਏ ਨੂੰ ਥਾਪੜਾ ਦੇਈ ਜਾ ਰਹੀ ਹੈ। ਨਾ ਤਾਂ ਸਿੱਖ, ਸਾਬਕਾ ਸਿੱਖ ਬਣ ਸਕਦਾ ਹੈ ਅਤੇ ਨਾਂ ਹੀ ਕਿਸੇ ਖਾਲਿਸਤਾਨੀ ਨੂੰ ਸਾਬਕਾ ਖਾਲਿਸਤਾਨੀ ਬਣਨਾ ਚਾਹੀਦਾ ਹੈ।
ਭੁਪਿੰਦਰ ਸਿੰਘ ਢਿਲੋਂ ਨੇ ਇਸ ਮੌਕੇ ਸਿੱਖ ਕੌਮ ਦੇ ਵਿਲੱਖਣ ਇਤਹਾਸ ਤੋਂ ਗੱਲ ਸ਼ੁਰੂ ਕੀਤੀ। ਅਤੇ ਸਰ ਮੁਹੰਮਦ ਇਕਬਾਲ ਦਾ ਸ਼ੇਅਰ ਪੜਿਆ; ਐ ਗੰਗਾ ਜ਼ਮਨਾ ਤੁਝ ਕੋ ਬੀ ਯਾਦ ਹੋ ਗਾ ਵੋਹ ਦਿਨ, ਉਤਰਾ ਥਾ ਤੇਰੇ ਕਿਨਾਰੇ ਜਿਸ ਦਿਨ ਕਾਫਲਾ ਹਮਾਰਾ, ਕੁਛ ਬਾਤ ਹੈ ਕਿ ਹਸਤੀ ਮਿੱਟਤੀ ਨਹੀਂ ਹਮਾਰੀ, ਸਦੀਓਂ ਰਹਾ ਹੈ ਦੁਸ਼ਮਨ ਦੌਰੇ ਜ਼ਮਾਂ ਹਮਾਰਾ।।
ਭੁਪਿੰਦਰ ਸਿੰਘ ਢਿਲੋਂ ਨੇ ਇਸ ਮੌਕੇ ਇਤਹਾਸਕ ਹਵਾਲੇ ਦੇ ਦੇ ਕੇ ਸਿੱਖਾਂ ਨਾਲ ਹੋ ਰਹੀਆਂ ਧੱਕੇਸਾਹੀਆਂ ਦਾ ਜਿ਼ਕਰ ਕੀਤਾ। ਉਨ੍ਹਾਂ ਕਿਹਾ ਕਿ 29 ਅਪਰੈਲ 1986 ਨੂੰ ਸਿੱਖਾਂ ਦਾ ਸਮੂਹਵਾਦੀ ਖਾਲਿਸਤਾਨ ਦਾ ਐਲਾਨ ਕੀਤਾ ਸੀ ਜੋ ਇਤਹਾਸਕ ਦਸਤਾਵੇਜ਼ ਹੈ।
ਇਸ ਤੋਂ ਬਾਅਦ ਸ੍ਰ. ਸੁਖਮਿੰਦਰ ਸਿੰਘ ਹੰਸਰਾ ਇਤਹਾਸ ਅਤੇ ਜਜ਼ਬਾਤ ਤੇ ਆਧਾਰਿਤ ਵਿਚਾਰ ਪੇਸ਼ ਕੀਤੇ। ਅਮਰੀਕਨ ਕੌਂਸਲ ਆਫ ਲਾਈਫ ਇੰਸੁਰਰ ਵਲੋਂ ਇੱਕ ਕਥਨ ਜਾਰੀ ਕੀਤਾ ਗਿਆ ਕਿ “ਅਸੀ ਨਹੀਂ ਸਮਝਦੇ ਕਿ ਤੁਸੀਂ ਲੋਕਾਂ ਨੂੰ ਨਹੀਂ ਕਹਿ ਸਕਦੇ ਕਿ ਜਿੰਨ੍ਹਾਂ ਨੇ ਉਨ੍ਹਾਂ ਉਪਰ ਤਸ਼ੱਦਦ ਅਤੇ ਨਸ਼ਲਕੁਸ਼ੀ ਕੀਤੀ ਹੋਵੇ, ਕਿ ਹੁਣ ਉਨ੍ਹਾਂ ਨੂੰ ਉਸੇ ਸਰਕਾਰ ਦੇ ਕਬਜ਼ੇ ਵਾਲੀ ਸਲਤਨਤ ਜਾਂ ਦੇਸ਼ ਵਿੱਚ ਰਹਿਣਾ ਪਵੇਗਾ। We do not believe that you can ask people who have been victims of an ongoing repression and most recently of genocide, to now have to go back to live in an occupied territory by the Serbian government,”
American Council of Life Insurersਕੌਂਸਲ ਅਨੁਸਾਰ ਅਜਿਹਾ ਮੁਮਕਨ ਨਹੀਂ ਹੈ।
ਭਗਤ ਫਰੀਦਾ ਜੀ ਦੀ ਬਾਣੀ ਦੀ ਬੜੀ ਪ੍ਰਚਲਤ ਤੁੱਕ ਹੈ, ਜਿਸ ਵਿੱਚ ਵੀ ਭਗਤ ਜੀ ਕੀ ਇਹੀ ਕਹਿ ਰਹੇ ਹਨ ਕਿ; ਫਰੀਦਾ ਬਾਰਿ ਪਰਾਇਐ ਬੈਸਣਾ ਸਾਂਈ ਮੁਝੈ ਨ ਦੇਹਿ ॥ਜੇ ਤੂ ਏਵੈ ਰਖਸੀ ਜੀਉ ਸਰੀਰਹੁ ਲੇਹਿ ॥42॥ ਕਿ ਅਗਰ ਮੈਨੂੰ ਗੈਰਾਂ ਦੀ ਦਹਿਲੀਜ਼ ਤੇ ਰਹਿਣਾ ਪਵੇਗਾ ਤਾਂ ਮੈਨੂੰ ਇਹ ਜਿ਼ੰਦਗੀ ਦੀ ਲੋੜ ਨਹੀਂ। ਪਰ ਸਾਨੂੰ ਇਹੀ ਕਿਹਾ ਜਾ ਰਿਹਾ ਹੈ ਕਿ ਭਾਰਤ ਜਿਸ ਨੇ ਸਿੱਖਾਂ ਦੀ ਰੱਜ ਕੇ ਨਸਲਕੁਸ਼ੀ ਕੀਤੀ ਹੈ ਕਿ ਤੁਹਾਨੂੰ ਭਾਰਤ ਵਿੱਚ ਉਸੇ ਸਰਕਾਰ ਦੇ ਪ੍ਰਬੰਧ ਹੇਠ ਰਹਿਣਾ ਪਵੇਗਾ।
ਕੁਦਰਤ ਦਾ ਅਸੂਲ ਹੈ ਕਿ ਮਨੁੱਖ ਮਜਬੂਰ ਹੋ ਕੇ ਭਾਵੇਂ ਕੋਈ ਧੱਕਾ ਬਰਦਾਸ਼ਤ ਕਰ ਲਵੇ ਪਰ ਜਦੋਂ ਉਹ ਵਿਰੋਧ ਕਰਨ ਦੇ ਸਮਰੱਥ ਹੁੰਦਾ ਹੈ ਤਾਂ ਉਹ ਵਿਰੋਧ ਜਰੂਰ ਕਰਦਾ ਹੈ। ਉਸਨੂੰ ਅਹਿਸਾਸ ਹੁੰਦਾ ਹੈ ਕਿ ੳਸਨੇ ਜੋ ਪਹਾੜੀਆਂ ਕੁੱਦੀਆਂ ਹਨ ਇਨਾਂ ਤੋਂ ਬਾਅਦ ਹੋਰ ਵੀ ਬਹੁਤ ਪਹਾੜੀਆਂ ਚੜਨੀਆਂ ਬਾਕੀ ਹਨ, ਭਾਵ ਉੱਦਮਸ਼ੀਲ ਰਹਿਣਾ ਹੀ ਜਿ਼ੰਦਗੀ ਹੈ ।,br> ਅੱਜ ਆਪਾਂ ਖਾਲਸਾ ਰਾਜ ਦੀ 300 ਸਾਲਾ ਸ਼ਤਾਬਦੀ ਮਨਾਅ ਰਹੇ ਹਾਂ। ਅਜਿਹਾ ਦੁਨੀਆਂ ਦੇ ਕੋਨੇ ਕੋਨੇ ਵਿੱਚ ਵੱਸਦੇ ਸਿੱਖਾਂ ਵਲੋਂ ਹੀ ਕੀਤਾ ਜਾ ਰਿਹਾ ਹੈ। ਪੰਜਾਬ ਵਿੱਚ ਕਰੋੜਾ ਰੁਪੈ ਖਰਚੇ ਜਾ ਰਹੇ ਹਨ। ਸੁਆਲ ਇਹ ਹੈ ਕਿ ਅਗਰ 1710 ਈਸਵੀ ਵਿੱਚ ਖਾਲਸਾ ਰਾਜ ਦੀ ਸਥਾਪਨਾ ਦਾ ਕਾਰਜ ਸ਼ਾਨਾਮੱਤਾ ਸੀ ਤਾਂ 2010 ਵਿੱਚ ਖਾਲਸਾ ਰਾਜ ਨੂੰ ਸਥਾਪਤ ਕਰਨ ਤੋਂ ਕੰਨੀ ਕਿਉਂ ਕਤਰਾਈ ਜਾ ਰਹੀ ਹੈ। ਅਗਰ ਅਸੀਂ ਹੁਣ ਖਾਲਸਾ ਰਾਜ ਸਥਾਪਤ ਕਰਨ ਦੇ ਉੱਦਮ ਨਹੀਂ ਕਰਨੇ ਤਾਂ ਕੀ ਮਤਲਬ ਹੈ ਇਨਾਂ ਦਿਵਸਾਂ ਨੂੰ ਮਨਾਉਣਾ ਦਾ?
ਕਿਸੇ ਸਿਆਣੇ ਦਾ ਕਥਨ ਹੈ ਕਿ “ਅਗਰ ਤੁਹਾਨੂੰ ਨਹੀਂ ਪਤਾ ਕਿ ਤੁਸੀਂ ਕਿਧਰ ਜਾ ਰਹੇ ਹੋ ਤਾਂ ਕੋਈ ਵੀ ਸੜਕ ਤੁਹਾਨੂੰ ਤੁਹਾਡੀ ਮੰਜਿ਼ਲ ਤੇ ਪਹੁੰਚਾ ਸਕਦੀ ਹੈ” ਭਾਵ ਕਦਮਾਂ ਦੀ ਕ੍ਰਿਆਸ਼ੀਲਤਾ, ਕਦਮਾਂ ਦੀ ਦਿਸ਼ਾ ਤਹਿ ਕਰਦੀ ਹੈ ਅਤੇ ਚੱਲਣਾ ਹੀ ਮੰਜਿ਼ਲ ਨੂੰ ਨੇੜੇ ਕਰ ਸਕਦਾ ਹੈ। ਦੁਨੀਆਂ ਤੇ ਕਈ ਕਿਸਮ ਦੇ ਰਾਜ ਪ੍ਰਬੰਧ ਚੱਲ ਰਹੇ ਹਨ ਪਰ ਇਨਾਂ ਨੂੰ ਦੋ ਭਾਗਾਂ ਵਿੱਚ ਤਕਸੀਮ ਕੀਤਾ ਜਾ ਸਕਦਾ ਹੈ। ਭਾਰਤ ਜ਼ੁਲਮ ਸ਼ਕਤੀ ਦੇ ਆਧਾਰਿਤ ਚੱਲ ਰਿਹਾ ਰਾਜ ਹੈ ਜਦੋਂ ਕਿ ਕੈਨੇਡਾ ਅਤੇ ਅਮਰੀਕਾ ਦਾ ਰਾਜ ਲੋਕ ਹੱਕਾਂ ਅਤੇ ਇਨਸਾਫ ਦੇ ਆਧਾਰਿਤ ਚੱਲ ਰਿਹਾ ਹੈ। ਇਨਸਾਫ ਪਸੰਦ ਮੁਲਕਾਂ ਦੇ ਰਾਜ ਦੇ ਝਰੋਖੇ ਚੋਂ ਜ਼ੁਲਮੀ ਰਾਜ ਨੂੰ ਖਤਮ ਕਰਨ ਲਈ ਇਨਸਾਫਪਸੰਦ ਲੋਕਾਂ ਨੂੰ ਅੱਗੇ ਆਉਣਾ ਚਾਹੀਦਾ ਹੈ।
ਔਟੋਮੈਨ ਤੁਰਕਿਸ਼ ਸੁਲਤਾਨ ਨੇ ਤੁਰਕੀ ਨੂੰ ਸੈਂਕੜੇ ਸਾਲਾਂ ਤੋਂ ਆਪਣੇ ਕਬਜ਼ੇ ਵਿੱਚ ਜਕੜਿਆ ਹੋਇਆ ਸੀ ਜਦੋਂ ਇੱਕ ਦਾਨਿਸ਼ਮੰਦ ਕੇਮਲ ਅੱਟਾਤੁਰਕ ਨੇ 1924 ਵਿੱਚ ਉਸਦਾ ਕਬਜ਼ਾ ਖਤਮ ਕਰਕੇ ਤੁਰਕੀ ਨੂੰ ਆਜ਼ਾਦ ਕਰਵਾਇਆ। ਕੇਮਲ ਲਿਖਦਾ ਹੈ ਕਿ:- “ਆਜ਼ਾਦੀ ਮਿਲਦੀ ਨਹੀਂ ਲਈ ਜਾਂਦੀ ਹੈ” ”Sovereignty is not given, it is taken”
ਕੇਮਲ ਅੱਟਾਤੁਰਕ ਇੱਕ ਸਟੇਟਸਮੈਨ ਸੀ, ਉਹ ਆਪਣੇ ਲੋਕਾਂ ਦੀ ਆਜ਼ਾਦੀ ਲਈ ਆਪਣੇ ਇਲਮ ਨੂੰ ਹਥਿਆਰ ਵਜੋਂ ਵਰਤਦਾ ਸੀ ਜਦੋਂ ਕਿ ਸਾਡੇ ਭਾਈਚਾਰੇ ਵਿੱਚ ਬਹੁਤੇ ਦਾਨਿਸ਼ਮੰਦ ਕਮ-ਹਿੰਮਤੀ ਲੋਕ ਹਨ, ਉਹ ਕੌਮੀ ਆਜ਼ਾਦੀ ਦੀ ਗੱਲ ਕਰਨ ਬਜਾਏ ਕੌਮ ਨੂੰ ਹੋਰਨਾਂ ਭੰਬਲਭੂਸਿਆਂ ਵਿੱਚ ਪਾਈ ਰੱਖਦੇ ਹਨ। ਪਰ ਕੇਮਲ ਅੱਟਾਤੁਰਕ ਦਾ ਮੰਨਣਾ ਹੈ ਕਿ “ਇਨਸਾਫ ਮਾਲਕ ਦਾ ਬੁਨਿਆਦੀ ਢਾਂਚਾ ਹੁੰਦਾ ਹੈ” ““Justice is the infrastructure of proprietorship” ਕੇਮਲ ਅਨੁਸਾਰ ਇਨਸਾਫ ਹੀ ਰਾਜ ਦਾ ਬੁਨਿਆਦੀ ਢਾਂਚਾ ਹੁੰਦਾ ਹੈ।
ਭਾਰਤ ਦੇ ਬੁਨਿਆਦੀ ਢਾਂਚੇ ਵਿੱਚ ਕਿੰਨੇ ਛੇਕ ਹਨ ਇਨਾਂ ਦੀ ਗਿਣਤੀ ਤੁਸੀਂ ਐਮਨੈਸਟੀ ਇੰਟਰਨੈਸ਼ਨਲੀ, ਇੰਟਰਨੈਸ਼ਨ ਹਿਊਮਨ ਰਾਈਟਸ ਆਰਗੇ, ਪੰਜਾਬ ਹਿਊਮਨ ਰਾਈਟਸ ਆਰਗੇ, ਏਸ਼ੀਆ ਵਾਚ ਵਰਗੀਆਂ ਸੰਸਥਾਵਾਂ ਦੀਆਂ ਰਿਪੋਰਟਾਂ ਤੋਂ ਕਰ ਸਕਦੇ ਹੋ।
ਜਿਥੇ ਇਨਸਾਫ ਨਾਮ ਦੀ ਕੋਈ ਗੱਲ ਨਾ ਹੋਵੇ ਅਤੇ ਰਾਜੇ ਸੀਂਹ ਮੁਕੱਦਮ ਕੁੱਤਿਆਂ ਵਾਲਾ ਮਹੌਲ ਹੋਵੇ ਤਾਂ ਅਮਰੀਕਾ ਦੇ 3ਰਦ ਪ੍ਰਧਾਨ ਥਾਮਸ ਜੈਫਰਸਨ ਦਾ ਕਥਨ ਬੜਾ ਢੁੱਕਵਾਂ ਹੈ ਕਿ: “Resistance to tyrants is obedience to God.” Thomas Jefferson (American 3rd US President (1801-09) ਭਾਵ ਜ਼ਾਲਮ ਦਾ ਵਿਰੋਧ ਕਰਨਾ ਗੁਰੂ ਦੇ ਆਗਿਆਕਾਰੀ ਹੋਣਾ ਹੈ।
ਅਜੋਕੇ ਸਮ੍ਹੇਂ ਅੰਦਰ ਸਿੱਖ ਕੌਮ ਨੂੰ ਨਿਪੁੰਸਕ ਬਣਾਉਣ ਲਈ ਭਾਰਤ ਸਰਕਾਰ ਨੇ ਪ੍ਰਾਪੇਗੰਡਾ ਮਸ਼ੀਨਰੀ ਨੂੰ ਫੁੱਲ ਸਪੀਡ ਤੇ ਛੱਡਿਆ ਹੋਇਆ ਹੈ। ਅਸੀਂ ਵੇਖ ਰਹੇ ਹਾਂ ਕਿ ਜਿਹੜੇ ਅਦਾਰੇ ਸੌੜੀ ਸੋਚ ਦੇ ਮਾਲਕ ਹਨ ਉਨ੍ਹਾਂ ਦਾ ਸੌੜਾਪਣ ਵਿਰੋਧ ‘ਚ ਖੜਾ ਹੁੰਦਾ ਹੈ। ਖਾਲਿਸਤਾਨੀਆਂ ਦਾ ਵਿਰੋਧ ਅਤੇ ਖਾਲਿਸਤਾਨ ਦਾ ਵਿਰੋਧ ਦੋ ਵਿਸ਼ੇ ਹਨ। ਇਨਾਂ ਦੋਹਾਂ ਦੇ ਮਾਅਨਿਆਂ ਵਿੱਚ ਜ਼ਮੀਨ ਅਸਮਾਨ ਦਾ ਅੰਤਰ ਹੈ, ਜਦੋਂ ਕਿ ਖਾਲਿਸਤਾਨੀ ਵਿਅਕਤੀ ਦਾ ਵਿਰੋਧ ਕਰਦੇ ਕਰਦੇ ਇਹ ਅਦਾਰੇ, ਭਾਰਤ ਸਰਕਾਰ ਦੀ ਸੋਚ ਨੂੰ ਸਮਰਪਿਤ ਹੁੰ ਦਿਆਂ ਖਾਲਿਸਤਾਨ ਦੇ ਸੰਕਲਪ ਨਾਲ ਖਿਲਵਾੜ ਕਰ ਜਾਂਦੇ ਹਨ।
ਅਜਿਹੇ ਲੋਕਾਂ ਨੂੰ ਯੂ ਐਨ ਓ ਦੇ 7ਵੇਂ ਜਨਰਲ ਸਕੱਤਰ ਅਤੇ ਗਾਨਾ ਦੇ ਡਿਪਲੋਮੈਟ ਕੌਫੀ ਐਨਨ ਦੀ ਇੱਕ ਸਲਾਹ ਹੈ, ਜੋ ਇਨ੍ਹਾਂ ਸਿੱਖਾਂ ਦੀ ਆਦਤ ਤੇ ਪੂਰੀ ਢੁੱਕਦੀ ਹੈ ਕਿ ਅਗਰ ਤੁਸੀਂ ਕੋਈ ਉਲਟ ਕੰਮ ਵੀ ਕਰਨਾ ਹੈ ਤਾਂ ਉਹ ਪਾਸਾ ਚੁਣੋ ਜੋ ਸੁਤੰਤਰਤਾ ਵਾਲਾ ਹੋਵੇ। “If one is going to err, one should err on the side of liberty and freedom.”
Kofi Annan
29 ਅਪਰੈਲ 1986 ਨੂੰ ਸ੍ਰੀ ਅਕਾਲ ਤਖਤ ਸਾਹਿਬ ਤੋਂ ਹੋਏ ਖਾਲਿਸਤਾਨ ਦੇ ਐਲਾਨਨਾਮੇ ਪ੍ਰਤੀ ਹਰ ਸਿੱਖ ਦੀ ਸੁਹਿਰਦਤਾ ਅਤੇ ਦ੍ਰਿੜਤਾ ਹੋਣੀ ਲਾਜ਼ਮੀ ਹੈ। ਸਾਡੇ ਵਿੱਚ ਸੱਚ ਤੇ ਟਿੱਕਣ ਵਾਲੀ ਅਜਿਹੀ ਪਕਿਆਈ ਹੋਣੀ ਚਾਹੀਦੀ ਹੈ ਜਿਵੇਂ ਗੁਰੂ ਨਾਨਕ ਸਾਹਿਬ ਕਹਿੰਦੇ ਹਨ ਕਿ: ਰਤੁ ਪੀਣੇ ਰਾਜੇ ਸਿਰੈ ਉਪਰਿ ਰਖੀਅਹਿ, ਏਵੈ ਜਾਪੈ ਭਾਉ ॥ਭੀ ਤੂੰ ਹੈ ਸਾਲਾਹਣਾ ਆਖਣ ਲਹੈ ਨ ਚਾਉ ॥3॥
ਹੁਣ ਮੈਂ ਸਿੱਖ ਕੌਮ ਦੇ ਪਿਛਲੇ 60-70 ਸਾਲ ਦੇ ਇਤਹਾਸ ਵਿੱਚ ਖਾਲਿਸਤਾਨ ਦੇ ਸੰਕਲਪ ਪ੍ਰਤੀ ਕੀ ਸੋਚ ਸੀ ਅਤੇ ਸਮ੍ਹੇਂ ਸਮ੍ਹੇਂ ਸਿਰ ਊਨ੍ਹਾਂ ਨੇ ਕਿਹੋ ਜਿਹੇ ਮਤੇ ਪਾਸ ਕੀਤੇ।
* 13 ਅਪਰੈਲ ਸੰਨ 1999 ਨੂੰ ਸ੍ਰੀ ਅਨੰਦਪੁਰ ਸਾਹਿਬ ਦੀ ਪਵਿੱਤਰ ਧਰਤੀ ਤੇ ਸਿਮਰਨਜੀਤ ਸਿਮਘ ਮਾਨ ਨੇ ਖਾਲਿਸਤਾਨ ਦਾ ਨਾਹਰਾ ਬੁਲੰਦ ਕਰਕੇ ਇਸ ਸਿੱਧ ਕਰ ਦਿੱਤਾ ਕਿ ਇਹ ਸੰਕਲਪ ਸਿੱਖਾਂ ਦੇ ਜਿ਼ਹਨ ਵਿੱਚ ਉਵੇਂ ਹੀ ਮੌਜੂਦ ਹੈ। ਸ੍ਰ਼ੋਮਣੀ ਅਕਾਲ ਦਲ, ਜਮਹੂਰੀਅਤ ਦੇ ਦਾਇਰੇ ਵਿੱਚ ਰਹਿ ਕੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਉਤੇ ਆਧਾਰਿਤ, ਪੰਜਾਬੀ ਕੌਮੀ ਸਭਿਆਚਾਰ ਦੇ ਮੋਹਰੀ ਹੋਣ ਵਜੋਂ ਸਿੱਖ ਪੰਥ ਲਈ ਇੱਕ ਅਜਿਹੇ ਵੱਖਰੇ ਖਿੱਤੇ ਵਾਸਤੇ ਜੱਦੋਜਹਿਦ ਕਰਨ ਦੇ ਆਪਣੇ ਵਚਨ ਨੂੰ ਦੁਹਰਾਉਂਦਾ ਹੈ, ਜਿਥੇ ਉਹ ਆਜ਼ਾਦੀ ਦਾ ਨਿੱਘ ਮਾਣ ਸਕਣ।
* ਇਹ ਸਤਰਾਂ ਸ੍ਰੀ ਅਕਾਲ ਤਖਤ ਸਾਹਿਬ ਤੋਂ 1 ਮਈ ਸੰਨ 1994 ਨੂੰ ਹੀ ਜਾਰੀ ਕੀਤੇ ਗਏ ਅੰਮ੍ਰਿਤਸਰ ਐਲਾਨਨਾਮੇ ਦੀਆਂ ਹਨ। ਅੱਜ ਦੇ ਸੁਭਾਗ ਦਿਹਾੜੇ ਸ੍ਰੀ ਅਕਾਲ ਤਖਤ ਸਾਹਿਬ ਜੀ ਤੋਂ ਸਾਰੀ ਦੁਨੀਆਂ ਅਤੇ ਸਾਰੇ ਮੁਲਕਾਂ ਦੀਆਂ ਸਰਕਾਰਾਂ/ਹਕੂਮਤਾਂ ਦੇ ਸਾਹਮਣੇ ਐਲਾਨ ਕਰਦਾ ਹੈ ਅਤੇ ਉਨ੍ਹਾਂ ਨੂੰ ਸੂਚਿਤ ਕੀਤਾ ਜਾਂਦਾ ਹੈ ਕਿ ਅੱਜ ਤੋਂ ਖਾਲਸਾ ਪੰਥ ਦਾ ਆਪਣਾ ਘਰ “ਖਾਲਿਸਤਾਨ” ਹੋਵੇਗਾ।
* ਇਹ ਸਤਰਾਂ 29 ਅਪਰੈਲ ਸੰਨ 1986 ਨੂੰ ਪੰਥਕ ਕਮੇਟੀ ਵਲੋਂ ਸ੍ਰੀ ਅਕਾਲ ਤਖਤ ਸਾਹਿਬ ਤੋਂ ਜਾਰੀ ਕੀਤੇ ਐਲਾਨਨਾਮੇ ‘ਚ ਦਰਜ ਹਨ। ਇਹ ਸਮ੍ਹਾਂ 1986 ਦਾ ਹੈ।
ਦੇਸ਼ ਦੇ ਵਰਤਮਾਨ ਰਾਜਸੀ ਹਾਲਾਤ ਤੇ ਕੌਮਾਂ ਦੀ ਦਿਮਾਗੀ ਦਸ਼ਾ ਤੋਂ ਉਤਪੰਨ ਹੋਣ ਵਾਲਿਆਂ ਨਤੀਜਿਆਂ ਤੇ ਉਨ੍ਹਾਂ ਦਾ ਸਿੱਖਾਂ ਤੇ ਜੋ ਖਤਰਨਾਕ ਅਸਰ ਪੈਣ ਦੀ ਸੰਭਾਵਨਾ ਹੈ ਉਸਨੂੰ ਮੁੱਖ ਰੱਖ ਕੇ ਅਤੇ ਦੇਸ਼ ਵਿੱਚ ਜੋ ਇਨਕਲਾਬੀ ਤਬਦੀਲੀਆਂ ਹੋਣ ਵਾਲੀਆਂ ਹਨ, ਉਨ੍ਹਾਂ ਵਿੱਚ ਸਿੱਖ ਹਸਤੀ ਦੀ ਕਾਇਮੀ ਦੀ ਲੋੜ ਨੂੰ ਅਨੁਭਵ ਕਰਕੇ, ਇਸ ਅਜਲਾਸ ਦੀ ਰਾਏ ਹੈ ਕਿ ਸਿੱਖਾਂ ਦੇ ਮੁੱਖ ਧਰਮ ਅਸਥਾਨ, ਸਭਿਆਚਾਰਕ ਸਿੱਖ ਰਿਵਾਜ਼ਾਂ ਦੀ ਕਾਇਮੀ, ਸਿੱਖ ਸਵੈਮਾਨ ਅਤੇ ਆਜ਼ਾਦੀ ਦੀ ਰਾਖੀ ਤੇ ਭਵਿੱਖਤ ਵਿੱਚ ਸਿੱਖਾਂ ਦੀ ਤਰੱਕੀ ਲਈ ਸਿੱਖ ਸਟੇਟ ਜਰੂਰੀ ਹੈ। ਇਸ ਲਈ ਇਹ ਅਜਲਾਸ ਸਿੱਖ ਸੰਗਤ ਨੂੰ ਅਪੀਲ ਕਰਦਾ ਹੈ ਕਿ ਇਸਦੀ ਪ੍ਰਾਪਤੀ ਲਈ ਵੱਧ ਤੋਂ ਵੱਧ ਉਪਰਾਲਾ ਕਰਨ।
• ਇਹ ਸਤਰਾਂ ਹਨ ਸੰਨ 1946 ਦੇ ਸ੍ਰੋ਼ਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਇਜਲਾਸ ਵਿੱਚ ਪਾਸ ਕੀਤੇ ਗਏ ਮਤਾ ਨੰਬਰ 18 ਚੋ ਹਨਂ। ਉਪਰਤੋਕ ਇਤਹਾਸਕ ਫੈਸਲਿਆਂ, ਐਲਾਨਾਮਿਆਂ ਜਾਂ ਪੰਥਕ ਫੈਸਲਿਆਂ ਵਿੱਚ ਇੱਕ ਗੱਲ ਬੜੀ ਕਾਮਨ ਹੈ ਕਿ ਸਿੱਖ ਆਪਣੇ ਦੇਸ਼ਕਾਲ ਦੀ ਲੋੜ ਨੂੰ ਸੰਨ 1946 ਵਿੱਚ ਭਾਰਤ ਦੀ ਅਜ਼ਾਦੀ ਤੋਂ ਪਹਿਲਾਂ ਵੀ ਮਹਿਸੂਸ ਕਰਦੇ ਸਨ, ਉਸਤੋਂ ਬਾਅਦ ਵੀ ਸਿੱਖਾਂ ਨੇ ਅਜਿਹਾ ਹੀ ਮਹਿਸੂਸ ਕੀਤਾ ਅਤੇ ਛੇਵੇਂ ਪਾਤਸ਼ਾਹ ਗੁਰੂ ਹਰਿ ਗੋਬਿੰਦ ਸਾਹਿਬ ਵਲੋਂ ਸਥਾਪਤ ਕੀਤੇ ਗਏ ਸਰਵਉੱਚ ਤਖਤ ਸ੍ਰੀ ਅਕਾਲ ਤਖਤ ਸਾਹਿਬ ਤੋਂ ਹਰ ਐਲਾਨਨਾਮਾ ਕਰਕੇ ਇਸਦੀ ਅਹਿਮੀਅਤ ਨੂੰ ਵਜ਼ਨ ਦੇਣ ਦੀ ਕੋਸਿ਼ਸ਼ ਕੀਤੀ।
ਪਰ ਇਤਹਾਸ ਜਰੂਰ ਗੱਲ ਕਰੇਗਾ ਕਿ 27 ਅਕਤੂਬਰ 1969 ਨੂੰ ਸਿਰਦਾਰ ਕਪੂਰ ਸਿੰਘ ਨੇ ਪੰਜਾਬ ਵਿਧਾਨ ਸਭਾ ਵਿੱਚ ਸ਼ਹੀਦ ਦਰਸ਼ਨ ਸਿੰਘ ਫੇਰੂਮਾਨ ਦੀ ਸ਼ਹਾਦਤ ਬਾਰੇ ਬੋਲਿਦਆਂ ਕਿਹਾ ਸੀ “ਹੁਣ ਇਹ ਜਰੂਰੀ ਹੋ ਗਿਆ ਹੈ ਕਿ ਕੋਈ ਗੁਰੂ ਕਾ ਸਿੰਘ ਆਪਣਾ ਸੀਸ ਦੇ ਕੇ , ਪੰਥ ਦੇ ਅਖੌਤੀ ਲੀਡਰਾਂ ਅਤੇ ਸਿੱਖੀ ਦੇ ਗਦਾਰਾਂ ਦੇ ਕੀਤੇ ਹੋਏ ਪਾਪਾਂ ਦਾ ਪਰਾਇਸ਼ਚਿਤ ਕਰੇ, ਤਾਂ ਜੋ ਪੰਥ ਆਜ਼ਾਦ ਹਿੰਦੋਸਤਾਨ ਵਿੱਚ ਆਜ਼ਾਦ ਪੰਥ ਅਥਵਾ ਸਿੱਖ ਹੋਮਲੈਂਡ ਦੀ ਸਥਾਪਤੀ ਵੱਲ ਅਗਲਾ ਕਦਮ ਚੁੱਕ ਸਕੇ।”
ਇਸੇ ਵਿਧਾਨ ਸਭਾ ਵਿੱਚ ਸਿਰਦਾਰ ਕਪੂਰ ਸਿੰਘ ਨੇ ਸਿੱਖ ਹੋਮਲੈਂਡ ਅਮਰ ਰਹੇ ਦਾ ਨਾਹਰਾ ਗਜਾ ਕੇ ਇਸ ਸਥਾਪਤ ਕਰ ਦਿੱਤਾ ਸੀ ਕਿ ਜ਼ਮੀਰ ਅਜੇ ਮਰੀ ਨਹੀਂ।
ਕੌਮਾਂ ਦੇ ਨਿਸ਼ਾਨੇ, “ਐਲਾਨਨਾਮੇ” ਜਾਂ “ਨਾਹਰਿਆਂ” ਵਿੱਚ ਹੀ ਸਮੋਏ ਹੁੰਦੇ ਹਨ। ਜਿਊਜ਼ ਕੌਮ ਨੇ 100 ਵਰ੍ਹਾ ਇੱਕੋ ਨਾਹਰਾ ਲਾਇਆ ਕਿ “ਨਿਕਸ ਯੀਅਰ ਇਨ ਯੈਰੋਸਲਾਮ” ਭਾਵ ਕਿ ਅਗਲੇ ਸਾਲ ਯੈਰੋਸਲਾਮ ਵਿੱਚ ਮਿਲਾਂਗੇ। ਇਹ ਵਿਦੇਸ਼ੀ ਵੱਸਦੇ ਜਿਊਜ਼ ਲੋਕਾਂ ਦਾ ਨਿਸ਼ਾਨਾ ਸੀ, ਜੋ 100 ਸਾਲ ਤੋਂ ਉਪਰ ਦੇ ਸੰਘਰਸ਼ ਤੋਂ ਬਾਅਦ ਸੰਨ 1948 ਵਿੱਚ ਸਾਕਾਰ ਹੋਇਆ ਅਤੇ ਜਿਊਜ਼ ਆਪਣੇ ਹੋਮਲੈਂਡ ਇਜ਼ਰਾਈਲ ਵਿੱਚ ਜਾ ਕੇ ਵਸਣ ਜੋਕਰੇ ਹੋਏ। ਕੈਨੇਡਾ ਦਾ ਇਤਹਾਸ ਵੀ ਕੁੱਝ ਅਜਿਹਾ ਹੀ ਹੈ। ਕੈਨੇਡਾ ਨੂੰ ਫਰਿੰਚਾਂ ਨੇ ਪਹਿਲਾਂ ਲੱਭਿਆ ਸੀ ਬਾਅਦ ਵਿੱਚ ਅੰਗਰੇਜ਼ਾਂ ਨੇ ਆ ਕੇ ਜੰਗ ਕੀਤੀ ਅਤੇ ਕੈਨੇਡਾ ਉਪਰ ਕਬਜ਼ਾ ਜਮਾ ਲਿਆ। ਕਿਊਬਿਕ ਵਿੱਚ ਫਰਿੰਚਾਂ ਨੂੰ ਵੱਧ ਅਧਿਕਾਰ ਦੇ ਕੇ ਰਾਜ਼ੀ ਕਰ ਲਿਆ ਗਿਆ। ਕਿਊਬਿਕ ਦੀ ਸਰਕਾਰ ਦੇ ਫਰਿੰਚ ਆਗੂ ਹਰ ਮੌਕੇ ਆਪਣੀ ਖੁੱਸੀ ਆਜ਼ਾਦੀ ਦੀ ਗੱਲ ਦੁਹਰਾਉਂਦੇ ਹਨ ਅਤੇ ਬੜੇ ਜਾਬਤੇ ਵਿੱਚ ਰਹਿ ਕੇ ਆਪਣੇ ਸੰਘਰਸ਼ ਨੂੰ ਚਲਾ ਰਹੇ ਹਨ। ਫਰਿੰਚ ਕਿਊਬਿਕ ਦਾ ਨਾਹਰਾ ਬੜਾ ਵਿਲੱਖਣ ਅਤੇ ਨਿਵੇਕਲਾ ਹੈ। ਕਿਊਬਿਕ ਦੇ ਹਰ ਵਸਨੀਕ ਨੂੰ ਹੋਰ ਰੋਜ਼ ਉਸ ਨਾਹਰੇ ਦੀ ਯਾਦ ਆਉਂਦੀ ਹੈ। ਦੂਰਅੰਦੇਸ਼ੀ ਤੋਂ ਕੰਮ ਲੈਂਦਿਆਂ ਕਿਊਬਿੱਕ ਦੇ ਆਗੂਆਂ ਨੇ ਹਰ ਕਾਰ ਦੀ ਲਾਈਸੈਂਸ ਪਲੇਟ ਉਪਰ ਲਿਖ ਦਿੱਤਾ ਹੈ “ਝੲ ਮੲ ਸੋੁਵਇਨਸ” ਭਾਵ “ਮੈਨੂੰ ਯਾਦ ਹੈ”। ਫਰਿੰਚ ਲੋਕ ਹਰ ਰੋਜ਼ ਯਾਦ ਕਰਦੇ ਹਨ ਕਿ ਉਨ੍ਹਾਂ ਦਾ ਰਾਜ ਖੁੱਸਿਆ ਹੋਇਆ ਹੈ ਅਤੇ ਇੱਕ ਦਿਨ ਉਨ੍ਹਾਂ ਨੇ ਇਹ ਪ੍ਰਾਪਤ ਕਰਕੇ ਰਹਿਣਾ ਹੈ। ਬਲਾਕ ਕਿਊਬਿੱਕਾ ਦਾ ਕੋਈ ਵੀ ਲੀਡਰ ਬਣੇ, ਉਸਨੂੰ ਅਧਿ-ਆਦੇਸ਼ ਦਿੱਤਾ ਜਾਂਦਾ ਹੈ ਕਿ ਉਸਨੇ ਹਰ ਵਾਹ ਲਾ ਕੇ ਇੰਗਲਿਸ਼ ਕੈਨੇਡਾ ਨਾਲੋਂ ਵੱਖ ਹੋ ਕੇ ਫਰਿੰਚ ਕੈਨੇਡਾ ਦੀ ਸਥਾਪਨਾ ਕਰਨੀ ਹੈ। ਕਿਉਂਕਿ ਇਹ ਉਨ੍ਹਾਂ ਦਾ ਰਾਜ ਅਸਲ ਵਿੱਚ ਖੁੱਸਿਆ ਹੋਇਆ ਰਾਜ ਹੈ ਜਿਸਦਾ ਇਤਿਹਾਸ ਤੁਸੀਂ ਕਿਊਬਕਿ ਸਿਟੀ ਵਿੱਚ ਜਾ ਕੇ ਵੇਖ ਸਕਦੇ ਹੋ।
ਬਿਲਕੁਲ ਇਸੇ ਤਰਾਂ ਸਿੱਖ ਕੌਮ ਦਾ 1849 ਵਿੱਚ ਸਿੱਖ-ਐਂਗਲੋ ਜੰਗ ਤੋਂ ਬਾਅਦ ਸਿੱਖ ਰਾਜ ਖੁੱਸ ਗਿਆ ਸੀ ਜਿਸ ਨੂੰ ਵਾਪਿਸ ਹਾਸਿਲ ਕਰਨ ਲਈ ਸਾਨੂੰ ਸ੍ਰੀ ਅਕਾਲ ਤਖਤ ਸਾਹਿਬ ਤੋਂ ਐਲਾਨਨਾਮਾ ਜਾਰੀ ਹੋ ਚੁੱਕਾ ਹੈ। ਇਸ ਐਲਾਨਨਾਮੇ ਪ੍ਰਤੀ ਖੇਸਲ਼੍ਹ ਵੱਟਣੀ ਸਿੱਖ ਕੌਮ ਦੇ ਕੌਮੀ ਮੁੱਦੇ ਵੱਲ ਪਿੱਠ ਘੁਮਾਉਣ ਬਰਾਬਰ ਹੈ।
ਕਾਕਾ ਜਰਨੈਲ ਸਿੰਘ ਨੇ ਸਟੇਜ ਤੋਂ ਖਾਲਿਸਤਾਨ ਜਿ਼ੰਦਾਬਾਦ ਦੇ ਪੰਜ ਨਾਹਰੇ ਲਾ ਕੇ ਨਿਹਾਲ ਕੀਤਾ।
ਇਸ ਮੌਕੇ ਡਾ. ਅਮਰਜੀਤ ਸਿੰਘ ਜੀ ਦੇ ਵਿਚਾਰਾਂ ਨੂੰ ਟੈਲੀਫਨ ਰਾਹੀਂ ਸੰਗਤ ਦੇ ਸਨਮੁੱਖ ਕੀਤਾ ਗਿਆ।
ਅਖੀਰ ਵਿੱਚ ਯੂਨਾਈਟਡ ਫਰੰਟ ਆਫ ਸਿੱਖਸ ਦੇ ਆਗੂ ਬਲਕਾਰ ਸਿੰਘ ਨੇ ਆਈਆਂ ਸੰਗਤਾਂ ਦਾ ਧੰਨਵਾਦ ਕੀਤਾ। ਉਨ੍ਹਾਂ ਨੇ ਖਾਲਿਸਤਾਨ ਨਾਈਟ ਦੇ ਮਹੱਤਵ ਨੂੰ ਹੋਰ ਵਜ਼ਨ ਦਿੰਦਿਆਂ ਕਿਹਾ ਕਿ ਜਿਹੜੀਆਂ ਕੌਮਾਂ ਆਪਣੇ ਨਿਸ਼ਾਨਿਆਂ ਨੂੰ ਆਪਣੇ ਹਿਰਦਿਆਂ ਵਿੱਚ ਸਮੋਅ ਕੇ ਰੱਖਣ ਦੀਆਂ ਆਦੀ ਹੋ ਜਾਂਦੀਆਂ ਹਨ ਉਹ ਨਿਸ਼ਾਨੇ ਪ੍ਰਾਪਤ ਵੀ ਕਰ ਲੈਂਦੀਆਂ ਹਨ। ਉਨ੍ਹਾਂ ਫਿਰ ਤੋਂ ਇਹ ਦੁਹਰਾਇਆ ਅਗਰ ਤੁਹਾਨੂੰ ਇਹ ਨਹੀਂ ਪਤਾ ਕਿ ਤੁਸੀਂ ਕਿਧਰ ਨੂੰ ਜਾਣਾ ਹੈ ਤਾਂ ਹਰ ਸੜਕ ਹੀ ਤੁਹਾਨੂੰ ਤੁਹਾਡੀ ਮੰਜਿ਼ਲ ਤੇ ਪਹੁੰਚਾ ਸਕਦੀ ਹੈ, ਭਾਵ ਅੱਜ ਭਾਵੇਂ ਕਈ ਸਿੱਖਾਂ ਨੂੰ ਖਾਲਿਸਤਾਨ ਦੀ ਮੰਜਿ਼ਲ ਦੂਰ ਅਤੇ ਗੁਆਚੀ ਜਿਹੀ ਲੱਗ ਰਹੀ ਹੈ ਪਰ ਅਗਰ ਉਹ ਯੂਨਾਈਟਡ ਫਰੰਟ ਆਫ ਸਿੱਖਸ ਦੇ ਵਾਹਨ ਤੇ ਸਵਾਰ ਹੋ ਕੇ ਠਿੱਲ ਪੈਣਗੇ ਤਾਂ ਮੰਜਿ਼ਲ ਲੱਭ ਹੀ ਜਾਵੇਗੀ। ਬਲਕਾਰ ਸਿੰਘ ਨੇ ਇਸ ਸ਼ਾਮ ਨੂੰ ਖਾਲਿਸਤਾਨ ਦੇ ਸੰਘਰਸ਼ ਵਿੱਚ ਇੱਕ ਮੀਲ ਪੱਥਰ ਕਰਾਰ ਦਿੰਦਿਆਂ ਕਿਹਾ ਕਿ ਆਉਣ ਵਾਲੇ ਸਮ੍ਹੇਂ ਵਿੱਚ ਇਨ੍ਹਾਂ ਸਮਾਗਮਾਂ ਦੀ ਲੜੀ ਨੂੰ ਹੋਰ ਫਲ੍ਹ ਲੱਗੇਗਾ ਜਿਸ ਸਦਕਾ ਕੌਮ ਚ ਕੌਮੀਅਤ ਪ੍ਰਤੀ ਰੁਚੀ ਵਧੇਗੀ ਅਤੇ ਆਜ਼ਾਦੀ ਦੇ ਸੂਰਜ ਦੀਆਂ ਕਿਰਣਾਂ ਦੀ ਰੌਸ਼ਨੀ ਖਾਲਸੇ ਦੇ ਵਿਹੜੇ ਵਿੱਚ ਦਸਤਕ ਦੇਵੇਗੀ। ਖੁਸ਼ੀ ਖੁਸੀ ਅੱਜ ਦੇ ਸਮਾਗਮ ਦੀ ਸੰਪੂਰਨਤਾ ਤੇ ਸਭ ਨੇ ਵਿਦਾਇਗੀ ਲਈ ਅਤੇ ਗੁਰੂ ਦਾ ਧੰਨਵਾਦ ਕੀਤਾ। ਅਖੀਰ ਵਿੱਚ ਸਕੱਤਰ ਰਾਮਪਾਲ ਸਿੰਘ ਢਿਲੋਂ ਨੇ ਬੈਂਕੁਐਟ ਹਾਲ ਲਈ ਲਾਡੀ ਅਤੇ ਚੰਨੀ, ਸਾਊਂਡ ਸਿਸਟਮ ਲਈ ਬੌਬ ਦੁਸਾਂਝ ਅਤੇ ਖਾਲਿਸਤਾਨ ਨਾਈਟ ਦੇ ਸਮੂਹ ਸੇਵਾਦਾਰਾਂ ਦਾ ਗਹਿ ਗੱਡਵਾਂ ਧੰਨਵਾਦ ਕੀਤਾ ਗਿਆ।
ਇਸ ਮੌਕੇ ਭਾਰਤ ਸਰਕਾਰ ਦੀਆਂ ਕੁਟਲ ਨੀਤੀਆਂ ਦੀ ਨਿਖੇਧੀ ਕਰਦਿਆਂ ਪ੍ਰੋ. ਦਵਿੰਦਰ ਸਿੰਘ ਭੁੱਲਰ ਦੀ ਰਿਹਾਈ, ਭਾਈ ਦਲਜੀਤ ਸਿੰਘ ਬਿੱਟੂ ਅਤੇ ਉਨ੍ਹਾਂ ਦੇ ਸਾਥੀਆਂ ਦੀ ਰਿਹਾਈ ਦੀ ਪੁਰਜ਼ੋਰ ਸ਼ਬਦਾਂ ਵਿੱਚ ਮੰਗ ਕੀਤੀ ਗਈ।

“ਖਾਲਸਾ ਰਾਜ” ਦੀ ਸਥਾਪਤੀ ਦਿਹਾੜੇ ਉੱਤੇ ਪੰਜਾਬ ਅਤੇ ਸੈਟਰ ਹਕੂਮਤਾਂ ਫਾਂਸੀ ਦੀਆਂ ਸਜ਼ਾਵਾਂ ਰੱਦ ਕਰੇ ਤੇ ਬੰਦੀ ਸਿੱਖਾਂ ਦੀ ਰਿਹਾਈ ਦਾ ਐਲਾਨ ਕਰੇ:-ਮਾਨ

ਫਤਿਹਗੜ੍ਹ ਸਾਹਿਬ, 13 ਮਈ :- ਸ: ਸਿਮਰਨਜੀਤ ਸਿੰਘ ਮਾਨ ਪ੍ਰਧਾਨ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਨੇ ਆਪਣੇ ਦਸਤਖਤਾਂ ਹੇਠ ਜਾਰੀ ਕੀਤੇ ਗਏ ਇੱਕ ਬਿਆਨ ਵਿੱਚ ਕਿਹਾ ਹੈ ਕਿ “14 ਮਈ ਦਾ ਦਿਨ ਸਿੱਖ ਕੌਮ ਲਈ ਆਜ਼ਾਦੀ ਦੇ ਪ੍ਰਤੀਕ ਵਜੋਂ ਅਤਿ ਮਹੱਤਵਪੂਰਨ ਹੈ। ਇਸ ਦਿਨ ਪਹਿਲੇ ਖਾਲਸਾ ਰਾਜ ਦੀ 1710 ਈਸਵੀ ਵਿੱਚ ਸਥਾਪਨਾ ਹੋਈ ਸੀ। ਬਾਬਾ ਬੰਦਾ ਸਿੰਘ ਬਹਾਦਰ ਨੇ ਆਰਥਿਕ ਅਤੇ ਸਮਾਜਿਕ ਆਜ਼ਾਦੀ ਨੂੰ ਬਹਾਲ ਕਰਨ ਲਈ ਗੁਰੂ ਸਿਧਾਂਤਾ ਅਨੁਸਾਰ “ਗਰੀਬ ਦਾ ਮੂੰਹ ਗੁਰੂ ਦੀ ਗੋਲਕ” ਦੀ ਵੱਡਮੁੱਲੀ ਸੋਚ ਉਤੇ ਪਹਿਰਾ ਦਿੰਦੇ ਹੋਏ, ਵੱਡੇ ਵੱਡੇ ਜਿ਼ਮੀਦਾਰਾਂ, ਧਨਾਢਾਂ ਕੋਲੋ ਜ਼ਮੀਨਾਂ, ਜਾਇਦਾਦਾਂ ਲੈ ਕੇ ਮੁਜ਼ਾਹਿਰਿਆਂ ਨੂੰ ਇਹ ਜ਼ਮੀਨਾਂ, ਜਾਇਦਾਦਾਂ ਵੰਡ ਕੇ ਇਸ ਪਾੜੇ ਨੂੰ ਖਤਮ ਕਰਕੇ ਬਰਾਬਰਤਾ ਦੀ ਸੋਚ ਨੂੰ ਲਾਗੂ ਕੀਤਾ ਸੀ। ਜਦੋਂ ਕਿ ਪੰਜਾਬ ਸਰਕਾਰ ਅਤੇ ਐਸ ਜੀ ਪੀ ਸੀ ਦੇ ਅਮਲ, ਅਮੀਰੀ ਅਤੇ ਗਰੀਬੀ ਦੇ ਪਾੜੇ ਨੂੰ ਵਧਾਉਣ ਵਾਲੇ ਅਤੇ ਇੱਥੋ ਦੇ ਬਸਿੰਦਿਆਂ ਅਤੇ ਸਿੱਖ ਕੌਮ ਨਾਲ ਜਬਰ-ਜ਼ੁਲਮ ਅਤੇ ਬੇਇਨਸਾਫੀਆਂ ਕਰਨ ਵਾਲੇ ਹਨ। ਜਦੋਂ ਕਿ ਬਾਬਾ ਬੰਦਾ ਸਿੰਘ ਬਹਾਦਰ ਨੇ ਜ਼ਬਰ-ਜ਼ੁਲਮ ਅਤੇ ਨਾਬਰਾਬਰੀ ਨੂੰ ਖਤਮ ਕਰਨ ਲਈ ਅਮਲ ਕੀਤੇ। ਇਹ ਦਿਹਾੜਾ ਪੰਜਾਬ ਸਰਕਾਰ ਅਤੇ ਸ੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋ ਸਰਕਾਰੀ ਪੱਧਰ ਉੱਤੇ ਮਨਾਇਆ ਜਾ ਰਿਹਾ ਹੈ। ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਇਸ ਮਹਾਨ ਦਿਹਾੜੇ ਉੱਤੇ ਇਹ ਪੁਰਜ਼ੋਰ ਮੰਗ ਕਰਦਾ ਹੈ ਕਿ ਪੰਜਾਬ ਅਤੇ ਸੈਟਰ ਦੀਆਂ ਹਕੂਮਤਾਂ ਅੱਜ ਦੇ ਦਿਨ ਫਾਂਸੀ ਯਾਫਤਾ ਕੈਦੀਆਂ ਭਾਈ ਜਗਤਾਰ ਸਿੰਘ ਹਵਾਰਾ, ਭਾਈ ਦਵਿੰਦਰ ਸਿੰਘ ਭੁੱਲਰ, ਭਾਈ ਬਲਵੰਤ ਸਿੰਘ ਰਾਜੇਆਣਾ, ਸ਼੍ਰੀ ਅਫਜ਼ਲ ਗੁਰੂ ਆਦਿ ਜਿਨ੍ਹਾ ਨੂੰ ਹਿੰਦ ਹਕੂਮਤ ਨੇ ਫਾਂਸੀ ਦੇ ਹੁਕਮ ਦਿੱਤੇ ਹੋਏ ਹਨ, ਉਨ੍ਹਾ ਦੀਆਂ ਫਾਸੀਆਂ ਨੂੰ ਤੁਰੰਤ ਰੱਦ ਕਰੇ ਅਤੇ ਮੁਲਕ ਅਤੇ ਪੰਜਾਬ ਦੀਆਂ ਵੱਖ ਵੱਖ ਜ਼ੇਲ੍ਹਾ ਵਿੱਚ ਲੰਮੇ ਸਮੇਂ ਤੋਂ ਗੈਰ ਕਾਨੂੰਨੀ ਤਰੀਕੇ ਕੈਦੀ ਬਣਾਏ ਗਏ ਸਿੱਖਾਂ ਦੀ ਰਿਹਾਈ ਦਾ ਐਲਾਨ ਕਰੇ। ਜੇਕਰ ਉਪਰੋਕਤ ਦੋਵੇ ਸਰਕਾਰਾਂ ਅਜਿਹੇ ਅਮਲ ਕਰ ਸਕਣਗੀਆਂ, ਫਿਰ ਤਾਂ ਬਾਬਾ ਬੰਦਾ ਸਿੰਘ ਬਹਾਦਰ ਦੇ ਇਸ ਮਹਾਨ ਦਿਹਾੜੇ ਨੂੰ ਮਨਾਉਣ ਦੇ ਮਕਸਦ ਦੀ ਕੁਝ ਹੱਦ ਤੱਕ ਪ੍ਰਾਪਤੀ ਹੋ ਸਕਦੀ ਹੈ, ਵਰਨਾ ਅਜਿਹੇ ਦਿਹਾੜੇ ਮਨਾਉਣ ਦੇ ਮਨੋਰਥ ਅਸਫਲ ਹੋ ਕੇ ਰਹਿ ਜਾਣਗੇ।”
ਉਨ੍ਹਾ ਆਪਣੇ ਵਿਚਾਰਾਂ ਦੀ ਲੜੀ ਨੂੰ ਅੱਗੇ ਤੋਰਦੇ ਹੋਏ ਕਿਹਾ ਕਿ ਅਸੀਂ ਕੁਝ ਸਮਾਂ ਪਹਿਲੇ ਇਹ ਜ਼ੋਰਦਾਰ ਮੰਗ ਉਠਾਈ ਸੀ ਕਿ ਚੰਡੀਗੜ੍ਹ ਵਿਖੇ ਬਣਨ ਜਾ ਰਿਹਾ ਨਵੇ ਕੌਮਾਂਤਰੀ ਹਵਾਈ ਅੱਡੇ ਦਾ ਨਾਮ ਸਿੱਖ ਕੌਮ ਦੇ ਜਰਨੈਲ ਬਾਬਾ ਬੰਦਾ ਸਿੰਘ ਬਹਾਦਰ ਦੇ ਨਾਮ ਉੱਤੇ ਰੱਖਿਆ ਜਾਵੇ। ਉਸ ਸਮੇਂ ਬਾਦਲ ਹਕੂਮਤ ਅਤੇ ਐਸ ਜੀ ਪੀ ਸੀ ਉੱਤੇ ਬੈਠੇ ਅਧਿਕਾਰੀਆਂ ਨੇ ਸਾਡੀ ਇਸ ਰਾਏ ਨੂੰ ਕੋਈ ਵਜ਼ਨ ਨਹੀਂ ਸੀ ਦਿੱਤਾ, ਜੋ ਕਿ ਇਨ੍ਹਾ ਦੀ ਵੱਡੀ ਭੁੱਲ ਅਤੇ ਗੁਸਤਾਖੀ ਸੀ। ਲੇਕਿਨ ਅੱਜ ਅਸੀਂ ਫਿਰ ਬਾਬਾ ਜੀ ਦੀਆਂ ਕੌਮ ਲਈ ਕੀਤੀਆਂ ਗਈਆਂ ਮਹਾਨ ਸੇਵਾਵਾਂ ਨੂੰ ਯਾਦ ਅਤੇ ਸਤਿਕਾਰ ਕਰਦੇ ਹੋਏ ਇਸ ਮੰਗ ਨੂੰ ਫਿਰ ਦੁਹਰਾਉਂਦੇ ਹਾਂ ਕਿ ਸ: ਪ੍ਰਕਾਸ਼ ਸਿੰਘ ਬਾਦਲ ਮੁੱਖ ਮੰਤਰੀ ਪੰਜਾਬ 14 ਮਈ ਦੇ ਹੋਣ ਜਾ ਰਹੇ ਮੁੱਖ ਸਮਾਗਮ ਫਤਿਹਗੜ੍ਹ ਸਾਹਿਬ ਵਿਖੇ, ਚੰਡੀਗੜ੍ਹ ਹਵਾਈ ਅੱਡੇ ਦਾ ਨਾਮ ਸਾਡੇ ਮਹਾਨ ਜਰਨੈਲ ਬਾਬਾ ਬੰਦਾ ਸਿੰਘ ਬਹਾਦਰ ਦੇ ਨਾਮ ਉੱਤੇ ਰੱਖੇ ਜਾਣ ਦਾ ਐਲਾਨ ਕਰਨ। ਉਨ੍ਹਾ ਕਿਹਾ ਜੇਕਰ ਵਾਕਿਆ ਹੀ ਪੰਜਾਬ ਹਕੂਮਤ ਉੱਤੇ ਬੇਠੈ ਆਗੂਆਂ ਨੂੰ ਬਾਬਾ ਬੰਦਾ ਸਿੰਘ ਬਹਾਦਰ ਵੱਲੋ ਕੀਤੇ ਗਏ ਉੱਦਮਾਂ ਦੀ ਕਦਰ ਹੈ ਤਾਂ ਇਹ ਉਪਰੋਕਤ ਐਲਾਨ ਬਿਨਾ ਕਿਸੇ ਰੁਕਾਵਟ ਅਤੇ ਦੋਚਿੱਤੀ ਦੇ ਫਤਿਹਗੜ੍ਹ ਸਾਹਿਬ ਦੀ ਮਹਾਨ ਸ਼ਹੀਦੀ ਪਵਿੱਤਰ ਧਰਤੀ ਤੋਂ ਕਰਕੇ ਜਾਣ ਵਰਨਾ ਇਹ ਸਮਝਿਆ ਜਾਵੇਗਾ ਕਿ ਮੌਜੂਦਾ ਹੁਕਮਰਾਨ ਅਤੇ ਧਾਰਮਿਕ ਸੰਸਥਾ ਐਸ ਜੀ ਪੀ ਸੀ ਉੱਤੇ ਬੈਠੇ ਲੋਕ ਸਿੱਖ ਕੌਮ ਦੇ ਜਰਨੈਲਾਂ ਦੇ ਨਾਮਾਂ ਨੂੰ ਸਮੇਂ ਸਮੇਂ ਨਾਲ ਯਾਦ ਕਰਕੇ ਕੇਵਲ ਆਪਣੇ ਸਿਆਸੀ ਸਵਾਰਥਾਂ ਦੀ ਪੂਰਤੀ ਵਿੱਚ ਹੀ ਮਸ਼ਰੂਫ ਹਨ ਅਤੇ ਅਜਿਹੇ ਦਿਨਾਂ ਦੇ ਅਸਲ ਮਕਸਦ ਤੋਂ ਕੋਹਾਂ ਦੂਰ ਹਨ ਜੋ ਕਿ ਬਿਲਕੁਲ ਵੀ ਪ੍ਰਭਾਵ ਨਹੀਂ ਜਾਣਾ ਚਾਹੀਦਾ।

ਅਮਰਿੰਦਰ ਸਿੰਘ ਦਾ ਪਟਿਆਲਾ ਪੁੱਜਣ 'ਤੇ ਜ਼ੋਰ-ਸ਼ੋਰ ਨਾਲ ਸਵਾਗਤ

ਪਟਿਆਲਾ, 13 ਮਈ - ਕੈਪਟਨ ਅਮਰਿੰਦਰ ਸਿੰਘ ਨੂੰ ਸੁਪਰੀਮ ਕੋਰਟ ਵਲੋਂ ਵਿਧਾਨ ਸਭਾ ਦੀ ਮੈਂਬਰਸ਼ਿਪ ਦੀ ਬਹਾਲੀ ਲਈ ਦਿੱਤੀ ਗਈ ਰਾਹਤ ਤੋਂ ਬਾਅਦ ਅੱਜ ਉਨ੍ਹਾਂ ਦਾ ਏਅਰ ਪੋਰਟ 'ਤੇ ਕਾਂਗਰਸੀਆਂ ਵਲੋਂ ਸਵਾਗਤ ਕੀਤਾ ਗਿਆ। ਅੱਜ ਕੈਪਟਨ ਅਮਰਿੰਦਰ ਸਿੰਘ ਹਵਾਈ ਜਹਾਜ਼ ਰਾਹੀਂ ਏਅਰ ਪੋਰਟ 'ਤੇ ਪਹੁੰਚੇ। ਕੈਪਟਨ ਅਮਰਿੰਦਰ ਸਿੰਘ ਆਪਣੇ ਦੱਸੇ ਗਏ ਸਮੇਂ ਤੋਂ ਡੇਢ ਘੰਟਾ ਲੇਟ ਪਹੁੰਚੇ। ਉਨ੍ਹਾਂ ਦੇ ਨਾਲ ਉਨ੍ਹਾਂ ਦੀ ਧਰਮ ਪਤਨੀ ਮੈਂਬਰ ਪਾਰਲੀਮੈਂਟ ਤੇ ਕੇਂਦਰੀ ਵਿਦੇਸ਼ ਰਾਜ ਮੰਤਰੀ ਸ੍ਰੀਮਤੀ ਪ੍ਰਨੀਤ ਕੌਰ ਅਤੇ ਮੈਂਬਰ ਪਾਰਲੀਮੈਂਟ ਸੰਗਰੂਰ ਸ੍ਰੀ ਵਿਜੇਂਦਰ ਸਿੰਗਲਾ ਵੀ ਸਨ। ਕੈਪਟਨ ਅਮਰਿੰਦਰ ਸਿੰਘ ਦਾ ਏਅਰ ਪੋਰਟ 'ਤੇ ਪਹੁੰਚਣ 'ਤੇ ਬੈਂਡ ਵਾਜਿਆਂ ਨਾਲ ਸਵਾਗਤ ਕੀਤਾ ਗਿਆ, ਲੇਕਿਨ ਏਅਰ ਪੋਰਟ ਉਪਰ ਜਿੰਨਾ ਸਵਾਗਤ ਹੋਣਾ ਚਾਹੀਦਾ ਸੀ, ਉਨਾ ਸਵਾਗਤ ਨਹੀਂ ਹੋ ਸਕਿਆ, ਕਿਉਂਕਿ ਸਵਾਗਤ ਕਰਨ ਲਈ ਏਅਰ ਪੋਰਟ 'ਤੇ ਪਹੁੰਚੇ ਕਾਂਗਰਸੀਆਂ ਦੀ ਗਿਣਤੀ ਕਾਫੀ ਘੱਟ ਸੀ। ਕੈਪਟਨ ਅਮਰਿੰਦਰ ਸਿੰਘ ਦੇ ਜਹਾਜ਼ ਦੇ 11.34 ਮਿੰਟ 'ਤੇ ਏਅਰ ਪੋਰਟ 'ਤੇ ਉਤਰਨ ਸਮੇਂ ਹੀ ਕਾਂਗਰਸੀਆਂ ਵਲੋਂ ਜ਼ੋਰ-ਸ਼ੋਰ ਨਾਲ ਆਤਿਸ਼ਬਾਜ਼ੀ ਕੀਤੀ ਗਈ ਅਤੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੂੰ ਇੱਕ ਕਾਫਲੇ ਦੇ ਰੂਪ ਵਿੱਚ ਲਿਆਉਣ ਦੇ ਲਈ ਦੋ ਗੱਡੀਆਂ ਫੁੱਲਾਂ ਦੀਆਂ ਲੜੀਆਂ ਨਾਲ ਸਜਾਈਆਂ ਗਈਆਂ ਸਨ। ਗੱਡੀ ਵਿੱਚ ਕੈਪਟਨ ਅਮਰਿੰਦਰ ਸਿੰਘ, ਸ੍ਰੀਮਤੀ ਪ੍ਰਨੀਤ ਕੌਰ, ਵਿਜੇਂਦਰ ਸਿੰਗਲਾ, ਐਡਵੋਕੇਟ ਹਰਵਿੰਦਰ ਸ਼ੁਕਲਾ, ਮਦਨ ਲਾਲ ਜਲਾਲਪੁਰ ਵਿਧਾਇਕ ਖੜੇ ਹੋਏ ਸਨ ਅਤੇ ਆਪਣੇ ਚਾਹੁੰਣ ਵਾਲਿਆਂ ਦਾ ਅਭਿਨੰਦਨ ਕਬੂਲ ਰਹੇ ਸਨ। ਕੈਪਟਨ ਅਮਰਿੰਦਰ ਸਿੰਘ ਦੇ ਏਅਰ ਪੋਰਟ ਤੋਂ ਨਿਕਲਣ ਤੋਂ ਬਾਅਦ ਗੇਟ 'ਤੇ ਖੜੇ ਕਾਂਗਰਸੀ ਵਰਕਰਾਂ ਨੇ ਫੁੱਲਾਂ ਦੀ ਵਰਖਾ ਕੀਤੀ। ਉਨ੍ਹਾਂ ਦਾ ਸਵਾਗਤ ਯੁਵਰਾਜ ਰਣਦੀਪ ਸਿੰਘ, ਸ੍ਰੀ ਰਮੇਸ਼ ਸਿੰਗਲਾ, ਸਾਧੂ ਸਿੰਘ ਧਰਮਸੋਤ ਵਿਧਾਇਕ, ਮਦਨ ਲਾਲ ਜਲਾਲਪੁਰ ਵਿਧਾਇਕ, ਕਾਕਾ ਰਣਦੀਪ ਸਿੰਘ ਵਿਧਾਇਕ, ਭਰਤਇੰਦਰ ਸਿੰਘ ਚਹਿਲ ਸਾਬਕਾ ਮੀਡੀਆ ਸਲਾਹਕਾਰ, ਸੀਨੀਅਰ ਕਾਂਗਰਸੀ ਆਗੂ ਜਗਤਾਰ ਸਿੰਘ ਰਾਜਲਾ, ਸ੍ਰੀਮਤੀ ਗੁਰਮੇਜ ਕੌਰ ਲਾਖਾ ਪੰਜਾਬ ਪ੍ਰਧਾਨ ਐਸ.ਸੀ/ਬੀ.ਸੀ ਸੈਲ, ਅਮਰਜੀਤ ਕੌਰ ਭੱਠਲ ਸਾਬਕਾ ਜ਼ਿਲ੍ਹਾ ਪ੍ਰਧਾਨ ਮਹਿਲਾ ਕਾਂਗਰਸ, ਗੁਰਦਰਸ਼ਨ ਕੌਰ, ਗੁਰਸ਼ਰਨ ਕੌਰ ਰੰਧਾਵਾ ਸਾਬਕਾ ਚੇਅਰਪਰਸਨ ਜ਼ਿਲ੍ਹਾ ਪ੍ਰੀਸ਼ਦ, ਜਸਵਿੰਦਰ ਸਿੰਘ ਰੰਧਾਵਾ, ਵਿਕਾਸ ਸ਼ਰਮਾ, ਸਾਬਕਾ ਪ੍ਰਧਾਨ ਜ਼ਿਲ੍ਹਾ ਕਾਂਗਰਸ ਕਮੇਟੀ ਸ੍ਰੀ ਵੇਦ ਪ੍ਰਕਾਸ਼ ਗੁਪਤਾ, ਜਸਵੀਰਇੰਦਰ ਸਿੰਘ ਢੀਂਡਸਾ, ਕੇ. ਕੇ. ਸਹਿਗਲ, ਸ੍ਰੀ ਤਰਸੇਮ ਸਿੰਗਲਾ ਪ੍ਰਧਾਨ ਜ਼ਿਲ੍ਹਾ ਕਾਂਗਰਸ ਕਮੇਟੀ ਦਿਹਾਤੀ, ਸ੍ਰੀ ਹਰਦਿਆਲ ਕੰਬੋਜ, ਅਜੈ ਥਾਪਰ, ਅਨਿਲ ਮਹਿਤਾ ਸਾਬਕਾ ਮੈਂਬਰ ਐਸ. ਐਸ. ਬੋਰਡ, ਨਰਿੰਦਰ ਲਾਲੀ, ਸੱਚਦੇਵ ਗੌਤਮ, ਸੀਨੀਅਰ ਐਡਵੋਕੇਟ ਸ੍ਰੀ ਐਸ. ਸੀ ਵਸ਼ਿਸ਼ਟ ਅਤੇ ਐਡਵੋਕੇਟ ਵਰਿੰਦਰ ਦੀਵਾਨ ਨੇ ਫੁੱਲਾਂ ਦੇ ਹਾਰ ਪਾ ਕੇ ਕੀਤਾ ਅਤੇ ਨਾਲ ਹੀ ਸਾਬਕਾ ਮੁੱਖ ਮੰਤਰੀ ਨੂੰ ਫੁੱਲਾਂ ਦੇ ਗੁਲਦਸਤੇ ਤੇ ਬੁੱਕੇ ਵੀ ਭੇਂਟ ਕੀਤੇ। ਉਸ ਤੋਂ ਬਾਅਦ ਇੱਕ ਵੱਡੇ ਕਾਫਲੇ ਦੇ ਰੂਪ ਵਿੱਚ ਏਅਰ ਪੋਰਟ ਤੋਂ ਬਾਹਰ ਨਿਕਲੇ। ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦਾ ਪਟਿਆਲਾ ਪਹੁੰਚਣ 'ਤੇ ਰਾਜਿੰਦਰਾ ਹਸਪਤਾਲ ਕੋਲ ਤਿੰਨ ਥਾਵਾਂ 'ਤੇ, ਲੀਲਾ ਭਵਨ ਵਿਖੇ ਦੋ ਥਾਵਾਂ 'ਤੇ, ਰਜਬਾਹਾ ਰੋਡ 'ਤੇ ਦੋ ਥਾਵਾਂ 'ਤੇ ਮਾਲ ਰੋਡ ਉਪਰ ਦੋ ਥਾਵਾਂ 'ਤੇ ਭਰਵਾਂ ਸਵਾਗਤ ਕੀਤਾ ਗਿਆ। ਕੈਪਟਨ ਅਮਰਿੰਦਰ ਸਿੰਘ ਦਾ ਸਵਾਗਤ ਕਰਨ ਦੇ ਲਈ ਜ਼ਿਆਦਾਤਰ ਕਾਂਗਰਸੀ ਵਰਕਰ ਪਿੰਡਾਂ ਵਿਚੋਂ ਆਏ ਹੋਏ ਸਨ। ਜਦਕਿ ਸ਼ਹਿਰ ਅਤੇ ਇਸ ਤੋਂ ਬਾਹਲੀਆਂ ਕਲੋਨੀਆਂ 'ਚੋਂ ਆਏ ਕਾਂਗਰਸੀ ਵਰਕਰਾਂ ਦੀ ਗਿਣਤੀ ਕਾਫੀ ਘੱਟ ਦੇਖੀ ਗਈ। ਜ਼ਿਆਦਾਤਰ ਕੈਪਟਨ ਅਮਰਿੰਦਰ ਸਿੰਘ ਦਾ ਸਵਾਗਤ ਮਦਨ ਲਾਲ ਜਲਾਲਪੁਰ ਦੀ ਕੋਠੀ ਦੇ ਬਾਹਰ ਅਤੇ ਗਾਰਡਨ ਰਿਜ਼ੋਰਟ ਹੋਟਲ ਦੇ ਕੋਲ ਵਿਧਾਇਕ ਸਾਧੂ ਸਿੰਘ ਧਰਮਸੋਤ ਅਤੇ ਕਾਕਾ ਰਣਦੀਪ ਸਿੰਘ ਵੱਲੋਂ ਕੀਤਾ ਗਿਆ।

ਕੈਬਨਿਟ ਵਲੋਂ ਆਨੰਦ ਮੈਰਿਜ ਐਕਟ 'ਚ ਸੋਧ ਲਈ ਵਿਚਾਰ ਜਲਦ

ਚੰਡੀਗੜ੍ਹ, 13 ਮਈ - ਜੇਕਰ ਬੀਤੇ ਬੁੱਧਵਾਰ ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਇਕ ਵਫ਼ਦ ਨੂੰ ਕੇਂਦਰੀ ਕਾਨੂੰਨ ਮੰਤਰੀ ਐਮ ਵਿਰੱਪਾ ਮੋਇਲੀ ਵਲੋਂ ਦਿੱਤਾ ਭਰੋਸਾ ਕਿਸੇ ਹੱਦ ਤੱਕ ਸੱਚ ਹੈ ਤਾਂ ਸਿੱਖ ਮੈਰਿਜ ਐਕਟ ਦਾ ਖਰੜਾ ਕੇਂਦਰੀ ਕੈਬਨਿਟ ਦੇ ਵਿਚਾਰ ਅਧੀਨ ਹੋਣ ਵਿਚ ਦੇਰੀ ਨਹੀਂ। ਕੈਬਨਿਟ ਵਲੋਂ ਪ੍ਰਵਾਨਗੀ ਮਿਲਣ 'ਤੇ ਇਸ ਨੂੰ ਸੰਸਦ ਦੇ ਅਗਲੇ ਸੈਸ਼ਨ ਵਿਚ ਪੇਸ਼ ਕੀਤਾ ਜਾਵੇਗਾ। ਇਕ ਵਾਰੀ ਸਿੱਖ ਮੈਰਿਜ ਐਕਟ ਪਾਸ ਹੋਣ 'ਤੇ ਸਿੱਖ ਭਾਈਚਾਰੇ ਵਲੋਂ ਲੰਮੇਂ ਸਮੇਂ ਤੋਂ ਅੰਗਰੇਜ਼ਾਂ ਵਲੋਂ 1909 ਵਿਚ ਪਾਸ ਕੀਤੇ ਆਨੰਦ ਮੈਰਿਜ ਐਕਟ ਸੋਧ ਦੀ ਮੰਗ ਪੂਰੀ ਹੋ ਜਾਵੇਗੀ। ਇਸ ਐਕਟ ਦੇ ਤਹਿਤ ਸਿੱਖ ਰਹੁ ਰੀਤਾਂ ਅਨੁਸਾਰ ਕੀਤੇ ਜਾਂਦੇ ਵਿਆਹਾਂ ਦੀ ਰਜਿਸਟਰੇਸ਼ਨ ਦੀ ਵਿਸ਼ੇਸ਼ ਵਿਵਸਥਾ ਕੀਤੀ ਜਾਵੇਗੀ। ਹੈਰਾਨ ਕਰਨ ਵਾਲੀ ਗੱਲ ਹੈ ਕਿ ਪਾਕਿਸਤਾਨ ਨੇ ਦੋ ਕੁ ਸਾਲ ਪਹਿਲਾਂ ਭਾਰਤ ਤੋਂ ਅੱਗੇ ਲੰਘਦਿਆਂ ਸੋਧਿਆ ਹੋਇਆ ਆਨੰਦ ਮੈਰਿਜ ਐਕਟ ਪਾਸ ਕਰ ਦਿੱਤਾ ਸੀ। ਇਸ ਤੋਂ ਪਹਿਲਾਂ ਬੀਤੇ ਦਿਨੀਂ ਕੇਂਦਰੀ ਕਾਨੂੰਨ ਮੰਤਰੀ ਵੀਰੱਪਾ ਮੋਇਲੀ ਨੇ ਇਹ ਵੀ ਇਸ਼ਾਰਾ ਕੀਤਾ ਸੀ ਕਿ ਉਹ ਵਿਸ਼ੇਸ਼ ਮੈਰਿਜ ਐਕਟ ਵਿਚ ਸੋਧ ਬਾਰੇ ਵਿਚਾਰ ਕਰ ਰਹੇ ਹਨ, ਨਾ ਕਿ ਹਿੰਦੂ ਮੈਰਿਜ ਐਕਟ ਵਿਚ। ਸਿੱਖ ਧਾਰਮਿਕ ਰਵਾਇਤਾਂ ਅਨੁਸਾਰ ਸੰਪੰਨ ਵਿਆਹ ਜਾਂ ਤਾਂ ਹਿੰਦੂ ਮੈਰਿਜ ਐਕਟ ਜਾਂ ਵਿਸ਼ੇਸ਼ ਮੈਰਿਜ ਐਕਟ ਤਹਿਤ ਰਜਿਸਟਰਡ ਕੀਤੇ ਜਾਂਦੇ ਹਨ। ਹੁਣ ਜਦੋਂ ਵਿਸ਼ੇਸ਼ ਮੈਰਿਜ ਐਕਟ ਵਿਚ ਸੋਧ ਕੀਤੀ ਜਾ ਰਹੀ ਹੈ ਤਾਂ ਇਸਦੇ ਨਾਲ ਹੀ 1909 ਤੋਂ ਚਲੇ ਆ ਰਹੇ ਆਨੰਦ ਮੈਰਿਜ ਐਕਟ ਦੇ ਤਹਿਤ ਹੋਣ ਵਾਲੇ ਵਿਆਹਾਂ ਦੀ ਰਜਿਸਟਰੇਸ਼ਨ ਲਈ ਵਿਵਸਥਾ ਵਿਚ ਤਬਦੀਲੀ ਵੀ ਸੁਭਾਵਕ ਹੈ। ਮੋਇਲੀ ਨੇ ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਵਫ਼ਦ ਵੱਲੋਂ ਦਿੱਤੇ ਮਤੇ ਨੂੰ ਧਿਆਨ ਨਾਲ ਸੁਣਿਆ। ਇਸ ਵਫ਼ਦ ਵਿਚ ਕਮੇਟੀ ਦੇ ਪ੍ਰਧਾਨ ਪਰਮਜੀਤ ਸਿੰਘ ਸਰਨਾ, ਉਨ੍ਹਾਂ ਦੇ ਭਰਾ ਹਰਵਿੰਦਰ ਸਿੰਘ ਸਰਨਾ ਤੋਂ ਇਲਾਵਾ ਭਜਨ ਸਿੰਘ ਵਾਲੀਆ, ਕਰਤਾਰ ਸਿੰਘ ਕੋਚਰ, ਗੁਰਮੀਤ ਸਿੰਘ ਸ਼ੰਟੀ ਅਤੇ ਰਜਿੰਦਰ ਸਿੰਘ ਚੱਢਾ ਸ਼ਾਮਲ ਸਨ। ਕਾਨੂੰਨ ਮੰਤਰੀ ਨਾਲ ਇਹ ਵਿਚਾਰ ਕੀਤਾ ਗਿਆ ਕਿ ਸਿੱਖ ਰਵਾਇਤਾਂ ਅਨੁਸਾਰ ਕੀਤੇ ਜਾਂਦੇ ਆਨੰਦ ਕਾਰਜ ਨੂੰਵਿਸ਼ੇਸ਼ ਮਾਨਤਾ ਦਿੱਤੀ ਜਾਵੇ । ਮੋਇਲੀ ਨੇ ਕਿਹਾ ਕਿ ਕਾਨੂੰਨ ਮੰਤਰਾਲੇ ਨੇ ਲੰਮੇਂ ਸਮੇਂ ਤੋਂ ਉਠ ਰਹੀ ਇਸ ਮੰਗ ਨੂੰ ਵਿਚਾਰਿਆ ਹੈ ਅਤੇ ਇਸ ਨੂੰ ਕੈਬਨਿਟ ਦੀ ਪ੍ਰਵਾਨਗੀ ਲਈ ਇਸਦੀ ਸਿਫ਼ਾਰਸ਼ ਕੀਤੀ ਹੈ।